1 Pa ingo, Bɔkɔta ɔ sɔni bankinɛ *baeki baomu esambaele laaphee. Aatomi ba phee ba phee, batangole otamboka lande kila ɔsɛngɛ la kaama lalikuli elangi ndako nɛmɛlɛ nchwa. 2 Aasimeli: «Lilɛ lilende ike, kinaki bauki balende basali. Aliko la ingo, simela nyo ɔmɛlɛ ebeli atome bauki bankinɛ weebeli ende. 3 Nkaanɛ chwaka nyo! Eya nyo nte, mbokotoma nyo wɛɛnte bana baɛkɔkɔ batachu asamba nkɔi. 4 Kɔɛmbake nyo besanga aɔ mpata aɔ tomposo; la kɔɛbɛyake nyo bonto lalikuli e mboka.

5 «La kila lulu layala nyo ataingela, otamboka ɛbɛya nyo bako ŋaanɛ: Bii keyale o lulu lanyo! 6 Iya koyalake bonto o longo lulu atalange bii, bii enyo kekondoyala lande. Iya jɛ, engo bii enyo kekondo kuutolela nyo. 7 Yala nyo e longo lulu atale nyo la nywa lalikuli bɛkɔya nyo bako, aliko bokambi osanaka mbɔyama musaala bande. Kochwake nyo ole nyo ɔlɔnɛ lulu la lonkinɛ. 8 Iya wiiyake nyo ɔɔsɛngɛ bɔmɔɔ, la banto bakɔɛbɛyake nyo, lɛɛ nyo lalikuli bɛkɔya nyo bako. 9 Ikya nyo bakɔnu bayala ongo, simela nyo banto: ‹Ekeleka e Kanamombe* kembosukama kanyo›. 10 Kinaki wiingelake nyo ɔɔsɛngɛ lalikuli, iya banto phaakɔɛbisa nyo, pasa nyo, eta nyo o mboka yaɔ la nɔnda: 11 ‹Tombo ko kokolela nyo juutu ja bɔsɛngɛ banyo botokemeli weekolo beso. Kinaki koonga ŋaanɛ eya nyo nte ekeleka e Kanamombe* kembosukama kanyo›. 12 Sɔlɔ mbokosimela nyo nte, eleko luina la ntumbyama luiyaki, banto ba bɔsɛngɛ bakondoba tosoya mbeta tongo ta Sodomo.

13 «Ŋandi ele wɛɛ bɔsɛngɛ ba Kolasini! Ŋandi ele wɛɛ bɔsɛngɛ ba Betesaida! Aliko, iya bintɔmpɔ bikiisa lemi kanyo bitɔkɛɛma ɔɔsɛngɛ ba Tilo la Sidoni, banto ba bengo bɛsɛngɛ batondo yala anyɔi la ndɔta makunia la mbwikila betoko aliko baɛnya nte bambotulola belengo bɛɔ. 14 Koonga ŋango, luina la ntumbyama, banto ba Tilo la Sidona bakondo tumbyama inchɛ nkoleka nyo. 15 La wɛɛ bɔsɛngɛ ba Kapelenaumu, onde, akondo isakola nende e loola? Jɛ! Akondo kicheyama nende e liphuku».

16 Lonkinɛ Yesu aasimeli baeki bande nte: «Ɔnɛ akooka nyo, nte lemi komomboka ndako, kinaki ɔnɛ akila nkɔɛbɛya nyo, nte lemi kombokila ndako limbɛbɛya. La bonto lalikuli akila limbɛbɛya lemi, nte ongo antomi lemi kombokila ndako».

17 Pa, bango baeki baomu esambaele laaphe bautoli ba mboola la libɛla linɛnɛ, balɔndi: «Bɔkɔta, koonga basombo baiki bata tooke eleko eiki iso tata baite o lokombo labɛ». 18 Laango Yesu aasimeli: «Mbiki lataɛni bosombo ŋango baiki ndako atakitela wɛɛnte ibalibali mima e loola. 19 Oka nyo, mbɔkɔya nyo nkulu ya ndeka bosombo. Akondo yala nyo atanyɛkɛ ndwa la nkoto, la nkulu aliko la nkulu lalikuli ya ongo etamba, koo ekambwa lalikuli ɛɔsɔna nyo nko kɛɛ bobe. 20 Koonga ŋango, kuisɛkɛyake nyo, aliko la basombo batakooke nyo, ila, wiisɛkɛyɛ nyo, aliko nkombo yanyo imwandekama e loola».

21 Weengo eleko, Yesu aisɛkisa ike mbetela nkulu ya Lɔkɛngɛ Lɔɛlɔ, alɔndi: Mbo kosakoya wɛɛ phapha, Bɔkɔta a loola la wooni. Aliko wiisisha baso lokani la limanya besao bɛnɛ, ombwiisolela bana. Sɔlɔ, phapha, ŋango nde kolangi wɛɛ.

