1 Ape Jesu wakateeti kuli basikwiiya bakwe, "Kwali muntu muvubi wajesi sikweendelezya lubono lwakwe. Ooyo muvubi wakaambilwa kuteeti sikweendelezya lubono lwakwe ulimukwaasinyoona mali. 2 Mpoonyina wakaita sikweendelezya okuteeti kulinguwe, ‘Niinzeezi zyendimvwide alindiwe? Ndipe mundandaanda mbuwakabelesya lubono lwangu, kaambo takucikonzeki kuteeti wiindilizye kweendelezya lubono lwangu.’ 3 Mpoonyina sikweendelezya wakalyaamboozya kateeti, ‘Ino ndilacita buti mbokunga simalelaangu ulandigwisya amusebezi wangu? Tandijesi nguzu zyokugampoola, ape ndilalisenda kukumbila. 4 Ehee! Ndilizi cenditacite kuteegwa ndagwisigwa amusebezi ndibe abeenzuma bayoonditambula mumaandaabo.’ 5 Mpoonyina wakaita bantu boonse bakaleezikoloti kuli simalelaakwe, okubuzya wokusaanguna kuteeti, ‘Ino yebo uleecikoloti cisikaali kuli simalelaangu?’ 6 We wakateeti, ‘Madilamu aamafuta aa oliva ali mwaanda.’ Mpoonyina sikweendelezya wakateeti kulinguwe, ‘Ngooyu mweelwe wecikoloti cako. Kalaansi fwambaana lemba makumi osanwe feela.’ 7 Mpoonyina wakabuzya umwi kuteeti, ‘Ino yebo uleecikoloti cisikaali?’ We wakateeti, ‘Masaka aamaila aali mwaanda.’ Okulooyu wakateeti, ‘Ngooyu mweelwe wecikoloti cako. Lemba makumi aali lusele feela.’ 8 Simalelo naakabona namu, wakalumbaizya ooyu sikweendelezya lubono lwakwe uutasyomeki kaambo wakacita cobusongo. Eeci cikozyanyo citondezya kuteeti bantu benyika balaamaano loko mukucita zintu mulicabo kwiinda bana bomumuni."

9 Ape Jesu wakazwida anembo kwaamba kuteeti, "Iino ndimwaambila kuteeti, amubelesye lubono lomunyika kugwasya bantu kuteegwa mubaabeenzinyoko, cokuteeti lwazoomana Leza azoomutambule mumaanda aatamani. 10 Kufumbwa muntu uusyomeka muzintu ziniini nguusyomeka omuzipati, awe uutasyomeki muzintu ziniini tasyomeki omuzipati. 11 Ino, na tosyomeki mukweendeleezya lubono lomunyika, inga wasyomeka buti mulubono lwenconzyo? 12 Ape na kotasyomeki muzintu zyoumwi, ino ngwani utikupe zyako zikugeme?

13 ✝ "Taakwe mubelesi ukonzya kuba muzike wa bami bobile, kaambo ulazonda umwi okuyanda umwi, na kukakatila kuli umwi okunyansilizya umwi. Tacikonzyekani kubelekela bami bobile, Leza amali." ✝

14 Bafalisi balikuyandisisya mali nibakamvwa eezi zyoonse, bakatalika kumufubazika. 15 Mpoonyina Jesu wakateeti kulibo, "Mulipa kululama kumenso aabantu. Kono Leza uliizi myoyo yenu. Zintu zyemuyeeya kuteeti zezipati loko kubantu kuli Leza zilasesemya.

16 ✝"Mulawo wa Mozesi aamalembe aabasinsimi zyalikubeleka kusikila mane muciindi ca Joni Mubbabbatizi, kuzwaawo Makani Mabotu o Bwami bwa Leza alakambookwa ape abantu boonse balwanina kunjila mwateni. 17 ✝ Kono cuubauba julu enyika kumana, kwiinda kabala naanga komwi ko Mulawo wa Leza kumwaigwa.

18 ✝ "Kufumbwa mwaalumi uleka mwanakazaakwe okukwata uumbi, wacita bumambe, awe ooyu uukwata mwanakazi wakalekwa wacita bumambe."

19 Mpoonyina Jesu wakapa eeci cizyanyo, "Imwi nako kwali mwaalumi muvubi wali kuzwaata zizwaato zitalidulili, walikulya zilyo zibotu okuponoobotu loko buzuba-obuzuba. 20 Ape kwali omwaalumi mupenzi wali kuteegwa Lazalo, waleezilonda mubili woonse. Walikweetwaanga amulyango wooyu muvubi, 21 kalangila kulya zyalikusyaala okuwa kuzwa atefule lyo muvubi. Ababwa balikuza okumyankoota zilonda zyakwe. 22 Kuzwaawo, muntu mupenzi wakafwa okubwezegwa abangelo kuyookala kumbaloo Abbulahamu. Mpoonyina awe muvubi wakafwa okuzikwa. 23 Kumane wakainka kucibaka cabafu, kwaakamvwide kucisa kupati loko. Mpoonyina wakalanga mujulu okubona Abbulahamu kule loko kali o Lazalo kumbali lyakwe. 24 Mpoonyina wakaita kateeti, ‘Tata Abbulahamu! Ndifwide mangʼeke, utume Lazalo atompe munwe wakwe mumaanzi, azootontozye lulimi lwangu, kaambo ndimvwide kucisa kupati loko mumulilo muno!’ 25 Kono Abbulahamu wakateeti, ‘Mwanaangu, yeeya kuteeti mubuumi bwako walipedwe zintu zibotu zyoonse, we Lazalo wapedwe zintu zibi zyoonse. Kono iino we ulilikwaide okuno ayibo ulapenga ooko. 26 Kutaleeco feela, akati kesu ayibo kuli mulindi mulamfu loko cokuteeti taakwe muntu uukonzya kuzubuka kuzwa kuno kwiinka ooko, naanga uukonzya kuzubuka kuzwa ooko kuza kuno.’ 27 Mpoonyina muvubi wakateeti, ‘Ano nacilinamu, tata Abbulahamu ndakumbila kuteeti, utume Lazalo ku ngʼanda ya tata, 28 kondijesi bazyalwama bosanwe. Akabacenjezye kuteegwa batakazookuno kucibaka cokucisa loko.’ 29 Abbulahamu wakataba kuteeti, ‘Bazyalwanyoko balijesi Mulawo wa Mozesi amalembe aabasinsimi aanga abacenjezya, beelede kwaaswiilizya zyaamba.’ 30 Ooyu muvubi wakataba kuteeti, ‘Nee, tata Abbulahamu, kutali eeco feela, kono kuteeti umwi wabuka kuzwa kubafu okubainkila inga basanduka okusiya zibi zyabo.’ 31 Kono Abbulahamu wakateeti, ‘Batamvwa Mulawo wa Mozesi amalembe aabasinsimi, naanga omwi wabuka kuzwa kubafu tabakoosyoma.’"