1 Kaiki luina lɔmɔɔ, Yesu aiki ataemala ɔɔkɔngɛ ba wango ba Gɛnɛsalɛti*, la banto ike baanjisa mboo phika, aliko baonaki mboka besao be Kanamombe*. 2 Aɛni biɔmbɔ biphee ɔɔkɔngɛ ba wango. Balɔwi baiki batapase otema baiki bata ɔkya bɛtɛi bɛɔ. 3 Yesu auleli ɔ kɛmɔɔ kiiki ango. Kengo kyɔmbɔ kiiki ke Simo. Yesu aosimeli nte asɛmɛya e wango, bɔɔ inchɛ la ɔkɔngɛ. Ayali o kengo kyɔmbɔ la njala ataekya banto.

4 Ango asili ndako mbekya, asimeli Simo nte: «Sɛmeya kyɔmbɔ ele iloko, linjanyo bɛtɛi bɛnyo wiiloko, aliko o jake nyo nse». 5 Simo auchisa: «Bɔkɔta, tombo lɔwa lɛlɔ bocho lalikuli koo mba ekambwa. Kinaki, ŋaanɛ wɛɛ kɔmbɔ lɔnda lakondo oka lonkinɛ bɔtɛi e losi». 6 Pa nsila mboka bɔtɛi e losi, ba jaki nsee ike, nende ango aiki bɛtɛi bɛɔ beke betaate. 7 Baeleli baina labɔ baiki e kenkinɛ kyɔmbɔ, baande mbo baamola. Baandi baojisa biɔmbɔ beko biphee la nse ilango biɔmbɔ bilinde. 8 Simo Pɛtɛlɛ aɛni ndako ŋango, akɔmeli Yesu balwe la nɔnda nte: «Pasa otamboka lami, ee Bɔkɔta aliko lemi nende boso njambi»! 9 Kwiki ŋaanɛ, aliko Simo la baina lande, basebalali ike la mɛna nse ya jaki bako. 10 Ŋango ako, Yakɔbɔ la Yɔani bana ba Sebedayɔ baiki baina lande basɔkɔli ba nse. Yesu asimeli Simo: «Kolawake; manja lɛlɔ akondo yala bɔsɔkɔli baanto». 11 Baɛlisa kyɔmbɔ wɔɔ kɔngɛ, bachiki bikambwa lalikuli la ningita Yesu.

12 Laango, Yesu aiki ɔɔsɛngɛ ɔmɔɔ, bonto ɔmɔɔ boso nsuli bionge lalikuli awɛɛni, la ongo onto akwɛɛ ba nkukuku la alɔmbi ele Yesu: «Bɔkɔta, iya olangake aɔsɔna limbɔkya».

13 Yesu aosemboleli likasa, aokooli la nɔnda: «Mbolanga! Ɔkyama»! Kako nkango, engo nsuli kepasi ele ongo onto. 14 La Yesu aɔsimeli: «Kosimelake onto koonga ɔmɔɔ. Kinaki, chwaka loko iyɛnya ele weeta atei* lonkinɛ opasha mpato aliko la mbokyama yabɛ ŋango balɔndi Musa omɛnya nte ombwika».

15 Kinaki, jaamba ja Yesu ja balaŋani kaama lalikuli. Boloi baanto bosaŋani aliko la mbo wooka la mbikyama ya bakɔnu baɔ. 16 Kinaki, Yesu achwe kaama kaiki ndako nɛmɛlɛ opholi o nɔmba engo.