22 Pa, Yesu ɔlɔndi: «Isɛmi ɔmɔmpaa bikambwa lalikuli. Koo onto ambeya lemi bɔna ila isɛmi. La koo ɔnɛ aeya phapha ila lemi bɔna, la banto balanga lemi ba weeye».

23 O kantunda, Yesu laango achwe ele baeki bande alɔndi: «Alombele banɛ bamwɛna binɛ bimwɛna nyo! 24 Sɔlɔ, mbokosimela nyo nte:Baɛni la Bɛkɔta ike balangi mɛna binɛ bimwɛna nyo, kinaki koo mbo biɛna. Lonkinɛ balangi mboka binɛ bimbooka nyo kinaki koo mbo bioka».

25 Pa bingo, weekisi ɔmɔɔ aisalia aemali, aumboli Yesu o mbowaambela lilonga: «Weekisi, nke ŋaande nte m'mba luiko la tiiti»? 26 Yesu awuuchisa nte: «Koandekamaka ŋaande otema ba isalia*? La ookaka ŋaande ango asɔmaka wɛɛ»? 27 Ongo weekisi aisaliya auchisa nte: «Yala atalange Bɔkɔta Kanamombe abɛ, o lisolo jabɛ lalikuli, o onto baɛ lalikuli, o nkulu yabɛ lalikuli, la limanya jabɛ lalikuli. La, yala atalange a mamana labɛ wɛɛnte wiilangaka wɛɛmɛlɛ*». 28 E kantunda Yesu aosimeli: «Ombuucha bɔlɔti! Bingo nde biyala wɛɛ atakee, aliko obaa luiko».

29 Kinaki ongo weekisi a Isaliya* olangi mbwiɛnya njala boso sɔlɔ, aumboli Yesu:«La amamana lami ko nani»? 30 Yesu awuuchisa.

«Bonto ɔmɔɔ wiiki atakitela mima ɛ Yɛlusalɛma nchwa e Yeliko. Aiki ndako e mboka, okwɛɛ waakasa ba bakumoli. Bango baokumoli bikambwa bende la mboophoma, baochiki ombolala mɛ la mbwa».

31 Kopaseli Weeta atei ɔmɔɔ aetaki weengo mboka, awɛɛni, aeti boleka bonkinɛ, achwe lande. 32 Mulawi* ɔmɔɔ lande aiye ango. Awɛɛni ndako onngo onto, lande aeti boleka bonkinɛ, achwe lande.

33 «Pa kopaseli Musamaliya ɔmɔɔ aiki ɔlɔkɛndɔ. Aiye ndako ango aiki ongo onto, la ndako awɛɛni ongo onto, la awɛɛnɛli ŋandi».

34 Aosukameli, awiingi ingo mpota yande la mbowiila difai la bauta la mbwiilɛma. Awuulisa aliko la mpunda ende, la aɔtɔli e lulu laaŋɛni nte aiŋame*. 35 Lɔi ende, opasisha dinali iphee yaakuti, ɔɔyisa ongo ɔmɛlɛ lulu laaŋɛni, aosimeli: Inga ɔnɛ onto bɔlɔti, la ango autola lemi, bakuti bapasha wɛɛ ya liko lakondo kɔngɛla o mbutola.

36 Ango Yesu aumboli ongo weekisi a Isaliya* nte: «Asamba banɛ basato, nani ɔmwɛnamwa njala amamana la ɔnɛ akwɛɛ waakasa baakumoli»? 37 Ongo weekisi a Isalia* auchisa Yesu nte: «Ongo awɛɛnɛli ŋandi».

Yesu aosimeli nte: «Chwaka, labɛ oyale atakɛɛ ŋango».

38 Eleko Yesu la baeki bande baiki ɛ lɔkɛndɔ, baingeli wiisɛngɛ imɔɔ. Wiingo isɛngɛ kaiki la wainto ɔmɔɔ aelelami Malata, atɔli Yesu e lulu lande. 39 Ongo Malata aiki la waankunɛ ande aelelamaki Maliya. Ɔnɛ aiki atayale mpamba la bekolo be Yesu, ata oke beiki Yesu ataekya. 40 Kinaki, Malata ndako wiiki ataaŋanga la bikambwa ike. Laango achwɛli Yesu, aosimeli: «Bɔkɔta, wɛɛ phaeye nte waankunɛ ami omonchika lataaŋanga lɛɛmɛlɛ opholi, ingo phayakosimela ekambwa? Simela ndako, amamole».

41 Kinaki Bɔkɔta Yesu awuuchisa: «Malata, Malata! Wɛɛ omoaŋanga la mena la bikambwa ike. 42 Kinaki kolende la ekambwa ɛmɔɔ ɛnɛ ele la bekulukulu. Maliya ndako ɔmbɔ sɔna ekambwa ɛlɔti ndeka ele koo ɔnɛ onto aɔsɔna mbookumola».