1 Jesu naakamana kwaamba zintu eezi zyoonse kubantu, wakanjila mu Kapenaumu. 2 Mutaindi eelyo kwakali umwi mweendelezi wabasilumamba beci Loma, wakajesi muzike ngwaalikuyandisya loko. Muzike ooyo walikuciswa colufu. 3 Silutwe wabasilumamba naakamvwa zya Jesu, wakakumbila bamaalu beci Juda bamwi kuteegwa bakamukumbilile kuteeti Jesu aze kuzooponya muzike wakwe. 4 Mpoonyina bakeza kuli Jesu, okumukombelezya loko kabateeti, "Ooyu muntu uleelede kugwasigwa ayibo. 5 Muntu uuyanda musyobo wesu weci Juda ape nguwakatuyakila cikombelo."

6 Mpoonyina Jesu wakainkaabo. Naakasika afwiifwi engʼanda, mweendelezi wabasilumamba wakatuma bamwi beenzinyina kuteegwa baambile Jesu kuteeti, "Mwami, utalikatazyi, kaambo tandelede kuteeti undizide mu ngʼanda yangu. 7 Naanga mebo kulimvwa kuteeti ndileelede kuza kulindiwe. Lailila feela mpoonyina mubelesi wangu ulapona. 8 Ndilizi kaambo amebo ndili muntu weendelezegwa abolupati-pati ape ndeendelezya basilumamba bamwi. Ndaambila omwi kuteeti ‘Koya’, ulainka, ape na ndaambila umwi kuteeti, ‘Koza’ uleza. Ape ndalailila mubelesi wangu kuteeti, ‘Cita namu,’ ulacita."

9 Jesu naakamvwa namu wakamukomokwa. Wakalanga bbunga lyabantu lyalikuyoobumucilila okuteeti, "Ndimwaambila kuteeti tandina kujana lusyomo mbuli oolu nekuba kubana Izilaili!"

10 Aabo bakatumidwe nibakapiluka kungʼanda ya silutwe wabasilumamba, bakajana mubelesi wapona kale.

11 Kuzwaawo, Jesu abasikwiiya bakwe bakainka kutaindi lya Naini, abantu banji bakamucilila. 12 Naakasika feela amanjililo omuunzi, wakaswaana bantu bayumwine mutunta. Ooyo mufu ngowakali mwana musyimani alike womukamufu. Bantu banji bakezaawe mukamufu ooyo kuzwa mumuunzi. 13 Mpoonyina Mwami naakabona mukamufu, wakamufwida mangʼeke okumwaambila kuteeti, "Aakaka leka kulila." 14 Jesu wakaswena afwiifwi okujata macile mpaalede mufu, balikwaayumwine bakaima. Mpoonyina Jesu wakateeti, "Musyimani, ndikwaambila kuteeti buka!" 15 Wakabuka okukala okutalika kwaamboola, amane Jesu wakamupeda kuli banyina.

16 Bantu boonse bakayoowa loko mpoonyina bakatalika kulumbaizya Leza kabateeti, "Musinsimi mupati wasika akati kesu! Leza waza kuzoofutula bantu bakwe!"

17 Mpuwo ya Jesu yakasabalangana cisi coonse ce Judiya ecilalaanda cizingulukide.

18 Basikwiiya ba Joni nibakamwaambila* zyoonse Jesu zyaalikucita, Joni wakaita bobile alimbabo. 19 Wakabatuma kuli Jesu kuyoomubuzya kuteeti, "Ino ndiwe ooyo uuza na? Na katucilangila umbi?"

20 Iino nibakasika kuli Jesu bakateeti, "Joni Mubbabbatizi watutuma kuzoobuzya kuteeti, ‘Ino ndiwe ooyo uuza na? Na katucilangila umbi?’"

21 Aciindi conya eeco, Jesu wakaponya bantu banji balikuciswa aabo bakali amalwazi okutanda myuuya mibi, ape wakabonya boofu banji. 22 ✝ Mpoonyina wakateeti kuli basikwiiya ba Joni, "Amupiluke mukaambile Joni zimwabona okumvwa, boofu balabona, zihole zileenda, basizinsenda balapona, basinkide matwi balamvwa, bafu balabusigwa, Makani Mabotu alakambookwa kubapenzi. 23 Ulilelekedwe ooyo utandizumboozyi!"

24 Kuzwaawo basikwiiya ba Joni nibakapiluka, Jesu wakatalika kwaamboola zya Joni Mubbabbatizi kubantu banji kateeti, "Nimwakainka munkanda kuli Joni mwalikuyanda kubona muntu uulibuti? Kana ndubu lwali kuzungaana kaambo koluwo na? 25 Nee? Ino mwainkide kuyobona ni? Mwaalumi uzwete zizwato zidula na? Bantu bazwata namu okupona kabotu bajanika mumaanda aabami! 26 Ino mwakainkilide kuyoobonaanzi? Musinsimi na? Iiyi nconzyo, kono mwakabona ciinda amusinsimi. 27 ✝ Joni nguwaambwa mumalembe kuteeti, ‘Leza wakaamba kuteegwa, Bona! Ndiyootuma mutumwa wangu kunembo lyako kuyoobamba nzila motizooinde.’" 28 Jesu wakayungizizya okuteeti, "Ndimwaambila kuteeti, Joni mupati kwiinda boonse bakaponaansi aano. Kono ooyo muniini mu Bwami bwa Leza mupati kwiinda Joni."

