1 ✝Jesu abasikwiiya bakwe balikuyoobweenda mumyuunda yamaila mubuzuba bwe Nsabata. Basikwiiya bakwe bakapulula mitwe yamaila okwiibukusa mumaanza okulya buseke bwa maila. 2 Bamwi Bafalisi nibakababona kabacita namu, bakabuzya kuteeti, "Ino niinzi nemucita cuutazumizi Mulawo mu Nsabata?"

3 Mpoonyina Jesu wakabataba kuteeti, "Ino taakwe nimwakabala caakacita Deveti, we abantu mbaalaabo nibakafwide nzala na? 4 ✝✝Ede wakanjila mulabba lye Ngʼanda ya Leza* okubweza cinkwa caakapegwa omupaizi, cinkwa cakatuuzigwa kuli Leza. Wakalya okwabanya bantu bakwe. Kono Mulawo tiwalikuzumizya muntu feela utainsi mupaizi kulya cinkwa eeci."

5 Mpoonyina Jesu wakamanizya kateeti, "Mwanoo Muntu ngo Mwami we Nsabata."

6 Bumwi buzuba bwe Nsabata, Jesu wakanjila mu cikombelo okutalika kwiisya. Oomo mwali mwaalumi wayuminide janza lyolulyo. 7 Kwali bamwi bamayi bo Mulawo abamwi Mafalisi bali kuyandoola nzila yokupeda fateni Jesu mulandu. Kaambo keeci bakamulangisisya kuyanda kubona na ulaponya mu Nsabata. 8 Kono Jesu waliizi mizeezo yabo, mpoonyina wakaambila mwaalumi ooyu kuteeti, "Nyamuka uze kuno." Mwaalumi wakainka okuyoima. 9 Mpoonyina Jesu wakababuzya kuteeti, "Ino ceecili Mulawo wesu cuuzumizya kucita mu Nsabata? Kucita cibotu na cibi? Kufutula buumi na kubusinyoona?" 10 Amane wakazinguluka kubalanga boonse okwaambila mwaalumi kuteeti, "Olola janza lyako." Mpoonyina wakacita mboonyina namu, janza lyakapona.

11 Eeci cakabanyemya loko Bafalisi abamayi bo Mulawo okutalika kwaamboozyanya mulicabo mbobatimucite Jesu.

12 Muciindi eeco Jesu wakainka kucilundu okuyookomba kuli Leza busiku boonse. 13 Nibwakaca wakaita basikwiiya bakwe, akati kabo wakasala bali kumi abobile okubaita kuteeti mbaapositola. 14 Bakaitwa mbaaba, Saimoni ngwakauzika kuteeti Pita o Andulu mwence wakwe, Jemusi o Joni, Filipo o Batolomeyo, 15 Mateyo o Tomasi, Jemusi mwanaa Alufasi, o Saimoni walikwiitwa kuteeti Sikulwanina Lwaanguluko, 16 Judasi mwanaa Jemusi, o Judasi Isikaliyoti wakazomwaaba.

17 Jesu wakaselela abaapositola kuzwa acilundu okwiima apateme. Mpoonyina wakajana basikwiiya bakwe banji kababungene antoomwi ebbunga lyabantu balikuzwa ku Judiya yoonse, oku Jelusalemu, omuzilalaanda zya Taila o Sidoni zili mumbaloo lwizi. 18 Bakeza kuzoomumvwa kaiisya okuponisigwa kumalwazi aabo, abalikusyupwa emyuuya mibi bakaponisigwa. 19 Bantu boonse balikuyanda kumuguma, kaambo nguzu zyalikuzwa mulinguwe okubaponya boonse.

20 Mpoonyina Jesu wakalanga kuli basikwiiya bakwe okuteeti,

"Mulilelekedwe nomupengede,

kaambo Bwami bwa Leza mbubwenu.

21 Mulilelekedwe nomufwa nzala iino nako,

kaambo muzookuta.

Mulilelekedwe nomulila iino nako,

kaambo muyooseka.

22 ✝ "Mulilelekedwe bantu banomusulaika, banomukaka, banomutuka okunomwaamba kuteeti muli babi kaambo ko Mwanoo Muntu. 23 ✝ Mubotelwe okuzyana cokunonenwa eezi zyacitika kaambo bulumbu bwenu kujulu mbupati. Mboonyina namu basikale babo mbubakacita basinsimi."

24 "Kono maawe kulinywebo nomuvubide iino nako,

kaambo mwatambula kale buumi bubotu buzulide.

25 Maawe kulinywebo nomukuta iino nako,

kaambo muyoofwa nzala.

Maawe kulinywebo nomuseka iino nako,

kaambo muyoolila okoomoka.

