1 Muciindi eeco, Kaisala Ogasitasi woku Loma wakalailila kuteeti bantu boonse balimubulelo bwe Loma bakalilembye. 2 Ooku kulilembya kwali kokusaanguna mubulelo bweci Loma. Kwakacitika nako Kwiliniyasi naali mweendelezi woku Siliya. 3 Muntu omuntu wakainka kutaindi kwazwa kuyoolilembya.

4 Josefa wakazwa mutaindi lya Nazaleta mu Galileya okwiinka mutaindi lya Bbetelehemu mu Judiya ooko Mwami Deveti kwakazyalilwa kaambo wali wolunyungu lwa Deveti. 5 Wakainka kuyoolilembya o Maliya wakatangidwe kukwatwa kulinguwe.* Maliya walimisi. 6 Kabacili ooko buzuba bwa Maliya bokutumbuka bwakasika. 7 Mpoonyina wakatumbuka mwana musyimani wokusaanguna. Wakamuvungaila mumasila. Mpoonyina wakamulazika mucilido cebanyama, kaambo tikwalikwe cibaka mungʼanda yabeenzu.*

8 Oobo busiku mumyuunda afwiifwi o Bbetelehemu kwakali beembezi balikulindilila matanga eembelele zyabo. 9 Mpoonya mpoonya mungelo wo Mwami wakaboneka kulibo, obulemu bo Mwami bwakamweka okubazinguluka, mpoonyina bakayoowa loko. 10 Kono Mungelo wakateeti, "Mutayoowi kaambo ndeeta makani mabotu aateete kubotelwa kupati kubantu boonse. 11 Ndyoonya sunu, mutaindi lya Deveti, Mufutuli wenu wazyalwa, Mwami Mesiya! 12 Eeci ceciyooba citondezyo kulindinywe, muyoojana mbuumbu uvungailidwe mumasila kalede mucilido cabanyama."

13 Mpoonya-mpoonya kwakalibonya bangelo basinkondo bokujulu banji antoomwi omungelo, kabalumbaizya Leza

14 kabateeti, "Bulemu kuli Leza kujulu lyamajulu,

oluumuno ansi kulaabo mbakondwaabo!"

15 Bangelo nibakapiluka kujulu, beembezi bakaambilana kuteeti, "Atwiinke inaawa ku Bbetelehemu tukabone ecicintu cacitika caatwaambila Mwami."

16 Mpoonyina cokufwambaana bakainka, okumujana Maliya o Josefa okubona mbuumbu kalede mucilido cabanyama. 17 Beembezi nibakamubona mwana, bakabaambila boonse balikwateni zyakaamba mungelo kujatikizya mwana. 18 Boonse bakamvwa zibakalungulula beembezi bakakomokwa. 19 Maliya wakazibika eezi zintu zyoonse mumoyo wakwe ape walikuziyeeyaanga nako yoonse. 20 Beembezi bakapiluka kabayoobwiimba okulumbaizya Leza kaambo zyoonse zibakabona okumvwa zyakaba mboonyina mbuli mbwaakabaambilide mungelo.

21 ✝Nikwakainda Nsondo, niyakasika nako yokuteeti mwana apalulwe, wakauzikwa kuteeti Jesu, zina mungelo ndyakamupa katana kumitwa.

22 Niyakasika nako yokuteeti Josefa o Maliya bazuzikizye Mulawo wa Mozesi waamba kuteeti mwanakazi wakazwa akutumbuka weelede kulisalazya, bakatola mbuumbu ku Jelusalemu kuyoomupeda ku Mwami, 23 ✝mboonyina mbuli mbokulembedwe mumulawo wo Mwami kuteeti, "Mwana musyimani wokusanguna weelede kupedwa kuli Leza, 24 ✝okuyoopa cipaizyo ce nziba ziniini zyobile, na nkwilimba ziniini zyobile kwendelana o Mulawo wo Mwami."

