1 ✝ Nako Yomukiti Wecinkwa citakwe Mumena uteegwa Pasika* calaafwiifwi. 2 Bapaizi basilutwe abamayi bo Mulawo balikuyandoola nzila yo kujaila Jesu cokusisilikizya kaambo kokuyoowa bantu.

3 Mpoonyina Satani wakanjila Judasi uuteegwa Isikaliyoti, umwi wabasikwiiya bali kumi abobile. 4 Mpoonyina Judasi wakainka kuyaamboozyanya abapaizi basilutwe abolupati-pati babalindizi be Ngʼanda ya Leza mbwataabe Jesu kulibo. 5 Naakaamba namu, bakabotelwa loko mane bakamusyomezya kumubbadela mali. 6 Judasi wakazumina, mpoonyina wakatalika kuyandoola nako mbotu yokwaaba Jesu kulibo bantu kabatezi.

7 Muciindi Comukiti we cinkwa Citakwe Mumena buzuba bwakasika mbelele zyokulya a Pasika nizyalikujaigwa. 8 Jesu wakatuma Pita o Joni kuteeti, "Kamuya mukatubambile cilalilo cesu ce Pasika."

9 Mpoonyina bakabuzya Jesu kuteeti, "Kokuli koyanda kuteeti tukacibambile?"

10 Wakabataba kuteeti, "Amumvwe! Mwanoonjila mu Jelusalemu, muyooswaanwa omwaalumi uyumwine nongo mpati yamaanzi. Mumucilile omo mungʼanda mwatikanjiile. 11 Mpoonyina mukaambile mukamwini ngʼanda kuteeti, ‘Mwiiyi wesu ukubuzya kuteeti, moomuli monditilide Pasika abasikwiiya bangu?’ 12 Mpoonyina ulamutondezya ngʼanda mpati ilimujulu ibambidwe kabotu loko. Mukatubambilile mwateni zyokulya."

13 Mpoonyina bakainka okujana zyoonse zili mbuli mbwakaamba Jesu. Kumane bakabamba zyokulya zye Pasika.

14 Nako niyakasika yokulya Pasika Jesu wakakala mucibaka cakwe atafule abaapositola. 15 Mpoonyina wakabaambila kuteeti, "Ndalikuyandisisya loko kulya cilalilo eeci ce Pasika andinywe kanditana kunjila mumapenzi, 16 kaambo ndimwaambila kuteeti, sikoyoocilya ape mane kusikila cikazuzikizigwe mu Bwami bwa Leza."

17 Mpoonyina Jesu wakabweza nkomoki, wakalumba Leza, okwaambila basikwiiya bakwe kuteeti, "Amubweze eeci, mwaabane mulicenu. 18 Ndimwaambila kuteeti, kuzwa sunu siyounwi ape musinza womunsaansa, kusikila mane Bwami bwa Leza bukasike."

19 Mpoonyina wakabweza cinkwa, wakalumba Leza, wakacikomoona okucipa basikwiiya bakwe kateeti, "Ooyu mubili wangu, wapegwa kaambo kandinywe. Kamucita namu mukundiyeeya." 20 ✝ Munzila iswana, niwakamana mulalilo wakabapa nkomoki kateeti, "Eeyi nkomoki cecizuminano cipya ca Leza cidiisigwa egazi lyangu, lyatika kaambo kandinywe.

21 ✝ "Kono, amulange! Ooyo uundaaba ulimukulya andime awa atafule! 22 Nconzyo, Mwanoo Muntu uyoofwa mbuli mbwakaciyanda Leza, kono maawe kulooyo mwaalumi uumwaaba!"

