1 Bodoa Yunus tong TUHAN Allahne, neke huang sanai kenah hiyo. 2 Uhuine,

"Huang kasasatku, ku nerau TUHAN, tahui Ne nyamut ku,

teke botuk dinia lun matei ku mingkiak,

tahui Nu keringo eau wawaku.

3 Haot Nu monting ku tong uneng sa lalem,

tong puhet tahik,

tahui ku sinimpun awi ranu;

kahai kulupuat lukun umak Nu ngililing ku.

4 Tahui ku bapaner: haot tunulak ku neke tama mate-Nu.

Behe ku tau neau eso blai-Nu sa barasih.

5 Kahai ranu haot ngapungku, ngantam umurku, tahik ngililing;

lut tahik ngililit utekku.

6 Tei hane gunung. Ku leteng tei hane tane, jawongne nyawalang tei likut ku,

de sekekelane. Hayak hiyolei Nu pakamai umurku.

Teke huang luang ogang, Oh TUHAN, Allahku.

7 Rahat aheng ku uyuh mole tei huang ku,

tirikingatku lukun TUHAN tahui hampe doaku tong Nu,

tong huang blai-Nu sa barasih.

8 Ire sa basaput lukun berhala awe bugunai,

ire sa noyak Tuhan sa sasi ire lukun bukuh.

9 Tapi ku kuhui syukur lukun TUHAN sagar ngokoi kurban tong Tuhan,

hiye sa kanajanji ku sagar panayat.

Kasalamatan naan neke TUHAN!"

10 Libas hiyo bipirman TUHAN lukun kenah hiyo, tahui kenah hiyo nua Yunus tong pampang.