Pensamentos

A Bíblia ensina que somos fruto dos nossos pensamentos. Por isso, Deus nos chama a renovar a mente, pensar em coisas nobres e guardar o coração com toda diligência.

Pensar no que é bom

Paulo nos exorta a pensar no que é verdadeiro, honesto, justo, puro, amável e de boa fama. A mente renovada é o caminho da transformação.

8 Atɔŋ, mumay, làsi an’kyän abɛ unsà indiir a ndandaa, byà ibyääl, byàbalàbal, byàŋàpɔŋà, byà ukwen, byàŋàsyäŋà, byàŋàbwaŋ, anà byàlàkoo.

Filipenses 4:8

2 Twon lan’lab nsyääl a mɛɛn a mpal ayi, wɛɛ làkäl bàŋàbulà u nsɔɔmà a un’yɛnà ntɔn musà nsɔ̈ɔ̈l unsà ukwen a Nzam: undiir aŋàbwaŋ afàpà nde un’sak anà wàŋàkwo.

Romanos 12:2

Làkäl unsà mɔ̈ɔ̈ a in’kyɛɛl

13 Kyakin, làyöŋà an’kyän abɛ ntɔn isal, làkäl unsà làbɔ̈ɔ̈n, làsi làkyän abɛ lanswà unsà kab a ngway alà bàlatwääl kà ilä a mɛɛy a Yɛsu Klistɔ.

1 Pedro 1:13

20 Apanà, akà nde akwà, u mbwo a unkaak a ngwal afàsal amu bi, kan’kwo mukyer indiir byàŋàsöön indiir byanswà ifàlɔm bi itàkal ifàyweer bi, 21 wɛy làkoo làkäl akà nde uboo a Ikööŋ anà amu Klistɔ Yɛsu, akà ngyääl yanswà, u mbul a in’tye! Wöwöö.

Efésios 3:20,21

Guardar a mente

A Palavra de Deus discerne os pensamentos e intenções do coração. Guardar a mente é proteger a alma das armadilhas do pecado.

12 Ntɔn ndaa a Nzam ye anà mɔ̈ɔ̈, ya yà ngwal anà yan’söön kɔm lanswà u mpɔr. Ya ifàbilà tii kà ikal mukaab mɔ̈ɔ̈ anà dweelà, in’kwo anà usɔ. Nde afàsyeebà pànsi pànsi an’kyän a mpem a mbuur.

Hebreus 4:12

Os caminhos de Deus são mais altos

Os pensamentos de Deus são infinitamente superiores aos nossos. Devemos entregar nossos pensamentos a Ele e confiar em sua sabedoria.

Pensamento e conduta

Do coração procedem os males. A Bíblia nos adverte a não se preocupar excessivamente e a ter pensamentos sóbrios e disciplinados.

20 Nde waa kàtɛn naa: « Ndaa ifafà uboo a mbuur, ya ifun’buul wàŋingyäy. 21 Ntɔn an’kyän an’be ifàtoo fà boo, fà mpem a baar: ipasàsɛ, küb, ndwääl a baar, 22 intswem, ngyal a in’naaŋ, an’kyän an’be, loor, mɔ̈ɔ̈ a isak isak, intwɛn, mbɛɛy, nsɛɛn a an’pɛy, unsil. 23 Indiir ibe abi byanswà byàfàtoo uboo, waa byàfàbuul mbuur wàŋingyäy. »

Marcos 7:20-23

Nkyän

25 « Undiir awun waa mɛ alakyään naa twon lan’man mpay ntɔn udii ndür abɛ, itàkal naa bɛ ya làsàbwää aben. Nkye mɔ̈ɔ̈ kà kan’söön isaa anki anà ndür kà yan’söön ipfɛy anki u ndöŋ?

Mateus 6:25

7 « Mpal làyamà bɛ, twon lan’tɛn itetɛɛn, asànaa baar mpa abà Ayudà: ba bàfàsi naa ba bàsàtɛn mbɔɔn ba bàsàwal nsaak.

