1 Sambuk na allaw, migpasinan si Pédro aw si Juan adti Témplo na manga alas trés na ambung kay yan ya udas na pagpanawagtawag na manga utaw na Judiyu sa Tyumanem. 2 Sa malapit da silan adti Témplo, awun eseg dun na kapig na lekat pa na pagka͡utaw nan. Aw dun pagbetang na manga utaw na magtingga kanan kada allaw na un magsekat sa limos adti manga utaw na sumeled adti suwangan na pigngalanan na Manenggeya. 3 Aw sa pagkitaꞌ nan kan Pédro aw kan Juan, migsekat sakanan sa kuwalta. 4 Manang pigtengtengan nilan ya utaw yan, aw law ni Pédro, "Inunuwa kami!" 5 Aw pigtengtengan nan uman ya duwa kay yan ya pig-iman nan na atagan nilan sakanan na kuwalta. 6 Manang miglong si Pédro, "Walaꞌ ya kuwalta ku, manang ya ini kanak na nyatagtun ku, yan ya un ku atag kanmu. Na! Dun ni ngalan ni Jisu-Kristu na taga Nazarit, indeg kaw aw panaw kaw!" 7 Aw pig-awidan ni Pédro ya kalintu na bekten nan aw dayaw nan pa-indega. Aw tigkan migkabagseg ya siki nan 8 aw nyaka-indeg da aw nyanaw, aw nyagad kanilan adti Témplo na gayed mig-ugpasen na migdeyen sa Tyumanem. 9 Aw kyinitaꞌ na kadég na manga utaw na nyakapanaw da sakanan aw migdeyen sa Tyumanem. 10 Kyilala nilan sakanan na yan ya eseg na nyingkud dun ni Suwangan na Manenggeya na gayed nyangilalat. Aw to-o silan nyabelengbeleng sa nya-imoꞌ kanan.

11 Ya eseg na bagu makapanaw, walaꞌ pakaluwat kan Pédro aw kan Juan dun ni agiyanan na pigngalanan na Portiko ni Solomon na awun ni pamanag na Témplo. Aw migkagallat ya madég na manga utaw migpalapit kanilan kay to-o silan nya-enneng-enneng sa kyinitaꞌ nilan. 12 Aw sa pagkitaꞌ ni Pédro sa manga utaw, miglong sakanan kanilan, "Kay manga kadégan ku na manga utaw na Isra-él, anangaꞌ kamu ma-enneng-enneng sa kyinitaꞌ mayu? Anangaꞌ gayed kamu nyinunu kanami? Pagaw iman mayu aw awun katulus nami magpapanaw sa utaw yeiy. Aw iman mayu uman aw nyakapanaw da sakanan kay dyalug nami ya Uldin na Tyumanem? 13 Manang bekeꞌ saba na maynan! Ya kyinitaꞌ mayu kakayna lyumekat saba adti kana Tyumanem na manga tyugbulan tadun na si Abraham aw si Isa-ak aw si Jakub. Aw pigpakitaꞌ da nan ya pagka Tyumanem na sugu-anen nan na si Jisus. Manang si Jisus yeiy, pigtumbay mayu baling na patayen, aw pigkele͡an mayu adti asdangan na gubirnador na si Pilato, pangkay kaliman ni Pilato na paluwa-en sakanan. 14 Pigkele͡an mayu ya pigpadala na Tyumanem na walaꞌ ya salaꞌ! Aw pigsekat mayu baling na paluwa-en ya sambuk na utaw na migpatay sa eped na utaw. 15 Aw pigpapatay mayu ya piglekatan sa ginawa, manang pigmataw na Tyumanem lekat adti pagkamatay nan, aw migmatinaw kami na nyataw da sakanan. 16 Aw ya utaw ini na pigkilala mayu, ya pagpangintu-u nan sa ngalan ni Jisus, yan ya migpakabagseg sa siki nan. Si Jisus saba ya pyangintu-uwan nan aw yan ya nyatag sa pagkadyaw na lawas nan asini asdangan na kadég mayu.

17 "Na, kamu na manga kadégan ku, kya-ede-an da ku adun na idtu na pagpapatay mayu kan Jisus, walaꞌ mayu kilala͡a na yan ya pigpadala na Tyumanem. Aw walaꞌ uman sakanan kilala͡a na manga migdumala kamayu. 18 Manang dun ni pig-imoꞌ mayu kan Jisus, pigtuman na Tyumanem ya pigpa-edeꞌ nan dadan magi sa manga propita nan asini muna na un magti-is ya Misiyas aw matay. 19 Yanagaw pagselsel kamu sa manga salaꞌ mayu aw ka͡agadi mayu ya Tyumanem pada lanasen nan ya manga salaꞌ mayu. Kun imo-un mayu yeiy, dumateng ya manga allaw na pakaganen na Tyumanem ya ginawa mayu, 20 aw padala pa nan salut asini tas na lupaꞌ ya Misiyas na un magdumala kamayu, na yan saba si Jisus. 21 Manang ka-ilangan pa sakanan matingen adti tas na langit taman na allaw na baguwun ya kadég, kay pigpa-edeꞌ na Tyumanem dadan adti kanan manga propita na yan ya un nan imo-un. 22 Miglong si Moysis asini muna adti manga utaw na Isra-él, law nan, ‘Un magpadala ya Tyumanem kamayu adti moli na allaw sa propita kasiling kanaken. Aw ya propita yan, un lumekat adti buwadbuwad ni Isra-él. Pakanyegi mayu ya kadég na un nan paglongun. 23 Aw pangkay singalan ya diliꞌ dumalug sa piglong na propita yeiy, taniyen sakanan aw patayen.’ * 24 Aw si Samwél uman aw ya eped na manga propita na syumayu kanan, mig-ubat-ubat ya kadég nilan asini muna kun unu ya ma-imoꞌ adun na manga allaw yeiy. 25 Aw kitadun saba na Judiyu ya dyumawat adun sa pigpakang na Tyumanem adti tyugbulan tadun magi sa manga muna propita. Kay miglong ya Tyumanem kan Abraham asini muna, ‘Magi dun ni manga buwadbuwad mu, pakadyawun ku ya kadég na utaw na asini tas na lupaꞌ.’ * 26 Yanagaw pigpadala na Tyumanem asini tas na lupaꞌ ya kanan sugu-anen, aw kitadun na manga utaw na Isra-él ya muna nan pigpadala͡an, pada pakadyawun kitadun magi dun ni pagtabang nan sa tagsambuksambuk kanaten na un tadun talikudan ya pag-imoꞌ sa malatay."