Preocupação

कैफटिरंलाई चेतावनी

1 आव बेलाकंज़ हजार-हजार मीरं याडुप्सिव, एटाव समं ओटाव मीये मीलाई सिने समं ओटाव, येसुये ङाःडे उसिसरंलाई हैओडोवरं, "जे फरिसीराई याखमिरटाम होस्यार लेच्यो। नो खमिर नोराई याकैफट ची। 2 कप्सिव ऐटाव कडि रोःज़ माले, जो रःन्ने माले, होसोनो मोःसिव कडि रोःज़ माले, जो ठा टाने माले। 3 हैजैडे जो जे अन्ड्यारोलं हैजेवार्ज़्या, नो उज्यालोटं ठैने ले। गुप्त कोठालं हैवार्सिव रोः ज़ीःम ढुरिटाम प्रचार टानेले।"

काङ्कालो ओछ्या डोने

4 "ङानैरं, ङा जेलाई हैङाडाच्यो, नोरासं टाछेच्यो जोराई क्याङलाई सैःरंये, होकाम उरु कडिज़ माझैडुरं। 5 हैनि पनि काङ्कासं छेच्यो वार्डे ङा जेलाई हैङाडाच्यो नोसं छेच्यो जोसं क्याङलाई ओसोःयो पाना नर्गलं ख्याने सक्ति ले। ङा जेलाई हैङाडाच्यो, नोसंज़ छेच्यो।

6 कडा नेपैसालो पाँस गोटा भङ्गिरा मायेःये डोरो? नोरंकाम टोबोलाई पनि परमेस्वरये मामेःवरंये। 7 हैनि पनि जे के जेङैःटा जेचेम समं पनि गनिसिव ची ले। हैजैडे टाछेच्यो, जे के बनै भ्या भङ्गिरारं भन्डा भ्या जेयेः ले।"

येसुलाई चाव झैने सोनो माझैने

8 "ङा जेलाई हैङाडाच्यो, जो-जोये ङालाई मीराई याङाःकं ङा नोसंकाज़ वार्ये, नोलाई मानवालो ओज़ाये पनि परमेस्वरलो ओकटंवालराई याङाःकं नो पनि ङासंकाज़ वार्ने ले। 9 जोये मीराई याङाःकं ङालाई नो ङासंका ची मावार, परमेस्वरलो ओकटंवालराई याङाःकं पनि नो ङासंका माङ्क वार्ने ङाले।

10 जो-जोये मानवालो ओज़ालो उबिरोडलं पाङ, नोलाई छेमा टाने ले, हैनि पनि जोये चोखो आत्मालो उबिरोडलं डोसोयो, नोलाई छेमा टाने माले।"

11 "होकाम नोराई जेलाई यहुडीरं याडुप्सिने ज़ीःमयालं, हाकिमराई सोनो सिफाइँराई याङाःकं रैनेलेरं, होकाम जे कैलेडे, कडि जबाफ याने, कैवार्ने वार्डे चिन्ता टाडाच्यो, 12 कडालेकं नो बेलाकंज़ जे कडि पाङने हो जेलाई चोखो आत्माये पैनेले।"

मुर्ख साहुलो ओसात्रो

13 माहुले मीराई याखार्लाम टोबोये येसुलाई हैओडोव, "गुरबा, ङाडाज्युलाई हैडाड्याङ, नोये बाबुलो ओसम्पति ओयाङोकं।"

14 होकाम नोलाई येसुये हैओडोव, "ङानै, ङालाई काङ्काये जेलाई निया डाने होसोनो जेसम्पति भाड्याने ओझैसोङो?" 15 येसुये नोरंलाई हैओडोवरं, "होस्यार लेच्यो, स्यान्टै खाले लोभटाम जोगिने येःन डाच्यो, कडावार्क मीलो असलि उजिन्डकी नोलो भ्या ओढन सम्पतिटं मारहिये।"

16 येसुये नोरंलाई टोबो सात्रो हैओडोवरं, "टोबो ढनी मीलो ओयेःङलं बनै भ्या उब्जनि ओटाव। 17 नोये उयुङ-उयुङलं हैओवारो, ‘अन्न नैने पो ङासं माले, आबो ङा कैलेने?’ 18 होकाम नोये हैओवारो, ङा ऐ ङाझै, ङाघुरुङरं टैःडे झन घ्यो-घ्योव झैने ङाले, होसोनो स्यान्टै ङाअन्न सोनो ङासमानरं होलं नैने ङाले।" 19 होकाम ङापोहोनलाई हैडाने ङाले, "ए पोहोन, भ्या बर्स समं योने बनै भ्या सम्पति नलागिटं ढम्सिव ले। सुखंसं लेन। ज़्यो, ओँ, मोज डो।" 20 "होकाम परमेस्वरये नोलाई हैओडोव, ‘ए, मुर्ख, आछिम रिलंज़ नपोहोन नङ लेवटाम हाइसिनेले, होसोनो जो रोः नङ नलागिटं ढम्डे ननै, नो काङ्कालो टा?’"

