As 10 parábolas mais importantes de Jesus

Mukozyanyo womuna Samaliya Mubotu

25 ✝Imwi nako mwiiyi wo Mulawo wakeza kuli Jesu okusola kumuca kateeti, "Omwiiyi mubotu, ino ndeelede kucita nzi kuteegwa nditambule buumi butamani?"

26 Jesu wakamutaba kuteeti, "Ino Malembo aamba kuteeti nzi? Ino waapandulula buti?"

27 ✝Mpoonyina mwaalumi wakateeti, "‘Yanda Mwami Leza wako omoyo wako woonse, omuuya wako woonse, enguzu zyako zyoonse, emizeezo yako yoonse’ ape yanda muntunyoko mboonyina mboliyanda."

28 ✝Jesu wakamutaba kuteeti, "Waamba kabotu. Cita mboonyina namu, uyooboo buumi."

29 Kono mwiiyi wo Mulawo mukuyanda kulisalazya, wakabuzya Jesu kuteeti, "Ino ngwani muntuma ngondeelede kuyanda?"

30 Mpoonyina Jesu wakataba kuteeti, "Imwi nako kwali umwi mwaalumi wali mumusinzo kuzwa ku Jelusalemu kaya ku Jeliko. Munzila bafumpi bakamulwana, kumutubula, okumuuma okumusiya kayuminide. 31 Kuzwaawo, kwakeza mupaizi umwi kayoobweenda munzila njoonyeeyo, kono naakabona mwaalumi ooyu, wakamuleya. 32 Awe mu Levi naakasika acibaka eeco wakamubona mpoonyina wakamuleya. 33 ✝Kono mu Samaliya walimumusinzo wakasika aali mwaalumi ooyu. Naakamubona wakamufwida mangʼeke. 34 Mpoonyina wakamwiinkila okutila waini azilonda zyakwe okumunanika mafuta mpoonyina okumuzambaila zisila. Amane wamutansika ambongolo yakwe okumutola kungʼanda yabeenzu, ooko kwaakakumubabalela. 35 Buzuba bwakacilila mu Samaliya wakapa mwini ngʼanda yabeenzu mali omuwaya-waya we nsiliva obile okumwaambila kuteeti, ‘Umubabalele kabotu, nakuteeti ubelesye ainda aawa, ndaakupiluka ndizookubbadela.’"

36 Mpoonyina Jesu wakamaninizya kateeti, "Ino mumuzeezo wako, ngwani aalaaba bamaalumi botatwe wakaba muntunyina mubotu kulooyu mwaalumi wakalwanwa abafumpi?"

37 Mwiiyi wo Mulawo wakataba kuteeti, "Ngooyo wakamufwida mangʼeke."

Mpoonyina Jesu wakamutaba kuteeti, "Mbombubo, iino koya ukacite mboonyina namu."

4 "Na umwi muntu kajesi mbelele zili mwaanda mpoonyina yomwi yasweeka, ino inga wacita nzi? Ede inga wasiya zili makumi aalifuka efuka musaka okwiinka kuyooyandoola eeyo yomwi isweekede mane kusikila akiijane. 5 Aijana ulabotelwa loko, okwiisempula. 6 Mpoonyina aitola kungʼanda, uyooita beenzinyina antoomwi ambabambenaabo okubaambila kuteeti, ‘Atusekelele antoomwi, kaambo ndaijana mbelele yangu yasweekede.’ 7 Ndimwaambila kuteeti, mboonyina namu okujulu kulaba kusekelela loko kaambo kasizibi omwi wasanduka kwiinda baluleme bali makumi aalifuka efuka batayandiki kusanduka.

