As 10 parábolas mais importantes de Jesus

Perumpamaan lun Samaria sa asuh aheng

25 Tahui, naan guru agama Yahudi mindri de nompojok Yesus. Ne tane, "Bapa Guru, hiye sa harus dakawi ku de tau welum selamane?"

26 Yesus nyamut, "Hiye sa tunulis huang Hukum Taurat? Hiye pendapat nu tentang sa kanabasa nu tei hiyo?"

27 Lun hiyo nyamut, "Sinta lukun Tuhan Allah nu lukun kongoreng aheng nu, kongoreng jiwa nu, kongoreng kukuatannu lukun kongoreng pikirannu, lukun sinta sasamanu ngunau nu sinta arep nu gagalo."*

28 Uhui Yesus, "Samut nu hiyo bujur. Awi hiyo, maka nu sagar welum."

29 Tapi guru agama Yahudi hiyo kakan ngampang arep ne, jari ne tane lukun Yesus, "Hiye sasama ku hiyo?"

30 Yesus nyamut lukun perumpamaan uhui-Ne, "Naan lun Yahudi minau neke kota Yerusalem tong Yerikho.Tei bengkang alan ne sanarang parampok. Kongoreng sa naan tei ne oreng darampas. Ne konompak hampe setengah matei, tahui dewelah ngarampalek tei alan.

31 Katangaran naan imam lun Yahudi malan tei alan hiyo lei. Rahat ne neau lun hiyo, ne nyiliah tong hila alan, tahui tarus malan. 32 Ngunau hiyo lei naan lun neke lului Lewi malan tei hiyo. Rahat ne neau lun hiyo, ne gin nyiliah tong hila alan, tahui tarus malan.

33 Tapi naan lun Samaria* sa rahat malan, nangkah tei hiyo. Rahat ne neau lun hiyo, ne ahi. 34 Tahui kinidinine lun hiyo tahui ngarasih batan-batanne pakai angur. Ne nawasne pakai minyak, tahui mabat batan-batan hiyo. Ne pakamai lun hiyo tong munan keledaine tahui koitne tong pinginapan, ngarawatne tei hiyo.

35 Kiat andraune ne nigo rueh kapeng duit perak, ngokoine tong sa ampun pinginapan hiyo. Uhuine, "Rawat ne. Amun naan biaya-biaya lainne, ku bayar nireh tei ku waleng."

36 Libas hiyo Yesus nupon perumpamaan hiyo lukun panane ti, "Munurut pendapat nu, neke telu lun hiyo hiye sa jari sasama dela lun sa darampok hiyo?"

37 Samut guru agama Yahudi hiyo,"Lun sa haot putundru kangahi lukun lun hiyo."

"Nah tulak lukun awi lei ngunau hiyo!" Uhui Yesus.

4 "Amun naan neke nu sa ampun saratus bulot domba, tahui jawoh isa, hiye sa sagar dakawi kon? Sareh nu sagar melah sa suei pulu suei domba hiyo tei pulau rikut, tahui tulak kelo sa jawoh hiyo hampe halu. 5 Libas kon halu waleng domba hiyo, kon begoh bebene hampe kanahan nu domba hiyo tei pulukene, 6 koitne mudi. Tahui ne nerau tuyang-tuyang nu lukun tetangga-tetangga nu lukun kuhui, ‘Ayu taka begoh gana domba ku sa jawoh haot halu ku waleng!’

7 Nah, ngunau hiyo lei tei surga naan kebegoh sa labih gaya gana naan isa lun sa bodosa sa botobat, neke suei pulu suei lun sa haot asuh mo perlu botobat."

Perumpamaan anak sa jawoh.

11 Yesus kuhui eso, "Naan erai kulun bapak sa ampun rueh kulun anak laki. 12 Sa hepu kuhui lukun ne, ‘Amai, hayakti okoi tong ku bagian ku neke kusugih taka.’ Tahui amai ne nyabagi harta hiyo tong kurueh anak ne.

13 Pipire andrau libas hiyo anak sa hepu hiyo ngiai kongoreng bagian ne hiyo tahui tulak tong negeri sa oro. Tei anai ne ngoreng duit ne lukun sara welum jias-jaus. 14 Hayak duit ne haot oreng, tei negeri hiyo naan kalau sa tamam. Jari, ne malai awe pongokan. 15 Tahui ne tulak bagawi tei uneng isa tuan hiyo. Lun hiyo nyingku ne tong ume ngajaga iwek ne. 16 Ne lau bebene hampe kakan kuman pongokan iwek hiyo. Ble ne lau, awe naan isa lun sa ngokoi okan dela ne.

17 Ahir ne sadar lukun kuhui, ‘Lun-lun sa bagawi uneng amai ku deo bebene pongokan ne, tapi ku tei ti mamane matei kalauan! 18 Ku sagar mudi, tong amai ku, tahui kuhui lukun ne: Amai, ku haot bodosa tong Allah lukun tong amai. 19 Mo patut eso ku dukuhui anak amai. Anggap bo ku lun sa bagawi dela amai.’

20 Tahui ne mudi waleng tong amai ne. Rahat ne eso oro neke blai, amai ne haot neau ne. Amai ne begoh tahui melempat tong ne tahui makut lukun nunuh ne.

21 Uhui ne, "Amai, ku haot bodosa tong Allah lukun tong amai. Mo patut eso ku dukuhui anak amai.’ 22 Tapi amai ne nerau hamba-hamba ne tahui kuhui, ‘Golek! Nigo pakaian sa paling bungas, tahui pusulep tong ne. Pusulep sinsim tei ingking ne, pusulep lei sapatu tei pee ne. 23 Libas hiyo, nigo anak sapi sa bonok tahui neleng ne. Taka sagar gawi pesta kuman lukun begoh. 24 Gana anak ku ti haot matei, tapi hayakti welum waleng. Ne haot jawoh, tapi hayakti halu waleng.’ Jari, ire malai pesta.

