1 Manang awun sambuk uman na eseg na si Ananiyas, aw ya ka͡ubayan nan na si Sapira. Awun piggalin nilan na lupaꞌ, 2 aw migkasambuk ya ginawa nilan na balyaw ya tengteng na alagaꞌ sa piggalin nilan na lupaꞌ aw diliꞌ ubusun atag adti manga apostolés, yanagaw pigtaguꞌ nilan ya eped, aw ya sobla pigbetang ni Ananiyas adti asdangan na manga apostolés. 3 Manang miglong si Pédro kanan, "Kay Ananiyas, anangaꞌ pig-atmuꞌ ni Satanas ya kanmu anenganeng na piggalu-an mu ya Ispiritu Santo? Kay yan ya piglong mu na yeiy da ya kadakulaꞌ na kuwalta adti paggalin mu sa lupaꞌ, manang awun baling pigtaguꞌ mu. 4 Idtu muna ikaw ya tyumagtun sa lupaꞌ mu, aw kun galinen da mu, ikaw ya magbayaꞌ kun unun mu ya kuwalta. Manang mig-ubat kaw sa galuꞌ. Paglongun ta kaw: Bekeꞌ saba na utaw ya piggalu-an mu, manang yan ya tengteng piggalu-an mu ya Tyumanem!" 5,6 Pagdengeg ni Ananiyas sa piglong ni Pédro, dayaw sakanan nyatuwad dun ni lupaꞌ aw nyabugtuꞌ ya ginawa nan. Aw dyumateng ya manga eseg, aw pigputus nilan ya lawas nan aw dyala adti un lebengan kanan. Aw ya kadég na dyumengeg sa kyagamakan nan, to-o silan nyallek.

7 Na, manga tulungka udas pa ya lyumabay, nyaka-ibwang uman ya ka͡ubayan nan. Aw walaꞌ nan ka-ede-i kun unu ya kyagamakan na eseg nan. 8 Aw miglong si Pédro kanan, "Kay Sapira, ubatan kanami. Unu, yeiy da ya kuwalta sa paggalin mayu sa kamayu lupaꞌ?" Aw tyumubag si Sapira, "E-e, yan da." 9 Pagkatigkas yan, miglong si Pédro, "Anangaꞌ migsambuk ya anenganeng mayu na un tanda-en ya Ispiritu na Tyumanem? Inunuwa! Iyan da ya manga eseg na bagu pa miglebeng sa eseg mu. Aw maynan uman ya kagamakan mu." 10 Aw tigkan nyatuwad si Sapira dun ni asdangan ni Pédro aw nyabugtuꞌ ya ginawa nan. Aw pagdateng na manga eseg, kyinitaꞌ nilan na nyatay da. Aw uman da nilan pigdala adti un lebengan kanan, aw pigbetang nilan dun ni tangkil na eseg nan. 11 Aw to-o pa kyadugangan ya kakallekan na kadég na manga mangintu-uway aw kadég na dyumengeg sa kyagamakan nilan.

12 Na, madég ya pangilala aw milagru na pigpan-imoꞌ na manga apostolés magi sa katulus na Tyumanem. Aw gayed migsambuk ya kadég na manga mangintu-uway adti agiyanan na pigngalanan na Portiko ni Solomon dun ni pamanag na Témplo. 13 Ya manga utaw na walaꞌ pangintu-u walaꞌ silan paka-eles tambung manang pigbasa͡an nilan ya manga mangintu-uway. 14 Aw madég pa uman ya manga eseg aw ka͡ubayan na bagu nyangintu-u kan Jisus. 15 Yanagaw pigpandala nilan ya manga pyangkedelan adti ligad na dalan aw pigpakulang dun ni kanilan kamen. Kay yan ya pig-iman nilan na kun lumabay dun si Pédro kalandungan silan na alung nan aw dayaw silan kaguli-an. 16 Aw dyumulud uman adti manga apostolés ya madég to-o na manga utaw lekat adti manga lunsud na nyakapalibed sa syudad na Jérusalim. Aw dyala nilan uman ya manga pyangkedelan aw ya manga utaw na pyamulayaman na manga busaw. Aw nyabus silan pyangkaguli-an.

17 Na, ya pangulu na manga magdadugsu-ay adti Témplo na Tyumanem aw manga eped nan na nyaka-akup adti sékta na manga Sadusiyo, pagkitaꞌ da nilan sa pigpan-imoꞌ na manga apostolés, to-o silan nyingaꞌ. 18 Yanagaw pigpadakep nilan ya manga apostolés aw pigseled adti kalabusuwanan na syudad. 19 Manang dun ni gabi yan, dyumateng ya sambuk na anghil na Tyumanem aw pig-uwangan nan ya manga tatakep na kalabusuwanan, aw pigpa-agad nan ya manga apostolés adti luwaꞌ, aw law nan, 20 "Na, kadtu kamu ni pamanag na Témplo aw dayaw mayu palna-uwi ya manga utaw sa pig-atag na Tyumanem na yan ya bagu na ginawa." 21 Pagdengeg nilan sa piglong na anghil, lyumikuꞌ silan adti pamanag na Témplo na maselem da, aw migpalekat silan migpalna-u sa manga utaw dun.

