1 Kuzwaawo Jesu wakaita basikwiiya bali kumi abobile antoomwi okubapa nguzu zyokugwisya madimona oonse okuponya malwazi. 2 Mpoonyina wakabatuma kuteeti bainke kuyookambooka zyo Bwami bwa Leza okuponya balwazi. 3 Wakabaambila kuteeti, "Mutabwezi naanga cintu comwi mumusinzo wenu, mutabwezi nkoli na cilyo, mpotomona naanga mali, ape mutabwezi zibaki kunze azyomuzweete. 4 Kufumbwa mu ngʼanda mobayoomutambula, mukakale moonyoomo kusikila mwaakuzwa mucibaka eeco. 5 ✝✝ Ape kufumbwa mutaindi njimwatatambulwa, mwanoozwa kwateni mukunkumune suko ili kumaulu eenu kuteeti cikabe citondezyo cokubacenjezya."

6 Mpoonyina basikwiiya bakainka okwiinda mumiinzi yoonse kabaabukambooka Makani Mabotu, okuponya bantu koonse-koonse.

7 ✝ Iino Helodi Antipasi mwami wa Galileya wakamvwa zyoonse Jesu zyakacita. Mpoonyina wakakatazigwa loko kaambo bamwi balikwaamba kuteeti Joni Mubbabbatizi wabuka kuzwa kubafu. 8 Bamwi balikuteeti musinsimi Elija* walibonya ape, mpoonyina bamwi balikwaamba kuteeti musinsimi umwi wabeciindi wabuka kuzwa kubafu. 9 Helodi wakateeti, "Ede Joni ndakamutimbuzya mutwe. Ino ngwani ooyu ucita zintu eezi zyendimvwide?" Mpoonyina wakasola loko kuteeti abone Jesu.

10 Baapositola nibakapiluka mumusinzo wabo, bakaambila Jesu zyoonse zibakaakucita. Kumane wakababweza okwiinkaabo kutaindi lya Bbetisaida kuteegwa bakabe abalike. 11 Kono bantu banji nibakamvwa bakamucilila, mpoonyina wakabatambula, okubaambila zyo Bwami bwa Leza okuponya balikuciswa.

12 Izuba nilyakainka mukubbila, basikwiiya balikumi abobile bakeza kulinguwe okuteeti, "Niwabaambila bantu kuteeti bainke mumiinzi otuunzi tulaafwiifwi kuteegwa bakalijanine zyokulya amalalo kaambo ecino cibaka cilikule abantu."

13 Kono Jesu wakaambila basikwiiya bakwe kuteeti, "Ndinywenya nywebo amubape zyokulya."

Mpoonyina bakataba kuteeti, "Kono tujesi feela zinkwa zyosanwe enswi zyobile. Ino uyanda kuteeti tukabaulile zilyo bantu boonse aaba na?" 14 Kwakali baalumi balikutandila kusika kuzyuulu zyosanwe mumbunga.

Jesu wakaambila basikwiiya bakwe kuteeti, "Amubaambile bantu bakale makumi osanwe kabunga akabunga."

15 Basikwiiya nibakamana kucita namu, 16 Jesu wakabweza zinkwa zyosanwe enswi zyobile, wakalanga kujulu okuzileleka. Mpoonyina wakazikomoona okupa basikwiiya bakwe kuteegwa baabanye bantu. 17 Boonse bakalya okukuta. Kuzwaawo basikwiiya bakabwezelela zizuma zili kumi ezyobile zyezilyo zyakasyaala.

18 Bumwi buzuba Jesu naalikukomba alike, basikwiiya bakwe balaafwiifwi. Mpoonyina wakababuzya kuteeti, "Ino bantu bandaamba kuteeti ndime ni?"

19 ✝ Bakamutaba kuteeti, "Bamwi baamba kuteeti, ndiwe Joni Mubbabbatizi, bamwi baamba kuteeti, ndiwe musinsimi Elija, bamwi baamba kuteeti, uli umwi wabasinsimi beciindi wakabuka kuzwa kubafu."

