1 Luina lɔmɔɔ Yesu aeleli bakɛndi bande joomu laaphee. Abaɔyisa nkulu ya mbikya bakɔnu la mbita basombo babe. 2 Aatomi bachu mbekya besao be ekeleka e Kanamombe* la mbikya bakɔnu. 3 Aasimeli nte: «Ɔlɔkɛndɔ lanyo Kɔɛmbake nyo ekambwa lalikuli: kɔɛmbake nyo bephapho aɔ lophata aɔ lilɛ aɔ besanga koonga lonkinɛ bisenda biphee. 4 Kila lulu lalikuli laingela nyo bakɔɛbɛya nyo, yala nyo ango nende ango apasa nyo woongo ɔsɛngɛ. 5 Iya banto bakilake nkɔɛbɛya nyo ɔɔsɛngɛ ɔmɔɔ, wiipasele nyo ango. Ango apasa nyo kokola nyo juutu ja bekolo benyo. Ingo yakondo ɛnya kaɔ nte bakee bobe*». 6 Bango bakɛndi*, baanjisa lɔkɛndɔ mbeta bɔsɛngɛ kaɔsɛngɛ bataekya Besako Bɛlɔti la mbikya bakonu.

7 Eleko, Bɔkɔta Elɔde awooni ba Galilaya aoki ndako besako be bikambwa lalikuli be kɛɛmi, aiki la ekalali o ŋango balɔndaki bako: «Yɔani ombo tondwa mima waabwe»! 8 Bankinɛ baiki batalɔndɛ nte olende wɛɛni Eliya kombopasela, la bankinɛ balɔndaki nte ɔmɔɔ a baɛni batango ombotondwa.

9 Kinaki, Elɔde ɔlɔndi: «Ɔnɛ Yɔani, mbɔ lemi kotenisa bɔtɛ bande. Anɛ nani ɔnɛ ataoke lemi besako bende»? Aliko la ingo Elɔde wiiki la mposa ɛmɛna Yesu.

10 Eleko eutoli bango baeki*, basimeli yesu besao lalikuli bekee bako. Pa Yesu aatɔli, bɔɔ la banto boleka ba bɔsɛngɛ ba Betesaida.

11 Kinaki banto baei echwe ndako, baolingiti. Yesu abaɛbisa aasimeli aliko la ekeleka e Kanamombe*, aekisa bango baiki la lokani la mbikyama.

12 Aiki kako likɔlɔ, bango bakɛndi* joomu laaphee baochweli, baosimeli: «Bɔkɔta anɛ tolende bɔɔ la banto. Wiingo simela banto bachu wɛɛsɛngɛ la tɔsɛngɛ ta sukɛlɛ, baibaele lilɛ la kaama ka ndala». 13 Kinaki Yesu aasimeli: «Nyo ɔya nyo bako lilɛ». La bako bawuuchisa: «Tapha la lilɛ ila too bitumbula bitano la nsee iphee. Andalange tochu mbwasombela banɛ banto lalikuli lilɛ»? 14 [Ango baiki ba mpame, ilango 5,000.]

Laango, Yesu asimeli baeki bande: «Simela nyo banto bayale o beloi beanto baomu atano atano». 15 Baeki bakee wɛɛnte ŋango Yesu aasimeli, baakichisa banto lalikuli. 16 Pa Yesu aɔsi bingo bitumbula bitano la ingo nsee iphee, aulisa baiso eliko, achweli bochwako, abikeloli aɔyisa baeki bande aliko baphakele banto. 17 Banto lalikuli bale nende o jiimbi. Baeki bakɔngi bingo bichikalaki, baojisa biphaka joomu la iphee.

18 Luina lɔmɔɔ Yesu aiki atalɔmbɛ ndako nɛmɛlɛ, la baeki* bande baiki sukɛlɛ la ndako. Laango, abaumboli: «Banto batalɔndɛ nte lemi nde nani»? 19 La bako bawuuchisa: «Bamɔɔ batalɔndɛ nte wɛɛ olende Yɔani oso mbatisa la bankinɛ olende Eliya, bankinɛ olende ɔmɔɔ a baɛni batango ɔnɛ ombotondwa». 20 Laango Yesu abaumboli: «Lanyo atalɔndɛ nyo nte lemi nde nani»? Pɛtɛlɛ auchisa: «Wɛɛ ko Kilisito Bɔna a Kanamombe*».

