1 25 Kaiki luina lɔmɔɔ la Sabato*, Yesu aiki ataete weebeli e Nganɔ. Baeki* bande baanjisa mbuka mɛjɛmbɛ be ingo Nganɔ, baanjisa mpolola* la ndɛ.

2 Bafalisayɔ bamɔɔ ba baumboli nte: «Aliko laanke ɔmbɔ kɛɛ nyo ile Isaliya* yaso phaya imeya nkɛɛ luina la Sabato*»? 3 Yesu abauchisa nte: «Onde, koo nsɔma nyo bolengo baiki Daudi la banto baiki ndako la bako eleko eiki bako la botala? 4 Aingeli* e lulu la Kanamombe*, aɔsi bitunbula bɛnɛ bepashaki banto ele Kanamombe*. Aele, la aɔyisa baina lande baiki ndako la bako. La balɛɛki bingo ko baeta atei atoo baiki la luusa la ndɛ bingo bitumbula be bongo bolengo»! 5 Yesu aasimeli lonkinɛ nte: «Lemi Bɔna a Onto kole Bɔkɔta ba Sabato*».

6 Wiina onkinɛ ba Sabato*, Yesu aingeli otema Baasaŋanelo Baayuda*, aanjisa mbekya banto. Engo otema baango Basaŋanelo kaiki bonto ɔmɔɔ aiki ombo lɛngɛla loambo la loome. 7 Baekisi ba Isaliya* la Mafalisayɔ* balendaki Yesu ike nte baɛni iya aikya ongo onto luina la Sabato. Bakɛɛ ŋango, nte babaa bosao ba memalela omboo sitaka. 8 Kinaki, Yesu wiiki ombosila mbeya bamanya baɔ. Asimeli ongo bonto alɛngɛli loambo nte: «Emala la waande otamboka baanto lalikuli». Ongo onto aemali la achwe otamboka baanto.

9 Pa Yesu aasimeli bango Mafalisayɔ* la Baekisi ba Isaliya* nte: «Mbo kuumbola nyo: Nke ile Isaliya yaso ilangaka toyale tatakee luina la Sabato*? Nkɛɛ bɔlɔti aɔ bobe? Mbikya bonto aɔ mboo jaka»?

10 Yesu aalendi bako lalikuli, ango, asimeli ongo onto nte: «Sembola loambo labɛ». Alosemboli, kako nkango longo loambo laiki. 11 Kinaki bango, Mafalisayɔ* la Baekisi ba Isaliya* baomali ike. Baanjisa mumbolana asamba bako nte bakeele Yesu nke.

12 Luina lɔmɔɔ, Yesu auleli nɔmba Kanamombe ɛ bɔɔkɔ. Akɛsisa luina la likuli atalɔmbɛ. 13 Loi ende mpendu, aeleli baeki* bande, la asamba bako, asɔni joomu la aphee banɛ baeleli ndako «Bakɛndi*». 14 La Simo ɔnɛ aŋunyisa Yesu Pɛtɛlɛ la Andele aotwa lande, Yakɔbɔ la Yɔani la Filipi la Batɔlɔmayɔ, 15 la Matayɔ, la Tɔmasi, la Yakɔbɔ bɔna a Alufayɔ la Simo aelelamaki Sɛlɔtɛ, 16 Yuda bɔna a Yakɔbɔ la Yuda Isikaliyɔtɛ ɔnɛ a phaki Yesu.

17 Yesu nkitela mima ɛ bɔɔkɔ la bakɛndi* bande. Aiye ndako kaama ka sanjabala, aemali. Atani boloi bɔnɛnɛ ba baeki bande la banto bankinɛ ike baimi o beoni lalikuli be Yudeya, la boleka ba bɔsɛngɛ ba Yɛlusalɛma, la boleka ba bɛsɛngɛ bɛ Tilɔ la Sidoni biiki ɔɔkɔngɛ ba wango. 18 Bango banto baandaki nte ba oke Yesu, la baikyame beale bɛɔ. La bango baiki la basombo babe baikyame. 19 Banto lalikuli balangaki mbookoola, aliko nkulu ya pasaki kande ya baikisa bako lalikuli.

20 Pa Yesu alendi baeki* bande, aasimeli nte:

«Alombele nyo baola,

aliko ekeleka e Kanamombe* kelende kenyo.

21 Alombele nyo bata oke botala nkaanɛ,

aliko akɔndɔlɛ nyo nende e jiimbi!

Alombele nyo bata lele nkaanɛ,

aliko akondo ɔla nyo la libɛla».

22 Alombele nyo eleko ekonina banto la mbwiambalala lanyo, la nkotola nyo la ntata nkombo yanyo bobe,

Aliko lami Bɔna a Onto.

23 Eleko engo ekwiyela nyo bengo besako, yala nyo ataisɛkɛya la nkɛnya, aliko ombo kicheyama nyo mpato nɛnɛ e loola. Ŋango ko bankɛɔ bata tumbya Baɛni*.

24 Kinaki, ŋandi ele nyo baso nombo,

aliko, ombo sila nyo mba bolombe bɔlɔti.

25 Ŋandi kanyo baso jiimbi nkaanɛ,

aliko, eleko inchɛ akondo oka nyo botala.

Ŋandi ele nyo bataɔlɛ la libɛla nkaanɛ,

aliko, eleko inchɛ akondo lela nyo.

26 Ŋandi ele nyo batakoseke nyo banto lalikuli,

aliko, ŋango ko bankɛɔ baiki bataseke Baɛni* ba belimbo.

