8 Na, kay manga inulug ku, yan ya gayed mayu anenganenga ya matinaw aw ya diliꞌ pagsala-en aw ya matulid. Anenganenga mayu ya malinis na walaꞌ ya daliꞌ, aw pangkay unu na to-o madyaw, aw ya umbaꞌ sayaꞌ.

2 Diliꞌ mayu pagsilingan ya bet na manga utaw na walaꞌ pangintu-u sa Tyumanem. Manang pabaguwan baling sa Tyumanem ya kamayu anenganeng pada ka-ede-an mayu ya tengteng pagkaliman nan, aw kalabetan mayu kun unu ya madyaw aw ya makatutuk kanan, aw kun unu ya umbaꞌ imo-un.

13 Yanagaw pakasaliga ya kamayu anenganeng aw tagilana dun ni pag-imoꞌ sa pagkaliman na Tyumanem. Aw pagtibulluk kamu adti pig-iman mayu na grasya na un nan atag kamayu dun ni allaw na bukasan si Jisu-Kristu.

20 Deyen tadun ya Tyumanem! Kay magi sa katulus nan na migtalabahu dun ni seled tadun, mabatug nan imo-un ya to-o pa dakulaꞌ kay sa kadég na pigsekat tadun aw sa kanaten pig-anenganeng. 21 Umbaꞌ deyen ya Tyumanem na walaꞌ ya tyamanan, asuntu sa kadég tadun na manga mangintu-uway na migsimba kanan, aw asuntu kan Kristu Jisus na kanaten Matas na Pangulu. Amén.

12 Kay to-o matulus ya tingeg na Tyumanem, aw to-o pa matalem kay sa lipang. Mabatug nan kelegan ya anenganeng na manga utaw kasiling na lipang na pigtibas na matengaꞌ nan ya pigkita͡an na pesaꞌ, aw dayaw uman datengen ya utuk na pesaꞌ. Aw mabatug na kanan tingeg bukasan ya awun ni anenganeng na utaw pangkay ya pigtaguꞌ nan dala ya manga palpa aw pagkaliman nan.

20 Miglong uman si Jisus, "Ya kadég na malatay na lyumekat adti anenganeng na utaw, yan ya makapalipaꞌ kanan. 21 Kay ya anenganeng na utaw, yan ya lyekatan sa kadég na malatay kasiling na pagkasala-enen, pagpanakaw, pagpatay sa utaw, 22 aw ya paglakadenen, aw ya pagkatagaw, aw ya pagkaybeg sa pametang na eped na utaw, aw ya pagkaliman mag-imoꞌ sa malatay adti eped, ya paggaluꞌ, aw ya pag-imoꞌ sa makamulamula sa lawas, aw ya pag-ingaꞌ, aw ya pagkalat sa dengeg na eped na utaw, aw ya pagpatastas, aw ya pagkategel. 23 Ya kadég na malatay yeiy, lekat saba adti anenganeng na utaw, aw yan ya makapalipaꞌ kanan."

25 "Yanagaw paglongun ta kamu: Diliꞌ magkakamang ya kamayu ginawa sa kadég na kamayu kapelekan asini tas na lupaꞌ, kun unu ya un mayu kanen aw inemen, aw kun unu uman ya un mayu sutun. Kay ya pag-eyaꞌ na utaw asini tas na lupaꞌ, bekeꞌ oloꞌ na makan aw bekeꞌ oloꞌ na kadégkadég.

7 "Aw dun ni kamayu pagpanawagtawag adti Tyumanem, ya-i mayu pagsalutsaluta ya manga tingeg kasiling na pig-imoꞌ na manga utaw na Héntil na walaꞌ paka-edeꞌ sa tengteng na Tyumanem. Kay mig-anenganeng silan na kun salutsalutun nilan ya kanilan pagpanawagtawag pakanyegan silan.

