1 Bumwi buzuba Jesu wali kukomba mucibaka cimwi. Naakamana, umwi sikwiiya wakwe wakateeti kulinguwe, "Mwami, twiisye kukomba mboonyina mbuli Joni mbwakaiisya basikwiiya bakwe."

2 Mpoonyina Jesu wakabaambila kuteeti, "Mwanookomba kamwaamba namu,

‘Tateesu,

alilemekwe zina lyako.

Abuze Bwami bwako,’"

3 "Utupe cilyo* cesu cobuzuba-obuzuba.

4 Utujatile zibi zyesu,

kaambo aswebo tulabajatila boonse batubisizya.

Ape utatutoli mumasunko."

5 Mpoonyina ape Jesu wakabaambila kuteeti, "Atwaambe kuteeti, umwi wenu wainka kungʼanda yo mweenzinyina akataamasiku okwaamba kuteeti, ‘Mweenzuma, ndipe kwateni zinkwa zyotatwe, 6 kaambo ndatambula umwi mweenzuma ulimulweendo weza kungʼanda yangu, kono tandikwe cokumupa kuteegwa alye.’ 7 Mpoonyina atwaambe kuteeti ooyo uli mungʼanda wataba kuteeti, ‘Utandikatazyi! Twajala kale mulyango ape swebo abana twalala. Tandikonzyi kubuka kuzokupa zyoyanda.’ 8 Ino inga cacitika namu na? Ndimwaambila kuteeti, naanga katakonzyi kubuka okukupa cinkwa kaambo mweenzinyoko, inga wabuka okukupa zyoonse zyoyanda kaambo tayandi kubija zina. 9 Mpoonyina ndimwaambila kuteeti amukumbile mulapegwa, amuyandoole mulajana, amukonkomone muyoojulilwa mulyango. 10 Nconzyo boonse bakumbila balatambula, aabo bayandoola balajana, mulyango ulajulwa kuli woonse ooyo ukonkomona. 11 Ino kuli isi akati kenu unga mwana wakwe amukumbila nswi umupa nzoka na? 12 Naanga akumbila ji umupa kabanze? 13 Na kuteeti nywebo nobasizibi kamuzi kupa zintu zibotu kubana benu, ino Uso uuli kujulu inga wakacilwa buti kupa Muuya Uusalala kulaabo bamukumbila?"

14 Bumwi buzuba Jesu walikutanda dimona lyalikupa umwi mwaalumi kutaamboola. Nilyakazwa, mwaalumi ooyu wakatalika kwaamboola. Mpoonyina mabunga aabantu akakomokwa, 15 ✝ kono bamwi bantu bakateeti, "Ngu Bbelizabbuli mwami wamadimona nguumupa nguzu zyokwaatanda."

16 ✝Bamwi balikuyanda kuca Jesu mpoonyina bakamukumbila kuteeti acite citondezyo camaleele kuzwa kujulu. 17 Kono Jesu walizi zyobalikuyeeya, mpoonyina wakateeti kulimbabo, "Kufumbwa cisi caanzeene mutubunga tulwaanisyanya mulicato cilasinyeka ape mukwasyi waanzeene mulicawo ulamwacooka. 18 Mwaamba kuteeti Bbelizabbuli nguundipa nguzu zyokutanda madimona. Kono na bwami bwa Satani bulootubunga tulwana mulicato, ino bulaima buti njii? 19 Iino na muyeeya kuteeti nditanda madimona kubelesya nguzu zya Bbelizabbuli, ano abacilili benu zyobabelesya kwaatanda. Kokuteeti mbabayooba baatuzi benu. 20 Kono na kuteeti nditanda madimona munguzu zya Leza, kokuteeti Bwami bwa Leza bwamusikila kale.

21 "Na mwaalumi singuzu kalibambilide ezilwaanyo zyakwe kalindilila ganda lyakwe, zibya zyakwe zyoonse inga zilikwabilidwe kabotu. 22 Kono na uleenguzu kwiinda mukamwini ganda wamulwana okumuzunda, ulamunyanga zilwaanyo eezyo zyaalikusyoma okuzyaabanya zyabba zyoonse."

23 ✝ Mpoonyina Jesu wakamanizya kateeti, "Kufumbwa ooyo utali amebo nguundilwana, ooyo utabunganiki amebo nguumwaya."

24 Ape Jesu wakateeti, "Na muuya mubi wazwa mumuntu, ulainda mucimpayuma kuyandoola cibaka cokupumwida. Watacijana cibaka eeco, ulalyaamboozya kuteeti, ‘Ndilapilukila kungʼanda yeciindi kundakazwa.’ 25 Mpoonyina ulapiluka okujana ngʼanda ilitanyedwe okubambwa kabotu. 26 Mpoonyinaawo ulainka okweeta myuuya iimbi mibi kwiinda nguwo iili ciloba, ileza okuzookala mwateni. Kuzwaawo buumi booyo uunjidwe bulabija kwiinda kusaanguna."

27 Jesu naakaamba namu, umwi mwanakazi wakoongolola akati kembunga kateeti, "Ulilelekedwe mwanakazi wakakutumbuka okukunyonsya!"

