1 Jesu abasikwiiya bakwe nibali mulabba lye Ngʼanda ya Leza, wakalanga-langa okubona bavubi kababika zipego zyabo mucibikilo camali. 2 Ape wakabona mukamufu mupenzi awe kabika tudibilisi tobile tomukuba. 3 Jesu wakateeti, "Nconzyo ndimwaambila kuteeti, ooyu mukamufu mupenzi wapa kwiinda boonse, 4 kaambo bamwi aaba boonse bapa zipego zyabo kuzwa mubuvubi bwabo bunji. Kono we obupenzi bwakwe, wapa tudibilisi toonse twaajesi tokuponena fateni."

5 Iino bamwi basikwiiya ba Jesu balikwamboola mbuli mbuyalikuboneka Ngʼanda ya Leza amabwe mabotu akabelesigwa kwiiyaka ape ezipo zyali kupegwa kuli Leza kwiibotya. Kono Jesu wakateeti, 6 "Iyoosika nako yokuteeti zyoonse eezi zintu zemubwene ziyookolomonwa. Takukabi naanga bbwe lyomwi litikasyaale polyeelede kuba."

7 Mpoonyina basikwiiya bakabuzya Jesu kuteeti, "Omwiiyi, ino ziyoocitika lili eezi? Ape citondezyo nzi citakacitike kutondezya kuteeti ciindi casika cokuteeti eezi zintu zicitike?"

8 Amane Jesu wakateeti, "Amucenjele, kuteeti kutabi muntu umweena kaambo bantu banji bayooza muzina lyangu kabateeti, ‘Ndendime nguwe!’ Ape, ‘Nako yasika!’ Kono mutakabacilili. 9 Mutayoowi mwamvwa nkondo okubukilana kaambo eezi zyeelede kutalikila kucitika, kono tazyambi kuteeti mamanino alaafwiifwi loko."

10 Jesu wakazwidaanembo okuteeti, "Zisi ziyobukilana, bwami buyoolwana obwaminyina. 11 Kuyooba kuzungaana kwenyika kuyoosya, enzala mpati, amalwazi atabukila muzibaka zisiyene-siyene ape kuyooba ziyoosya okukomosya kuzwa kujulu. 12 Kono kazitana citika zyoonse eezi, muyaangwa okupenzegwa, muyootolwa kuyoozekisigwa muzikombelo okubikwa muntolongo ape muyeetwa kunembo lya bami okubeendelezi kaambo kangu. 13 Eeyi iyooba nako yenu yokuba bakamboni bangu. 14 ✝ Amuliibe ape mutalibambili mbomutakalikwabilile nako kaitana sika, 15 kaambo ndiyoomupa majwi o busongo cokuteeti taakwe naanga womwi sinkondonyoko uyoozikaka na kuzikazya eezyo zyemutikaambe. 16 Muciindi eeco, naanga bazyali benu abazyalwanyoko amabbululu ape abeenzinyoko bayoomwaaba. Bamwi benu mane bayojaigwa. 17 Boonse bayoomuzonda kaambo kangu. 18 Kono taakwe susu naanga lyomwi liyoosweeka kuzwa mumitwe yenu. 19 Amujatisye cokuzyandamana, mpoonyina muyoojana buumi butamani.

20 "Mwaakubona Jelusalemu yazingulukwa abasilumamba, mukazibe kuteeti nako yokukolomonwa kwayo yaswena afwiifwi. 21 Mpoonyina balimu Judiya abacijile mumalundu, ape aabo balimutaindi abazwe mwateni, mpoonyina aabo balimumiinzi batainki mutaindi, 22 ✝ kaambo aaya ngangawo mazuba ecisubulo azuzilikizya zyoonse Malembo zyaamba. 23 Maawe kulaabo banakazi bamisi akulaabo banyonsya mumazuba aayo. Nyika eeyi iyoosikilwa amapenzi ayoosya ayoozidaamwi obukali bwa Leza kubantu aaba. 24 Mpoonyina bamwi bayoojaigwa amasabule, ape bamwi bayootolwa mubuzike kuzisi zyoonse. Kumane Jelusalemu uyoolyatookwa abamasi mane kusikila nako yabamasi ikainde.

25 ✝ "Kuyooba zitondezyo zikomosya ku zuba, ku mwezi, oku nyenyezi. Mpoonyinaano ansi kuyooba kuyoowa okulyangana loko muzisi zyoonse kaambo kokuvuuma ko lwizi amayuwe mapati. 26 Bantu bayooyumimina kaambo kokuyoowa banoolindila citikasike munyika yoonse kaambo nguzu zilimumulenga-lenga ziyoozungaanisigwa. 27 ✝ Mpoonyina bayoobona Mwanoo Muntu keza mumayoba enguzu zipati obulemu. 28 Iino eezi zintu zyaakutalika kucitika, mukanyamuke obusicamba kaambo lwaangunuko lwenu lulaafwiifwi."

29 Mpoonyina Jesu wakabaambila cikozyanyo eeci, "Amuyeeye mukuyu emisamu yoonse imwi. 30 Nako nemubona maani atalika kusyuuka mulaziba kuteeti mainza alaafwiifwi. 31 Munzila iswana eeci, mwazoobona zintu eezi kazicitika, muzoozibe kuteeti Bwami bwa Leza bulaafwiifwi.

32 "Nconzyo ndimwaambila kuteeti zyoonse eezi ziyoocitika bamwi bantu besunu kabatana kufwa. 33 Julu enyika ziyoomana kono majwi aangu taayoomani.

34 "Amukale kamulibambilide! Mutayandisisyi mikiti okunywa makoko okubilaila zyoobuumi oobu, buyo-buyo buzuba oobo buyoomujanikizya kamutalibambilide, mboonyina mbuli kakole mbokaca. 35 Oobo buzuba buyooza ciyusu-yusu kubantu boonse bapona munyika. 36 Kamumamela okukomba nako yoonse kuteegwa mubeenguzu zyokwiinda kabotu-kabotu muzintu eezyo ziyoocitika okuyoima kunembo lyo Mwanoo Muntu."

37 ✝ Buzuba obuzuba walikwiinka kuyoiisya mulabba lye Ngʼanda ya Leza mpoonyina kujolezya walikuzwaanga okwiinka kucilundu ca Oliva kwaalikubucesezya. 38 Bantu boonse balikumufumina kuyomuswiilizya mulabba lye Ngʼanda ya Leza.