1 Na, adti syudad na Césariya dun ni probinsiya na Judiya, awun utaw dun na pigngalanan na Cornélyo. Sambuk sakanan na kapitan na migdumala sa sangka batalyun ya sundalu na taga Italiya. 2 Aw pangkay Héntil sakanan, manang nyatibulluk ya ginawa nan dyumalug sa Tyumanem aw awun pagkallek nan kanan, dala uman ya manga ka-epedanan nan dun ni balay. Aw dakulaꞌ to-o ya tabang nan adti manga Judiyu na walaꞌ ya pagkamangan. Aw malikit sakanan magpanawagtawag adti Tyumanem. 3 Sambuk na allaw, manga alas trés na ambung, awun anghil na Tyumanem na migpakitaꞌ kan Cornélyo kasiling na tagaynep. Syumeled ya anghil adti balay nan aw miglong, "We Cornélyo!" 4 Aw to-o si Cornélyo migteneb aw nyakatengteng sa anghil. Aw law nan, "Unu yan kay Sir?" Aw tyumubag ya anghil, "Dyengeg da na Tyumanem ya kanmu pagpanawagtawag aw walaꞌ nan kalingawi ya pagtabang mu sa manga utaw na makalalat. 5 Na, pagsuguꞌ kaw sa manga eseg adti Jopa aw pa-angayan si Simon na pigngalanan uman na Pédro. 6 Nyeyaꞌ sakanan dun ni balay na sambuk na Simon na mag-imo-ay sa manga pametang lekat adti kindal na ayep. Apit adti ligad na dagat ya balay nan." 7 Sa walaꞌ da dun ya anghil, migtawag si Cornélyo sa duwa ya sugu-anen nan aw sambuk uman na sundalu na kanan pagsaligan na nyatibulluk uman ya ginawa nan dyumalug sa Tyumanem. 8 Aw pig-ubat nan kanilan ya kadég na nya-imoꞌ. Aw tigkas yan, pigsuguꞌ nan silan na madtu ni Jopa.

9 Pagkasalut na allaw na manga alas dosi la, migkalapit da adti Jopa ya manga pigsuguꞌ ni Cornélyo. Aw yan uman na udas, nyanik si Pédro adti atep na balay na un manawagtawag adti Tyumanem.* 10 Aw walaꞌ kadugay nyagetem si Pédro aw kaliman da nan kuman, manang talana nan tyumagad sa mag-imo-ay sa kakan, awun pigpakitaꞌ kanan na Tyumanem. 11 Nyabekaꞌ ya langit aw awun kyinitaꞌ nan na nyatonton dun ni asdangan nan na iman mu aw dakulaꞌ na abul na nya-ulad na pig-eketan ya upat ya tuktuk. 12 Adti seled na abul yan, awun madég na punganan na mannanap aw ayep, dala ya manga magpanaw aw ya manga magpananap aw ya manga langgam.* 13 Aw awun tingeg na dyengeg nan na miglong, "Kay Pédro, indeg kaw aw pag-iyaw kaw, aw kana!" 14 Manang tyumubag si Pédro, "Kay Matas na Pangulu, diliꞌ aku san magkan! Taman adun walaꞌ pa ya pigkan ku na malipaꞌ na pigpigil adti Uldin na manga Judiyu." 15 Pagkatigkas yan, pigdengeg da nan uman ya tingeg na miglong, "Kun unu ya piglong na Tyumanem na malinis da, ka-ilangan na diliꞌ da mu pagngalanan na malipaꞌ." 16 Makatlu yeiy ka-imoꞌ, aw tigkas yan, nya-engat ya dakulaꞌ na abul adti langit.Pigpakitaꞌ na Tyumanem kan Pédro ya manga mannanap na diliꞌ pagkanen na manga Judiyu.