20 ✝ Wakababuzya kuteeti, "Ino nywebo mundaamba kuteeti ndime ni?"

Pita wakataba kuteeti, "Ndiwe Mesiya wa Leza."

21 Mpoonyina Jesu wakalailila basikwiiya bakwe cenguzu kuteeti bataambili muntu naanga omwi kuteeti ngwani. 22 Ape wakabaambila kuteeti, "Mwanoo Muntu weelede kupenga loko okukakwa abamaalu, bapaizi basilutwe, abamayi bo Mulawo. Ape weelede kujaigwa okubusigwa kuzwa kubafu kwainda mazuba otatwe."

23 ✝ Mpoonyina Jesu wakabaambila boonse kuteeti, "Na kuli uyanda kundicilila, aliimye zyayanda, okunyamuna ciingano cakwe buzuba obuzuba okundicilila. 24 ✝Iino kufumbwa uyanda kufutula buumi bwakwe, uyoobusweekelwa, kono kufumbwa usweekelwa buumi bwakwe kaambo kangu uyoobufutula. 25 Ino nimpindu nzi muntu njakonzya kujana nakuteeti wavuba nyika yoonse kono wasweekelwa buumi butamani na wasinyeeka? Taakwe! 26 Kufumbwa uumvwa nsoni akaambo kangu amajwaangu, awe Mwanoo Muntu uzoomufwida nsoni asika mubulemu bwakwe obulemu bwa Isi abangelo basalala. 27 Nconzyo ndamwaambila kuteeti, kobali bamwi baimvwaawa batayoofwi mane bakabone Bwami bwa Leza."

28 Naalikuyanda kukwana mazuba aali lusele kaambide eezi, Jesu wakabweza Pita, Joni o Jemusi okwiinkaabo atala eecilundu kuyookomba. 29 Naalikukomba, bube bwe ciinso cakwe bwakasanduka, ezizwaato zyakwe zyakatuba buu. 30 Mpoonyinaawo kwakadunuka baalumi bobile, Mozesi o Elija okutalika kwaamboola anguwe. 31 Bakalibonya mubulemu bokujulu kabaamboola o Jesu mbwayoozuzilikizya muzeezo wa Leza kwiinda mukufwida mu Jelusalemu. 32 Iino Pita abeenzinyina bakalikoona. Nibakabuka bakabona bulemu bwa Jesu ape bakabona baalumi bobile kabaimvwi anguwe. 33 Mozesi o Elija nibalikuzwa kuli Jesu, Pita wakateeti, "Simalelo, cabota tuli kuno! Atupange tutungu totatwe, komwi kako, komwi ka Mozesi akomwi ka Elija." Nconzyo taakwe naakazi caali kwaamba.

34 Kacaamboola kwakeza joba lyakazobavumba eceemvule cateni mpoonyina basikwiiya bakayoowa nilyakabavumba joba. 35 ✝✝Mpoonyina kwakazwa jwi mujoba, lyalikwaamba kuteeti, "Ooyu Mwanaangu, ngundakasala. Amumumvwide!"

36 Nilyakaumuna jwi, basikwiiya bakajana kuteeti Jesu wali alike. Basikwiiya taakwe ngubakaambila aleeyo nako aleezi zibakabona.

37 Buzuba bwakacilila Jesu abasikwiiya bakwe botatwe nibakaselela kuzwa acilundu, bantu banji bakamucinguuzya. 38 Mpoonyina mwaalumi umwi akati kebbunga lyabantu wakoongolola kateeti, "Omwiiyi! Ndakukomba, bona mwanaangu musyimani ngondijesi alike! 39 Kucitika kuteeti muuya mubi ulamujataanga, mbuumujatila mpoonya-mpoonya ulamukwiizya okumusuntusya cokumugwisya kovu kumulomo, tuumuleki ape ulamucisa loko. 40 Ndakumbide basikwiiya bako kuteeti bautande kono bakacilwa."

