2 YWAN 1

Mbɔr

1 Mɛ undweer, an’söön Un’kaar kàsɔ̈ɔ̈l Nzam anà baan ande abà in’kwen mɛ u pɛɛlà a ndandaa. Kà ntɔn mɛ mpɛl anki, wɛɛ sye akà baar banswà abye anà ngyööb a ndandaa, 2 ntɔn ndandaa ayà uboo a bi, anà isàkal ipepey anà bi.

3 Kab a ngway, ngyɛb anà duu amà man’fà akà Taa Nzam, anà akà Yɛsu Klistɔ, Mwan a Taa, màyàkal anà bi ntɔn bi ikäl anà mɔ̈ɔ̈ unsà ndandaa anà ukwen. 4 Mɛ kàmɛn un’sak mbɔɔn muman baan angye bumwɛy: mɔ̈ɔ̈ aba ban’pà u mbwo a ndandaa, asànaa nswɛɛŋ kàwɛl bi akà Taa. 5 Apà, Un’kaar, mɛ amàlɔm apanà, mɛ kà nswɛɛŋ akün kàlasöön anki, wɛɛ ya akwà awà bi ayà fà nsɛmà: wɛy bi ikwen bi a bi. 6 Ler naa ukwen bà nkye: naa bi ipe mɔ̈ɔ̈ abi u mbwo a nswɛɛŋ ande. Asànaa nswɛɛŋ làwem bɛ fà nsɛmà, ntɔn bɛ làläb mbwo ayin. 7 Ntɔn abwiiy mbɔɔn bàkyàpää u mɛɛn: ba làkwikilà bàfàsà anki u ngyeel a Yɛsu Klistɔ unsà imbuur. Yà unsà yayin waa bàyöb un’bwiiy anà un’yiiŋ a Klistɔ. 8 Làkäl kà igyɛɛŋ bɛ ŋakwo, ntɔn bweel a isal abi bàkɔ̈ɔ̈n akyà bwà, wɛɛ bɛ làwɛl bweel aŋàkwo.

9 Mbuur wanswà mpa awà uboo a an’lɔɔŋ a Klistɔ, wɛɛ akwen ukyà kwɛl, nde un’tüüb watɛy ana Nzam. Mbuur awà uboo a an’lɔɔŋ amà, wàŋàtüüb anà Taa anà Mwan. 10 Isàkal naa mbuur an’yà akà bɛ, anà kàlatwääl anki an’lɔɔŋ amà, twon lun’wɛl, twon lun’pɛ mbɔr sye. 11 Ntɔn mbuur awun’pà mbɔr, nde an’bulà un’yööb ande unsà isal ande byà ibe.

Nswaal a ndeer

12 Mɛ in’yàfàkal anà indiir mbɔɔn mukalasöön, wɛɛ mɛ inkwen anki musɔn unsà làkay a un’kaan anà tin. Ntɔn mbalà yumwɛy mɛ in’yà akà bɛ anà mutɛn unsà ndaa a duu, abun un’sak abi asàkal wàŋàkwo.

13 Mbɔr yi yan’fà akà baan a mpääŋ angye wàŋàsɔɔl.