25 Rahat hiyo, anak ne sa punguntuha naan tei ume. Hayak ne mudi, hampe tei dini blai, ne kiringo eau suling lukun eau lun nandrik. 26 Ne nerau isa hamba, tahui tane, ‘Naan hiye tei blai?’

27 Hamba hiyo nyamut, ‘Ani nu waleng! Amai nu haot nyingku neleng anak sapi sa bonok, gana ne haot kahalu waleng anak ne huang keadaan salamat!’

28 Anak ne sa punguntuha hiyo sangit bebene hampe ne mo kakan huluk tong huang blai. Tahui amai ne losek lukun ngatau ne de huluk. 29 Tapi ne kuhui, ‘Bataun-taun kengela ne ku bagawi dela Amai. Ku talalahui tumun singku Amai. Tapi Amai awe piji ngokoi isa anak kaming de ku pesta lukun tuyang-tuyang ku! 30 Anak Amai hiyo haot ngoreng kusugih amai lukun wawei lahung, tapi rahat ne waleng, Amai neleng anak sapi sa bonok dela ne!’ 31 Samut amai ne, ‘Anak ku, nu talalahui naan tei ti dayo ku. Kongoreng sa ampun ku nehiyo ampun nu lei. 32 Tapi taka harus pesta lukun begoh, gana ani nu hiyo haot matei, tapi hayakti welum waleng. Ne haot jawoh, tapi hayakti haot halu waleng.’"*

Perumpamaan lun Parisi lukun panagih pajak

9 Tei hiyo naan pipire lun sa somong. Ire prasaya arep ire haot bujur. Lukun ire pukuwa lun-lun lain. Yesus pahampe perumpamaan lukun ire, 10 "Naan rueh kulun sa tulak tong Blai Allah de bodoa; sa isa lun Parisi, sa lainne lun panagih pajak. 11 Lun Parisi hiyo mindri tahui bodoa huang ahengne, ‘Oo Allah, ku busukur lukunnu, gana ku mo bodosa ngunau lun lain sa mangagou, surang atawa dusa ngunau panagih pajak hiyo. 12 Ku lun asuh, ku puasa rueh kali erai menggo, lukun ngokoi sepersupuluh neke kongoreng pangahalu ku.’ 13 Tapi panagih pajak hiyo mindri oro-oro bat mo maleh denga tong langit. Sansaluh musut dada ne kuhui, ‘Oo Allah, ngahi ku, lun sa bodosa ti!’"

14 Yesus kuhui, "Prasaya bo, rahat mudi tong blai, panagih pajak hiyo sa tinirime Allah lukun lain lun Parisi hiyo. Gana Allah sagar pukuwa kongoreng lun sa pekemoh arep ne, lukun pekemoh kongoreng lun sa pukuwa arepne."

Lun sugih lukun Lasarus

19 "Naan lun sugih, sa pakaian ne larang-larang, lukun welum ne mewah tiap andrau. 20 Tei jawong pagar blai ne naan lun susah sa kading tei hiyo, aran ne Lasarus. Deo bebene puyu tei kongoreng tenga ne. 21 Bat sawayan tahu tei hiyo hulet nelap puyu ne. Lasarus kakan bebene kuman okan sa ratu neke meja lun sugih hiyo.

22 Akhirne lun susah hiyo melah, tahui malaikat-malaikat koit ne tong uneng sa terhormat tei lepeh Abraham tei surga. Lun sugih hiyo gin matei tahui konogang. 23 Tei dinia lun matei ne mantais bebene. Hayak ne neau tong moh, ne neau Abraham tei uneng sa oro lukun Lasarus naan tei lepeh Abraham. 24 Ne nerau, ‘Bapak Abraham! Ngahi ku. Singku Lasarus nyolop ingking ne tong huang ranu tahui hulet de pikiso lela ku. Ku bujur mantais bebene tei huang apui ti!’

25 Tapi Abraham kuhui, ‘Anak ku, ingat waktu nu eso welum, nu nginam welum sa mewah tapi Lasarus nginam welum sa mantais. Hayakti, ne halu sa sanang, tapi nu sa mantais. 26 Salain hiyo, tei antara nu lukun kamin haot dakawi isa jurang sa gaya, de lun neke hiyo mo inuh tong ti!’ Lun neke ti mo inuh tong hiyo.

27 Lun sugih hiyo kuhui, ‘Amun ngunau hiyo, ku onok de Bapak nyingku Lasarus tong blai amai ku. 28 Naan dime puloksanai ku sa eso welum lukun muneng tei hiyo. Singku Lasarus pikingat lukun ire, de ire ada hampe huluk tong huang uneng sa mantais ti.’

29 Tapi Abraham kuhui, ‘Kongoreng puloksanai nu hiyo haot ampun kitab-kitab Musa lukun kitab-kitab nabi-nabi. Ire harus tumun kongoreng sa tunulis tei huang kitab-kitab hiyo!’

30 Lun sugih hiyo kuhui, ‘Hiyo mo sukup, Bapak Abraham. Tapi amun naan lun matei sa welum waleng tahui hulet tong ire, ire sagar botobat neke dosa-dosa ire.’

31 Abraham kuhui, ‘Amun ire mo tumun hiye sa tunulis huang kitab-kitab Musa lukun kitab-kitab nabi-nabi, sareh ire mo prasaya ble naan lun matei welum waleng.’"