1 Manang dun ni manga allaw yan, kenneꞌ pa ni Saulo pigpamulayaman ya manga mangintu-uway kan Jisus aw gayed nan silan byantakan na apnasen. Yanagaw nyadtu sakanan adti pangulu na manga magdadugsu-ay dun ni Témplo na awun ni Jérusalim 2 aw migsekat sa manga sulat na un pakitaꞌ adti magdadumala͡ay sa manga sinagoga* na manga Judiyu adti syudad na Damasko. Ya manga sulat yan, palangad katundanan nan magdakep sa manga utaw na nyangintu-u kan Jisus. Kadég na kita-en nan dun na nyangintu-u la, pangkay eseg aw ka͡ubayan, alag nan dakepen aw pa-agad adti Jérusalim.

3 Na, sa malapit da si Saulo adti Damasko, biglaꞌ awun kalalamdag na to-o masilang na lekat adti tas na langit na nyakapalibed kanan, 4 aw dayaw sakanan nyatuwad dun ni lupaꞌ, aw awun tingeg na dyengeg nan, "We Saulo! We Saulo! Anangaꞌ aku mu gayed pamulayaman?" 5 Aw tyumubag si Saulo, "Singalan kaw kay Sir?" Aw tyumubag ya tingeg, "Aku saba si Jisus na gayed mu pigpamulayaman. 6 Manang pagbangun kaw aw kadtuwi ya syudad. Pagdateng da mu dun, awun maglong kanmu sa unu ya un mu imo-un." 7 Na, ya manga eped ni Saulo, walaꞌ silan pakapaglong kay to-o silan kyabigla-an. Kay dyengeg nilan ya tingeg manang walaꞌ ya kyinitaꞌ nilan na miglong. 8 Yanagaw migbangun si Saulo lekat adti lupaꞌ, manang pagbekaꞌ nan sa kanan manga mata, diliꞌ da sakanan magkitaꞌ. Yanagaw pig-agak sakanan na manga eped nan aw pig-ated nilan adti Damasko. 9 Aw seled na tulungallaw walaꞌ sakanan kitaꞌ, aw walaꞌ uman sakanan kan aw walaꞌ inem.Biglaꞌ awun kalalamdag na lekat adti tas na langit na nyakapalibed kan Saulo.

10 Na, dun ni syudad na Damasko pag-eyaꞌ ya sambuk na mangintu-uway kan Jisus na pigngalanan na Ananiyas. Aw migpakitaꞌ si Jisus kanan kasiling na migtagaynep, aw piglongan nan, "We Ananiyas." Aw miglong si Ananiyas, "Ini aku, kay Matas na Pangulu." 11 Aw miglong si Jisus kanan, "Kadtu kaw ni dalan na pigngalanan na Matulid, aw paninawa adti balay ni Judas ya sambuk na eseg na pigngalanan na si Saulo na taga syudad na Tarso. Kay tolobo sakanan nyanawagtawag adti Tyumanem 12 aw pigpakitaꞌ da ta kaw kanan magi sa tagaynep na nyadtu kaw kunu adti pig-eya-an nan aw pigpandungan mu sakanan na kanmu palad pada kumitaꞌ sakanan salut." 13 Manang tyumubag si Ananiyas, "Kay Matas na Pangulu, pigdengeg ku adti madég na manga utaw na malatay ya bet na utaw yan. To-o nan pigpamulayaman ya madég na mangintu-uway kanmu dun ni Jérusalim, 14 aw adun, awun da katundanan nan lekat adti mangkatas na manga magdadugsu-ay dun ni Jérusalim na magdakep sa kadég na nyangintu-u kanmu." 15 Manang miglong si Jisus kanan, "Kadtu kaw ni sayid nan, kay pigpamalliꞌ ku dadan si Saulo na un aku nan pa-edeꞌ adti manga utaw na Héntil, aw adti asdangan na manga hariꞌ, aw adti manga utaw na buwadbuwad ni Isra-él. 16 Aw pa-edeꞌ ku kanan ya kadég na ka-ilangan nan ti-isan asuntu sa pagpangintu-u nan kanak."

