1 Kuzwaawo Jesu wakanjila mu Jeliko kayoobwiinda. 2 Kwali kukala umwi simutelo mupati wali kwiitwa kuteeti Zakeyo, wavubide loko. 3 Ooyo muntu walikusola kuteeti abone Jesu, kono kaambo kokufwiimpa kwakwe okuvula kwabantu, wakakacilwa. 4 Mpoonyina Zakeyo wakazuzila kunembo okuyootanta mucisamu comukuyu kuteegwa abone Jesu mukuteeti Jesu kwaakeleede kwiinda. 5 Jesu naakasika acibakaawo, wakalanga mujulu okumwaambila kuteeti, "Zakeyo, fwambaana seluka! Ndeelede kukala mungʼanda yako sunu."

6 Zakeyo wakaseluka cokufwambaana okumutambula kaboteledwe loko. 7 Bantu boonse bakaboneeci bakatalika kutongooka kuteeti, "Ooyu mwaalumi wainka kuyoopotela sizibi!"

8 Mpoonyina Zakeyo wakanyamuka okwaambila Mwami kuteeti, "Komvwa Mwami! Ndilabwiinda akati buvubi bwangu okupa cibeela comwi kubapenzi, ape na ndakeeneena muntu, ndiyoomupilusizya ziindi zyone."

9 Jesu wakataba kuteeti, "Lufutuko lwasika kubantu boomuno mungʼanda sunu, kaambo ooyu mwaalumi awe ngokulunyungu lwa Abbulahamu. 10 ✝ Ede Mwanoo Muntu wakazida kuyandoola okufutula basweekede."

11 Bantu kabaciswiilizya eezi zyaalikwaamba, Jesu wakazwida anembo kubaambila cikozyanyo kaambo aawa walaafwifwi o Jelusalemu, ape kaambo ababantu bakayeeya aanga Bwami bwa Leza bwaandosika mpoonyinaawo. 12 Mpoonyina wakateeti kulibo, "Kwali mwaalumi walikukutekwa wali kwiinka kucisi cokule loko kuyoopegwa bwami kuteegwa kwamana apiluke azoolele bantu bakwe. 13 Katanainka, ababelesi bakwe wakaita bali kumi okubapa di lyomwi-lyomwi lyengolide* okubaambila kuteeti, ‘Mwaapindoole mali aaya kuteegwa ndaakuza ndizojane mpindu yawo.’ 14 Kono basicisinyina balikumuzondede, mpoonyina musule lyaakwe, bakatuma batumwa amajwi okuteeti, ‘Swebo tatuyandi kuteeti muntu ooyu abe mwami wesu.’

15 "Mwaalumi ooyo wakapegwa bwami amane wakapiluka. Mbwaakasika feela, wakaita babelesi bakwe boonse mbaapede mali kuteegwa azibe mpindu njibakajana mukupindooka kwabo. 16 Wokusaanguna wakasika okuteeti, ‘Mwami, ndakajana mali eengolide aali kumi kuzwa kuli lyomwi ndiwakandipede.’ 17 Mwami wakateeti kulinguwe, ‘Wacita kabotu, omubelesi mubotu! Iino kaambo ulasyomeka muzintu ziniini, ndilakupa bweendelezi bwa mataindi mapati aali kumi.’ 18 Mubelesi wabili wakasika okuteeti, ‘Mwami, ndajana mali eengolide aali osanwe kuzwa kuli lyomwi ndiwakandipede.’ 19 Kulooyu wakateeti, ‘Ulaba mweendelezye wa mataindi mapati osanwe.’ 20 Umwi mubelesi wakasika okuteeti, ‘Mwami, ndeeli di lyako lya ngolide, ndalilivungailide mukasila. 21 Ndakayoowa kaambo ulimukali. Ulabweza ciwatakabika ape ulakutula ciwatakabyala.’ 22 Mpoonyina mwami wakamwaambila kuteeti, ‘Yebo o mubelesi mubi! Ndilabelesya majwaako kukupa mulandu! Ulizi kuteeti ndilimukali, ndibweza cindatakabika okukutula cindatakabyala. 23 Ino niinzi niwatakaabika feela mumaanza abasimpindu malaangu? Naanga ndaatambula empindu atala akupiluka kwangu.’ 24 Mpoonyina wakaambila bakaimvwi aawo kuteeti, ‘Amumunyange di lye ngolide mulipe ooyo mubelesi ujesi aali kumi.’ 25 Kono bakateeti kulinguwe, ‘Mwami, ede ulijesi kale madi aali kumi!’ 26 Mwami wakabataba kuteeti, ‘Ndimwaambila kuteeti, aabo bajesi bayoopegwa zinji, kono uutajesi uyoonyangwa naanga kaniini kajesi. 27 ✝Iino kulaabo basinkondoma batalikuyanda kuteeti ndibe mwami wabo, amubeete kuno ape mubajaile mumenso aangu!’"

