1 Kaiki nde wiilongi joomu la itano, weeleko e Bɔkɔta* Tibɛliyɔ, Poso Pilato aiki Bɔkɔta ba Yudeya. Elɔde aiki Bɔkɔta* ba Galilaya, la aotwa lande Filipi aiki Bɔkɔta* ba bɛsɛngɛ ba Ituleya la Talakoniti. La Lusaniya aiki Bɔkɔta ba Abilɛnɛ, 2 la Anasi la Kayafa baiki Bɛkɔta be baeta atei*. Weengo eleko, ko besao be Kanamombe biiyeli Yɔani bɔna a Sakaliya engo woosowe. 3 Laango, Yɔani achwe wɛɛsɛngɛ lalikuli biiki mɛ la losi Yɔlɔdani. Aiki ataekya banto ba imeye la mbatisama aliko Kanamombe aba sokolele njambi yaɔ. 4 Kole ŋango baandekami kako e libuku ja wɛɛni Isaya:

«Jooi ja onto ɔmɔɔ ja okami woosowe:

‹Lɔngɔsɔlɛla nyo Bɔkɔta mboka ende;

sembola nyo mboka yande.

5 Likilikili lalikuli jakondo ojama,

bɛɔkɔ la bekondi lalikuli bekondo sɛngɔlama,

bamuna lalikuli bakondo sembo lama,

mboka mbe yakondo lɔngɔsɔlama.

6 La banto lalikuli bakondo ɛna nkakolama yaanda la Kanamombe›».

7 Laango, Yɔani asimelaki banto ike ba iyaki nte aabatise: «Nyo jooti ja ndwa! Nani akuekisa nyo ndawa losingo la Kanamombe lataande»? 8 Yala nyo ataɛnya nte mimeya yanyo mbetela belengo benyo. Koanjake nyo mbwi lɔndɛla: «Isɛso ko Ibulaimu! Aliko, mbo kosimela nyo sɔlɔ, Kanamombe aɔsɔna mengola babwɛ banɛ bayale bana ba Ibulaimu. 9 La liswa lilende tayali weejo beete; laango, bote lalikuli bole phaaote biuma bilɔti ba kondo tenama la mbokama wiiya».

10 Boloi ba anto ba wuumboli: «Tokɛɛ ŋaande»? 11 Yesu abauchisa: «Ole la bisenda bi phee aɔya ɔnɛ ole apha la bisenda, ole la lilɛ akɛɛ ŋango akɔ».

12 La baso ngɛja kɔdi baandi la bako mbatisama, bawuumboli Yɔani: «Weekisi, tɔkɛɛ ŋaande»? 13 La ndako aasimeli: «Kopashake nyo ndeka ingo ipangemi».

14 Bakɔlɔbɔi la bako bawuumboli: «La iso tɔkɛɛ ŋaande»? La ndako abauchisa: «Kɔɔsake ekambwa ele onto la nkulu aɔ nsitaka onto lalikuli weelimbo. Kinaki, Koka nyo la misaala benyo».

15 Bako lalikuli baiki bata lendela ekambwa ɛmɔɔ: laango baanjisa mbwiumbola waa solo baɔ aliko la Yɔani, iya ndako kole Kilisito*. 16 Laango Yɔani aasimeli bako la lalikuli: «Lemi, mbo kobatisa nyo wiiloko, kinaki, ɔnɛ ataande olende la nkulu lindeka lemi. Ole lemi phalaɔsɔna koonga nɛmɔla nkɔli ya toposo tande. Ndako akondo ko batisa nyo la Lɔkɛngɛ Lɔɛlɔ la wiiya. 17 Ndako kole la Lwɛli o likasa jande la mphophola aliko la maŋanya mpapha la tomuka. Akondo saŋanya tomuka e lokala, la ntumba mpapha wiiya ile phayalimaki jɛ».

18 Ŋango ko Yɔani abaekyaki banto Besako Belɔti.

19 Bɔkɔta* Elɔdɛ, aliko aiki ɔmbɔɔsa Elɔdiya waaja a aotwa lande oke waajande. La lonkinɛ aliko la bobe lalikuli baiki ndako atakee. 20 Laango, Elɔdɛ akokiisa bobe ande ombo wiila Yɔani ɛ munyɔlɔlɔ.

21 Asili banto lalikuli mbatisama, Yesu la ndako ba obatisi. Aiki ndako atalɔmbɛ loola la liphwe. 22 La Lɔkɛngɛ Lɔɛlɔ la okiteleli wɛɛnte elenga. La jooi ja okami mima e loola: «Wɛɛ kole Bɔna ami, alanga lemi; ombo nangya».

23 Ango Yesu aanjisa bolemo ande, aiki la bilongi ilango baomu asato. Banto bakanyaki nte olende bɔna a Yɔsɛfu, aiki bɔna a Eli. 24 Eli aiki bɔna a Matati, aiki bɔna a Lawi, bɔna a Meleki bɔna a Yanaye, bɔna a Yɔsɛfu, 25 aiki bɔna a Matatiya bɔna a Amosi, bɔna a Naumu, bɔna a Hesli, bɔna a Nagai, 26 aiki bɔna a Maathi, bɔna a Matatiya, bɔna a Shemeni, bɔna a Yɔsɛki, bɔna a Yuda, 27 aiki bɔna a Yɔhanani, bɔna a Lɛsa, bɔna a Solubabeli, bɔna a Shealitieli, bɔna a Neli, 28 bɔna a Meleki, bɔna a Adi, bɔna a Kɔsamu, aiki bɔna a Elemadamu, bɔna a Eli, 29 aiki bɔna a Yɔsuwa, bɔna a Elieseli, bɔna a Yɔlimu, bɔna a Mathati, bɔna a Lawi, 30 aiki bɔna a Simiyɔni, bɔna a Yuda, bɔna a Yɔsefu, bɔna a Yɔnamu, bɔna a Eliyakimu, 31 aiki bɔna a Meleya, bɔna a Mena, bɔna a Matata, bɔna a Natani, bɔna a Daudi, 32 aiki bɔna a Yɛsɛ, bɔna a Ɔbɛdi, bɔna a Bɔasi, bɔna a Salɔmɔni, bɔna a Nashɔni, 33 aiki bɔna a Aminadabu, bɔna a Adimini, bɔna a Alini, bɔna a Esilɔni, bɔna a Pɛlɛsi, bɔna a Yuda, 34 aiki bɔna a Yakɔbɔ, bɔna a Isaka, bɔna a Ibulaimu, bɔna a Tɛla, bɔna a Naɔli, 35 aiki bɔna a Selugi, bɔna a Leu, bɔna a Pɛlɛgi, bɔna a Ebeli, bɔna a Sala, 36 aiki bɔna a Kainamu, bɔna a Alufakisadi, bɔna a Shɛmu, bɔna a Nɔwa, bɔna a Lamɛki, 37 aiki bɔna a Metusɛla, bɔna a Ɛnɔki, bɔna a Yaledi, bɔna a Mahalaleli, bɔna a Kainamu, 38 aiki bɔna a Henɔshi, bɔna a Seti, bɔna a Adamu, aiki a Kanamombe.