17 Yanagaw nyadtu si Ananiyas aw syumeled adti balay ni Judas. Aw pigpandungan nan na kanan palad si Saulo, aw law nan, "Kay inulug Saulo, pigsuguꞌ aku ni Jisus na kanaten Matas na Pangulu, yan saba ya migpakitaꞌ kanmu dun ni dalan talana mu migpasinan adi. Aw pigpakadi aku nan pada salut kaw kumitaꞌ aw matmuꞌ na Ispiritu Santo." 18 Aw tigkan awun nyangkataktak lekat adti mata ni Saulo na kasiling na manga imbis na isdaꞌ, aw dayaw sakanan kyumitaꞌ salut. Pagkatigkas yan, nyindeg sakanan aw migpaba͡utismu la. 19 Kyuman sakanan aw lyumikuꞌ ya kabagseg na lawas nan.

Na, seled na pilangallaw nyeyaꞌ si Saulo adti sayid na manga mangintu-uway dun ni Damasko. 20 Aw nyadtu sakanan ni manga sinagoga aw pig-ubat-ubatan nan ya manga Judiyu, law nan, "Si Jisus, yan saba ya Iseꞌ na Tyumanem." 21 Aw ya kadég na utaw na dyumengeg kanan, to-o silan nyabelengbeleng. Aw mig-usip-usipay silan, "Anangaꞌ ya utaw iyan? Idtu muna, pigpamulayaman nan ya manga mangintu-uway kan Jisus adti Jérusalim. Aw ya tud na pagkadi nan asini banwa yeiy, yan ya pagdakep sa manga mangintu-uway pada pa-agad adti asdangan na mangkatas na manga magdadugsu-ay dun ni Jérusalim."

22 Manang dun ni manga allaw yan, si Saulo to-o pa kyadugangan ya katulus na pagpalna-u nan, aw dun ni palna-u nan pigmatinaw nan na si Jisus saba ya Misiyas. Aw ya manga utaw na Judiyu dun ni Damasko, diliꞌ nilan mabatug tubagen ya pagmatinaw nan.

23 Paglabay da na madég na allaw, awun eped na manga Judiyu dun ni Damasko na migkasambuk migpalpa na patayen si Saulo. 24 Kada allaw aw gabi, pigbanganan nilan si Saulo dun ni manga suwangan na inalad na syudad. Manang awun migpa-edeꞌ kanan sa pigpalpa nilan. 25 Aw pigtamengan sakanan na manga utaw na dyumalug sa palna-u nan. Pigpa-ingkud nilan si Saulo adti seled na anes aw yan na gabi pigtonton nilan adti luwaꞌ na inalad na syudad.*

26 Aw lyumikuꞌ si Saulo adti Jérusalim aw kaliman nan galu sumambuk adti manga mangintu-uway kan Jisus, manang nyallek silan kanan kay iman nilan aw walaꞌ pa sakanan pangintu-u kan Jisus. 27 Manang pig-alladan sakanan ni Bérnabi adti asdangan na manga apostolés. Aw pig-ubat ni Bérnabi kanilan ya pagpakitaꞌ ni Jisus kan Saulo adti dalan pasinan dun ni Damasko aw ya piglong ni Jisus kanan, aw ya pag-ubat-ubat ni Saulo dun ni ngalan ni Jisus adti manga utaw na awun ni Damasko na walaꞌ ya kakallekan. 28 Yanagaw migka-iyeped da si Saulo aw ya manga mangintu-uway dun. Aw pangkay ayin silan kadtu dun ni Jérusalim, walaꞌ si Saulo kallek mag-ubat-ubat dun ni ngalan ni Jisus. 29 Na, awun manga Judiyu na yan ya kanilan tingeg ya Grigo. Aw ya palna-u nilan gayed pigbilingbiling ni Saulo. Yanagaw byantakan nilan na patayen sakanan. 30 Aw sa pagka-edeꞌ na manga mangintu-uway na byantakan si Saulo, pig-ated nilan sakanan adti syudad na Césariya aw pigpasakay nilan pasinan adti banwa nan na Tarso.

