1 Lonkinɛ Yesu abaokeli baeki* bande bɔnɛ bomanu aliko abaɛnya nte kasana njala batalɔmbɛ Kanamombe kapha la mena. 2 Ango, alɔndi nte: «Ɔɔsɛngɛ ɔmɔɔ kaiki la waamoli ɔmɔɔ. Ɔnɛ waamoli ataika atakucha Kanamombe. Lonkinɛ aiki ataelolelela kila onto. 3 Woongo ɔsɛngɛ, kaiki lonkinɛ bobwele ɔmɔɔ. Ɔnɛ obwele aiki atachwela ongo waamoli kila wiina, la mboosimela nte: ‹Omamolele bɔlɔti bosao bami, bɔnɛ boyalaka lemi la bitamba bemi›.

4 «Kinaki, biina ike bieti la ongo waamoli koo nanga mbowaamolela. E kantunda, wiilɔndɛli nte: ‹Sɔlɔ lemi phalakucha Kanamombe la phalalawaka onto lalikuli. 5 Kinaki mɛna ŋango bomo maŋangya ɔnɛ bobwele, lakondo waamolela besao bende bɔlɔti. Aliko iya phankɛɛ ŋango, akando memeya limaŋangya too›».

6 Aliko laingo, Bɔkɔta ɔlɔndi nte: «Oka nyo bɔlɔti ŋango ɔmbɔlɔnda ongo waamoli bobe. 7 Onde, Kanamombe landako phabaamolelaki bɔlɔti bango basɔni ndako, la bango bawookomelaka bocho la yaani? Onde, akondo lembela mbobaamola? 8 Mbokosimela nyo nte, akondo baamolelaka loango. Kinaki, eleko lemi Bɔna a Onto mbutolaki, lakondo tana banto ba lokani e wooni»?

9 Laango Yesu aoki bomanu waango baikanyisaki njala baso sɔlɔ otamboka ba Kanamombe la njala bataelolela bankinɛ. Ango Yesu abaokeli bongo bomanu: 10 «Luina lɔmɔɔ banto baphee bachwe e lulu la Kanamombe nɔmba Kanamombe. Ɔmɔɔ aiki Mufalisayɔ*, la onkinɛ aiki bongɛjisi a kɔdi. 11 Ongo Mufalisayɔ* aemali, la nɔmba Kanamombe o lisolo jande nte: ‹Haa Kanamombe ami, mbokosakoya, aliko lemi phalayalaka wɛɛnte banto bankinɛ. Bako bayalaka nde baiyi lonkinɛ balimbi, lonkinɛ baso loseka. Lonkinɛ mbokosakoya aliko lemi lapha wɛɛnte ɔnɛ bongɛjisi a kɔdi. 12 Mala iphee ɔmpɔsɔ, nkɛɛka malɔmbi ba nkila ndɛ. Lonkinɛ mpashaka mpato ya bikambwa lalikuli bi baaka lemi›.

13 «Kinaki bongɛjisi a kɔdi ndako aemali bɔɔ, koo mbɔsɔna nende nsakola baiso bande e loola. Kinaki, wiiki too ataphome bakasa e ntolo ende la nkangi, ɔ nɔmba ŋandi nte: ‹Haa Kanamombe ami, ɔmɛnɛlɛ ŋandi lemi boso njambi›»!

14 Ango Yesu ɔlɔndi nte: «Mbokosimela nyo nte, ɔnɛ bongɛjisi a kɔdi autoli e lulu la Kanamombe ɔmbɔwɛɛna njala boso sɔlɔ otamboka lande. Kinaki, ongo Mufalisayo* ndako jɛ. Aliko kila ongo oiyuuleyaka akondo kicheyamaka. Kinaki ongo wiikicheyaka ndako, akondo uleyamaka».

15 Luina lɔmɔɔ banto bawɛɛlisa Yesu Bana baakɛnda nte abaapheya bakasa. Kinaki Baeki bande aɛni bako bingo, baphangweli bango banto. 16 Kinaki Yesu abaɔyisa luusa ba weela bango bana. Asimeli lonkinɛ bango baeki* bande nte: «Sanjiya nyo bana baande ele lemi! Koakengake nyo, aliko ekeleka e Kanamombe* kelende ele bango bale wɛɛnte bako. 17 Mbokosimela nyo nte kila bonto lalikuli ole phaɛbɛisa ekeleka e Kanamombe wɛɛnte bɔna, phataingela koonga inchɛ weengo ekeleka*». Yesu ombochweela bochwako bana baakɛnda

