1 Weengo eleko banto basaŋani weeloi be maɛlɛfu baiki batanyɛkana. Yesu asimeli obi baeki* bande: «Ayeka nyo la besao be Mafalisayɔ*, ko nɔnda banto bale bapha phololo. 2 Ekambwa lalikuli eisisha bako kekondo isolama, la ekambwa lalikuli eisami kekondo iswa. 3 Aliko la ingo, ekambwa lalikuli kɛ lɔndami e wiilima banto bakondo oka asamba yaani. La ekambwa lalikuli ɛlɔnda nyo waaniŋina otema ba kyumba lataliphama, yakondo lɔndama la jooi linɛnɛ aliko la nsambe».

4 Yesu a memeisa nɔnda: «Mbokosimela nyo biseka bemi nte: ko yalake nyo atalawa banto bajakaka bionge, kinaki ɔkɔngɔ la njaka phaɔsɔna lonkinɛ nkɛɛ ekambwa enkinɛ aliko la ingo. 5 Latalange nkɔɛnya nyo ongo aɔsɔna nyo njala ata olawa nyo: yala nyo atalawa Kanamombe* ɔnɛ aɔsɔna nkumola luiko la onto la pa nkumola olende la nkulu ya mboka onto wiiya. Sɔlɔ mbokosimela nyo, ɔnɛ ko onto asana nyo ndawa.

6 «Kombo eyama nte binsɔlɛ itano bisombamaka nde la bakuti baphee atoo. Kinaki Kanamombe phaophelaka koonga ɛnsɔlɛ ɛmɔɔ. 7 La, koonga libo ja bɛtɛ benyo, beajemaka. Kanamombe aeya isabu ya ingo lalikuli. Wiingo kolawake nyo, aliko nyo olende nyo la bokuchu ike ndeka binsɔlɛ ike».

8 Yesu ɔlɔndi lɔnkinɛ: «Mbokosimela nyo nte bonto lalikuli amimeya lemi otamboka baanto nte olende weeki ami, la lemi Bɔna a Onto lakondo wiimeya otamboka ba biphongo be Kanamombe*. 9 Kinaki, bonto lalikuli a ntata otamboka baanto, la lemi Bɔna a Onto lakondo otata otamboka ba biphongo be Kanamombe*.

10 «Bonto lalikuli alɔnda bobe aliko lami Bɔna a Onto akondo sokolelama. Kinaki ongo atola Lɔkɛngɛ Lɔɛlɔ ndako phasokolelama koonga inchɛ.

11 «Eleko eyala bako batakɔtɔlɛ nyo nte osambe nyo otema Baasaŋanelo* aɔ otamboka ba baiyolo aɔ otamboka ba Bɛkɔta, koyalake nyo la wɔɔma aliko la be samba nyo aɔ bɛ lɔnda nyo. 12 Aliko Lɔkɛngɛ Lɔɛlɔ akondo koekya nyo bingo besamba nyo aɔ nɔnda».

13 Bonto ɔmɔɔ asamba bongo boloi baanto aosimeli Yesu: «Weekisi, onsimelele aotwa lami anphakele yami eteni entiko etochikeli isɛso». 14 Yesu awuuchisa nte: «Keseka kemi, nani ankichisa lemi njale waamoli asamba nyo, aɔ bophaki a besanga benyo»?

15 Laango Yesu aasimeli banto lalikuli nte: «Ayeka nyo la nanga besanga be ntipha la ntipha. Aliko, luiko la onto phalaɛlamya la wiike ba besanga bende, koonga ole la besanga ike».

16 Lonkinɛ Yesu aasimeli bomanu bɔnɛ: «Kaiki la boso nombo ɔmɔɔ aiki la bibeli bende bepashaki lilɛ ike. 17 Ɔnɛ boso nombo aanjisa mbwiumbola o lisolo jande: ‹Latakɛɛ ŋaande lemi anɛ lapha la kaama ka nkicha lilɛ jami›? 18 Laango alɔndi: ‹La kondo kɛɛ ŋaanɛ: lakondo phanjola bokombe bami la lakondo phika bankinɛ banɛnɛ anɛnɛ. La waango kakicha lemi otema bande lilɛ jami lalikuli la bɛnkinɛ besanga bemi. 19 Lami lakondo isimela lɛɛmɛlɛ: ‹Lemi nkende la bikambwa ike bɛkɛɛ lemi biina ike. Anɛ laɔsɔna momoya n'ndɛ n'nywa la mbwisɛkɛya›!