23 Mpoonyina basikwiiya bakatalika kubuzyanya mulicabo na ngwani aalimbabo uunga wacita cilinamu.

24 ✝Iino kwakabuka kukazyanya akati kabasikwiiya kokuteeti na ngwani weleede kuba mupati akati kabo. 25 Mpoonyina Jesu wakabaambila kuteeti, "Bamami babamasi balela bantu cokudyaaminina, abo baleli bayanda kwaambwa kuteeti, ‘Mbaasikugwasya bantu.’ 26 ✝✝ Kono eeci taceelede kuba namu kulinywebo. Ooyo mupati akati kenu abe mbuli muniini loko ape mweendelezi mbuli mubelesi. 27 ✝ Ino ngwani mupati kwiinda, ooyo ukalaansi kulya na ooyo ubeleka? Nconzyo ngooyo ukalaansi. Kono mebo ndili akati kenu mbulooyo ubeleka.

28 "Mwakala amebo mumasunko aangu oonse. 29 Iino ndimupa nguzu zyobwami, mboonyina mbuli Tata mbwaakandipa. 30 ✝ Muyoolya okunywa atafule lyangu mu Bwami bwangu, ape muyookala azibbula zyobwami okulela misyobo ya Izilaili iili kumi ayobile."

31 Jesu wakaambila Saimoni kuteeti, "Saimoni, Saimoni! Swiilizya! Saatani wazumizigwa kuteeti amusunke noonse, kwanzaanya zibotu kuzwa kuzibi mbuli mulimi mbwavulula buungululwa kuzwa kumaila. 32 Kono ndakukombela Saimoni kuteegwa lusyomo lwako lutamani. Ape wakupiluka kulindime weelede kuyumya bazyalwanyoko."

33 Pita wakataba kuteeti, "Mwami, ndililibambilide kwiinka kuntolongo naanga kufwa ayibo!"

34 Jesu wakateeti, "Pita ndikwaambile, muzingili takookukuluka masiku aano kusikila ukake ziindi zyotatwe kuteeti tondizi."

35 ✝ Mpoonyina Jesu wakabuzya basikwiiya bakwe kuteeti, "Nindakamutuma kamutakwe cikwama, nkomo, amakatulu amwi, mwakaakubula cintu na?"

Bakateeti, "Taakwe naanga comwi ncitwakabula."

36 Jesu wakateeti, "Kono iino*, kufumbwa ujesi cikwama naanga cibbeeki weleede kucibweza ape kufumbwa utajesi sabule weelede kuuzya jansi lyakwe kuteegwa aule lyomwi. 37 ✝ Amucite namu kaambo Malembo aamba kuteeti, ‘Wakabalilizigwa abasikutyola Mulawo’ eelede kuzuzikizigwa mulindime kaambo eeco cakalembwa kujatikizya ndime caba afwiifwi okucitika."

38 Basikwiiya bakateeti, "Bona! Mwami, ngaaya masabule obile!"

Jesu wakateeti, "Mbubo, kwamana ankani eeyi."

39 Mpoonyina Jesu wakazwa mutaindi okwiinka kucilundu camisamu ye Oliva mbuli cilengwa cakwe, abo basikwiiya bakainka awe. 40 Naakasika acibaka eeco wakateeti kulibo, "Amukombe kuteegwa mutawidi mumasunko."

41 Mpoonyina wakabasiya, wakainka aleele aniini, aawo wakaakufugama okukomba. 42 Wakateeti, "Tata, na ulayanda gwisya nkomokeeyi yamapenzi alimebo. Nikuba namu kutabi kuyanda kwangu nee, kono lucitwe luyando lwako." 43 Kwakalibonya mungelo kulinguwe kuzwa kujulu okumuyumya-yumya. 44 Mukupenga kupati komoyo, wakakombesya cenguzu cokuteeti nkasaalo yakwe yali mbuli madosi egazi alikulokelaansi.

45 Naakanyamuka kuzwa mpaali kukombela wakapiluka okujana basikwiiya baloona. Bakalikatede kaambo myoyo yabo yakatyompya. 46 Mpoonyina wakabaambila kuteeti, "Kaambo nzi comoona? Amubuke, mukombe kuteegwa mutawidi mumasunko."

47 Jesu naacili kwaamboola kwakasika mbunga yabantu yakasololedwe o Judasi umwi wabasikwiiya bakwe bali kumi abobile. Wakasika kuli Jesu okumumyonta. 48 Kono Jesu wakateeti, "Judasi, ino wazaaba Mwanoo Muntu kwiinda mukumumyonta na?"

