1 यहुडीरं यानाःसिने डिन छ्याम येसु येःङ पाटाला ग्यानटं ओनाज़्याव, होकाम येसुलो उसिसराई पिमालो ओबालारं टिडे याकुइये ज़ुडे याकैज़्याव। 2 हैनि पनि कोइ-कोइ फरिसीराई होरंलाई हैयाडोवरं, "यहुडीरं यानाःसिने डिन छ्याम जोज़ माडाने जे कडाने होज़ जेडोज़्याव?"

3 येसुये नोरंलाई एटाव जबाफ ओयोवरं, जे एटाव पनि जिपरिव माङ्क डोरो, "डाउडये ओल सोनो ओल्स लेनेरं याकरेव बेलाकं कै यालेया? 4 कैजैडे परमेस्वरलो उज़ीःमलं नाडे चरैसिव बरेरं हाइडे ओज़्योव, होकाम ओल्स लिज़्यावरंलाई पनि ओयोवरं, नो सेवा डोने मीराई याज़ ज़्योरंये यहुडीरंकाम उरुका मीये काङ्कायेज़ ज़्याने माटाये।"

5 होकाम येसुये होरंलाई हैओडोवरं, "मानवालो ओज़ा नाःसिने छ्यामका पनि प्रभु ची।"

6 होकाम फरि छुटं नाःसिने डिन छ्याम येसुये यहुडीरं याडुप्सिने ज़ीःमलं नाडे ओपोयोरं। होलं टोबो वोःरटा उकुइ स्याङो मी लेव। 7 येसुये नाःसिने डिन छ्याम ससम्ने येःन याडोवखे भने येसुलाई ओडोस पुलैड्याने वार्डे न्याम पैने मीरं सोनो फरिसीरं येसुलो ओचीवारे चुङडे यालिज़्याव। 8 हैनि पनि येसुये होराई याबिचार ठा ओसोनो, होकाम उकुइ स्याङो मीलाई हैओडोव, "आकं राडे च्याङसिन।" होकाम हो सोडे ओच्याङसिव। 9 होकाम येसुये नोरंलाई हैओडोवरं, "ङा जेलाई ङापजैच्यो, नाःसिने डिन छ्याम कडि येःन डाने न्याम अनंसारला टाये, चाव येःन डाने सै माचाव येःन डाने, ज्यु जोगैने सै नास झैने, खेटाव येःन डाने चाव टाये?" 10 होकाम येसुये आडेहोडे चारकोनाडे रःङडे हो मीलाई, "नकुइ गपंलाके" वार्डे हैओडोव। होये हैज़ ओझोयो, होकाम उकुइ ओसोमो।

11 हैनि पनि नोरं यारिसये चुर-यामोलो, होकाम येसुलाई कैझैने वार्डे या-याज़ सल्ला याडोव।

12 हो बेलाकं येसु डान्डाडे प्रार्ठना डाने ओनाव, होकाम येसुये परमेस्वरसं तरिडुङ प्रार्ठना ओडोव। 13 ओपराटि छकाल्ने येसुये उसिसरंलाई ओल लेवकं खुल्डे होरंलाम बारंजनालाई उरुजिवरं, होकाम होरंलाई प्रेरितरं वार्ने मिन नैडे ओयोवरं 14 सिमोन, जोलाई येसुये उमिन पत्रुस नैडेओयोव, होकाम नोलो ओभाइ अन्ड्रियास, याकुब सोनो युहन्ना, फिलिप सोनो बारठोलोमाइ, 15 मत्ती सोनो ठोमा, अल्फयसलो ओज़ानि याकुब, सोनो सिमोन, जोलाई उग्रपन्ठी* हैयाडोज़्याव, 16 याकुबलो ओज़ा यहुडा, सोनो यहुडा इस्करियोत, जोये ढोका ओयोव।

17 येसु होरासं मेलं टोबो बाङलं राडे ओच्याङसिव। होकाम उसिसरं, सोनो स्यान्टै यहुडिया, यरुसलेम, सोनो समन्डर छ्योका लेव टुरोस सोनो सीडोनलाम बनै भ्या मीरं राव लेवरं। 18 नोरं येसुलो ओपाङ ठैने सोनो यारोगोटाम सम्ने लागिटं राडे यालिज़्याव। होकाम माचाव आत्माये डुखं ओयोवरं पनि राडे यासमो। 19 होकाम होला बनै भ्या मीराई येसुलाई छुने यापान्ज़्याव, कडालेकं येसुलो ओक्याङटाम सक्ति पुलुडे हो स्यान्टैरंलाई ओससंमज़्यावरं।