Cikozyano ca Isi Uulekelela

11 Kuzwaawo Jesu wakazwida anembo kateeti, "Kwali mwaalumi wajesi bana basyimani bobile. 12 Mpoonyina muniini wakateeti kuliisi, ‘Tata, ndipe caabilo cangu colubono.’ Mpoonyina mwaalumi ooyu wakaabanya lubono lwakwe akati kabana bakwe bobile. 13 Nikwakainda feela mazuba maniini, ooyu muniini wakauzya lubono ndwaakapedwe okubweza mali oonse amane waya kunyika iili kule kwaakaakutatoola mali mukucita zyobufuba-fuba. 14 Wakalumana lubono ndwaajesi, kuzwaawo mucisi oomo mwakanjila nzala ilunda kasuko, mpoonyina wakatalika kupenga. 15 Kuzwaawo wakatalika kubeleka kuluumwi muntu womucisoomo, wakamutuma mumyuunda yakwe kuyoosanina ngulube*. 16 Musyimani ooyu walikufwa nzala cokuteeti walikunyomenena kulya zyokulya zye ngulube kono taakwe walikumupa cili coonse. 17 Kono kumamanino naakaliyeeya wakateeti, ‘Boonse babelesi ba tata balalya mbobayandila, iino mebo kuno ndaandoofwa enzala! 18 Ndilapiluka kuli tata okuyoomwaambila kuteeti, "Tata, ndakabisya kuli Leza okuli yebo. 19 Tandiceelede kwiitwa kuteeti mwana wako, ndibweze feela mbuli umwi wababelesi bako."’ 20 Mpoonyina wakanyamuka okupiluka kuliisi. Kono kacili kule omuunzi, isi wakabona mwana wakwe. Moyo wakwe wakazula mangʼeke, mpoonyina wakamuzuzila, okuyoomukumbata okumumyoonta.

21 "Mpoonyina we wakateeti, ‘Tata, ndakabisya kuli Leza okuli yebo. Tandiceelede kwiitwa kuteeti mwana wako.’ 22 Kono bo baisi bakaita babelesi babo, kabateeti, ‘Amufwambaane! Amweete jansi liinda kubota, mumuzwaatike. Mumubike nwenwe kumunwe, mwamana mumuzwatike ezikatulu. 23 Mpoonyina mweete munamani uneneede*, mujaye kuteegwa tupange mukiti tusekelele, 24 kaambo ooyu mwaanangu musyimani walifwide kono iino wabuka, waliswekede, kono iino wajanwa.’ Mpoonyina mukiti wakatalika.

25 "Aleeyo nako mwana wakwe mupati taaliwo, walikumuunda. Iino naalikuyoobupiluka, naakaswenaafwiifwi omuunzi wakamvwa kwiimba okuzyana. 26 Kumane wakaita umwi wababelesi okumubuzya kuteeti, ‘Ino niinzi cicitika?’ 27 Mubelesi wakateeti, ‘Mweencaako wapiluka mpoonyina bauso bajaya munamani uneneede, kaambo bamutambula kali muumi ape kalikabotu.’ 28 Kono mupati wakanyema loko mane wakakaka okunjila mungʼanda. Mpoonyina isi wakazwaanze okumukombelezya kuteeti anjile. 29 Kono wakataba isi kuteeti, ‘Kolanga, myaaka yoonse eeyi ndakubelekela mbuli muzike, ape lyoonse ndalikucilila malailile aako. Ino wakandipedeenzi? Taakwe naanga mpongo feela kuteeti ndisekelele abeenzuma! 30 Kono ooyu mwana wako, wakatatoola lubono lwako kumahuule, we ucisika feela wamujaila munamani uneneede!’ 31 Isi wakataba kuteeti, ‘Mwanaangu, yebo ukalaandime lyoonse, ape zyendijesi zyoonse zizyako. 32 Kono twacita kabotu kusekelela kaambo ooyu mweencaako walifwide, iino wabuka, walisweekede, iino wajanwa.’"