Mateus 6:7

Igyɛɛŋ ntɔn ukwen a loor

1 Yàmɛnà naa utaaŋ nsil alan, baar nsaab bàkyer ayàköŋ, ba bàndyàndyaar ba a ba kà in’kɔl. Yɛsu kàtàsɛmà mutɛn a alɔŋki ande naa: « Làduub mii abɛ ntɔn ful a Amfarisi, iswaŋà naa ukwen a loor. 2 Ndaa yanswà yàŋàyee ikyer asàmɛnà u mii, ndaa a unku ikyer asàtoo. 3 Lalan ndaa yanswà làsàtɛn bɛ u làpib, bàkyer asàwem u mwäänà answà, wɛɛ ndaa yanswà làsàŋüŋün bɛ u mun a tsü uboo a suk aŋàdübà, isàbulà ndaa a kuub in’kwɛŋ udu a nsyä a ndwà.

Mbuur ban’kwo muman bɔɔmà

4 « Asam amɛ, mɛ alàkyään naa: twon lan’man bɔɔmà a baar bàfàlɔ ndür mpɛl, wɛɛ mpa bàkwe mufàkyer undiir asin. 5 Mɛ in’kyer alàswaŋ nà bɛ lan’kwo mutiin bɔɔmà: làtiin mbuur awe anà ikɔ̈b mukàlàtɔɔm u yaaŋ a mbaa ungö a nkweel. Ndandaa mɛ alàkyään, bɛ bɔɔmà làtiin nde! »

6 « nkye Insɔɔr ityeen bàfàyälà anki ndiim yweel? Wɛɛ Nzam ufàdiimà anki akà umwɛy uboo a bya. 7 Yumwɛy ayi: Itàkal ntswee abɛ yanswà yàŋàtaŋ. Twon lan’man bɔɔmà, ntɔn bɛ lan’söön insɔɔr mbɔɔn u ntal.

8 « Wɛɛ mɛ alàkyään naa mbuur wanswà asàtà imbäl amɛ u mii a baar, Mwan a mbuur sye asun’tɛɛl imbäl u mii a akyeey a Nzam. 9 Wɛɛ mbuur wanswà asàswaŋ ngaal u mii a baar naa nde mɛ kan’yöb anki, nde sye bàsun’yöb anki u mii a akyeey a Nzam. 10 Isàkal naa mbuur kan’twe Mwan a mbuur, nde bàsun’dwääl nkul, wɛ mbuur asàto Dweelà In’kyɛɛl, usàwal anki ndwääl a nkul.

11 « Mpal bàsàlasyen ba u ndwà a nköŋ a Ayudà ntɔn mukàlatsüül nsaŋ, itàkal kusà a amfum, itàkal kusà a an’yɔl, twon lan’man mpay naa bɛ un’lɔn làkàsà aben, bɛ ndaa nà làkàtɛn. 12 Ntɔn Dweelà In’kyɛɛl akyer asàlalɔŋ taaŋ nsil alan ndaa lan’kwo bɛ mutɛn. »

Nsim a ŋun’naaŋ insil

13 Yàmɛnà naa uboo a un’sɛŋ a baar mbuur mwɛy kàtɛn a Yɛsu naa: « Un’lɔɔŋ, un’swɛŋ un’tɔŋ amɛ mukab anà m un’naaŋ abi. » 14 Yɛsu waa kun’fuur naa: « Un’sam amɛ, nà kan’si ntɛɛn abɛ, itàkal nkalsà mukab un’naaŋ abɛ? » 15 Nde waa kàtɛn a ba naa: « Làwem ubwaŋàbwaŋ: twon lan’kal anà ngyal mukal anà indiir mbɔɔn, ntɔn mɔ̈ɔ̈ a mbuur kà wà uboo a indiir ande anki, itàkal naa nde wà ŋun’naaŋ. »