1 Dun ni manga allaw yan, matag pilammalalan ya manga utaw na migpangkatipun pada magpakanyeg kan Jisus, aw gayed da silan mig-insek. Aw piglongan nan una ya kanan manga umagakan, law nan, "Magpakatadeng kamu sa manga Parisiyo pagaw katapunan kamu na kanilan pagtallalingu, kay ya bet nilan kasiling na patulinay sa pan. 2 Kay walaꞌ ya nyataguꞌ adun na diliꞌ kagaya kabukasan, aw ya malatay na kaliman na utaw tagu-un, ya kadég alag saba ka-ede-an. 3 Yanagaw, pangkay unu ya piglong mayu dun ni mangitngit, dengegen da kagaya kun magkalalamdag da. Aw pangkay unu ya pigtumantuman mayu adti seled na tambiꞌ na pigtakepan, bekkalen kagaya adti kadég na manga utaw.

4 "Kamu na kanak manga ubaybay, paglongun ta kamu: Diliꞌ kamu magkallek sa manga utaw na makamatay sa lawas mayu, kay oloꞌ lawas ya mabatug nilan patayen, aw tigkas yan walaꞌ da ya mabatug nilan na malatay dun ni kamayu. 5 Manang ubat ku kamayu kun singalan ya umbaꞌ mayu kallekan: Kalleki mayu ya Tyumanem kay mabatug nan saba patayen ya lawas na utaw aw awun uman katulus nan mag-agbel sa utaw adti atulun na diliꞌ pagkapatayan. Yan saba ya paglongun ku kamayu na Tyumanem oloꞌ ya umbaꞌ mayu kallekan.

6 "Anenganenga mayu ya mangkayantek na langgam na maya. Pangkay lima ya maya, manang tagbiꞌ to-o ya alagaꞌ nilan. Manang walaꞌ ya pangkay sambuk kanilan na pigkalingawan na Tyumanem. 7 Aw to-o pa kamu dun na diliꞌ nan kalingawan. Pangkay ya manga lugay mayu kya-ede-an saba na Tyumanem kun pila ya kadég. Yanagaw diliꞌ kamu magkallek kay to-o pa dakulaꞌ ya alagaꞌ mayu kay sa madég na maya."

8 Migpadeleg si Jisus miglong adti madég na utaw, law nan, "Paglongun ta kamu: Pangkay singalan ya maglong adti asdangan na manga utaw na umagakan ku sakanan, aku na Iseꞌ na Utaw maglong uman adti asdangan na manga anghil na Tyumanem na umagakan ku ya utaw yan. 9 Manang pangkay singalan ya magbalyaw kanak adti asdangan na manga utaw, balyaw ku uman sakanan adti asdangan na manga anghil na Tyumanem. 10 Pangkay singalan ya maglong sa malatay adi kanak na Iseꞌ na Utaw, mabatug lanasen na Tyumanem ya salaꞌ nan. Manang ya utaw na maglong sa malatay adti Ispiritu Santo, diliꞌ saba lanasen ya salaꞌ na utaw yan.

11 "Asuntu sa pagpangintu-u mayu kanak, awun manga utaw na maglimanda kamayu aw pa-agad kamu nilan adti mag-usayay dun ni sinagoga, aw adti asdangan na manga gubirnador aw manga migdumala. Manang diliꞌ magkakamang ya ginawa mayu kun unu ya un mayu tubag kanilan, 12 kay dun ni udas yan, ya Ispiritu Santo, yan ya magpalna-u kamayu kun unu ya madyaw mayu paglongun."