Cikozyanyo co Mufalisi o Simutelo

9 Kuzwaawo Jesu wakapa cikozyanyo eeci kubantu balikulimvwa kuteeti baliluleme okunyansilizya bamwi boonse. 10 Wakateeti, "Kwali baalumi bobile bakainka ku Ngʼanda ya Leza kuyookomba. Umwi wali Mufalisi umwi wali simutelo. 11 Mufalisi wakaima okukomba kalyaamba kuteeti, ‘Leza ndilakulumba mukuteeti tandili mbuli bantu boonse, tandili mufumpi, tandili muntu uutasyomeki, tandili simamambe naanga mbuli ooyu simutelo. 12 Ndiliimyaanga zyokulya mazuba obile munsondo, ape ndilakupa ecekumi kuli zyoonse zendijana.’ 13 Kono simutelo wakaiminaale okukacilwa kulanga kujulu naalikukomba, kono walikulyuuma acamba kateeti, ‘Leza ndifwide mangʼeke, kaambo ndilisimucita zibi!’ 14 ✝Mpoonyina Jesu wakateeti ndimwaambila kuteeti, simutelo wakapiluka kungʼanda yakwe kalulamikidwe kutaamba Mufalisi." Ndamwaambila cikozyanyo eeci kuteegwa muzibe kuteeti, "Boonse balisumpula bayootolwa ansi ape aabo balitola ansi bayoosumpulwa."

Muvubi o Lazalo

19 Mpoonyina Jesu wakapa eeci cizyanyo, "Imwi nako kwali mwaalumi muvubi wali kuzwaata zizwaato zitalidulili, walikulya zilyo zibotu okuponoobotu loko buzuba-obuzuba. 20 Ape kwali omwaalumi mupenzi wali kuteegwa Lazalo, waleezilonda mubili woonse. Walikweetwaanga amulyango wooyu muvubi, 21 kalangila kulya zyalikusyaala okuwa kuzwa atefule lyo muvubi. Ababwa balikuza okumyankoota zilonda zyakwe. 22 Kuzwaawo, muntu mupenzi wakafwa okubwezegwa abangelo kuyookala kumbaloo Abbulahamu. Mpoonyina awe muvubi wakafwa okuzikwa. 23 Kumane wakainka kucibaka cabafu, kwaakamvwide kucisa kupati loko. Mpoonyina wakalanga mujulu okubona Abbulahamu kule loko kali o Lazalo kumbali lyakwe. 24 Mpoonyina wakaita kateeti, ‘Tata Abbulahamu! Ndifwide mangʼeke, utume Lazalo atompe munwe wakwe mumaanzi, azootontozye lulimi lwangu, kaambo ndimvwide kucisa kupati loko mumulilo muno!’ 25 Kono Abbulahamu wakateeti, ‘Mwanaangu, yeeya kuteeti mubuumi bwako walipedwe zintu zibotu zyoonse, we Lazalo wapedwe zintu zibi zyoonse. Kono iino we ulilikwaide okuno ayibo ulapenga ooko. 26 Kutaleeco feela, akati kesu ayibo kuli mulindi mulamfu loko cokuteeti taakwe muntu uukonzya kuzubuka kuzwa kuno kwiinka ooko, naanga uukonzya kuzubuka kuzwa ooko kuza kuno.’ 27 Mpoonyina muvubi wakateeti, ‘Ano nacilinamu, tata Abbulahamu ndakumbila kuteeti, utume Lazalo ku ngʼanda ya tata, 28 kondijesi bazyalwama bosanwe. Akabacenjezye kuteegwa batakazookuno kucibaka cokucisa loko.’ 29 Abbulahamu wakataba kuteeti, ‘Bazyalwanyoko balijesi Mulawo wa Mozesi amalembe aabasinsimi aanga abacenjezya, beelede kwaaswiilizya zyaamba.’ 30 Ooyu muvubi wakataba kuteeti, ‘Nee, tata Abbulahamu, kutali eeco feela, kono kuteeti umwi wabuka kuzwa kubafu okubainkila inga basanduka okusiya zibi zyabo.’ 31 Kono Abbulahamu wakateeti, ‘Batamvwa Mulawo wa Mozesi amalembe aabasinsimi, naanga omwi wabuka kuzwa kubafu tabakoosyoma.’"