17 Talana nyabelengbeleng pa si Pédro kun unu ya kakawasan na kyinitaꞌ nan, nyaka-ibwang adti suwangan na inalad na balay ya manga eseg na pigsuguꞌ ni Cornélyo kay nyangusip silan kun ayin ya balay ni Simon. 18 Aw migtawag silan aw nyusip, "Ayin asini bantuk si Simon na pigngalanan na Pédro?" 19 Aw sa kenneꞌ pa ni Pédro mig-anenganeng sa kyinitaꞌ nan, piglongan sakanan na Ispiritu Santo, "Inunuwa! Awun tulu ya eseg na nyaninaw kanmu awun ni luwaꞌ. 20 Indeg kaw aw panog kaw adti dalem. Aw diliꞌ kaw magduwaduwa mag-agad kanilan kay aku ya migsuguꞌ kanilan." 21 Aw nyanog si Pédro adti dalem aw piglagbet nan silan, aw piglongan nan silan, "Aku saba ya pyaninaw mayu. Na, unu ya tud mayu kanak?" 22 Aw miglong silan kan Pédro, "Pigpakadi kami na kapitan na si Cornélyo. Nyatibulluk ya ginawa nan dyumalug sa Tyumanem, aw pigsayaꞌ sakanan na kadég na manga Judiyu asuntu sa kadyaw na bet nan. Aw yan ya migsuguꞌ kanami adi tampid mu, kay ya sambuk na anghil na Tyumanem miglong kanan na angayen kaw nami pada magpakanyeg sakanan sa un mu paglongun." 23 Yanagaw pigpaseled silan ni Pédro aw pigpakulang pa nan silan na gabi yan.

Pagkamaselem da, migbangun si Pédro aw nyagad kanilan, aw awun uman nyagad kanan na manga inulug na nyangintu-u na taga Jopa. 24 Dyumateng silan adti Césariya salut da na allaw. Tyumagad kanilan si Cornélyo dala ya manga ka-epedanan nan aw ya kanan manga ubaybay na dadan da nan pigtipun dun ni kanan balay. 25 Pagseled da ni Pédro adti balay, pigsungun sakanan ni Cornélyo aw lyumuhud adti asdangan nan. 26 Manang miglong si Pédro, "Indeg kaw! Utaw aku saba oloꞌ kasiling mu." Aw pigpa-indeg nan si Cornélyo. 27 Aw migpadeleg ya pagbalawbalaw nilan talana nilan migpasinan adti katipunanan dun ni balay, aw dun da ni Pédro kita-a ya madég na utaw na migkatipun. 28 Aw miglong si Pédro kanilan, "Kya-ede-an da mayu ya Uldin nami na manga Judiyu, na pigpigil kanami ya sumambuk sa manga utaw na Héntil aw diliꞌ kami uman makalabaꞌ adti sayid nilan. Manang pigpa-edeꞌ da kanak na Tyumanem na diliꞌ da ku pagngalanan na malipaꞌ ya pangkay singalan utawa. 29 Yanagaw sa pagpa-angay mayu kanak, walaꞌ aku pagduwaduwa na madi. Aw usipen ta kamu: Unu ya tud mayu kanak?"

30 Aw tyumubag si Cornélyo kanan, "Idtu na upatengallaw pa ya lyumabay na minangadi na udas, manga alas trés na ambung, nyanawagtawag aku adti Tyumanem asini balay ku. Aw tigkan awun dyumateng adti asdangan ku na sambuk na eseg na masilang ya kadégkadég nan, 31 aw piglongan aku nan, ‘Kay Cornélyo, dyengeg na Tyumanem ya pagpanawagtawag mu, aw walaꞌ nan kalingawi ya pagtabang mu sa manga utaw na makalalat. 32 Yanagaw pagsuguꞌ kaw sa manga eseg adti Jopa, aw pa-angayan si Simon na pigngalanan uman na Pédro. Nyeyaꞌ sakanan dun ni balay na sambuk na Simon na mag-imo-ay sa manga pametang lekat adti kindal na ayep. Apit adti dulug na dagat ya balay nan.’ 33 Yan ya piglong nan kanak. Aw yanagaw maksay ta kaw pigpa-angay. Aw madyaw kay nyadi kaw. Migkatipun da kami ini aw nya-edeꞌ kami na asini sayid tadun ya Tyumanem, aw un nami pakanyegan ya kadég na pigpameneꞌ nan kanmu."

