1 Bumwi buzuba Jesu kaiisya bantu mulabba lye Ngʼanda ya Leza okukambooka Makani Mabotu, bapaizi basilutwe bamayi bo Mulawo abamaalu bakamuzida okumubuzya kuteeti, 2 "Ninguzu nzi zyobelesya kucita zintu eezi? Ngwani wakakupa zizyo?"

3 Mpoonyina Jesu wakabataba kuteeti, "Pili amebo ndimubuzye mubuzyo. Munditabe, 4 ino nguzu zya Joni zyokubbabbatizya zyakazwida kuli Leza na kubantu?" 5 Bakatalika kwaamboozyanya mulicabo kuteeti, "Ino tulataba buti? Twataba kuteeti, ‘Zyakazwa kuli Leza,’ ulaamba kuteeti, ‘Ino niinzi nimwatakamusyoma Joni?’ 6 Kono ape twaamba kuteeti, ‘Zizwa kubantu,’ bantu boonse babungene aawa, balatupotoola mabwe kaambo basyoma kuteeti Joni wali musinsimi." 7 Mpoonyina bakataba kuteeti, "Tatuzi kuzyakazwida nguzu zya Joni zyokubbabbatizya."

8 Mpoonyina Jesu wakabaambila kuteeti, "Ano tandikomwaambila amebo nguzu zyondibelesya kucita zintu eezi kuzyakazwida."

9 ✝Mpoonyina Jesu wakaambila bantu cikozyanyo eeci, "Kwali mwaalumi wakabyala muunda womusaansa okuusiya mumaanza abalimi kuteeti baweendelezya kuteegwa bapanga mpindu, kabaabana anguwe. Mpoonyina wakainka mumusinzo kweciindi cilamfu. 10 Niyakasika nako yokukutula, wakatuma muzike wakwe kuteeti akamubwezele caabilo cakwe kubalimi. Kono balimi bakauma muzike okumupilusya cinkwa maanza. 11 Mpoonyina wakatuma umwi muzike, kono balimi bakamuuma awe okumusampoola okumupilusya cinkwa maanza. 12 Mpoonyina ape wakatuma muzike watatu. Balimi bakamucisa anguwe, okumusowelaanze cinkwamaanza. 13 Mpoonyina mukamwini muunda wakateeti, ‘Ndilacita buti? Ndilatuma mwanaangu muyandisi, nconzyo bayoomukuteka.’ 14 Mpoonyina wakatuma mwana wakwe. Kono balimi nibakamubona, bakaamboozyanya kuteeti, ‘Ooyu ngoswaana. Amuze tumujaye kuteegwa muunda tuubweze!’ 15 Kuzwaawo bakamusowela anze omuunda, okumujaya."

Mpoonyina Jesu wakabuzya kuteeti, "Ino mukamwini muunda uzoobacita buti aabo balimi? 16 Uzooza okubajaya aabo balimi okuupa bamwi."

Bantu nibakamvwa namu bakateeti, "Aakaka, kutabi namu!"

17 ✝ Kono Jesu wakabadongomwena okubabuzya kuteeti, "Ino Malembo aaya ookuteeti,

‘Bbwe* ndibakakaka bayasi kuteeti talikwe musebezi

lyakaba ndeliyandisi kwiinda oonse’ aamba nzi?

18 Kufumbwa muntu uwida abbwe eelyo, ulavwenzooka na bbwe eelyo lyawida amuntu umwi, lilamupwacoola kuba busu."

19 Bapaizi basilutwe abamayi bo Mulawo, balikuyanda kumwaanga Jesu mpoonyinaawo, kaambo bakaziba kuteeti mucikozyanyo eeci walikwaamba mbabo. Kono bakayoowa bantu, mpoonyina bakamusiya okwiinka. 20 Mpoonyina bakamucililizya kumuyandweeda mokumwaangila. Bakaula bamwi baalumi makulo okubaambila kuteeti bakalitondezye mbuli kuteeti balasyomeka kulinguwe. Bakatuma baalumi aaba kuli Jesu kuteegwa bamujanine kaambo kwiindila mukwaamboola kwakwe okumwaaba kumweendelezi waba Loma kuyaatulwa. 21 Mpoonyina aabo bakaulwa makulo bakateeti kuli Jesu, "Omwiiyi, tulizi kuteeti zyoamba okwiisya zyenconzyo ape tosalululi kono wiisya feela zyenconzyo zyayanda Leza kuteeti tucite. 22 Iino twaambile, cililuleme na taciluleme mumulawo wesu kutela mutelo kuli Kaisala Muleli Mupati waba Loma?"