20 «Kinaki Kanamombe* aosimeli: ‹Bolee wɛɛ, bocho ba lɛlɔ lakondo ɔsa lisolo jabɛ. La bingo bikanbwa lalikuli biiki wɛɛ ataikicheya bekondo, beyala be nani?›»

21 Yesu alɔndi lɔnkinɛ: «Ŋaanɛ boyalaka ele onto wiikicheyaka besanga aliko lande nɛmɛlɛ. Kinaki phakayalaka boso nombo ele Kanamombe*».

22 Pa Yesu asimeli baeki* bande: «Ingo nde ya chiki lemi nkosimele nyo nte, koyalake nyo la ekalali aliko la luiko lanyo la bionge benyo nte alɛ nyo nke, aɔ alɔta nyo nke. 23 Aliko luiko lanyo nde lole la bakuchu ike ndeka lilɛ, la bionge benyo nde bile la bokuchu ike ndeka bisenda. 24 Lenda nyo bomanu ba mpulu: phaonaka aɔ phaukaka la bapha la okombe. Kinaki Kanamombe* oaleshaka. La nyo mbɔ olende nyo la bokuchu ike ndeka mpulu! 25 Nani asamba nyo mbetela ndela yande aɔsɔna nkokeya inchɛ botale ba luiko lande? 26 Laango, iya phaɔsɔna nyo nkɛɛ bikambwa inchɛ wɛɛnte bingo, aliko laanke etalelalela nyo aliko la bikambwa binkinɛ?

27 «Lenda nyo ŋango bata tɔngɔla bolowa. Phayakɛɛka ekambwa aɔ mbwisɔnɛla esenda. Kinaki mbokosimela nyo, koonga Bɔkɔta Sɔlɔmɔnɔ, o nomba yande lalikuli koo ndɔtaka esenda ndɔti wɛɛnte bolowa bɔmɔɔ. 28 Balilo baebeli baɛnamwaka lɛlɔ la loi bambookama wiiya. Kinaki Kanamombe* wiilɔchaka bɔlɔti. Bolengo nke ele ndako phakɔlɔcha nyo bɔlɔti ike, eeh nyo baso lokani inchɛ»?

29 Koyalake nyo ataiyaŋangya o mona ɛlɛɛ nyo aɔ ɛ nywa nyo. 30 Aliko banto ba ɔnɛ wooni, banɛ bale phaaeye Kanamombe, ko baonaka bingo bikambwa lalikuli jɛ mena. Kinaki nyo, Isɛnyo weeyaka nte olangaka nyo bingo bikambwa. 31 Wiingo, nyo yala nyo obi ataone ekeleka e Kanamombe*, la ndako akondo kɔya nyo binkinɛ lalikuli. 32 Koyalake nyo atalawa, nyo boloi inchɛ! Aliko isɛnyo olangi nkɔya nyo ekeleka ende.

33 Yesu ɔlɔndi lonkinɛ, sombya nyo bikambwa benyo lalikuli, la bango bakuti ɔya nyo baola. Wiikeele nyo mefuko bele pheekongolaki. Lonkinɛ wiikicheya nyo besanga e loola ele pheelimela. Engo baiyi phaaiye aɔ bɔtɛlɛli phayafute. 34 Aliko ango ale besanga bɛbɛ, kako kayala lisolo jabɛ.

35 Yesu alɔndi lonkinɛ: «Yala nyo solo, ombwilɛma nkɔli o baombo banyo la batala banyo bayale batatowa. 36 Yalaka nyo wɛɛnte bakambi* batakonge Bɔkɔta abɔ autole mima e libɛla ja nsɔŋana. Aliko baolipholele kako nkango eleko eakanya ndako e lɔkukɛ. 37 Alombele bakambi* bango bale o mbutola ya Bɔkɔta abɔ, akondo atana baiso phololo! Mbokosimela nyo sɔlɔ, ɔnɛ alɛma bɔkɔta nkɔli e joombo, akondo akicha ɔ mɛsa la mbɔ baɔya lilɛ. 38 Alombele bango bakambi bale iya Bɔkɔta abɔ ombuutola asamba ilumo, aɔ mpendu la mbwatana baloko baiso phololo!