41 Jesu wakabaambila kuteeti, "Nywebo nomusela utakwe lusyomo, basicinguni! Ino ndikale nako ndamfu buti andinywe? Ndilamulangilizya nako ndamfu buti? Mweete kuno mwana wako."

42 Musyimani naali kuyoobuza, dimona lyakamuwisizyaansi okumusuntusya. Mpoonyina Jesu wakalailila muuya mubi kuteeti uzwe okuponya musyimani, amane wakamupilusya kuli baisi. 43 Mpoonyina bantu boonse bakakomokwa nibakabona nguzu zya Leza.

Bantu kabacikomokedwe alizyoonse zyaakacita Jesu, wakateeti kuli basikwiiya bakwe,

44 "Mutalubi zindaandoomwaambila! Mwanoo Muntu wandoabwa mumaanza aabantu." 45 Kono basikwiiya bakwe taakwe nibakamvwisisisya caali kwaamba kaambo cicalikwaamba calisisidwe kulibo cibatakamvwisisisya ape balikuyoowa kumubuzya fateni.

46 ✝ Iino basikwiiya bakwe bakatalika kukazyanya kuteeti ngwani mupati akati kabo. 47 Kono Jesu naakaziba zibali kuyeeya, wakaita mwana muniini okumwiimika kumbali anguwe. 48 ✝ Amane wakateeti kulibo, "Kufumbwa utambula mwana mbuli ooyu muzina lyangu, watambula ndime, ape kufumbwa unditambula, watambula wakandituma."

Wakamanizya kateeti, "Ooyo muniini akati kenu noonse, ngomupati kwiinda."

49 Mpoonyina Joni wakateeti, "Omwiiyi, twabona muntu walikutanda madimona muzina lyako, mpoonyina twamwaambila kuteeti aleke kaambo tali umwi wesu."

50 Kono Jesu wakaambila Joni abasikwiiya bamwi kuteeti, "Mutasoli kumukasya, kaambo kufumbwa utamulwani ulikubbazu lyenu."

51 Niyalaafwi kusika nako ya Jesu yokutolwa kujulu, wakakanza kwiinka ku Jelusalemu lilampe lifwiimpe. 52 Wakatuma batumwa kunembo lyakwe, bakainka kumuunzi wabana Samaliya kuyoomululamikila kusika kwakwe. 53 Kono bantu booko bakaka kumutambula kaambo balizi kuteeti walikuya ku Jelusalemu. 54 ✝ Basikwiiya bakwe Jemusi o Joni nibakabona namu, bakateeti, "O Mwami, ino uyanda kuteeti twiite mulilo kuzwa kujulu kuteegwa ubasinye na?"

55 Kono Jesu wakacebuka okubapatookela. 56 Mpoonyina we abasikwiiya bakwe bakainka kumuunzuumbi.

57 Jesu abasikwiiya bakwe kabayobweenda munzila, mwaalumi umwi wakateeti kuli Jesu, "Ndilakucilila kufumbwa kotainke."

58 Mpoonyina Jesu wakamutaba kuteeti "Bamwaaba balijesi madindi, abayuni balijesi ziteente, kono Mwanoo Muntu takwe ngʼanda yokulala."

59 Kuzwaawo Jesu wakaambila mwaalumi umwi kuteeti, "Ndicilila!"

Kono mwaalumi ooyo wakateeti, "Mwami, leka pili ndikazike tata."

60 Kono Jesu wakamutaba kuteeti, "Leka bafu bazikane. Kono yebo koya ukakambooke zyo Bwami bwa Leza."

61 ✝ Ape oumwi wakateeti, "Mwami, ndilakucilila kono leka pili ndikalaizye mukwasyi wangu."

62 Kono Jesu wakamutaba kuteeti, "Kufumbwa uulima ecikekele kumwi kacebuka musule tajesi mpindu mu Bwami bwa Leza."