O poder da oração de intercessão: orando pelos outros

Ya pagpanawagtawag ni Jisus pada sa manga umagakan nan

1 Pagkatigkas ni Jisus maglong adti manga umagakan nan, lyumangad sakanan adti langit aw nyanawagtawag adti Tyumanem, law nan, "Kay Ama, dyumateng da ya udas na patasen mu ya dengeg na kanmu Iseꞌ, pada pa-edeꞌ nan uman ya kanmu dengeg. 2 Kay pig-atag da mu kanak ya katundanan magdumala sa kadég na manga utaw, pada atag ku ya ginawa na walaꞌ ya katigkasan adti manga utaw na pigtaligu mu kanak. 3 Aw maynini ya pa-agi na matagtun nilan ya ginawa na walaꞌ ya katigkasan: Ka-ede-an kaw nilan na ikaw oloꞌ ya tengteng Tyumanem aw ka-ede-an aku nilan na aku si Jisu-Kristu ya pigpadala mu. 4 Pigpatas ku ya kanmu dengeg asini tas na lupaꞌ magi sa pagtuman ku sa kadég na imo-unun na pigtaligu mu kanak. 5 Yanagaw adun, kay Ama, uli-an ya dengeg ku kasiling na idtu muna sa dun pa aku ni tampid mu lekat pa asini muna sa walaꞌ pa ka-imoꞌ ya kadakulaꞌ na banwa.

6 "Pigpa-edeꞌ ta kaw adti manga utaw na pigtaligu mu kanak na asini tas na lupaꞌ. Idtu muna, kanmu silan, aw adun pig-atag mu silan kanak. Aw pigdalug nilan ya kanmu piglong. 7 Aw pigka-ede-an da nilan na ya kadég na pig-atag mu kanak alag lyumekat adti kanmu. 8 Kay ya piglong mu kanak, yan ya pigpalna-u ku kanilan, aw dayaw nilan pigdawat. Kya-ede-an da nilan na aku lekat saba adti kanmu, aw nyangintu-u silan na ikaw ya migpadala kanak.

9 "Nyanawagtawag aku kanmu pada kanilan, manang bekeꞌ na manga utaw na walaꞌ pangintu-u kanak. Yan ya pigpanawagtawagan ku adti kanmu ya manga utaw na pigtaligu mu kanak, kay kanmu saba silan manga utaw. 10 Aw ya kadég na kanak, kanmu saba. Aw ya kadég na awun ni kanmu, kanak uman. Aw pigpatas ya dengeg ku magi kanilan. 11 Diliꞌ madugay lumikuꞌ aku adti kanmu kay Ama, aw diliꞌ da aku meyaꞌ asini sayid na manga utaw. Manang silan, kenneꞌ pa nilan asini. Kay Ama na walaꞌ ya salaꞌ, gayed silan tamengi magi sa katulus na kanmu ngalan na pig-atag mu kanak. Pakatanawi silan pada magkasambuk ya ginawa nilan kasiling na kita sambuk da. 12 Talana ini pa aku ni sayid nilan, pigpakatanawan ku silan aw pigtamengan ku magi sa katulus na kanmu ngalan na pig-atag mu kanak. Aw walaꞌ ya nyalagak kanilan, sambuk da oloꞌ aw yan ya datengan nan ya malagak, pada matuman ya pigpasulat mu asini muna. 13 Aw adun, lumikuꞌ da aku adti kanmu. Aw dadan ku piglong ya kadég yeiy kanilan talana ini pa aku ni tampid nilan, pada malingeb da adti kanilan ya pagleya ku. 14 Pigpalna-u la ku kanilan ya kanmu piglong. Aw pigdumutan silan asuntu na walaꞌ nilan daluga ya imo-unun na manga utaw na walaꞌ pangintu-u kanmu, kasiling ku uman na walaꞌ dalug sa manga imo-unun nilan. 15 Diliꞌ aku magsekat adti kanmu na kamangen mu silan lekat asini tas na lupaꞌ, manang yan oloꞌ ya sekaten ku adti kanmu na tamengan mu silan lekat adti manga kapandayan ni Satanas. 16 Bekeꞌ na asini tas na lupaꞌ ya kanilan tengteng eya-anan, kasiling ku uman na diliꞌ taga asini tas na lupaꞌ. 17 Taniya silan magi sa palna-u mu na alag matinaw. 18 Aw kasiling na pigpadala aku mu asini tas na lupaꞌ, maynan uman pigsuguꞌ ku silan adti kadég na manga utaw adti kadakulaꞌ na banwa. 19 Asuntu kanilan, tumbay ku ya kanak pagka-utawun na ma-imoꞌ dugsuꞌ adti kanmu pada mabatug da silan taniyen aw ma-imoꞌ kanmu manga utaw magi dun ni pagdalug nilan sa kanmu matinaw na palna-u.

20 "Na, bekeꞌ oloꞌ nilan ya pyanawagtawagan ku adti kanmu, manang kadég uman na manga utaw na un pa mangintu-u kanak magi sa pag-ubat-ubat na manga mangintu-uway. 21 Kay Ama, nyanawagtawag aku kanmu na magkasambuk galu ya kadég nilan kasiling na ikaw asini kanak aw aku awun ni kanmu. Nyanawagtawag aku uman na maka-akup silan kanateꞌ pada mangintu-u ya manga utaw na asini tas na lupaꞌ na ikaw ya migpadala kanak. 22 Ya dengeg na pig-atag mu kanak asini muna, pig-atag da ku uman adti kanilan, pada magkasambuk ya kanilan ginawa kasiling na kita sambuk da. 23 Ikaw asini kanak, aw aku awun ni kanilan, pada dayaw malingeb ya pagkasambuk na ginawa nilan. Kun maynan, ka-ede-an na manga utaw na ikaw ya migpadala kanak. Aw ka-ede-an nilan uman na pigginawa͡an mu silan kasiling na pagginawa mu kanak.

24 "Kay Ama, ya manga utaw na pig-atag mu kanak, kaliman ku mag-iyeped kami dun ni sayid mu. Aw kita-en nilan ya pig-atag mu kanak na katulus asuntu na pigginawa͡an aku mu lekat pa na walaꞌ pa ka-imoꞌ ya kadakulaꞌ na banwa. 25 Kay Ama na walaꞌ ya salaꞌ, ya manga utaw, walaꞌ silan paka-edeꞌ kanmu. Manang aku nyaka-edeꞌ kanmu. Aw ya manga eped ku ini, kya-ede-an nilan na ikaw ya migpadala kanak. 26 Pigpa-edeꞌ da ta kaw adti kanilan, aw padelegen pa ku ya pagpa-edeꞌ, pada ya pagginawa mu kanak awun ni kanilan, aw aku uman awun ni kanilan."