18 Waiyolo ɔmɔɔ a Bayuda, aumboli Yesu nte: «Weekisi bɔlɔti, nkɛɛ ŋaande nte m'mbaa luiko la tiiti»? 19 Ango Yesu awuuchisa nte: «Aliko laanke omombelela wɛɛ bɔlɔti? Koo onto ole bɔlɔti ila Kanamombe nɛmɛlɛ! 20 Mbɔ weeyaka bolengo bɔlɔndaka isaliya ya Kanamombe nte: ‹Ko kɛɛkɛ loseka, koyalake atajake, koyalake ataiye, koyalake atasuudiya belimbo. Lonkinɛ yalaka atakucha isɛɛ la nyɛŋɛɛ*›». 21 Ongo onto aosimeli Yesu nte: «Ingo Isaliya* lalikuli landaikɛɛka mima oomponjo bami».

22 Yesu aoki bingo, aosimeli nte: «Oloko atapheke ekambwa ɛmɔɔ ɛnkɛɛ: Sombya bikambwa bɛɛ lalikuli bile wɛɛ la beko, la falanga lalikuli ya ba wɛɛ wiingo bikambwa phakela biola. Ɔkɛɛkɛ ŋango labɛ akondo yala la bokombe e loola. Pa aka la oningite».

23 Kinaki, ongo onto aoki ndako ŋango, aoki nkangi ike, aliko wiiki boso nombo ike.

24 Yesu aɛni nte ɔnɛ bonto ombooka nkangi ike, alɔndi nte: «Sɔlɔ kolende nkulu ike ele baso nombo mingela weekeleka e Kanamombe*! 25 Kolende kɔɔlu ike o Ngamiya mbeta e mpuku ɛ nsingɛ, kuliko boso nombo mingela weekeleka e Kanamombe*».

26 Bango banto baoki ŋango, baumboli nte: «Iya ŋango, nani lonkinɛ, akakolamaka»? 27 Yesu aasimeli nte: «Ingo ile phayasane waanto, yasana ele Kanamombe».

28 Ango Pɛtɛlɛ aosimeli Yesu nte: «Lenda! Iso tombochika bikambwa lalikuli biiki biso la beko la tombo kolingita»!

29 Yesu aasimeli nte: «Sɔlɔ mbokosimela nyo, bonto lalikuli achika lulu lande aɔ waajande aɔ aotwa lande aɔ baoti bande aɔ bana bande aliko la ekeleka e kanamombe*, 30 akondo ba binkinɛ ike eleko eyala ndako oloko e wooni. La eleko yaanda akondoba luiko la tiiti».

31 Pa Yesu aɔsi lonkinɛ bakɛndi* bande joomu la baphee, aasimeli nte: «Oka nyo! Iso nkoanɛ tomboulela ɛ Yɛlusalɛma la engo ka kokyama lalikuli eandekami la baɛni* aliko lami Bɔna a Onto. 32 Aliko lemi lakondo phakema waakasa ba bale bapha Bayuda. Bako bakondo mbɔla, la lintola, la linchweela lɔsɔi, 33 bakondo mphoma bephapho, pa bakondo njaka. La biina isato pa lakondo tondwa».

34 Kinaki bakɛndi* koo mbeya maana ba bengo bosao. Aliko biiki bitaisama kaɔ. La koo mbeya aliko laanke Yesu wiiki atalɔndɛ.

35 Eleko Yesu asukameli bɔsɛngɛ ba Yeliko, atani bontongo ɔmɔɔ aiki atayale mpamba la mboka la nɔmba nɔmba. 36 Ongo bontongo aoki ndako boloi baanto bataete aumboli nte: «Kole nke»? 37 Banto bawuuchisa nte: «Yesu a Nasaleti ndako kataete». 38 La aoki ndako bingo, aokomi la nɔnda nte: «Yesu, Bɔna a Daudi, ɔmɛnɛlɛ ŋandi». 39 Bango banto baiki otamboka la Yesu baophangweli la baosimeli akɔwɛ. Kinaki ndako aphaphi mbokoma nte: «Bɔna a Daudi, ɔmɛnɛlɛ ŋandi»!

40 Ango Yesu aemali, aasimeli baweela ongo bontongo. Aiye ndako sukɛlɛ la Yesu, Yesu awuumboli nte: 41 «Alanga nko keele nke»? Ndako nte: «Bɔkɔta, mbɔkɔlɔmba m'mɛni lonkinɛ». 42 Ango Yesu aosimeli nte: «Ena lonkinɛ! Lokani labɛ lombokokakola»! 43 La kako nkango ongo bontongo aɛni lonkinɛ. Aolingiti Yesu o mboosakoya Kanamombe. Ango aɛni banto lalikuli bingo, la bako ŋango akɔ bakuchisa Kanamombe.