Na, sa pagkatipun da na pangulu na manga magdadugsu-ay aw manga eped nan, pigpatawag nilan ya kadég na manga mag-usayay na manga Judiyu. Aw pigsuguꞌ nilan ya manga magtatunggu-ay na angayen ya manga apostolés adti kalabusuwanan. 22 Manang sa pagdateng nilan adti kalabusuwanan, walaꞌ da dun ya manga apostolés. Yanagaw lyumikuꞌ silan aw pig-ubatan nilan ya kadég, law nilan, 23 "Kyinitaꞌ nami na dayaw pigbalagsangan ya manga tatakep na kalabusuwanan aw kenneꞌ pa na manga magtatunggu-ay dun ni luwaꞌ, manang pag-uwang nami, walaꞌ ya utaw dun ni seled!" 24 Na, sa pagdengeg na kapitan na manga magtatunggu-ay sa Témplo aw manga mangkatas na magdadugsu-ay sa pig-ubat nilan, nyabelengbeleng silan kay walaꞌ nilan kalabeti kun unu ya un sampetan na kadég yeiy. 25 Pagkatigkas yan, awun utaw na dyumateng aw miglong kanilan, "Tanawa! Ya manga eseg na pigpakalabusu mayu, awun saba silan ni pamanag na Témplo! Migpalna-u la uman silan!" 26 Yanagaw nyagad ya kapitan sa manga magtatunggu-ay aw pig-angay nilan ya manga apostolés, manang walaꞌ nilan gelgela pa-agadan kay nyallek silan pagaw pamintuwun silan na manga utaw.

27 Pagdateng da nilan adti asdangan na manga mag-usayay, piglongan na pangulu na manga magdadugsu-ay ya manga apostolés, 28 law nan, "Pigpigil da nami kamayu na diliꞌ kamu magpalna-u dun ni ngalan yan, manang inunuwa ya pig-imoꞌ mayu! To-o la baling dyengeg adti kadakulaꞌ na Jérusalim ya pigpalna-u mayu! Aw kami pa ya pigdapel mayu na migpatay sa utaw yan!" 29 Manang tyumubag kanilan si Pédro aw ya eped na manga apostolés, law nilan, "Ya Tyumanem, yan ya ka-ilangan nami ka͡agadan, aw bekeꞌ na utaw. 30 Kay ya Tyumanem na pyangintu-uwan na tyugbulan tadun, yan ya migmataw kan Jisus na pigpapatay mayu magi sa pagkalabu adti krus. 31 Aw pigpatas nan si Jisus aw pigpa-ingkud apit adti kanan kalintu na un magdumala sa kadég. Aw magi sa maynan na pa-agi, pig-imoꞌ nan sakanan Magpaluwa-ay sa kadég na utaw na Isra-él pada magselsel galu silan aw ayawan nilan ya kanilan manga imo-unun na malatay aw lanasen ya manga salaꞌ nilan. 32 Aw pigmatinaw nami ya kadég yeiy na nyangka-imoꞌ, aw pigmatinaw uman na Ispiritu na pig-atag da na Tyumanem adti kadég na utaw na dyumalug sa manga suguꞌ nan."

33 Pagdengeg nilan sa tubag na manga apostolés, to-o silan nyadaman aw pigbetang nilan adti kanilan ginawa na patayen ya manga apostolés. 34 Manang nyindeg dun ya sambuk kanilan na si Gamalyél. Na, Parisiyo sakanan* aw magpalna-uway sa Uldin na manga Judiyu, aw pigsayaꞌ na kadég na manga utaw. Aw pigpaluwaꞌ nan ya manga apostolés dagawdagaw lekat adti usayanan. 35 Aw miglong si Gamalyél adti manga eped nan na mag-usayay, "Kay manga inulug na buwadbuwad ni Isra-él, diliꞌ tadun gallaten ya un tadun imo-un sa manga utaw yeiy. 36 Kya-anenganengan mayu na idtu muna awun sambuk na eseg na si Tyudas na migpatastas aw mig-imoꞌ sa kasakupan nan na manga upatenggatus (400) ya manga eseg. Manang pigpatay sakanan, aw ya kadég na eped nan nyabus migbeklag aw walaꞌ da ya nyabatug nilan. 37 Pagkatigkas yan, dun ni manga allaw na pagsinsus, si Judas na taga Galiliya, mig-imoꞌ uman sa kasakupan nan. Manang pigpatay sakanan uman, aw migbeklag ya manga eped nan. 38 Yanagaw, paglongun ta kamu: Pabaya-i la mayu ya manga utaw yeiy! Paluwa-a la mayu silan. Kay kun ya pagpalna-u nilan lyumekat adti utaw oloꞌ, aw kun ya palpa nilan lyumekat adti kanilan anenganeng, diliꞌ saba yan magpadeleg. 39 Manang kun lyumekat adti Tyumanem, na, diliꞌ mayu silan katagenan, pagaw ka-atuwan mayu baling ya pagkaliman na Tyumanem!" Yanagaw tyumandeꞌ ya kadég na mag-usayay kan Gamalyél. 40 Aw pigpatawag nilan ya manga apostolés adti seled na usayanan, aw byadasan nilan pigpalabet. Tigkas yan, pigpigilan nilan na diliꞌ da salutun ya pagpalna-u dun ni ngalan ni Jisus, aw pigpaluwaꞌ da nilan. 41 Pag-indeg da na manga apostolés, to-o silan migleya kay adti anenganeng na Tyumanem, umbaꞌ silan pati-isen sa pagmulamula kanilan asuntu kan Jisus. 42 Aw kada allaw migpalna-u silan adti pamanag na Témplo aw adti manga balay na mangintu-uway. Aw walaꞌ silan teneng sa pagpa-edeꞌ sa Madyaw na Ubat-ubat na si Jisus yan ya Misiyas.