13 Na, dun ni madég na manga utaw awun sambuk na miglong kan Jisus, "Kay Magpalna-uway, paglonga kanak ya magulang ku na eseg na bagi-an aku nan sa ayawanan na ama nami." 14 Manang tyumubag si Jisus kanan, "Kay Lew, singalan kaꞌ ya nyatag kanakeꞌ sa katundanan sa pag-usay kamayu aw sa pagtengaꞌ sa ayawanan yan?" 15 Tigkas yan, miglong pa si Jisus adti madég na utaw, "Magpakatanaw kamu pagaw walaꞌ ya katantanan mayu maninaw sa kuwalta aw ka-unan. Kay ya tengteng madyaw na pag-eyaꞌ walaꞌ dun ni kadakulaꞌ na nyatagtun na utaw." 16 Aw miglong si Jisus adti kanilan sa pundinganan: "Awun sambuk na makabatug na to-o dakulaꞌ ya aniyenen adti pawaꞌ nan. 17 Yanagaw miglong sakanan adti anenganeng nan, ‘Unu ya un ku imo-un adun? Walaꞌ da ya pul na kabetangan sa aniyenen ku! 18 Madyaw pa baling na agba-en ku ya kanak manga dadan na pul aw mag-imoꞌ aku sa to-o pa dakulaꞌ. Aw dun ku luduka ya kadakulaꞌ na kanak ani aw ya kadég na manga pametang ku. 19 Aw tigkas yan, maglong aku, "To-o la madég ya pigtagilan ku sa dumadateng na manga umay. Maglagdeng aku, aw to-o kuman aw minem, aw to-o aku magleya!" ’ 20 Manang miglong ya Tyumanem kanan, ‘Ayin pakabetang ya anenganeng mu? Adun na gabi kamangen ku ya ginawa mu. Yanagaw singalan pa ya makatagtun sa kuwalta aw ka-unan na pigluduk mu?’ " 21 Aw miglong pa si Jisus, "Maynan saba ya ma-imoꞌ sa utaw na migluduk sa manga ka-unan aw kuwalta pada ka-untungan oloꞌ ya kanan pagka-utawun manang walaꞌ nan gamita ya nyatagtun nan pada katutukan ya Tyumanem."

22 Pagkatigkas yan, miglong si Jisus adti manga umagakan nan, "Yanagaw paglongun ta kamu: Diliꞌ magkakamang ya ginawa mayu sa kadég na kamayu kapelekan asini tas na lupaꞌ, kun unu ya un mayu makan aw unu ya un mayu sutun. 23 Kay ya pag-eyaꞌ na utaw asini tas na lupaꞌ, bekeꞌ oloꞌ na makan aw bekeꞌ oloꞌ na kadégkadég. 24 Inunuwa mayu ya manga langgam. Walaꞌ silan pagtanem, aw walaꞌ silan uman pag-ani. Walaꞌ ya pul na un nilan pagludukan sa kanilan makan, manang pigpakan silan saba na Tyumanem. Aw asuntu na to-o pa dakulaꞌ ya alagaꞌ mayu kay sa kanilan, yanagaw atagan kamu nan sa kadég na kamayu kapelekan! 25 Singalan kaꞌ kamayu ya makasugpat sa ginawa mayu asini tas na lupaꞌ magi sa pagkaypeng mayu? Walaꞌ saba. 26 Na, kun diliꞌ mayu mabatug ya maynan, anangaꞌ magkakamang ya ginawa mayu sa manga kapelekan? 27 Inunuwa mayu ya pagtulin na manga sagbet na magpamulak adti magalet. Walaꞌ silan pagtalabahu aw walaꞌ uman silan pagtéꞌ. Manang paglongun ta kamu: Si Solomon, to-o dengganen ya pagkahariꞌ nan asini muna aw syumut sakanan sa kadégkadég na to-o manenggeya, manang to-o pa dun manenggeya ya manga bulak yeiy. 28 Ya manga sagbet adti magalet mamulak adun aw pagkakunallaw malanes aw tigkas yan sangaben. Aw pangkay tagbiꞌ ya alagaꞌ nilan, manang pigpakanenggeya silan na Tyumanem. Aw to-o pa kamu saba nan atagan sa un mayu sutun. Tay sa katagbiꞌ na pagpangintu-u mayu! 29 Yanagaw diliꞌ gayed magkakamang ya ginawa mayu kun unu ya un mayu kanen aw inemen. 30 Ya kadég yeiy, gayed pigtibagsegan na matagtun na manga utaw na walaꞌ pangintu-u sa Tyumanem. Manang kamu, walaꞌ ya du-an na makamang ya ginawa mayu, kay kya-ede-an da saba na Ama mayu na awun ni tas na langit kun unu ya kamayu kapelekan. 31 Tibulluka mayu baling ya kamayu anenganeng adti kadég na awun ni Kasakupan na Pighari-an na Tyumanem. Kun maynan ya imo-un mayu, sambaten nan ya kadég na kamayu kapelekan.