28 Kono Jesu wakamutaba kuteeti, "Balelekedwe loko mbaabo bamvwa majwaa Leza okwaacilizya!"

29 ✝ Bantu nibalikuyoobuvula, Jesu wakaindilizya kateeti, "Mbaasizibi balibuti bantu bamazuba aano! Bayanda kuteeti ndibacitile citondezyo camaleele, nee! Tainsi mbonditacite, kunze akubapa citondezyo cilimbuli cakacitikila musinsimi Jona. 30 ✝ Mboonyina musinsimi Jona mbwaali citondezyo kubantu boku Niniva, awe Mwanoo Muntu uyooba citondezyo kubantu besunu. 31 ✝ Mubuzuba bobwaatuzi, mwami wecanakazi woku Shebba uyoopa bumboni bokuteeti bantu besunu baloomulandu kaambo we wakazwa kule loko okuzooswiilizya majwi oobusongo bo Mwami Solomoni. Iino ndimwaambila kuteeti, mpali mupati aano wiinda Solomoni, kono mukaka kumumvwida. 32 ✝ Mubuzuba bobwaatuzi bantu boku Niniva bayoopa bumboni bokuteeti ooyu musela uloomulandu kaambo bo bakeempa okusanduka nibakamvwa Jona kakambooka. Iino ndimwaambila nconzyo kuteeti, mpali mupati aano wiinda Jona, kono mukaka kweempa."

33 ✝ Mpoonyina Jesu wakateeti, "Taakwe muntu umunika lampi okwiisisa naanga kulibika munsi ecisuwo, kono ulibika acikazikilo calyo kuteegwa boonse banjila bamunikilwe. 34 Meenso aako kekampalamba komubili wako. Nakuteeti meenso aako kaali kabotu, kokuteeti mubili wako woonse unoozwide mumuni. Kono na meenso aako taali kabotu, mubili wako woonse unooli mumudima uusiya mbii! 35 Kaambo keeci ucenjele kuteeti mumuni uuli mulindiwe tuuli mudima. 36 Na mubili wako woonse kuuzwide mumuni, kakutakwe kadima nekaceya, unoomweka mwee mbuli lampi mbolikumunikila omumuni walyo."

37 Jesu naakamana kwaamboola, umwi Mufalisi wakamutamba kuteeti akalye kungʼanda yakwe. Mpoonyina Jesu wakanjila mungʼanda okukala kuteeti alye. 38 Ooyo Mufalisi wakakomokwa naakabona kuteeti Jesu tasambide kumaanza katanalya kaambo eeci ticali kweendelana ecizo cama Juda. 39 Mpoonyina Mwami wakamwaambila kuteeti, "Iino nywebo no Bafalisi musanzya nkomoki emikeke yenu anze feela, kono mukati kenu muzwide busyacivule-mwaangu obubi. 40 Nywebo nobafuba-fuba! Ino Leza wakapanga aanze tiinsinguwe wakapangama omukati na? 41 Kono amupe bapengede kuzwa kunsi emyoyo yenu, mpoonyina ndamwaambila kuteeti zyoonse ziyoomusalalila.

42 ✝ "Maawe kulinywebo no Bafalisi! Mulapa cekumi cezisyango azyeezyo zivwelanywa muzilyo zyenu kuli Leza, kono mulakacilwa kucita ziluleme okuyanda Leza. Eezi mweelede kuzicita kakutakwe kusulaika zimwi.

43 "Maawe kulinywebo no Bafalisi! Muyandisya kukala azibbula zibotu loko muzikombelo okulumelesigwa elikute mumisika. 44 Maawe kulinywebo! Kaambo muli mbuli zyuumbwe zitalibonyi, bantu zyebalyatooka kabatezi kaambo taakwe zitondezyo."

45 Umwi mwiiyi wo Mulawo wakamutaba kuteeti, "Omwiiyi, waamba namu, aswibo watutuka!"

46 Mpoonyina Jesu wakataba kuteeti, "Maawe okulinywebo nobamayi bo Mulawo! Mubika mikuli milemu abantu, kono nywebo mulakaka kubagwasya kwiiyumuna nekuceya. 47 Maawe kulinywebo! Muyakila basinsimi zyuumbwe zibotu, mbeenyaabo basikale benu mbibakajaya. 48 Nobeni mwatondezya kuteeti mulazizumina zyakacita basikale benu, kaambo bakajaya basinsimi mpoonyina nywebo mwabayakila zyuumbwe. 49 Kaambo keeci, Leza mubusongo bwakwe wakaamba kuteeti, ‘Ndiyoobatumina basinsimi abaapositola, bamwi baaba bayoobajaya okupenzya bamwi.’ 50 Mpoonyina bantu besunu bayoopegwa mulandu wokujaya basinsimi boonse bakajaigwa kuzwa kumalengelo enyika, 51 ✝ kuzwa kukujaigwa kwa Abela kuyoosika kukujaigwa kwa Zakaliya, ooyo wakajailwa akati kecipaililo ecibaka cisalala mu Ngʼanda ya Leza. Nconzyo ndamwaambila, bantu beeino nako bayoopegwa mulandu kaambo kaaba boonse!

52 "Maawe kulinywebo nobamayi bo Mulawo! Mwakasisa nkii yecitendele coluzibo. Nywebo tamunjilide ape mukasyaabo basoleka kunjila mwateni!"

53 Mpoonyina Jesu naakazwa kucibakeeco, bamayi bo Mulawo a Bafalisi bakatalika kumusumuna okumubuzya mibuzyo azintu zinji, 54 bali kusola kumuteya kuteegwa bamuce aamba citalikabotu.