16 Apan nde katɛɛl nsim yi: « An’ywaŋ a ŋun’naaŋ mwɛy màtwey isaa mbɔɔn. 17 Nde kàsɛmà muyweer: "Mɛ in’kyer aben? Ntɔn mɛ ikal musà isaa amɛ abi byanswà kyatɛy." 18 Apan nde kàtɛn naa: "Mɛ in’yàkyer abà: Mɛ in’kyer ayàpay ikɔr amɛ byanswà ntɔn mutɔŋ byàkölàköl, waa in’yàsà mbɛŋ amɛ yanswà anà isaa amɛ byumwɛy. 19 Ungö apan mɛ in’yàtɛn a mɛ ŋakwo naa: Mɔ̈ɔ̈ amɛ, ngye awe anà isaa mbɔɔn ntɔn mbul mbɔɔn. Yweer, dyà, nwà, man un’sak." 20 Wɛɛ Nzam waa kàtɛn a nde naa: "Insil! U mpib a ŋàbà nsil awà ngye akyer akwà. Ayi yanswà an’lɔn ngye ntɔn ngye, nà asàman ubwaŋ a ya?" » 21 Yɛsu kàkwɛy naa: « Abun, ya yabwɛy sye ntɔn mbuur afàköŋà un’naaŋ mbɔɔn ntɔn nde ŋakwo, wɛɛ nde ukɔ̈ɔ̈n akal ŋun’naaŋ ntɔn Nzam. »

Ngwal a Nzam

22 Apan Yɛsu kàfàtɛn a alɔŋki ande naa: « Lalan m alàkyään naa: Twon lan’man mpay ntɔn mɔ̈ɔ̈ abɛ anà mutɛɛn naa bɛ ininà làyàdyà, itàkal naa ntɔn ndür abɛ naa bɛ ininà làyàbwaar. 23 Ntɔn mɔ̈ɔ̈ kan’söön isaa anà ndür yan’söön ipfɛy. 24 Làler inkaak, bya ifàkɔn anki, ifàbwo anki, bya ikɔr byatɛy, wɛɛ Nzam akyer afadii. Bɛ lan’söön nɛn! 25 Nà uboo a bɛ, ntɔn ngyɛb ande, kan’kwo mukwɛy akà ilä mwɛy u mɔ̈ɔ̈ ande? 26 Isàkal naa bɛ làkwe anki mukyer undiir ikikye, ntɔn nkye làmanà bɛ mpay ntɔn indiir byumwɛy? 27 Làler iful a an’ywaŋ ifàyɛl bya: bya byàfàsal anki, byàfàtɔŋ anki, wɛɛ mɛ alàkyään naa itàkal Salɔmun unsà un’naaŋ ande wanswà kàsàbwaar anki asànaa bya. 28 Isàkal naa Nzam afàbwää iteerà abyà u ywaŋ ŋàbà wɛɛ nkàswo bya bàyàtɔɔm u mbaa, waa Nzam mpa uyàlabwää, bɛ aŋàlàkwikilà ikikye. 29 Wɛɛ bɛ, twon lan’man mpay ntɔn udyà anà unwà abɛ, twon lan’kal u ngyɛb. 30 Ntɔn indiir abi byanswà baar mpa bàyöb Nzam u mɛɛn mà bàfàleŋ bya taaŋ lanswà. Wɛɛ bɛ, Taaràbɛ akyàyöb naa bɛ làbye anà mfun a bya. 31 Wɛɛ bɛ, tàlaleŋà imwol a Nzam, waa bàsàlakwɛy indiir abi byanswà. »