25 Muciindi eeco, kwakali mwaalumi walikuteegwa Simiyoni walikukala mu Jelusalemu. Wali muntu uululeme, uyoowa Leza, walikulindila kufutulwa kwa Izilaili. Muuya Uusalala walaalinguwe, 26 ooyo wakamuyubunwida kuteeti tayoofwi mane akamubone Mesiya wo Mwami. 27 Simiyoni kasolwedwe o Muuya wa Leza wakanjila mulabba lye ngʼanda ya Leza. Jesu nibakamweeta mwateni bazyali bakwe kuteegwa acitilwe celeede kweendelana o Mulawo, 28 Simiyoni wakamubweza mumanzaakwe o kulumba Leza kateeti,

29 "O Mwami Singuzu Zyoonse! Wazuzilikizya ciwakasyomezya,

iino leka mubelesi wako afwe muluumuno,

30 kaambo menso aangu amubona Mufutuli nguwakatuma,

31 nguwakabambila mumenso aabantu boonse.

32 ✝Ooyu ngomumuni uyubununa Leza kuli Bamasi

ape uyeeta bulemu kubantu bako bana Izilaili."

33 Baisi abanyina mwana bakakomokwa kumvwa majwi ngaakaamba Simiyoni kujatikizya mwana. 34 Simiyoni wakabaleleka mpoonyina wakaambila Maliya banyina mwana kuteeti, "Ooyu mwana wakasalwa o Leza kuzosinyoona banji ape okufutula banji mu Izilaili. Uyooba citondezyo kuzwa kuli Leza eeco bantu banji cobayookazya. 35 Kaambo kanguwe, mizeezo yemyoyo minji iyooyubununa. Ape ayibo mause ayooyasa moyo wako, mboonyina mbuli sabule libosya."

36,37 Kwali musinsimi mukamufu wali mucembele loko wezina lya Ana, mwanaa Faniwelu, womukowa wa Asha. Waleemyaka iili makumi aalilusele aone yokuzyalwa. Wakakwetwe feela kwe myaka iili ciloba. Lyoonse wali mulabba lye Ngʼanda ya Leza, kabeleka kwiinda mukukomba okuliimya kulya masiku esikati. 38 Aciindi coonyina eeco, wakasika kulibo okutalika kalumba Leza okwaamba zijatikizya mwana kuli boonse balikulindila Leza kuteeti anunune Jelusalemu.

39 ✝Josefa o Malia nibakamana kucita zyoonse zyakali kuyandika mu Mulawo wo Mwami, bakapiluka kulibo ku Nazaleta mu Galileya. 40 Mwanooyu wakakomena okubeenguzu, kazwide busongo ezileleko zya Leza zyalaalinguwe.

41 ✝Mwaaka omwaaka bazyali ba Jesu bali kwiinkaanga ku Mukiti we Pasika ku Jelusalemu. 42 Jesu naaleemyaaka ili kumi ayobile, bazyali bakwe bakainka ku Mukiti mbuli cilengwa cabo, okumutolelezya. 43 Mukiti niwakamana nibalikuyobupiluka kungʼanda yabo ku Nazaleta, Jesu wakasyaala mu Jelusalemu kono bazyali bakwe tibalizi. 44 Bali kuyeeya kuteeti mpali, uyobweenda mubbunga lyabantu. Nibakeenda musinzo wobuzuba bomwi, bakamuzula, kuzwaawo bakatalika kumuyandoola akati ka mabbululu a beenzinyina. 45 Taakwe nibakamujana, mpoonyina bakapiluka ku Jelusalemu kabayoobumuyandoola. 46 Nikwakainda mazuba otatwe, bakamujana mulabba lye Ngʼanda ya Leza kakede abamayi beci Juda kalimukubaswiilizya okubabuzya mibuzyo. 47 Boonse balikuswiilizya bakalukomokwa luzibo lwakwe emitabilo yakwe. 48 Bazyali bakwe bakakomokwa nibakamubona, mpoonyina banyina bakamwaambila kuteeti, "Mwanaangu, niinzi niwatucita namu? Bauso amebo twalikuyoobukuyandoola katulikaleledwe loko."

49 Jesu wakataba kuteeti, "Ino niinzi nimwali kundiyandoola? Timwalizi kuteeti ndeelede kuba mu Ngʼanda ya Tata na?" 50 Kono taakwe nibakaziba caalikwaamba.

51 Mpoonyina Jesu wakainkaabo ku Nazaleta, okwiindilizya kubamvwida. Banyina bakazibamba zyoonse eezi mumoyo wabo. 52 ✝Jesu walikuyoobukomena mumaano omuciimo ape wakaba mwana uuyandwa loko o Leza ape abantu.