21 "ओलागिटं ढन सम्पति ढम्ने, होकामटानि परमेस्वरलो ओङाःकं ढनी माटाने मीलो ओहालंत ऐटावज़ टाये।"

परमेस्वरटं बिस्वास डोच्यो

22 येसुये उसिसरंलाई हैओडोवरं, "हैजैडे ङा जेलाई हैङाडाच्यो, बान्चिने लागिटं कडि गेज़्याके होसोनो क्याङलो ओलागिटं कडि गेक्वाइसिके वार्डे जेसोगो टाहाइच्यो। 23 कडावार्क जीबन ज़्याव भन्डा सोनो क्याङ क्वा भन्डा भ्या ओयेः लेव ची। 24 कागंरंलाई बिचार डाच्योरं नोराई न वारंये, न क्यारंये, नोराई न याघुरुङले न यामुढुसले, होटानि पनि परमेस्वरये नोरंलाई ज़्याव योवरंये। जे के बाज़ारं भन्डा बनै ओयेः लेव जेले! 25 जे भरिलाम काङ्काये चिन्ता डाडे टघन्टा समं उजिउनीटं ठप्डुव ड? 26 हैजैडे जे नालेया आलिज़ा येःन पनि जेमडाडुखे भने, उरु रोःलो कडि चिन्ता जेडोज़्याव?"

27 "लिली वैलाई बिचार डाच्यो, कैजैडे नोराई न मेहेनत डोरं न ढागा खलरंये, हैनि पनि ङा जेलाई हैङाडाच्यो, सोलोमन राजालो नाढङ भ्या ओसम्पति लेडे पनि आवरंलाम टोबो हाडङका चाव ओक्वा पनि मालेव। 28 आछिम वैडे लेने सोनो पराटि मुटालं ख्याने बाङला छिलाई परमेस्वरये ऐजैडे चाव सटोनोये भने, ए जेबिस्वास टिगिडा लेवरं, परमेस्वरये जेलाई झन खाडंङ चाव झैच्योव।

29 कडि गेज़्याके कडि गेओँके वार्डे जे टाखिम्च्यो, होसोनो चिन्ता पनि टाडाच्यो। 30 कडालेकं सङसारला स्यान्टै मीरं आव रोःरं खिमरंये। जेलाई आव रोःलो खाँचो लिज़्या वार्डे जेबाबुये सोनोये। 31 हैनि पनि परमेस्वरलो ओराज्य खिमच्यो, होकाम आव स्यान्टै रोःरं जे पनि डैने जेले।"

स्वर्गटं सम्पति

32 "आलिज़ा बगालरं, टाछेच्यो! कडालेकं जेलाई राज्य याने जेबाबु खुसि लिज़्या। 33 जेसम्पति येडे डान याच्योरं। जेलागिटं ठोत्रा माटाने ठैलीरं झैच्यो। स्वर्गटं खर्कज़ नास माटाने ढन डुप्च्यो। नलं चोर मारा होसोनो रुइ पनि मारुइये। 34 कडालेकं जोङं नढन ले, होङ नयुङ पनि टानेले।"

जागा लेने नौकर

35 "जे जेवाःङ पोच्यो होसोनो जेभाङ खाङडे नैच्यो। 36 जे नो मीरं स्यानाव टाच्यो, जोये ओसाहु बिह्याँटा भोजलाम वोल्डे राडे झला घचं-घचं ओझैकं नोलो ओलागिटं चानोज़ झला फैड्योवये। 37 नो नौकररं के गराङोरं ची, नोलो ओसाहु ज़ीःमकं ओराकं नोरंलाई जागाज़ यालिज़्याव डैरिनेरंले। डस्साज़ ङा जेलाई हैङाडाच्यो, नोये ओवाम्फो पोसिडे नोरंलाई ज़्याव यानेरं ले, होसोनो राडे नोराई यासेवा डानेले। 38 होकाम खा गराङोरं नो नौकररं, नो साहु आढा रिलं ओरानि पनि होसोनो नो भन्डा कुबुलाकं ओरानि पनि नोरंलाई सनसिव यालिज़्यावज़ डैरिवरंये। 39 हैनि पनि आव सन्च्यो, चोर खाबला रा वार्डे ज़ीःम ओर्गेये ओसन्खिन के नो माइस्याडेज़ सनसिडे यालेहो, होकाम चोरलाई ज़ीःम पाडे पसिव मायाने ओलेव। 40 जे पनि तयार लेच्यो, कडावार्क जे जेमसुन्चिव बेलाकं मानवालो ओज़ा राने ले।"

बिस्वास डोने सोनो बिस्वास माडोने नौकर

41 होकाम पत्रुसये हैओवारो, "ए प्रभु, कडा आव सात्रो गेलागिटंया मान्त्रा हैनवारो, सै उरु स्यान्टैराई यालागिटं पनि?"