Un’naaŋ a du

32 « Twon an’man bɔɔmà, ngye làböl ikikye! Ntɔn Taaràbɛ kàkwen mukàlapà imwol. 33 Làyälà indiir abɛ, làpɛ ngim akà aŋàlàmbwà. Làkyer in’di a ngim mpa ifàbwà an’tär. Làyee in’naaŋ abɛ u du, waa mya mpa myàtäy. Mbüüb bàyàkwo anki muwal mya, anà nsɛɛl sye idyà anki mya. 34 Ntɔn ikal awà in’naaŋ abɛ, ikal sye iwà mpem abɛ. 35 Làkäl kà igyɛɛŋ musal anà indiir a isal abɛ u kɔɔ. Làwɛy minà abɛ myàkäl myàŋàlɛɛmà. 36 Làkäl asànaa asyääl bàkadilà nkum aba kàkyen mukàbäl un’kyay, ntɔn ba bun’duub ndwà isàkal naa nde kan’yàfura anà kan’bɛɛrà. Mpal uyàfurà nde, ubɛɛrà nde, waa ba bun’duub ndwà. 37 Un’sak akà asyääl usyetaan nde bàmuleerà mpal uyàfurà nde! Mɛ ndandaa alàkyään, nde ŋakwo asàbwaar ipfɛy a isal, asàpà ba ikal abwaay anà isaa. 38 Isàkal naa nde kan’yà uboboo a mpib, itàkal naa u nkɔɔ atàtwɛb, un’sak akà asyääl akwà usàtaan nde bàŋàleer! »

39 « Làyöb ubwaŋàbwaŋ naa isàkal naa ŋandwà akyàyöb taaŋ uyà mbüüb, nde uyun’wɛy anki mubilà u ndwà ande. 40 Bɛ sye, làduub mii abɛ, ntɔn bɛ làyöb anki taaŋ usàyà Mwan a mbuur. »

Un’syääl aŋàbwaŋ anà un’syääl un’be

41 Apan Petɔlà waa kun’fuul naa: « Mwol, nsim ayi yà ntɔn bi mpɛl lɛɛ ntɔn baar banswà? »

42 Mwol waa ufuur naa: « Nà un’syääl a balàbal anà ŋun’yɛnà awà kan’kwo nkum ande mupà buur muler asyääl anà mupà umwɛy umwɛy isaa ande u taaŋ a taaŋ? 43 Un’sak akà un’syääl awà, isàkal naa nkum ande amàyun’taan mukyer isal akin! 44 Mɛ alàkyään ndandaa, nde asun’sà mfum udu a un’naaŋ ande wanswà. 45 Wɛɛ, isàkal naa un’syääl kan’yweer u mpem ande naa: "Nkum amɛ kan’kyer itaan muyàfurà." Nde usɛmà mudüb baar a isal abaal anà bakaar, isal ande udyà, unwà anà uyɔr man, 46 apan nkum ande asyefurà ilä mpa kun’dilà nde anà u taaŋ mpa uyöb nde. Apan nkum ande asun’pà ntaaŋàmbar aŋàsöönà, nde asun’sà uboo a un’lwaaŋ a atsüüŋ mpa bàfàlab nswɛɛŋ. 47 Un’syääl akwà awà ayöb naa nkum ande ininà ufàkwen, wɛɛ nde ufàkwen anki mukyer ya anà mulɔ̈ɔ̈n ya kusà, nde asàwal an’füm mbɔɔn. 48 Wɛɛ un’syääl akwà mpa uyöb naa nkum ande inina ukwen ntɔn nde, isàkal naa nde an’kyer ube, ntaaŋàmbar ande isàkal ikikye. Isàkal naa mbuur kàwɛl mbɔɔn, bàsun’lɔ̈ɔ̈m sye mbɔɔn. Isàkal naa bàmapà mbɔɔn, bàsalɔ̈ɔ̈m sye mbɔɔn. »