21 Ango Yesu asimeli baeki* bande bata simelake onto besako bɛnɛ. 22 Lonkinɛ aasimeli: kasana lemi Bɔna a Onto m'mbaa toakola ike la nkilama la bekongo la Bɛkɔta be baeta atei*, la Baekisi ba Isalia*. Lakondo njakema, kinaki luina la isato lakondo tondwa.

23 Pa aasimeli lalikuli nte: «Bonto lalikuli alangake njala weeki ami, asanjiya nkanya aliko la ndako nɛmɛlɛ, aɛmbɛ balemba bande kila luina, la aningite. 24 Aliko, bonto alangake nkakola luiko lande, akondo lolimeya. Kinaki, ongo alimeya luiko lande aliko lami, akondo ikakola. 25 Lonkinɛ kole la bekulukulu nke bonto mba besanga lalikuli e wooni, kinaki o mbwilimeya aɔ mbwi tumbya nɛmɛlɛ? 26 Iya bonto amɛnɛlake lemi nsɔni la mɛnɛla nsɔni besao bemi, la lemi Bɔna a Onto ŋango akɔ lakondo wɛɛnɛla bonto ɔnɛ nsɔni eleko eanda lemi asamba bokuchu bande la ba isɛndɛ la ba biphongo* bɛɛlɔ. 27 Mbokosimela nyo sɔlɔ: kolende la bankinɛ anɛ phaabu otamboka iya bataɛni ekeleka e Kanamombe».

28 O biina ɛnaanɛi pa Yesu nɔnda bengo besao, okemeli Pɛtɛlɛ la Yɔani la Yakɔbɔ auleli la bako ɛ bɔɔkɔ nɔmba Kanamombe*. 29 Wiiki atalɔmbɛ, iima ende etulwe, la esenda eandi ɛɛlɔ la mbɛla pɛɛ. 30,31 Weengo ekowa, kopaseli ba mpame ba phee baoli la bokuchu, Musa la Eliya. Bango ba mpame baiki bata ɔmbɔla la Yesu aliko la libwelo jande jaanda anɛ kasende engo Yɛlusalɛma.

32 Eleko engo, Pɛtɛlɛ la baina lande baiki bambo ɔsɔnama la ilɔ nende ango aemwe bako. Baɛni bokuchu ba Yesu, ba baɛni la bango baphee baiki bamoemala kaama kamɔɔ lande. 33 Laango banɛ ba mpame ba phee, baaŋani la Yesu, Pɛtɛlɛ asimeli Yesu: «Bɔkɔta, kolende bɔlɔti iso njala anɛ. Tophike balɔmbɛ basato: kɛmɔɔ kɛbɛ, kɛnkinɛ ke Musa la kɛnkinɛ ke Eliya». Kinaki Pɛtɛlɛ koombeya ɛnɛ ɛ lɔndaki ndako.

34 Eleko iiki Pɛtɛlɛ oloko atalɔndɛ, mala ɛmɔɔ loonge lokiteli la mbwaalipha. Bango baeki baɛni longo loonge lomboalipha baɛni wɔɔma ike. 35 Jooi ja okami mima otema ba longo loonge: «Ɔnɛ ko bɔna ami asɔni lemi, oka nyo ndako».

36 Pa lingo jooi mbokama, baeki* baɛni Yesu ombochikala nɛmɛlɛ opholi. Bakɔwi bii aliko la bingo bipaseli. La engo eleko, koo nsimela bonto lalikuli besao bɛɛni bako.

37 Loi ende Yesu la baeki* basato, bakiteli bɔɔkɔ. Boloi bɔnɛnɛ baanto basaŋani la ndako. 38 O bongo boloi, bonto ɔmɔɔ aokomi la joi linɛnɛ, la nɔnda: «Weekisi! Mbokoseya o nendele ɔnɛ bɔna ami ɔmɔɔ! 39 Basombo babe balende, bataokemela, kako nkango batawookomya, bataɔtɛkya la mbɔɔkwɛya biunkunya la mboopasha lɔfulɔ woonywa. Bango basombo babe phaosanjiya loango la mboo tumbya ike. 40 N'nɔmbi baeki baɛ baopasha bako, kinaki koo mbɔsɔna».

