1 Bumwi buzuba bwe Nsabata Jesu naakainka kuyoolya kungʼanda youmwi mweendelezi wa Bafalisi, boonse bantu ooko bakamulangisisya. 2 Mpoonya-mpoonya umwi mwaalumi walikuciswa bulwazi bokuzimba maulu amaanza wakeza kuli Jesu. 3 Mpoonyina Jesu wakabuzya bamayi bo Mulawo a Bafalisi kuteeti, "Ino Mulawo wesu ulazumizya na tuuzumizyi kuponya muntu mu Nsabata?"

4 Kono taakwe nibakamutaba naanga comwi. Mpoonyina Jesu wakajata mwaalumi ooyo okumuponya. Amane, wakamuleka wainka. 5 ✝ Mpoonyina Jesu wakaambila bamayi bo Mulawo a Bafalisi kuteeti, "Ino kuteeti umwi wenu kajesi mwana na mupulu wawida mudindi mubuzuba bwe Nsabata, takoomugwisya mpoonya-mpoonya na?"

6 Kono bakuukacilwa kuutaba ooyu mubuzyo.

7 Mpoonyina Jesu naakabona beenzu bakatambidwe ku mukiti kabasala zibbula zibotu zyobulemu, wakabaambila cikozyanyo eeci, 8 ✝ "Nakuteeti watambwa ku mukiti womucado, utazuzili kukala acibbula cobulemu, kaambo cimwi ciindi kuli watambwa ukutekwa kwiinda yebo. 9 Mpoonyina wamutamba noonse ulakwaambila kuteeti, ‘Cija acibbula eeci kukale ooyu.’ Mpoonyina uyoolisenda loko waakukala acibbula ciniini cili munsi loko. 10 Kono watambwa kala acibbula ciniini loko kuteegwa uulya wamutamba aze azookwaambila kuteeti ‘Nyamuka mweenzuma, tanta uzookale mucibbula cibotu kwiinda eeco.’ Mukucita namu, uyoopegwa bulemu akati kabantu batambwa boonse, 11 ✝Ndamupa cikozyano eeci kumwiisya kuteeti boonse balisumpula bayootolwa ansi ape aabo balitola ansi bayoosumpulwa."

12 Mpoonyina Jesu wakateeti kuli wakamutamba, "Wabamba cisusulo na cilalilo, utatambi beenzinyoko na bazyalwanyoko na bomukowaako na bavubide mbokala aabo afwiifwi kaambo abo bayokutamba, muleeyi nzila unooliwapilusisigwa kale kuli cowacita. 13 Kono wapanga mukiti, tamba bapenzi, zihole aboofu. 14 Mpoonyina uyoolelekwa kaambo tabakonzya kukupilusizya. Leza uyookupilusizya mubuzuba bantu baluleme baakubuka kuzwa kubafu."

15 Naakamana kwaamboola Jesu, umwi waabo balikulya atafule wakamwaambila kuteeti, "Ulilelekedwe ooyo uuyoolya mumukiti womu Bwami bwa Leza!"

16 Jesu wakateeti kulinguwe, "Imwi nako, kwali muntu wakakanza kupanga mukiti mupati okutamba bantu banji. 17 Niyakasika nako, wakatuma mubelesi wakwe kuyoitaabo bakatambidwe, ‘Amuze-amuze, zyoonse zyabambwa kale!’ 18 Kono boonse bakatambidwe bakatalika kulitamizya. Wokusaanguna wakateeti kumubelesi, ‘Amundijatile kaambo ndakazwaakuula muunda mpoonyina ndeelede kuyoubona.’ 19 Umwi wakateeti, ‘Amundijatile kaambo ndakazwaakuula zipani zyosanwe zyamapulu. Ndiyanda kuyoozisola kulimya.’ 20 Oumwi wakateeti, ‘Tandikookonzya kuza kaambo ndakazwaakukwata.’ 21 Mubelesi wakapiluka okuyaambila simalelaakwe zyoonse zibakaamba basikutambwa. Simalelaakwe wakanyema loko mpoonyina wakaambila mubelesi wakwe kuteeti, ‘Fwambaana koya mumigwagwa o mutuzila tomutaindi ukeete bapenzi, zihole, aboofu.’ 22 Naakapiluka mubelesi wakateeti, ‘Simalelaangu, ndacita mboonyina mbumwandilailide, kono cibaka kocicili.’ 23 Mpoonyina simalelaakwe wakateeti, ‘Koya munzila ziindilila omutuzila twiinda mumyuunda ukabakombelezye boonse kuteeti baze kuteegwa ngʼanda yangu izule. 24 Ndimwaambila kuteeti taakwe naanga omwi waabo bakatambidwe kusaanguna uyooulabila mukiti wangu!’"

25 Iino Jesu naalikuyoobweenda amabunga aabantu, wakacebuka okuteeti kulibo, 26 ✝ "Aabo bayanda kundicilila tabakonzyi kuba basikwiiya bangu, aati kuteeti bandiyanda kwiinda mbobayanda baisi abanyina, banakazi babo abana, bazyalwanyina abamacizi, okwiinda mbobaliyanda. 27 ✝ Taakwe ukonzya kuba sikwiiya wangu aati wanyamuna ciingano cakwe okundicilila. 28 Ino kuteeti umwi wenu wayeeya kuyaka ngʼanda ndamfu, takookalaansi okubalila ziyandika kubona kuteeti na mali ngajesi alakwana kwiiyaka yoonse?Ngʼanda ndamfu 29 Buyo-buyo inga wayaka feela ntalisyo okukacilwa kwiimana ngʼanda yoonse, mpoonyina boonse bayaabona mayakaakwe bayoomuseka. 30 Banooteeti, ‘Ooyu mwaalumi wakaatalika mayake kono wakaakacilwa kwaamaninizya.’ 31 Naanga mwami nzi unga wainka kunkondo abasilumamba bali zyuulu zili kumi kuyoolwana o mwami ujesi basilumamba bali zyuulu zili makumi obile? Ede uyoosaanguna kukala ansi okubona na uyookonzya kuzunda mwaminyina. 32 Kono na wayeeya kuteeti takonzyi kumuzunda, uyootuma baiminizi bakwe kuteeti bakaswaane mwami ooyo kuyookumbila luumuno nacili kule." 33 Mukumaninizya Jesu wakateeti, munzila iswana, "Taakwe naanga omwi akati kenu ukonzya kuba sikwiiya wangu aati wafutatila okusiya zyoonse zyajesi.

34 "Sautu ndibbotu, kono kuteeti lyasampuka, taakwe mbolikonzya kupilusigwa kuteeti linone ape. 35 Talikwe bubotu kumuse na kumbolezi. Elyo sautu lilinamu ndyakusowa feela. Ulaamatwi ookumvwisya, amvwe!"