1 ✝Bumwi buzuba Jesu kaimvwi ankomwe yo lwizi lwa Genasaleti,* bantu banji balikusyanikizyanya kabaswena kulinguwe kuteegwa bamvwe majwaa Leza. 2 Jesu wakabona migolo yobile yalaambali olwizi. Basikuzuba baliiside kabayoosanzya tunyandi twabo. 3 Mpoonyina Jesu wakanjila mumugolo umwi wali wa Saimoni okumukumbila kuteeti autontele mumaanzi aniini. Kumane Jesu wakakala mumugolo okwiisya mbunga.

4 Naakamana kwiisya, wakateeti kuli Saimoni, "Tontela mugolo mumaanzi malamfu kuteegwa yebo abeenzinyoko musowele tunyandi twenu mumaanzi mujate nswi."

5 ✝ Mpoonyina Saimoni wakateeti, "O mwami, twabeleka cenguzu busiku boonse kusola kujata nswi kono taakwe citwajata naanga comwi. Kono kaambo waamba, ndilacita mboonya namu." 6 ✝ Nibakacita namu bakaca nswi zinji loko, mane tunyandi twakatalika kuyawooka. 7 Bakacita kukobeta beenzinyina bali mumugolo umwi kuteegwa bazoobagwasye. Bakeza okuzuzya migolo yobile mane yalikuyanda kubbila. 8 Saimoni Pita naakabona cakacitika, wakafugama kunembo lya Jesu okuteeti, "Mwami ndisiya! Ndilisimucita zibi!"

9 Saimoni wakaamba namu kaambo we abeenzinyina bakakomokwa loko obunji bwe nswi zibakajata. 10 Beenzinyina Saimoni bene Jemusi o Joni bana ba Zebbediya abo bakakomokwa. Kono Jesu wakateeti kuli Saimoni, "Utayoowi, kuzwa sunu unooli muzubi wabantu."

11 Kuzwaawo bakakwelela migolo yabo anze amaanzi mpoonyina bakasiya zyoonse okumucilila.

12 Imwi nako Jesu naali mutaindi limwi, oomo mwali mwaalumi wajesi cinsenda* mubili woonse. Ooyu mwaalumi naakabona Jesu, wakavundama kunembo lyakwe okumukumbila kuteeti, "Mwami, na ulayanda inga wandiponya."

13 Mpoonyina Jesu wakatandabika janza lyakwe okumuguma okuteeti, "Ndilayanda. Kopona!" Mpoonyinaawo cisenda cakamana, ooyu mwaalumi wakapona. 14 ✝Kuzwaawo Jesu wakamulailisisya kuteeti, "Mvwa! Utaambili muntu naanga omwi zyacitika. Kono koya ku Ngʼanda ya Leza kumupaizi, akakubone kuteeti wapona. Mpoonyina ukape cituuzyo mbuli mbwaakalailila Mozesi kuteegwa bantu bazibe kuteeti wapona."

15 Kono nekuba kuteeti Jesu wakamukasya, nkani yakasabalangana kwiinda kusaanguna. Kaambo keeci, bantu bakeza mubunji kuli Jesu kuteegwa bazomumvwe okuponesegwa kumalwazaabo. 16 Kono Jesu walikubasiyaanga okwiinka kuzibaka zyuumwine kuyookomba.

17 Bumwi buzuba Jesu naalikwiisya mungʼanda, Bafalisi abamayi bo Mulawo balikede aawo. Bakazwidilide mumiinzi yoonse ya Galileya, Judiya o Jelusalemu. Nguzu zyo Mwami zyokuponya zyakalaawe. 18 Iino bantu bamwi bakeeta mwaalumi wayuminide mubili amacile. Bakasola kuteeti bamweete kunembo lya Jesu mungʼanda. 19 Kono mukubula cibaka cokwiinda kaambo kokuvula kwabantu, bakatanta manela kabaya atala lyeciluli cipateme, okudonkola cipulo okumwiinzya fateni kalede amacile aakwe kumusisya akati kabantu paabede Jesu.Ngʼanda yeciluli cipateme 20 Jesu naakabona lusyomo lwabo wakateeti kumulwazi, "Mweenzuma, zibi zyako zyajatilwa."

21 Bafalisi abamayi bo Mulawo bakatalika kulyamboozya mumyoyo yabo kuteeti, "Ngwanooyu muntu usampoola Leza? Ngwani uunga wajatila zibi kunzaa Leza alike?"

22 Jesu mukuziba zyobali kuyeeya mumyoyo yabo wakateeti, "Ino niinzi comuyeeya zili namu? 23 Ino ceecili cuuba, kwaamba kuteeti, ‘Zibi zyako zyajatilwa,’ naakuteeti, ‘Nyamuka weende’? 24 Kono ndiyanda kumutondezya kuteeti Mwanoo Muntu ulijesi nguzu zyokujatila zibi aanaansi." Mpoonyina Jesu wakaambila mwaalumi wakayumininide mubili kuteeti, "Nyamuka! Bweza macile aako, uye kungʼanda yako."

25 Mpoonyinaawo wakanyamuka kabalangilide okubweza macile aakwe, okuya kungʼanda yakwe kalumbaizya Leza. 26 Bantu boonse bakakomokwa loko, okulumbaizya Leza, kabayoowede bakateeti, "Twabona cikomosya sunu!"

27 Kumane, Jesu naalikuzwa mutaindi, wakabona simutelo walikwiitwa kuteeti Levi. Wakakede paali kubelekela. Jesu wakateeti kulinguwe, "Ndicilile!" 28 Mpoonyinaawo Levi wakanyamuka okusiya zyoonse zyaalikucita okumucilila.

29 Amane Levi wakapangila Jesu mukiti mupati angʼanda yakwe. Bunji bwabeenzu bakazide bali basimutelo abamwi bantu feela. 30 ✝ Kono bamwi Bafalisi abamwi bamayi bo Mulawo balikubalilwa kubbazu lyabo bakatongookela basikwiiya ba Jesu kuteeti, "Niinzi nemulya okunywa abasimutelo, abamwi basizibi?"

31 Mpoonyina Jesu wakabataba kuteeti, "Bantu baumbulu tabayandiki musilisi aati baciswa. 32 Sikazidilide kwiita bantu baluleme kono ndakazida kwiita basizibi kuteegwa basanduke."

33 Bumwi buzuba bamwi bantu bakateeti kuli Jesu, "Basikwiiya ba Joni Mubbabbatizi aba Bafalisi balaliimya kulya okukomba kanji-kanji kono basikwiiya bako balalya okunywa."

34 Mpoonyina Jesu wakabataba kuteeti, "Muyeeyaanga inga mwakasya beenzu basikukwata kulya kacilaabo? Nee! Tacikonzeki! 35 Kono nako iyoosika sikukwata nayoobwezegwa kuzwa kulibo, mpampawo nebayooliimya kulya."

36 Ape Jesu wakabaambila cikozyanyo eeci, "Taakwe uuyaula cigamba kuzwa kucizwato cipya okucilukila acizwato ceciindi, kaambo acita namu cizwato cipya cilasinyeka ape cigamba cipya tacikoendelana ecizwato ceciindi. 37 Ape taakwe uutila waini mpya munkomo zyamatobo zyakabeleka kale. Naa wacita namu waini uulya ulabbotola okusinya nkomo ziya, kwamana waini ulasuumukilaansi. 38 Kono waini mpya yeelede kutilwa munkomo zyamatobo zipya.* 39 Ape taakwe uyanda waini mpya amana kunywa waini yeciindi. Ulateeti, ‘Waini yeciindi nimbotu kwiinda mpya.’"