27 Yesu amemeisa nɔnda nte: Kinaki nyo baso limboka: binɛ nde bitalange lemi nkosimela nyo: Langa nyo bitamba benyo, yala nyo ataakɛɛla bilɔti. 28 Bango bale kɔkɔmɛlaka nyo, yala nyo ataalɔmbɛla ele Kanamombe nte aachweele bochwako. La bango batakotumbya nyo, yala nyo ataa lɔmbɛla ele Kanamombe. 29 Iya bonto akophomake losola o litama limɔɔ, tulolela ndako lingo linkinɛ litama. La iya bonto akokumolake likɔti jaɛ, tikela ndako la simisi ɛbɛ.

30 Bonto akolɔmbake ekambwa lalikuli koo limake keko, aɔ akokumolake ekambwa ɛbɛ, kɔɔ lɔmbake lonkinɛ. 31 Ŋango alanga wɛɛ bako keele, keela bankinɛ ŋango akɔ.

32 Iya oyalake atalange nyo too, banɛ bako langaka nyo, ekambwa nke ɛɔsɔna nyo mba? Aliko, koonga baso njambi la bako balangaka baso mbwaalanga! 33 La iya okeelake nyo too bɔlɔti bango bakokeela nyo bilɔti, esakoya nke eba nyo? Koonga baso njambi la bako bakɛɛka ŋango akɔ! 34 La iya, o sɔmbyake nyo to ele bango bata kicheya nyo lokani la kɔngɛla nyo, onde! Aba nyo esakoya nkee? Koonga baso njambi la bako basɔmbyaka to bango baɔsɔna mbwangɛla!

35 «Kinaki nyo, yala nyo atalange bitamba benyo. Lonkinɛ yala nyo atasɔmbya jɛ nkicha lokani la ngɛlama. O ŋango akondoba nyo esakoya ɛnɛnɛ, lonkinɛ akondoyala nyo sɔlɔ bana ba Kanamombe ole aliko lalikuli. Aliko ndako okɛɛka bilɔti nende ele bango bale bapha la esakoya la baso njambi. 36 Yala nyo ataɛnɛlana nyo ŋandi wɛɛnte bole isɛ nyo atakɔɛnɛla nyo ŋandi.»

37 Yesu alɔndi lonkinɛ: «Koyala nyo atatumbya bankinɛ, la Kanamombe phakotumbya nyo ŋango akɔ. Koyalake nyo atakɔmɛla bankinɛ, aliko la nyo Kanamombe atakɔkɔmɛlake nyo ŋango akɔ. Kinaki yala nyo ata sokolela bankinɛ, aliko Kanamombe akondo kasokolela la nyo ŋango akɔ. 38 Yala nyo ataɔya bankinɛ, aliko Kanamombe* akondo kɔya lanyo. La ingo yaɔyama nyo yakondo yala yatapimama bɔlɔti, la nkɔkɔmyama la mbojama fua. Ŋango bo pimelaka nyo bankinɛ ko Kanamombe landako akondo kopimela nyo».

39 Yesu abaɔyisa lonkinɛ bomanu bɔnɛ: «Bontongo aɔsɔna mɛnya bontongo wiina lande mboka? Jɛ! Akɛɛkɛ ŋango bako baphee bakondo kwaa e liphuku». 40 Koo weeki ole waiyolo ele weekisi ande. Kinaki, weeki aekyamake bɔlɔti, akondo yala solo la weekisi.

41 Aliko laanke, ataɛni ephumbu o lisɔ ja aotwa labɛ, kinaki phailende la bote bole o lisɔ jabɛ? 42 Aliko laanke ɛɔsɔna wɛɛ nsimela aotwa labɛ nte: «Aotwa lami, konga nkopasha ephumbu ele o lisɔ jabɛ. La e lisɔ jabɛ kole la bote? Wɛɛ, ole apha phololo! Pasha obi bote bole o lisɔ jabɛ, pa akɔnɔɛna bɔlɔti o mpasha ephumbu ele o lisɔ ja aotwa labɛ»!

43 Yesu ɔlɔndi lonkinɛ nte: «Bote bɔlɔti phaotaka biuma bibe, la bote bobe phaɔsɔna mbota biuma bilɔti. 44 Bote lalikuli boeyamaka nde o biuma bende. Banto phaɔsɔna mbuka bɔnkɔmu aɔ mpachu oote ba weeŋenge. 45 Ko ŋango, bonto bɔlɔti ɔlɔndaka nde bilɔti bipasaka otema ba lisolo jande. Kinaki bonto bobe, bibe bilɔndaka ndako, bipashaka to oobe boolaka otema ba lisolo jande. Aliko, bonywa ba onto bɔlɔndaka too besao beolaka otema ba lisolo jande».

46 Yesu amemeisa nɔnda nte: «Aliko laanke etambelela nyo: ‹Bɔkɔta, Bɔkɔta›, lanyo phakokeya nyo binɛ bitakosimela nyo lemi? 47 Landalange nkɔɛnya nyo bolengo ba onto ataningita, la mboka besao bemi, la nkokya bolengo batalɔndɛ lemi, ɔmbɔɛlama: 48 la onto ataphike lulu lande. O, chimi obi ike mbiya waabwɛ. O lingo libwɛ, o kichi kako bɔnsɛsɛ bɔnɛ bophiki ndako lulu lande. Eleko ɛlwɛ mbula nɛnɛ, losi looli, la ingo iloko ya mbula, yaakani o longo lulu, koo ntɛka. Aliko, lophikami bɔlɔti. 49 Kinaki, bonto ole atakɛɛ besao bele bepha phololo be mboka besao bemi, la phakɛɛ ŋango batalɔndama, andaelama la bonto ophiki lulu lande aliko la lɔmɔ́tu koo bɔnsɛsɛ. Eleko engo eakanyisa iloko ya mpela o longo lulu, kako nkango lɔkwɛɛ la nphutana lalikuli».