Nkaabà ntɔn Yɛsu

49 « Mɛ kàyi muyàtɔɔm mbaa u mɛɛn. Wɛɛ mɛ in’kwen naa ya ikäl yàŋàlɛɛmà. 50 Ye anà ndüümà mwɛy mɛ in’wal, mɛ waa in’wà u ngyɛb mbɔɔn tii umpal isàkwo ya! 51 Nkye bɛ làsii naa mɛ kàyi ntɔn mutwaal duu u mɛɛn? Ŋaa, mɛ alàkyään naa nkaabà. 52 Yan’mɛnà naa sɛmà ŋàbawà, u ywar a baar atyeen nkaabà yan’bilà, atär bàkwen anki abɔ̈ɔ̈l, aböɔ̈l bàkwen anki atär, 53 taa ukwen anki mwan ande wà baal, mwan baal ukwen anki taarànde, maa ukwen anki mwan ande wà un’kaar, mwan un’kaar ukwen anki ngwän, maa ukwen anki un’kyay a mwan ande, un’kyay a mwan ukwen anki ukwà ande wà un’kaar. »

Ngyööb a mbuul a an’taaŋ

54 Ungö apan, Yɛsu waa kàtɛn sye a baar banswà naa: « Umpal làfàman bɛ itööm ntsü làfàmina taaŋ, bɛ làfàtɛn naa: "Mbul akyer anɔ", wa sye afàkyer anɔ. 55 Isàkal naa un’pöb an’fà ngyɛl, bɛ làfàtɛn naa: "Ŋàbà mwäänà akal mbɔɔn", wa sye afàkal mbɔɔn. 56 Baar a mpem yweel! Bɛ làkyàyöb ndaa yan’kwo mulyaaŋ u mɛɛn anà u du, wɛɛ ntɔn nkye mpa làyöb bɛ ndaa a mpalàyi? »

Ngyöŋà anà ibör ande

57 « Ntɔn nkye bɛ ŋakwo mpa làyöb bɛ musɔɔl ndaa a ndandaa? 58 Isàkal naa we anà mbur kàmafüün, wɛɛ bɛ làwàmukyà làbay a nsaŋ, leŋ ipöl muyöŋà anà nde mpal làbà bɛ u mbwo. Abun nde ngye uyàfasyen anki akà ntɛɛn, ntɛɛn ayàfapà anki akà un’kyɛɛŋ, un’kyɛɛŋ uyàfabiil anki u bɔlokà. 59 Kya naa tɛy, mɛ akyään ndandaa, ngye kwo asàtoo anki isàkal naa ngye ngim ande yanswà ŋàtàfur anki. »

Lucas 12

3 U mbwo a kab a ngway alà ban’pɛ, mɛ in’tɛn akà umwɛy umwɛy uboo a bɛ: twon lan’kal anà uyɔl aŋàsöönà anà uyɔl tii unsà undiir ayɔbà, làyɔbà mbɔɔn ntɔn mutɔn uyɔl, umwɛy ntɔn isii a làkwikilà alà kun’pɛ Nzam.

Romanos 12:3

Nkaabà uboo a Ikööŋ

10 Atɔŋ, mɛ amàlabɔɔn, kà ikɔb a Mwol abi Yɛsu Klistɔ: bɛ banswà làkäl mun mwɛy, nkaabà ikɔ̈ɔ̈n akal uboo a bɛ. Làkäl bàŋàtüüb unsà mpem mwɛy anà unsà an’kyän an’mwɛy.

1 Coríntios 1:10

11 Nà uboo a baar kan’kwo muyöb indiir abyà uboo a mbuur, naa tɛy dweelà alà uboo ande ŋakwo? Ifà imwɛy sye, indiir abyà amu Nzam, akà mbuur mwɛy uyöb anki, naa tɛy Dweelà a Nzam.

1 Coríntios 2:11

18 Wɛy mbuur ukɔ̈ɔ̈n akur nde ŋàkwo: isàkal naa mbuur mwɛy uboo a bɛ akakyeyà uyɔl naa nde wà ŋayeerà u mɛɛn mà, wɛy nde ubulà ŋukɔŋ, ntɔn mubulà ŋayeerà.