1 Tahui TUHAN bipirman lukun Yunus de sa kurueh kaline, ngunau ti: 2 "Buat, tulak tong Niniwe, leu sa gaya aro, tahui pahampe lukun ire wesen sa dokoi-Ku tongnu."

3 Kinsen Yunus, tahui tulak tong Niniwe, susuai lukun pirman TUHAN. Niniwe isa lei sa mengagumkan gayane, telu andrau pangalan luasne. 4 Malai Yunus huluk tong huang leu hiyo erai andrau alan kongorone, tahui ne mara: "Epat pulu andrau eso maka Niniwe sagar kanabalik kinibilei."

5 Lun Niniwe prasaya lukun Allah, tahui ire patau de puasa neke lun sa tuha hampe sa nikia, pakai kain kabung.

6 Hayak hampe kabar hiyo tong raja leu Niniwe, minau ne neke takhtane, delepakne jubahne, tahui sunuruwoune kain kabung, tahui ne maharung tei munan belenun. 7 Tahui munan singku raja lukun pajabatne nyingku lukun kuhui tei Niniwe ngunau ti:

"Mirisia lukun eha pemelum, lembu, sapi, lukun kaming domba mo tau kuman hiye-hiye, lukun mo tau kinum ranu. 8 Harus kongoreng mirisia busuruwou kain kabung. Kongoreng eha pemelum sunuruwou kain kabung. Tahui ire bodoa tong Allah, sining kulun waleng neke hadatne, lukun neke kangasar sa haot dawine. 9 Behe Allah sagar meneser neke kasangit-Ne sa mentur menar hiyo, de taka mo bajangan.

10 Hayak Allah neau gawi ire hiyo, ngunau awe ire bapaling neke hadat ire, tahui meneser Allah gana bajangan sa haot daransana-Ne tong ire, tahui Ne mo jari nguhukum ire.