28 Jesu naakamana kwaamba namu, wakazumanana kwiinka ku Jelusalemu. 29 Naakasika afwiifwi omuunzi wa Betifage owa Bbetaniya ku Cilundu ca Oliva, wakatuma bobile ali basikwiiya kunembo 30 okubalailila kuteeti, "Kamuya kumuunzi ulaanembo. Muciyoosika feela, muyoojana mbongolo itana beleka, yaangidwe acisamu. Mukayaangunune mpoonyina muyeete kuno. 31 Na umwi amubuzye kuteeti, ‘Ino muyaangunwidaanzi?’ Mumwaambile kuteeti, ‘Mwami ulaiyanda.’"

32 Aabo basikwiiya bakatumwa, bakainka okuyoojana zyoonse zili mboonyina mbwaakabaambilide Jesu. 33 Nibali kuyaangununa mbongolo, bamukamwini bakababona okuteeti, "Ino muyangunwidaanzi mbongolo eeyo?"

34 Bakataba kuteeti, "Mwami uliiyanda," 35 Bakayeeta kuli Jesu, okuyala majansi aabo amunsana wayo, mpoonyina wakatanta fateni. 36 Naalikuyoobuya katantide fateni, bantu balikuyoobuyala majansi aabo munzila.

37 Naakasika afwiifwi o Jelusalemu, acibaka nzila mpoiselelela kuzwa kucilundu ca Oliva, mbunga yoonse yabasikwiiya bakwe yakatalika kusekelela okulumbaizya Leza ejwi pati kaambo kamaleele oonse ngibakabona, 38 ✝ kabateeti, "Ulilelekedwe Mwami ooyo uza muzina lyo Mwami Leza! Luumuno kujulu obulemu kuli Leza!"

39 Mpoonyina bamwi Bafalisi bali mumbunga oomo bakateeti kuli Jesu, "Omwiiyi, lailila basikwiiya bako baumune!"

40 Jesu wakabataba kuteeti, "Ndimwaambila kuteeti naanga baumuna, mabwe alatalika koongolola kulumbaizya."

41 Jesu naakaswena afwiifwi okulibona taindi pati lya Jelusalemu, wakalila kaambo wakalifwida mangʼeke taindi pati eeli. 42 Wakateeti, "Kambe feela niwalizi sunu ziyandika kuteeti kube luumuno! Kono iino tokonzyi kuzibona! 43 Nako iyoosika basinkondonyoko nebayookuyakila bwaanda bukuzungulukide kukusinkila koonse-koonse. 44 Mpoonyina bayookusinyoona yebo abana bako bakala mulindiwe. Taakwe bbwe naanga lyomwi ndebayoosiya atalee bbwenyina, kaambo taakwe niwakaciziba nako Leza naazide kuzookufutula."

45 Mpoonyina Jesu wakainka mulabba lye Ngʼanda ya Leza, okutalika kutanda balikuuzizya* mwateni, 46 ✝ kateeti kulibo, "Kulilembedwe mu Malembo kuteeti Leza wakateeti, ‘Ngʼanda yangu iyooba ngʼanda yokukombela.’ Kono mwaisandula kuba ciyubilo cababbi!"

47 ✝ Jesu walikwiisya mulabba lye Ngʼanda ya Leza buzuba-obuzuba. Bapaizi basilutwe abamayi bo Mulawo abasololi ba bantu balikuyandoola nzila yokumujaila fateni. 48 Kono bakakacilwa kwiijana kaambo bantu boonse balikuyandisisisya kumuswiilizya.