26 "Maawe kulinywebo nomwaambwa zibotu kubantu boonse, kaambo abasikale babo bakacita mboonya namu ku basinsimi babeji.

27 "Kono nywebo nomundiswiilizya ndamwaambila kuteeti, muyande basinkondonyoko ape aabo batamuyandi mubacitile zibotu. 28 Amuleleke aabo bamufwiza okukombela aabo bamupenzya. 29 Nakuteeti muntu wakuuma kutama umuzumizye kuuma elimwi tama. Uutola jansi lyako, umuzumizye kutolelezya ecibaki. 30 Kufumbwa uukukumbila cintu umupe, ape naa muntu wabweza cintu cako, utacisesi kuteeti acipilusye. 31 ✝ Amucitile bamwi mbuli mbomuyanda kuteeti abo bamucitile.

32 "Nakuteeti kamuyanda feela bamuyanda, ino muleelede kulumbaizigwa na? Ede abo basizibi bayanda babayanda! 33 Ape nakuteeti kamucitila feela zibotu aabo bamucitila zibotu, ino muleelede kulumbaizigwa na? Ede abo basizibi mbobacita namu! 34 Nakuteeti kamukolotisya feela aabo mbomuyeeya kuteeti balapilusya, ino muleelede kulumbaizigwa na? Ede abo basizibi balakolotisyanya, kuteegwa babapilusizye mboonya mbubakakolotisya. 35 Kono muyande basinkondonyoko okubacitila zibotu. Amukolotisye kamutalindili kupilusizigwa. Nakuteeti mwacita namu, bulumbu bwenu bunooli bupati ape muyooba bana ba Leza Sijulu Wama Julu, kaambo we mubotu kubatalumbi okubabi. 36 Amube amangʼeke mbuli Leza Uso mbwalaamangʼeke.

37 "Mutaatuli kuteegwa anywebo mutaatulwi. Mutapi mulandu kuteegwa anywebo mutapegwi mulandu. Amujatile kuteegwa anywebo mujatilwe. 38 Amupe kulibamwi kuteegwa Leza akamupe anywebo. Nconzyo muyoopegwa cipimyo cizwide, citikimwidwe, cisindailidwe okufusuka. Cipimyo comubelesezya bamwi awe Leza cayoomubelesezya." 39 ✝ Mpoonyina ape Jesu wakabaambila cikozyanyo eeci: "Ino moofu inga wakonzya kusolweda moofunyina na? Tabakoowida mucilindi boonse na? 40 ✝ Taakwe sikwiiya wiinda mwiiyi wakwe, kono sikwiiya woonse amanizya kwiiya uba mbuli mwiiyi wakwe.

41 "Ino niinzi nolanga kakwa kali mulinso lyo muzyalwanyoko kotalangi tanda lili mulinso lyako? 42 Ino niinzi noambila muzyalwanyoko kuteeti, ‘Koza ndikugwisye kakwa kali mulinso lyako,’ kono tokonzyi naanga kubona tanda lili mulinso lyako? Yebo osikupaupa amenso! Saanguna kugwisya tanda lili mulinso lyako, mpoonyina inga wabona obotu kuteegwa ugwisye kakwa kali mulinso lyo muzyalwanyoko."

43 Taakwe musamu mubotu uuzyala micelo mibi, ape naanga musamu mubi uuzyala micelo mibotu. 44 ✝ Ede musamu uuli woonse uzibilwa kumicelo yawo, mbuli mbomuzi kuteeti nkuyu tazicelwa kumyuumvwa naanga nsaansa kumyuunga. 45 ✝ Muntu uulikabotu ucita zibotu kuzwa kuzibotu zyabambide mumoyo wakwe, awe muntu uutalikabotu ucita zibi kuzwa kuzibi zyabambide mumoyo wakwe, kaambo mulomo wakwe waamba zizwide mumoyo wakwe.

46 "Ino niinzi comundiitila kuteeti, ‘Mwami, Mwami,’ kono tamuciti zendimwaambila? 47 Kufumbwa uuza kulindime okuzooswiilizya majwaangu okwaacilila, ndilamutondezya mbwabede. 48 Uli mbuli muyaki naalikuyaka ngʼanda yakwe, wakasya kusikaabbwe, aawo pakayakila ntalisyo. Mulonga niwakabayuka, maanzi akauma angʼanda eeyo kono taakwe niyakawa, kaambo yakayakidwe kabotu. 49 Iino kufumbwa uumvwa majwaangu kono kataacilizyi uli mbuli mwaalumi wakayaka ngʼanda amuse kataside ntalisyo. Mulonga niwakazula okubayuka, maanzi akayuuma ngʼanda mpoonyina yakawa okukolomoka kumaninina."