34 Pagkatigkas ni Cornélyo maglong, tyumubag si Pédro, "Tengteng da ku adun nyabangal na walaꞌ kadiꞌ ya utaw na pigkibang na Tyumanem, 35 manang dawaten nan ya pangkay singalan utawa na awun pagkallek sa Tyumanem aw mag-imoꞌ sa pagkaliman nan. 36 Dyengeg da mayu ya Madyaw na Ubat-ubat na pigpa-edeꞌ na Tyumanem adti kanami na buwadbuwad ni Isra-él, na mabatug da na manga utaw ya paglikuꞌ adti Tyumanem magi sa pig-imoꞌ ni Jisu-Kristu na yan ya Matas na Pangulu na kadég na utaw. 37 Aw kya-ede-an da mayu ya manga nya-imoꞌ dun ni kadakulaꞌ na Judiya. Migpalekat yeiy adti probinsiya na Galiliya pagkatigkas na pagpalna-u ni Juan aw pagba͡utismu nan sa manga utaw na migselsel sa kanilan manga salaꞌ. 38 Aw kya-ede-an da mayu uman na si Jisus na taga Nazarit pig-atagan na Tyumanem na katulus aw Ispiritu nan, aw pangkay ayin sakanan panaw, pigpan-imoꞌ nan ya madég na madyaw na imo-unun aw pigpangguliꞌ nan ya manga utaw na syeledan na busaw, kay awun ni kanan ya Tyumanem. 39 Pigmatinaw nami ya kadég na pigpan-imoꞌ nan asini banwa na manga Judiyu aw adti Jérusalim. Manang baling nilan pigpatay magi sa pagkalabu nilan adti krus. 40 Manang pigmataw na Tyumanem dun ni katlu na allaw aw pigtumbay sakanan na magpakitaꞌ kanami. 41 Walaꞌ sakanan pakita-an adti kadég na utaw, manang kami oloꞌ ya pigpakita-an nan, kay dadan kami nan saba pigpamalliꞌ na un magmatinaw sa kadég na kyinitaꞌ nami kanan. Kay kyuman kami eped nan pagkatigkas na pagkataw nan lekat adti pagkamatay. 42 Aw pigsuguꞌ kami nan na magpa-edeꞌ sa Madyaw na Ubat-ubat adti manga utaw aw magmatinaw uman na si Jisus ya pig-atagan na Tyumanem na katundanan na un mag-ukum sa kadég na utaw, pangkay utaw pa silan aw pangkay nyatay da. 43 Aw si Jisus saba ya pigpa-edeꞌ na kadég na manga propita asini muna. Miglong silan na ya kadég na utaw na mangintu-u kanan, magi sa ngalan ni Jisus lanasen ya manga salaꞌ nilan."

44 Sa kenneꞌ pa ni Pédro miglong seiy, dyumateng ya Ispiritu Santo adti kadég na utaw na migpakanyeg kanan. 45 Aw ya manga Judiyu na mangintu-uway na nyagad kan Pédro lekat adti Jopa, nya-enneng-enneng to-o silan kay pangkay Héntil ya manga utaw dun ni balay ni Cornélyo, nyadawat nilan ya Ispiritu Santo, 46 aw dyengeg nilan si Cornélyo aw manga ka-epedanan nan na miglong sa madég na punganan na tingeg na walaꞌ pa nilan lemena paglongan, aw alag silan migsideyen sa Tyumanem. Tigkas yan, miglong si Pédro adti manga eped nan, 47 "Ya manga utaw ini, nyadawat da nilan ya Ispiritu Santo kasiling naten. Yanagaw singalan kaꞌ ya makapigil kanilan kun kaliman nilan magpaba͡utismu?" 48 Aw piglongan ni Pédro si Cornélyo aw ka-epedanan nan na magpaba͡utismu silan dun ni ngalan ni Jisu-Kristu. Pagkatigkas da nilan ba͡utismuwan, nyanginayuꞌ silan kan Pédro na meyaꞌ pa adti sayid nilan seled na pilangallaw.