1 Tapi hal hiyo mla pikiket aheng Yunus, tahui sangit ne. 2 Tahui bodoa ne tong TUHAN, uhui ne: "Oh TUHAN, maka haot ku kuhui hal hiyo, rahat ku eso tei negri ku? Hiyo ganane, ku hono pukuyo arep ku neke Tarsis, gana ku tanau, TUHAN Allah sa penu kumurah aheng lukun pangahi mo golek sangit. TUHAN pangahi lukun bukuh tahui sa meneser gana jangan sa kakan punuhulet-Ne. 3 Jari hayak ti, oh TUHAN go bo nyawa ku, gana keleh ku matei neke ku welum."

4 Samut TUHAN: "Tau nu sangit?"

5 Yunus haot losek melah leu hiyo tahui muneng tei tuhi Timur. Ne gawi suruap tei hiyo, tahui maharung huang suruap hiyo. Kandrei hiye sa sagar jari munan leu Niniwe. 6 Tahui TUHAN Allah putumu erai poneng pumule sa pidium Yunus, de Yunus tihibur neke kingiket ahengne.

7 Kiat andrau Allah gawi erai bulot lungkung, sa kuman wakat pumule hiyo tahui layo. 8 Libas mate andrau hulet, Allah puhulet riwut sa malayong neke tuhi Timur. Yunus migisit pisan kuno kai andrau sa malayong ngunau sunuru kuno utekne, Yunus manyarah uhuine: "Kelehku matei neke ku welum."

9 Tahui uhui Allah lukun Yunus: "Kuno hiye nu sangit gana pumule hiyo?"

Samutne: "Tau ku sangit hampe matei.

10 Tahui uhui TUHAN: "Nu kararo pumule hiyo, sa dodoho nu awe heka putumu pumule hiyo, sa tumu huang erai malem tei kiat andraune layo. 11 Ngunau awe Ku mo dat sehu, gana Niniwe leu sa gaya hiyo. Naan saratus ruempulu ribu lun sa mo tau ngebeda hiye sa asuh lukun hiye sa dat.