1 Mpoonyina benkuta boonse bakanyamuka okutola Jesu kunembo lya mweendelezi Pilato. 2 Bakatalika kumutamizya kuteeti, "Ooyu mwaalumi twamujana kayunga bantu besu, walikubaambila kuteeti batanotela mutelo kuli Kaisala ape walikulyaamba kuteeti ngonguwe Mesiya, Mwami."

3 Mpoonyina Pilato wakabuzya Jesu kuteeti "Ino yebo ndendiwe mwami wama Juda na?"

Wakamutaba kuteeti, "Waamba."

4 Amane Pilato wakaambila bapaizi basilutwe amabunga abantu kuteeti, "Tandijene mulandu mulooyu mwaalumi."

5 Kono nibakazumanana loko kuteeti, "Uyunga bantu eziisyo zyakwe Judiya yoonse. Wakatalikila mu Galileya mpoonyineeno weza kuno."

6 Pilato naakamvwa namu wakabuzya kuteeti, "Ino ooyu mwaalumi muna Galileya na?" 7 Nibakaamba kuteeti Jesu walikuzwa kucooko ca Galileya Helodi kwaali kulela, wakamutumina kuli Helodi kaambo anguwe wali mu Jelusalemu aleeyo nako. 8 Helodi wakabotelwa loko naakabona Jesu, kaambo walikuzimvwaanga zyakwe, ape kweciindi cilamfu walikuyanda kubona Jesu kacita zimwi zitondezyo zyamaleele. 9 Mpoonyina Helodi wakabuzya Jesu mibuzyo minji, kono Jesu taakwe naakataba. 10 Kuzwaawo bapaizi basilutwe abamayi bo Mulawo bakaswena afwiifwi okutalika kutamikizya Jesu loko. 11 Mpoonyina Helodi abasilumamba bakwe bakapenzya Jesu okumufubaazika, mpoonyina bakamuzwaatika cizwaato cobwami okumupilusya kuli Pilato. 12 Mboonyina oobo buzuba, Helodi o Pilato bakatalika kumvwana, nekuba kuteeti kusule balizondene.

13 Kuzwaawo Pilato wakaita antoomwi bapaizi basilutwe, basololi abantu, 14 okubaambila kuteeti, "Mweeta ooyu mwaalumi kulindime, okwaamba kuteeti walikuyunga bantu. Kono amumvwisisisye, ndamubuzya-buzya mumenso eenu, taakwe mulandu ngundamujanina kuli zyoonse zimulimukumutamikizya. 15 Naanga Helodi taakwe mulandu ngwaamujanina, caamupilusizya kuno kulindiswe. Calitondezya kuteeti taakwe caabisya kuteegwa ajaigwe. 16 Ndilamukwabboozya feela okumuleka ainke." 17 [Lyoonse aciindi cokusekelela Pasika, mweendelezi walikweelede kubalukulwida mwaange.]*

18 Bantu boonse bakoongolweda antoomwi kuteeti, "Ajaigwe! Tulukulwide Bbalabbasi!" 19 Ooyo Bbalabbasi waangilidwe manyongwe akacitikide mutaindi pati ape okujaya muntu.

20 Mpoonyina Pilato wakamboozyanya abo ape kaambo walikuyanda kulukulula Jesu. 21 Kono bakaindilizya koongolola kuteeti, "Akankaminwe aciingano! Akankaminwe aciingano!"

22 Mpoonyina Pilato wakabuzya katatu kuteeti, "Ino? Wacita mulandu nzi? Taakwe mulandu ngundajana wokuteeti mane ajaigwe! Iino ndilamukwabboozya feela okumulukulula."

23 Kono bakazumanana koongolola kuteeti, "Aakankaminwe!" Mpoonyina kumamanino majwaabo akazunda. 24 Mpoonyina Pilato wakaatula Jesu bwaatuzi mbubalikuyanda bantu. 25 Wakalukulula Bbalabbasi ngubalikuyanda, ooyo waangilidwe manyongwe ape okujaya muntu. Mpoonyina wakabapa Jesu kuteegwa bamucite mbobayanda.

26 Mpoonyina basilumamba bakatola Jesu. Nibalikuyoobuya, bakaswaana mwaalumi woku Sailini walikwiitwa kuteeti Saimoni walikuzwa kumiinzi kayoobuya mutaindi. Bakamujata okumubika ciingano amaheta okumunyamuzya cico musule lya Jesu.