39 «Eya nyo nte, ɔmɛlɛ lulu otoeya eleko yaanda wiiyi, phatochika lulu lande loolame. 40 Lanyo ŋango akɔ, yala nyo tayali, aliko lemi Bɔna a Onto lakonoanda weeleko ele nyo phaeye».

41 Laango Pɛtɛlɛ aumboli Yesu nte: «Bɔkɔta, bomanu bɔnɛ bolende aliko la iso atoo, aɔ aliko la banto lalikuli»? 42 Landako Bɔkɔta auchisa: «Nani ole bokambi a lokani lonkinɛ bokambi a limanya? Ko ongo ole bɔkɔta ande akondo okicha nkenga lulu, aliko ayale ataɔya baina lande bakambi lilɛ eleko esana. 43 Alombele ongo bokambi ɔnɛ ole bɔkɔta ande autolake akondo otana oloko atakɛɛ ŋango. 44 Sɔlɔ ongo Bɔkɔta ande akondo okicha njala waiyolo aliko la besanga bende lalikuli.

45 «Kinaki, iya ongo bokambi aanjake nɔnda otema ba lisolo jande nte: ‹Bɔkɔta ami ombo lembela o mbutola›; Pa ŋango aanjake mpoma baina lande bakambi, ba mpame la bainto, la ndɛ, la nywa, la ndɛwa, 46 Bɔkɔta ande autolake luina la eleko ele ndako phaeye; akondo ophoma ike ongo bokambi bobe la mbookicha boloi bɔmɔɔ la bango bakambi babe.

47 «Bokambi ɔnɛ aeya ŋango balanga bɔkɔta ande, kinaki phaikicha solo la nkɛɛ ŋango balanga ongo Bɔkɔta, akondo phomama ike. 48 Kinaki ongo akɛɛ bingo besana tumbyama koo mbeya belanga bɔkɔta ande, akondo phomama inchɛ. Ongo aɔyama ike, akondo ochama ike; la ongo aɔyama ike ndeka, akondo ochama ike ndeka».

49 Yesu alɔndi lonkinɛ: «Mandi ntoola iya e wooni, la ntolanga iyale nte imbosila ntowa! 50 Laɔsɔna mba ubatiso. La lalanga bongo ubatiso bo kekemale! 51 Atakanya nyo nte mandi mbela bii e wooni? Kapha ŋango! Kolende maŋana. 52 Manja anɛ, bolunga baanto batano bakondo phakana; basato boleka baɔ la baphee boleka baɔ. 53 Phapha akondo yala etamba ele bɔna ande, la bɔna etamba ele isɛnde, lele etamba ele bophoko ande, bophoko etamba ele nyɛŋɛnde, bokilo a wainto akondo yala etamba ele walisɔngwa ande, la ɔnɛ etamba ele bokilo ande a wainto».

54 Yesu asimeli lonkinɛ beloi beanto: «Eleko ɛɛnake nyo loola lataulela mima boleka ba likɔlɔ, ango alɔnda nyo nte: ‹Mbula kɛkɔndɔlwa› La sɔlɔ kɛlwaka. 55 La eleko ɛɛnake nyo lɔphɛphɔ lataime ɔɔkɔngɔ latalombe, akondo lɔnda nyo nte: ‹Kakondo yala la yoomombe› La sɔlɔ koyalaka ŋango. 56 Nyo banto bale apha nyo phololo! Weeya nyo mbekya imbali ya lɔphɛphɔ o nenda bolengo ba wooni la loola. Aliko laanke, phaɔsɔna nyo mbeya besao bɛnɛ betakɛɛma wɛɛnɛ eleko»?

57 Yesu ɔlɔndi lonkinɛ: «Aliko laanke phaɔsɔna nyo mbwiyamolela bosao bɔlɔti ya nyo nkɛɛ? 58 Iya ɔnɛ ole lande bosao, akɔtɔlake o masitaki, kotoyala bɔlɔti kaɛ mbokana lande oloko nyo e mboka. Aliko atakɔtɔlake otamboka ya waamoli. Landako waamoli akondo kɔtɔla ele mesase, la bako bakondo koaka ɔ munyɔlɔlɔ. 59 Sɔlɔ mbokosimela nyo nte: phaɔsɔna mpasa iya otasile ngɛla likuti ja kantunda».