32 "Ya kadég mayu na kanaken manga umagakan, pangkay tabay kamu manang diliꞌ kamu magkallek, kay yan ya pagkaliman na Ama mayu na awun ni tas na langit na atag kamayu ya kadég na awun ni kanan Kasakupan. 33 Yanagaw galina mayu ya kamayu nyatagtun, tigkas yan, atagi mayu ya manga utaw na walaꞌ ya pagkamangan. Kun imo-un mayu yeiy, dun da kamu pagluduk sa palangad ka-unan adti tas na langit, kasiling na betanganan sa kuwalta na diliꞌ magkalat. Ya pigluduk mayu adti tas na langit diliꞌ saba malagak aw walaꞌ ya makatakaw, aw walaꞌ ya mannanap na makakan. 34 Kay kun ayin ya kanmu ka-unan, adtu uman ya kanmu anenganeng.

35 "Magpakatadeng kamu aw gayed mayu pasiga͡en ya kamayu manga salengan pada diliꞌ kamu kabigla-an. 36 Pagsiling kamu sa manga sugu-anen na gayed migtagad sa pag-uliꞌ na amu nilan lekat adti kasal, pada sa pagdateng nan aw sa pagtawag nan, maksay nilan ka-uwangan ya tatakep. 37 Madyaw ya kana manga sugu-anen na nyakatagad sa paglikuꞌ na amu nilan kay walaꞌ silan pakatulug aw gayed silan mig-inap. Paglongun ta kamu na pa-ingkudun saba na amu ya kanan manga sugu-anen aw dayaw nan silan sanggila-en. 38 To-o madyaw ya kanilan kun datengan silan na kanilan amu na mig-inap pangkay kun magtengaꞌ da ya gabi aw pangkay kun paka͡allawunun da.

39 "Anenganenga mayu yeiy: Kun kya-ede-an pa na tagtun sa balay ya udas na pagseled na matakaw, pakatanawan nan saba ya kanan balay pada diliꞌ makaseled ya matakaw. 40 Yanagaw ka-ilangan mayu magtagilan, kay pangkay unu udasa lumikuꞌ aku na Iseꞌ na Utaw na diliꞌ mayu pag-imanmanen."

41 Aw nyusip si Pédro, "Kay Magpalna-uway, singalan ya pig-ubat-ubatan mu sa pundinganan yeiy, kami oloꞌ aw kun ya kadég na manga utaw?" 42 Tyumubag si Jisus kanan, "Ya sugu-anen na kasaligan aw to-o matadeng, yan ya taliguwan na amu nan sa manga eped nan na sugu-anen dun ni balay. Aw yan ya matag kanilan sa kakan na umbaꞌ sa allaw yan. 43 Madyaw ya kana sugu-anen yan kun sa pag-uliꞌ na amu nan, kita-en na pigpakadyaw nan ya talabahu na pigtaligu kanan. 44 Matinaw ya un ku paglongun kamayu: Ya sugu-anen yeiy un saba taliguwan na amu nan sa kadakulaꞌ na kanan nyatagtun. 45 Manang ya sugu-anen na diliꞌ kasaligan, mag-anenganeng sakanan, ‘Nyasalang pa ya amu ku kay madugay walaꞌ likuꞌ.’ Yanagaw palekaten nan ya pagpanlabet sa manga eped nan na sugu-anen na eseg aw manga bubay, aw gayed sakanan kuman aw minem mendaꞌ na malangulangu sakanan. 46 Manang dumateng ya kanan amu dun ni udas na walaꞌ nan pag-imanmana, aw to-o saba sakanan pa-emel-emelen na amu nan. Aw pasambuk sakanan adti banwa na pagludukan sa manga utaw na diliꞌ kasaligan.

47 "Na, ya sugu-anen yan, pangkay kya-ede-an nan ya pagkaliman na tagtun kanan manang walaꞌ nan tumana aw walaꞌ sakanan pagtagilan sa paglikuꞌ nan, yanagaw to-o saba sakanan labeten. 48 Manang ya sugu-anen na walaꞌ paka-edeꞌ sa pagkaliman na amu nan aw walaꞌ uman paka-edeꞌ sa salaꞌ na nya-imoꞌ nan, pa-emel-emelen uman sakanan manang diliꞌ to-o labeten. Na, ya utaw na pig-atagan sa madég, madég uman ya imanen lekat adti kanan. Aw ya utaw na pigtaliguwan sa madég na imo-unun, madég uman ya imanen lekat adti kanan."