23 Kono Jesu wakabona lweeneeno lwabo, mpoonyina wakateeti kulibo, 24 "Amunditondezye kadi komuwaya-waya wensiliva. Ino cifwanikiso eeci ezina lilaawa zizyani?"

Bakataba kuteeti, "Zizya Kaisala."Kadi komuwaya-waya

25 Mpoonyina Jesu wakateeti, "Zya Kaisala, amuzipe kuli Kaisala, ezya Leza amuzipe kuli Leza."

26 Aawa bakabula akumujanina kaambo akati kabantu kwiindila mukwaamboola kwakwe. Kutaba kwakwe kwakabakomosya mpoonyina bakaumuna feela.

27 ✝ Kuzwaawo bamwi Basaduki bakeza kuli Jesu. Basaduki basyoma kuteeti bantu tabayoobuki kuzwa kubafu. Nibakasika bakamwaambila kuteeti, 28 ✝ "Omwiiyi, Mozesi wakatulembela Mulawo wokuteeti, ‘Na mwaalumi wafwa katazyede, muzyalwanyina womufu weelede kukwata mukamufu okuzyalila mufu bana.’ 29 Imwi nako kwali baalumi bali ciloba bazyedwaamwi. Mupati wakakwata okufwa katakwe mwana. 30 Mpoonyina walikumucilila wakakwata mukamufu awe wakafwa. 31 Okuliwatatu mbweenya namu. Cintu ciswana cakacitika kuli aaba boonse bali ciloba, bakafwa kabatazyede anguwe. 32 Kumamanino mwanakazi awe wakafwa. 33 Iino, mubuzuba bokubuka kwabafu, ooyu mwanakazi uyoba wani? Twabuzya namu kaambo boonse bali ciloba balikumukwete."

34 Jesu wakabataba kuteeti, "Baalumi abanakazi bouno musela balakwatana, 35 kono baalumi abanakazi beelela kubusigwa kuzwa kubafu okupona muciindi ciza tabakoyookwatana. 36 Mane banooli mbuli bangelo ape tabakonzya kufwa. Mbana ba Leza kaambo babuka kuzwa kubafu. 37 ✝ Awe Mozesi wakacibika antangalala kuteeti, bafwa balabusigwa kuzwa kubafu mumalembe ankani ye citeyo calikuyaka mulilo, paakaita Mwami kuteeti, ‘Leza wa Abbulahamu, Leza wa Isaka, o Leza wa Jakobo.’ 38 Eeci caamba kuteeti ngu Leza wabapona, tali wabantu bafwide nee, kaambo kulinguwe boonse bantu bakwe mbaumi."

39 Mpoonyina bamwi bamayi bo Mulawo baliwo bakaamba kuteeti, "Wataba kabotu, omwiiyi!" 40 Kuzwaawo, taakwe nibakasolela limwi kumubuzya mibuzyo ape.

41 Mpoonyina Jesu wakababuzya kuteeti, "Ino inga kwaambwa buti kuteeti, Mesiya unooli wolunyungu lwa Mwami Deveti? 42 ✝ Deveti lwakwe mubbuku lye Ntembauzyo waamba kuteeti,

‘Mwami wakaambila Mwami wangu kuteeti

kala kubbazu lyolulyo lwangu lyobulemu 43 kusikila ndibike basinkondonyoko kuba cilyatilo cezituta zyako.’

44 Na Deveti wakaita Mesiya kuteeti ‘Mwami,’ ino inga waba buti wolunyungu lwakwe*?"

45 Iino bantu boonse nibalikuswiilizya, Jesu wakaambila basikwiiya bakwe kuteeti, 46 "Amucenjele, mutabaanga mbamayi bo Mulawo, bayandisya kuzyungaana kabazwete majansi malamfu okulumelesigwa elikute mumisika okukala azibbula zyobulemu muzikombelo omumikiti. 47 Beenena bamukabafu okubanyanga maanda aabo, ape bayanda kulibonesya kubantu kwiinda mukukomba kwabo kulamfu. Cisubulo cabo cinoindilide!"