49 Mpoonyina basikwiiya bali o Jesu nibakabona calikuyanda kucitika, bakabuzya kuteeti, "Mwami, tubelesye masabuleesu na?" 50 Mpoonyina umwi wabo wakatema muzike wo Mupaizi mupati okumutimbula kutwi kokululyo.

51 Kono Jesu wakateeti, "Kwamana! Amuleke!" Kumane wakajata kutwi kooyo muzike, okumuponya.

52 Mumbunga yazide mukujata Jesu mwali bapaizi basilutwe, abolupati-pati babalindizi be Ngʼanda ya Leza, abamaalu. Mpoonyina Jesu wakateeti kulimbabo, "Ino muzidaanzi amasabule a makoli mbulikuteeti mwaza kuzojata cigebenga? 53 ✝ Ede ndali anywebo buzuba obuzuba mulabba lye Ngʼanda ya Leza, kono taakwe nimwakasola kundijata. Kono eeci ceciindi cenu ape ceciindi cenguzu zyomumudima."

54 Kuzwaawo bakaanga Jesu okumutola mungʼanda yo Mupaizi Mupati. Kono Pita walikuyoobucilila aleele. 55 Kwabbikidwe mulilo akati kelabba, mpoonyina Pita wakaakukala aabo balikuyota mulilo. 56 Umwi mwanakazi mubelesi naakamubona kakede aawo amulilo, wakamulangisisya okwaamba kuteeti, "Ooyu mwaalumi awe waloo Jesu!"

57 Kono Pita wakakazya kateeti, "Yebo mwanakazi, tandimwizi okumuziba ooyo!"

58 Nikwakainda kaindi kaniini feela, mwaalumi umwi wakamuziba Pita okuteeti kulinguwe, "Ayebo uli umwi wabo!"

Kono Pita wakataba kuteeti, "Mwaalumi! Nee tandiinsi!"

59 Ape nikwakainda woola lyomwi umwi mwaalumi wakaamba cokusinizya wateeti, "Taakwe okuzumboozya ooyu mwaalumi walaawe, kaambo awe muna Galileya!"

60 Kono Pita wakataba kuteeti, "Mwaalumi, tandizi zyolimukwaamboola!"

Mpoonya-mpoonya naacilikwaamboola muzingili wakakukuluka. 61 Mpoonyinaawo Mwami wakacebuka okumulangisisya Pita, mpoonyina Pita wakayeeya Mwami zyakamwaambilide kuteeti, "Muzingili kautana kukukuluka masiku aano, uyoondikaka ziindi zyotatwe kuteeti, tondizi." 62 Pita wakazwidaanze elabba okuyoolila colufu.

63 Iino balindizi bali kulindilila Jesu, bakatalika kumufubazika okumuuma. 64 Bakamuvumba kumenso okunoomubuzya kuteeti, "Ino ngwani wakuuma? Sinsima!" 65 Ape bakaamba zintu zimwi zinji zyokumutukila.

66 Nibwakaca, Benkuta Mpati yabamaalu ba Majuda bakabungana antoomwi, aaba bali bapaizi basilutwe a bamayi bo Mulawo. Mpoonyina Jesu wakeetwa kunkuta yabo. 67 Kuzwaawo bakamubuzya kuteeti, "Twaambile! Ndiwe Mesiya na?"

Wakataba kuteeti, "Ndamwaambila tamukondisyoma 68 ape ndamubuzya mubuzyo tamukonditaba. 69 Kono kuzwa iino Mwanoo Muntu uyookala kululyo lwa Leza Singuzu zyoonse."

70 Mpoonyina boonse bakateeti, "Kokuteeti uli Mwanaa Leza na?"

Wakabataba kateeti, "Iiyi, mwaamba kuteeti ndime nguwe".

71 Mpoonyina bakateeti, "Tatuciyandi bambi bakamboni! Ede twalimvwida tobeni zyaamba omulomo wakwe mwini!"