49 Aw miglong pa uman si Jisus kanilan, "Nyadi aku asini tas na lupaꞌ na un dumala sa atulun, aw kaliman ku na maksay da yeiy lumaga. 50 Manang sa diliꞌ pa yeiy ma-imoꞌ, madég pa ya manga pagti-is na un ku ka-agiyan. Aw diliꞌ matingen ya kanak anenganeng mendaꞌ na matuman ya kadég yeiy. 51 Diliꞌ kamu mag-anenganeng na nyadi aku pada dumala sa kalinaw asini tas na lupaꞌ. Ya pagkadi ku, yan baling ya du-an na matenga-tengaꞌ ya manga utaw. 52 Lekat adun, kun awun lima ya mig-eyaꞌ adti sambuk na balay, diliꞌ da magkasambuk ya anenganeng nilan. Ya tulu, tanamen nilan ya duwa, aw maynan uman ya duwa adti tulu. 53 Ya ama aw ya kanan iseꞌ na eseg, magtanam silan asuntu kanak. Aw ya ina aw ya kanan iseꞌ na bubay, magtanam uman silan. Aw ya ugangan nan na ka͡ubayan aw ya makeyeꞌ nan na ka͡ubayan, magtanam silan uman."

54 Aw miglong pa uman si Jisus adti madég na manga utaw, "Sa pagkitaꞌ mayu sa lugaytem adti sallepan, maglong kamu, ‘Mulan adun,’ aw mulan saba. 55 Aw kun tumambel ya samet lekat adti balabagan, maglong kamu uman, ‘Mapasuꞌ adun,’ aw magkapasuꞌ saba. 56 Migtallalingu kamu! Matadeng kamu mag-ubad sa timpu manang anangaꞌ walaꞌ mayu kabatug ya pag-ubad sa kakawasan na manga nyangka-imoꞌ adun na manga allaw yeiy?

57 "Aw anangaꞌ walaꞌ mayu anenganenga kun unu ya madyaw imo-un? 58 Kun awun maglimanda kanmu, tibagsegi na maksay kamu magkakadyaway talana mayu dun ni dalan pasinan adti usayanan, pagaw padakep kaw na utaw yan aw dala͡en kaw nan adti mag-ukumay, aw ya mag-ukumay magtumbay kanmu adti pulis pada pakalabusu kaw. 59 Paglongun ta kamu: Diliꞌ kaw paluwa-en lekat adti kalabusuwanan kun diliꞌ mu una kabayadan ya kadakulaꞌ na salaꞌ na nya-imoꞌ mu."

3 Na, asuntu sa katundanan na pig-atag kanak na Tyumanem, paglongun ku ya kadég mayu: Diliꞌ kamu mag-anenganeng na to-o pa kaw madyaw kay sa eped mayu. Manang anenganengen mayu baling na ya tagsambuksambuk kamayu awun katadeng na pig-atag na Tyumanem na umbaꞌ sa kanan pagpangintu-u.

10 Kay manga inulug ku, nyanginayuꞌ aku kamayu dun ni ngalan ni Jisu-Kristu na kanaten Matas na Pangulu na magkasambuk ya kadég mayu aw diliꞌ da kamu matenga-tengaꞌ. Aw pagsambuka uman ya tud na anenganeng mayu.

11 Kasiling na utaw, walaꞌ ya nyaka-edeꞌ sa anenganeng na sambuk na utaw, yan oloꞌ ya nyaka-edeꞌ sa kanan anenganeng. Maynan uman ya Tyumanem, walaꞌ ya utaw na nyaka-edeꞌ sa anenganeng nan. Kanan oloꞌ Ispiritu ya nyaka-edeꞌ.

18 Diliꞌ mayu paggawayan ya kamayu pagka-utawun magi sa pagsalig mayu sa kamayu katadeng. Kun awun utaw dun ni kamayu na miglong na dakulaꞌ ya katadeng nan asini tas na lupaꞌ, ayawan da nan galu ya katadeng na maynan pada magkatadeng sakanan sa kana Tyumanem.