42 प्रभुये हैओवारो, "नो बिस्वासी सोनो बुड्डिमानी नौकर काङ्का? जोलाई नोलो ओसाहुये होला उज़ीःमला नौकरराई यामुख्या ओझोयो कडालेकं उरु नौकररंलाई ठीकं बेलाकंज़ नोराई याडैने भागला ज़्याव याव परिःङने ले। 43 नो नौकर गराङो ची, जोलाई ओसाहुये ओराकं नैझैडेज़ येःन ओडोज़्याव डैरिनेले। 44 डस्साज़ ङा जेलाई हैङाडाच्यो, नोलाई ओसाहुये स्यान्टै ओसम्पतिटं हक याने ले। 45 हैनि पनि नो नौकरये उयुङलं ङासाहु राने कुबुला झैनेले" वार्डे कमारा सोनो कमार्नीरंलाई पोःनेरं, सोनो नो ज़्याडे, ओँडे सोनो यामःङखे भने, 46 नोये आस ओमडोव छ्याम सोनो उमसुन्चीव बेलाकं नोलो ओसाहु राने ले, होकाम नोलाई सजै यानेले, होकाम नो बिस्वासी नौकर बिस्वास माडोने नौकरराई स्यानाव टानेले।

47 "ओसाहुलो उयुङला रोः ठा सन्डे तयार मालेने सोनो नोलो उइछ्या स्याव माडाने नौकरये बनै लाफ्रा कैने ले। 48 हैनि पनि ओसाहुलो उइछ्या मासन्डे लाफ्रा कैने येःन डानेये ठोको लाफ्रा कैने ले। जोलाई भ्या यासिव ले, नो लेवकाम भ्याज़ निःसिनेले, होसोनो स्यान्टै जोलाई भ्या सुम्पिसिव ले, नोलेवकाम अजं भ्या रैसिनेले।

येसुलो ओकारनये फुट

49 ङा प्रिठीबीलं मेः लैने ङाराव ची, नो के बुरु ङाडेज़ सल्किडे ओलेखिन के याटा हो! 50 टोबो डुखंलो बप्तिस्मा रैनेले। नो पुरा ओमटाया समं ङा सुखंसं ङाम्लेडु! 51 जे हैजेवार्ज़्याखे हो ङा प्रिठीबीलं सान्ति ङाझैरिव वार्डे? माङ्क, ङा जेलाई हैङाडाच्यो, बुरु ङा के फुट झैने ङाराव ची। 52 कडालेकं आबो के टोबो झानलं पाँस जनाराई याखार्ल फाटो टानेले, सोमबऱ्याङराई याबिरोडलं नेबऱ्याङनि सोनो नेबऱ्याङनि निबिरोडलं सोमबऱ्याङरं। 53 नोराई याखार्ल फाटो पसिनेले, बाबुलो उबिरोडलं ओज़ा, सोनो ज़ालो उबिरोडलं ओबाबु, वामा ओज़ालो याबिरोडलं सोनो ओज़ा वामालो याबिरोडलं, उफुबु ओबाहारीलो उबिरोडलं सोनो ओबाहारी उफुबुलो उबिरोडलं।"

समयलाई सरेःने

54 येसुये माहुले मीरंलाई पनि हैओडोवरं, "जे पोछ्योङङाम बाडल ओराज़्याव रःङडे चानोज़ हैजेवार्ये, ‘नम वानेले,’ होकाम हैज़ टाये। 55 डखिनङाम बतास ओचलिकं जे हैजेवार्ये, घाम टानेले, होकाम हैज़ टाये। 56 ए कैफटिरं! जे नमटा सोनो नामला चिन्नरं रःङडे समय जेसंःरेडु, हैनि पनि आव समयलो ओमाने खुलिने कडा जेमसंन?"

झगऱ्यासं मिलिने

57 "कडि रोः ठीकं टाये वार्डे जेज़ कडा जेमछुटैडुज़्याव? 58 जे जेझगऱ्यासं हाकिम लेवकं जेनाकं, येमटंज़ मिलिचिन, मानि के नोये नङलाई निया डाने मी लेवकं चेङडे लाङने ले, होसोनो निया डाने मीये नङलाई सिफाइँराई याकुइटं जिम्मा यानेले, होकाम सिफाइँराई नङलाई झ्याललं झाने लेरं। 59 ङा नङलाई हैङाडान, नङ स्यान्टै पैसा नम्फोया समं नलाम हाइसिने नमले।"

27 सान्ति ङा जेसं ङाख्यानै। ङा ङासान्ति जेलाई ङायाच्यो। प्रिठीबीये ओयाच्योव स्याव ङा जेलाई ङामयाच्योव। जियुङ डुखि टाटाकं होसोनो टाछेच्यो।"

येसु बाबु लेवडे नाने येम

1 "जे जियुङ हरेस टासटेच्यो। जे परमेस्वरलाई बिस्वास जेडाये, ङालाई पनि बिस्वास डाङच्यो।

11 होकाम मीराई जेलाई क्योःडे अड्डालं लाङने लेरं, हो बेलाकं ङाःडेकामज़ कडि गेपाङ्के वार्डे चिन्ता टाडाच्यो। होकाम हो बेलाकं जेलाई जो हैडासिनेले होज़ पाङच्यो। कडालेकं पाङने जे माङ्क चोखो आत्मा जियुङलाम पाङ्नेले।"