27 Bbunga lyabantu lyakacilila musule, akati kabo kwali bamwi banakazi balikuyoobumulila. 28 Mpoonyina Jesu wakabacebuka okubaambila kuteeti, "Nobanakazi bomu Jelusalemu! Mutalili ndime, kono mulilile lwenu abana benu, 29 kaambo mazuba ayoosika bantu nebatikaambe kuteeti, ‘Balilelekedwe banakazi batakwe bana, batakazyala okunyonsya!’ 30 ✝ Eeco ceciindi bantu nebayoambila malundu kuteeti, ‘Tuwide!’ Okwaambila tulundu keteeti, ‘Tuvumbe!’ 31 Nakuteeti bacita zintu zilinamu kucisamu cicili citetete, ino niinzi ciyoocitika kucisamu ciyumu?"

32 Iino kwali ezigebenga zyobile zyakatolelezegwa kuteeti zikajaigwe antoomwi o Jesu. 33 Mpoonyina nibakasika acibaka ciitwa kuteeti "Kapapa komutwe" bakakankamina Jesu aciingano ezigebenga zyobile, comwi kululyo lwakwe cimbi kucigoyo cakwe. 34 ✝ Kuzwaawo Jesu wakateeti, "Tata bajatile kaambo tabazi zyebalimukucita!"

Mpoonyina basilumamba bakaabana zizwaato zyakwe kwiinda mukuuma cisolo. 35 ✝ Bantu baliimvwi ooko kabeebela kumwi basololeli beci Juda kabamufubazika kuteeti, "Wakafutula bamwi, alifutule anguwe nakuteeti ngo Mesiya ngwaakasala Leza!"

36 ✝ Abo basilumamba bakamufubaazika Jesu kwiinda mukumuswenena okumupa waini upapa, 37 okumwaambila kuteeti, "Na uli mwami wama Juda, lifutule!"

38 Atala omutwe wakwe kwalee cikwankwani calembedwe kuteeti, "Ooyu ngo Mwami wama Juda."

39 Mpoonyina umwi we zigebenga zyakankaminidwe aciingano wakatuka Jesu kateeti, "Tolindiwe Mesiya na? Lifutule antoomwi aswebo!"

40 Kono oyuumwi wakamunyemena kateeti, "Toyoowi Leza na? Tobwene kuteeti watambula cisubulo comwi anguwe. 41 Swebo twaatulwa kabotu kaambo tuleelela kufwida zyotwakacita. Kono we ooyu mwaalumi taakwe cibi caacita." 42 Kuzwaawo wakateeti, "Jesu, ukandiyeeye waakutalika kulela mu Bwami bwako!"

43 Mpoonyina Jesu wakamutaba kuteeti, "Ndikusyomezya kuteeti sunu unolaamebo mu Paladaizi*."

44,45 ✝ Nako yesikati, zuba nilyali kale akati kwakaba mudima nyika yoonse kwamawoola otatwe kaambo zuba lyakaleka kumunika. Mpoonyina sila lyo mu Ngʼanda ya Leza lyakayauka akati. 46 ✝ Mpoonyina Jesu wakoongolola kuteeti, "Tata! Ndibika muuya wangu mumanzaako!" Wakaamba namu okufwa.

47 Iino umwi mupati wabasilumamba beci Loma naakabona cakacitika wakalumbaizya Leza okuteeti, "Nconzyo mwaalumi ooyu waliluleme!"

48 Boonse bantu bakabungene kuzeeba kukankaminwa kwa Jesu nibakabona cakacitika bakapiluka kumaanda aabo, kabayoobulyuuma-uma azyamba kutondezya kuusa. 49 ✝ Kono beenzinyina ba Jesu antoomwi abanakazi balikuyobumucilila kuzwa ku Galileya, baimvwi aleele kabeebela.

50,51 Iino kwali mwaalumi walikwiitwa kuteeti Josefa walikuzwa mutaindi liitwa kuteeti Alimatiya mu Judiya. Wali mwaalumi walikabotu okululama, walikulindilila kuza ko Bwami bwa Leza. Nekuba kuteeti wali waabo Benkuta Mpati ya Majuda taali kweendelana emizeezo emicito yabo. 52 Wakainka kuli Pilato, okuyookumbila mutunta wa Jesu kuteeti akuuzike. 53 Naakazumizigwa, wakuuselusya mutunta okuuvungaila musila okuubika mumpangala yakasidwe mubbwe pati loko yatalina kuzikilwa muntu. 54 Bwali buzuba bokulibambila ape e Nsabata* yalaafwiifwi okutalika.

55 Banakazi balikucilila Jesu kuzwa ku Galileya bakainka o Josefa, mpoonyina bakacibona cuumbwe omubili wa Jesu mbuwakabikwa. 56 ✝ Mpoonyina bakapiluka ku Jelusalemu okuyoobamba mafuta anunkilila okuteeti bazonanike mutunta wa Jesu. Kono mu Nsabata bakapumuna kweelana omulawo.