31 Aw dun ni manga allaw yan, tyumeneng da ya pagpamulayam sa manga mangintu-uway dun ni manga banwa na Judiya aw Galiliya aw Samariya. Magi sa tabang na Ispiritu Santo, migkadég silan aw gayed uman migkasalig ya kanilan pagpangintu-u aw gayed silan nyallek sa Tyumanem.

32 Na, si Pédro gayed nan pigkadtuwan ya manga banwa na pig-eya-an na manga mangintu-uway. Sambuk na allaw nyadtu sakanan ni manga mangintu-uway na awun ni lunsud na Lida. 33 Dun ni lunsud yan, kyinitaꞌ nan ya sambuk na eseg na pigngalanan na si Éniyas. Seled na walungka͡umay, diliꞌ sakanan magpakabangun kay pulid sakanan. 34 Aw miglong si Pédro kanan, "Kay Éniyas, pagbangun kaw aw luluna ya kamen mu, kay pigguliꞌ da ni Jisu-Kristu ya kanmu magkedel." Aw nyaksay si Éniyas migbangun. 35 Pagkitaꞌ na kadég na utaw dun ni Lida aw adti kalatagan na Syaron na kyaguli-an da si Éniyas, nyangintu-u silan uman kan Jisus.

36 Na, adti lunsud na Jopa awun sambuk na ka͡ubayan na nyangintu-u na pigngalanan na Tabita. Ya ngalan nan adti tingeg na Grigo, Dorkas. Madég ya pigpan-imoꞌ nan na madyaw aw gayed sakanan tyumabang sa manga utaw na walaꞌ ya pagkamangan. 37 Sa kenneꞌ pa ni Pédro adti Lida, kyedelan si Tabita aw to-o kyatigda-an, aw nyatay sakanan. Pig-ugasan na manga ubaybay nan ya kanan lawas aw pigpakulang nilan dun ni tambiꞌ adti kadwa na kansad na balay nan. 38 Na, mig-ilapit ya lunsud na Jopa aw ya lunsud na Lida. Aw sa pagdengeg na manga mangintu-uway dun ni Jopa na adtu pa si Pédro ni Lida, pigsuguꞌ nilan ya duwa ya eseg pada angayen sakanan. Aw nyanginayuꞌ silan kanan, law nilan, "Kaksay kaw beg agad kanami!" 39 Aw nyaksay si Pédro nyindeg aw nyagad kanilan. Pagdateng nilan dun ni balay, pig-alladan nilan si Pédro adti tambiꞌ na kyakulangan na lawas ni Tabita. Pagseled nan adti tambiꞌ, piglibedan sakanan na manga balu na alag migsugaw, aw pigpakitaꞌ nilan kanan ya manga kadégkadég na pigtéꞌ ni Dorkas sa utaw pa sakanan. 40 Aw pigpaluwaꞌ ni Pédro ya kadég nilan adti tambiꞌ. Aw lyumuhud sakanan aw nyanawagtawag adti Tyumanem. Aw tigkas yan, pig-asdangan nan ya lawas ni Tabita aw law nan, "Kay Tabita, pagbangun kaw!" Aw pigbekaꞌ nan ya kanan manga mata. Pagkitaꞌ nan kan Pédro, dayaw sakanan nyingkud. 41 Pig-awidan ni Pédro ya taklayan nan aw pigpa-indeg nan. Tigkas yan, pigpaseled ni Pédro ya manga balu aw eped na mangintu-uway, aw pigpakitaꞌ nan kanilan na nyataw da si Tabita. 42 Aw nyabekkal ya ubat-ubat kan Tabita adti kadakulaꞌ na lunsud na Jopa, aw ya syampetan yan madég ya utaw na nyangintu-u kan Jisus. 43 Aw si Pédro, nyeyaꞌ pa dun ni Jopa seled na madég na allaw, adti balay na sambuk na eseg na mag-imo-ay sa pametang lekat adti kindal na ayep. Aw ya utaw yan pigngalanan uman na si Simon.