29 ✝ Bantu boonse antoomwi abasimutelo bakamvwa kukambooka kwa Joni, bakazumina kuteeti nzila ya Leza ililuleme mpoonyina ncibakabbabbatizigwa okucililizya zyayanda Leza. 30 Kono Bafalisi abamayi bo Mulawo bakakaka muzeezo ngwaali kujesi Leza alibo, ncibakakakila kubbabbatizigwa o Joni.

31 Jesu wakaindilizya kateeti "Ino bantu bomusela wesunu inga ndabakozyanye enzi? Babede mbuli nzi? 32 Bali mbuli bana bakede mumusika. Kamwi kabunga kabana kalateeti kuli kamwi, ‘Twamulizizya nyeele, kono taakwe nimwazyana! Twaimba nyimbo zyecililo kono taakwe nimwalila.’ 33 Ede Joni Mubbabbatizi wakeza katalyi zilyo zibalikulya obuzuba bantu boonse okutanywa waini, mpoonyina mwaamba kuteeti, ‘Uleedimona.’ 34 Mwanoo Muntu wakeza kalya okunywa, mpoonyina mwaamba kuteeti, ‘Amumubone, uleendya ape mukolwi, mweenzinyina wabasimutelo abasizibi.’ 35 Kono busongo bwa Leza bulalitondezya kuteeti mbwanconzyo mubana bakwe."

36 Umwi Mufalisi wezina lya Saimoni wakatamba Jesu kuteeti akalalile awe. Mpoonyina Jesu wakainka kungʼanda yo Mufalisi okuyookalaansi kuteegwa alye. 37 ✝ Iino oomo mutaindi mwali mwanakazi sizibi. Naakamvwa kuteeti Jesu walikulya mu ngʼanda yo Mufalisi, wakeeta nsanzi yakapangwa ebbwe lya alabbasita* yalikuzwide mafuta aanunkilila. 38 Ooyu mwanakazi wakaima kusule lya Jesu kuzituta zyakwe kalila okutalika kuzitesya emisozi yakwe. Amane wakazipukuta amasusaakwe, wakazimyonta okuzitila mafuta aanunkilila.Jesu kakede abantu atafule, mwanakazi kamupukuta zituta zyakwe amasusaakwe 39 Mufalisi wakatamba Jesu naakabona namu, wakalyamboozya mumoyo wakwe kateeti, "Kambe ooyu mwaalumi walimusinsimi, naaziba mbwabede ooyu mwanakazi umujata obuumi bwezibi mbwapona."

40 Mpoonyina Jesu wakamwaambila kuteeti, "Saimoni ndilaacokukwaambila."

Saimoni wakataba kuteeti, "Iyii O mwiiyi, ndaambile."

41 Jesu wakamwaambila caano kateeti, "Kwali baalumi bobile bakakolotede mali kuli sikukolotisya, womwi wakolotede myaanda yosanwe yamali eensiliva, umwi wakolotede makumi osanwe. 42 Taakwe naanga omwi walikukonzya kupilusya cikoloti alaaba bobile, mpoonyina wakabajatila. Iino ngwani alaaba bobile utimuyande loko?"

43 Saimoni wakataba kuteeti, "Ndiyeeyaanga ngooyo wakajatilwa zinji."

Jesu wakamwaambila kuteeti, "Wataba kabotu." 44 Mpoonyina wakacebukila mwanakazi okwaambila Saimoni kuteeti, "Wamubona ooyu mwanakazi zyaacita? Nindeza mu ngʼanda yako mbuli mweenzu, taakwe niwandipa maanzi ookusamba kuzituta,* kono we wasanzya zituta zyangu emisozi yakwe okuzipukuta amasusaakwe. 45 Taakwe niwandimyoonta* nindasika, kono we taakwe naaleka kumyonta zituta zyangu kuzwa nindasika. 46 Taakwe niwanditila mafuta kumutwe kundilemeka, kono we watila zituta zyangu amafuta aanunkilila. 47 Ndakwaambila kuteeti zibi zyakwe zyali zinji zyajatilwa caatondezezya luyando lupati. Kono kufumbwa uujatilwa ziniini, utondezya luyando luniini."

48 Mpoonyina Jesu wakaambila mwanakazi kuteeti, "Zibi zyako zyajatilwa."

49 Kono bamwi bakede ambabo atafule bakatalika kulibuzya kuteeti, "Ngwani ooyu, mane ukonzya okujatila zibi?"

50 Mpoonyina Jesu wakateeti kumwanakazi, "Lusyomo lwako lwakufutula, koya muluumuno."