41 Laango Yesu alɔndi: «Nyo banto ba bɛnɛ biina apha nyo la lokani, lonkinɛ olende nyo babe ike. Njalaki lanyo la nkooka nyo nende luina nke»? Pa aosimeli ongo onto: «Ombela ongo bɔna abɛ anɛ».

42 Eleko iiki ongo bɔna atachu ele Yesu, kako nkango bango basombo babe baɔkwɛisa anyɔi la mbɔɔsɔkya. Kinaki, Yesu aphangweli ongo bosombo bobe la ndako aopasi aiki. Yesu auchisa ongo bɔna la mbɔwɔya isɛnde. 43 Banto lalikuli ba sebalali ike ɔ mɛna nkulu nɛnɛ ya Kanamombe*.

Eleko bango banto lalikuli baiki baloko batasebalala aliko la bikambwa lalikuli biiki Yesu atakee, asimeli baeki bande nte: 44 «Oka nyo bɔlɔti besao bɛnɛ betaone lemi nkosimela nyo: Lemi Bɔna a Onto lakondophakema waakasa baanto». 45 Kinaki, bengo besao beasimelaki Yesu bako koo mbeya maana ba lingo jooi. Iiki itaisama kaɔ nte bataeyake. La bako ba lawi mbowuumbola maana ba bongo bosao.

46 Baeki* ba Yesu baiki bataamoyana asamba bako aliko la mbeya nani ole waiyolo asamba bako. 47 Yesu wiiki pa mbeya limanya jaɔ. Aliko la ingo ɔɔsi bɔna a likɛnda la mbookicha sukɛlɛ lande. 48 Aasimeli nte: «Bonto lalikuli aɛbɛya bɔna ampɔu o lokombo lami, nte lemi komboɛbɛya ndako; la bonto lalikuli ambɛbɛya lemi, ko ongo antomi komboɛbɛya ndako. Aliko, ɔnɛ ole mpɔu asamba nyo, ndako kole waiyolo».

49 Laango weeki Yɔani alɔndi nte: «Bɔkɔta, tɔmwɛna bonto ɔmɔɔ atapasha basombo babe o lokombo labɛ. Laiso tooni mboosimba, aliko ndako apha ɔmɔɔ aso». 50 Kinaki Yesu aosimeli: «Koosimbake nyo, aliko ongo ole apha etamba eso olende boleka baso».

51 Eleko e Yesu nsakolama e loola eiye, ndako kapasisha yuungu ya nchwa ɛ Yɛlusalɛma. 52 Laango otomi banto baotangolele. Bango banto bachwe baingeli ɔɔsɛngɛ bɔmɔɔ ba Samaliya, aliko ba ɔɔlɔngɔsɔlɛlɛ kaama. 53 Kinaki baso ɔsɛngɛ koo nanga mbo wɛɛbɛya, aliko wiiki ɛlɔkɛndɔ lanchwa ɛ Yɛlusalɛma. 54 Laango, baeki* bande, Yakɔbɔ la Yɔani aɛni bako bingo balɔndi: «Bɔkɔta, alanga tɔlɔmbɛ iya mima e loola yaa sile». 55 Kinaki Yesu *aatulweli la mbwaphangwela. 56 Ba pasi, bachwe bɔsɛngɛ bɔnkinɛ.

57 Aiki Yesu la baeki bande e mboka, bonto ɔmɔɔ aosimeli nte: «Lakondo yala latakolingita kaama lalikuli e chwa wɛɛ». 58 Yesu aosimeli: «Bɔkɛngɛ oyalaka la Bokolo la mpulu bayalaka la bilumba. Kinaki lemi Bɔna a Onto phalayalaka la kaama ka ndala».

59 Yesu asimeli bonto onkinɛ ŋaanɛ: «Oningite». Kinaki ongo onto alɔndi: «Bɔkɔta, ompaa obi luusa nchu nkunja isɛmi».

60 Yesu awuuchisa: «Sanjiya babwe bakunja babwe baɔ, kinaki wɛɛ chwaka loko ekya banto besao be ekeleka e Kanamombe*».

61 La onto onkinɛ asimeli Yesu: «Bɔkɔta lakondoyala latakolingita, kinaki, ompaa obi luusa langochwa ndaka bolunga bami». 62 Yesu aosimeli: «Bonto lalikuli akemela liyɛmbɛ aliko la mona, kinaki iya alendake ɔkɔngɔ, phasane mbekya besako beekeleka e Kanamombe*».