17 Wiina ɔmɔɔ, Yesu aiki ataekya, Mafalisayɔ la Baekisi ba Isaliya baiki bataime wɛɛsɛngɛ be Galilaya, Yudɛya la Yɛlusalɛma, bayalaki ango. Nkulu ya Bɔkɔta yaiki lande aliko la mbikya bakɔnu. 18 La banto baandi bata ɛmbɛ bonto ɔmɔɔ oso nɛngɛla, baonaki bolengo ba mbo wiila otema ba lulu la mbo kicheya otamboka la Yesu. 19 Kinaki, aliko la wiike ba anto koo mbɔsɔna mingela otema. Laango, bauleli eliko la nsambe * la ntɛmɔla nsambe mbelama laango aiki Yesu. La baokichisa la likenge jande, asamba boloi otamboka* la Yesu. Banto bambokicheya bɔkɔni mima eliko la nsambe 20 Ango Yesu aɛni ndako lokani laɔ, alɔndi la bɔkɔnu: «Keseka njambi yabɛ imbɔ sokolama». 21 Baekisi ba Isaliya* la Bafalisayɔ baanjisa mbwiumbola la nɔnda: «Ɔnɛ onto ole nani atatole Kanamombe*? Koo onto aɔsɔna nsokolela bonto njambi. Ila nɛmɛlɛ kanamombe*». 22 Yesu aei bakani baɔ la aasimeli: Nke etakanya nyo waasolo anyo? 23 Nke ele kɔɔlu nɔnda mbo kosokolela njambi aɔ nɔnda emala wɛɛ la nkɛnda? 24 Kinaki, mbo langa nte weeye nyo: Bɔna a Onto ole nde la nkulu ya nsokolela banto njambi e wooni. Laango asimeli oso nɛngɛla:*Emala wɛɛ, kemela likenge jabɛ, La chwaka e lulu labɛ. 25 La, kako nkango, oso nɛngɛla aemali otamboka laako lalikuli, okemeli likenge jande ja lalelaki ndako, la achwe e lulu lande la atakucha kanamombe*. 26 Bako lalilkuli ba sebalali la nkucha kanamombe* baoli fua la wɔɔma la nɔnda, tomwɛna lɛlɔ ɛntɔmpɔ!

27 Pa bingo, Yesu apasi anja aɛni oso ngɛja kɔdi, aelelamaki Lawi, atayale kaama ka ngɛja kɔdi. Yesu aosimeli nte: «Oningite»! 28 La ndako aemali, la ntika lalikuli la aolingiti. 29 Lonkinɛ, Lawi a lɔngɔsɔlɛli Yesu lilɛ ike e lulu lande. La boloi bɔnɛnɛ ba baso ngɛja kɔdi, la bankinɛ banto baiki batale kaama kamɔɔ la bako. 30 Mafalisayɔ la Baekisi ba Isaliya* baiki batalɔndɛ baeki ba Yesu: «Aliko laanke etale nyo la nywa kaama kamɔɔ la baso ngɛja kɔdi la baso njambi»? 31 Yesu abauchisa nte: «Baso luiko bapha la mposa e wiingi ila bakɔnu nde bale la mposa e wiingi. 32 Lemi phamandi mbelela bango bale solo, kinaki baso njambi baande mimeya».

33 Bafalisayɔ basimeli Yesu ntes: «Baeki* ba Yɔani oso mbatisa la bango baso bataliphe kila eleko la bata lɔmbɛ, kinaki, baeki* baɛ batale la nywa». 34 Yesu abauchisa nte: «Bango baelelami o libɛla baɔsɔna nkila lilɛ la Bɔkɔta ba libɛla ole la bako? Jɛ phakasane! 35 Kinaki, eleko eiyaki ango asakolamaki Bɔkɔta Yesu asamba bako, weengo biina kekilaki bako lilɛ».

36 Yesu aasimeli lonkinɛ bongo bomanu: «Koo onto aɔsɔna mbata yaati ya esenda e kasende aliko la nɔngɔsɔla esenda e esasa, iya ŋango engo esenda ekasende kekondo ata la yaati ya esenda e kasende pheke sɔnama la esenda e esasa. 37 La koo onto a ila difai lilɔti otema ba esasa e mpɔmbɔ, iya ŋango, difai ja kasende jakondo ata mpɔmbɔ la mbulanga, la difai jakondo sua la mpɔmbɔ kekondo futana. 38 Difai ja kasende bailaka nde ɔ mpɔmbɔ e kasende. 39 Koo onto alanga nywa difai ja kasende pa nywa lokange. Aliko, longo lokange lolende lɔlɔti ndeka la kasende».