20 होकाम येसुये उसिसरं लेवडे भाल्सिडे हैओडोवरं

बनै रेङनेरं ची, जे गरिबरं,

कडालेकं परमेस्वरलो ओराज्य जेलागिटंज़।

21 बनै रेङनेरं ची, जे आर्क करेनेरं,

कडालेकं जे वाःङनेजेले।

बनै रेङनेरं ची, जे आर्क घर्नेरं,

कडालेकं जे साःनेजेले।

22 बनै रेङनेरं ची, जे मीराई जेलाई मानवालो ओज़ालो ओकारनटं घिनैने लेरं, होकाम मीराई याखार्लाम जेलाई पुलैडे जेबाठङ झैनेलेरं, होकाम गिल्लैडे सोनो माचावरं वार्डे जेबिज्यात झैनेलेरं। 23 हो छ्याम रेङच्यो, होकाम खुसि टाडे डरि-डरि स्याःच्यो, कडालेकं स्वर्गटं घ्योव इनाम डैनेजेले। कडालेकं जेपुर्खाराई पनि अगमबक्तारंलाई नैटावज़ याझोयोरं।

24 "हैनि पनि बनै घ्योव डुखं टानेले, जे ढनीरं!

कडालेकं जे सुखं आनन्ड डैडे जेखेम्डुखे।

25 बनै घ्योव डुखं टानेले, जे आर्क ज़्याव ओँव डोयोरं!

कडालेकं जे करेने जेले।

बनै घ्योव डुखं टानेले, जे आर्क साःनेरं!

कडालेकं जे सोगो डाडे घर्ने जेले।

26 बनै घ्योव डुखं टानेले, जेलाई, स्यान्टै मीराई जे जेप्रसंसा डोनेलेरं! कडालेकं जे जेपुर्खाराई पनि झुठा अगमबक्तारंलाई ऐज़ याझोयोरं।"

27 "हैनि पनि जे ठैनेरंलाई ङा हैङाडाच्यो, जेसुतंररंलाई मया डोच्योरं, होकाम जेलाई घिनैनेरंलाई चाव झैच्योरं, 28 सरापिनेरंलाई आसिक योच्योरं, जेलाई जेबिज्यात झैनेराई यालागिटं प्रार्ठना डोच्यो। 29 नङलाई टोबो नबाङलाटं पोःनेलाई छुटं नबाङला पनि ठाङड्यो, होकाम नकोट नान्नेलाई नकंमेस पनि यो 30 नङसं निःनेरं स्यान्टैरंलाई योरं, होकाम नङसं लेव बस्तरं लाङनेलाई फरि टानिः। 31 मीराई जेलाई खेटाव याझैच्योव चाव जेङप्सिये, जे पनि होरंलाई हेटावज़ झैच्योरं।"

32 "जेलाई मया डोनेरंलाई मया जेडोरंखे भने, जेलाई काङ्काये स्याबास डाच्योवडं? कडालेकं पापीराई पनि यालाई मया डोनेरंलाईज़ मया डोरंये। 33 जेलाई चाव झैनेरंलाई चाव जेझैरंखे भने, जेलाई कडि फाइडा याटायाडं? कडालेकं पापीरं पनि हैज़ झैरंये। 34 कोइ मीलाई रिन नयोकं सोवोल्डे रैने आस डाडे नयोखे भने, नङ कडि चाव येःन नडोखेडं? कडालेकं फरि पनि हाडङज़ डैने आस डाडे पापीराई पापीरंलाई रिन योरंये। 35 जेसुतंररंलाई मया डोच्योरं, होकाम होरंलाई चाव झैच्योरं। होकाम फरि डैने आस माडोडे रिन योच्योरं, होकाम घ्योव इनाम डैनेजेले, हैजैडे जे स्यान्टैराई भन्डा घ्योव प्रभुलो ओसन्तान टाने जेले, कडालेकं परमेस्वर बैगुनिरं सोनो यालाई फाइडा टाने येःन डोनेरंलाई पनि डया डोवरंये। 36 जेबाबु डयालु ओलेव मान्टि, जे पनि डयालु टाच्यो।"

37 "उरुकाराई यानिया टाडोच्यो होकाम जे पनि जिनिया टाने माले। उरुलाई याडोस टापुलैड्याच्योरं, होकाम जे पनि डोसि टाने जेमले। उरुरंलाई छेमा डोच्योरं, होकाम जे पनि छेमा डैने जेले। 38 उरुरंलाई योच्योरं, होकाम जे पनि डैने जेले। मीराई जेलाई खान्डि-खान्डि छलं-छलं झैडे यानेलेरं। कडालेकं जे उरुकारंलाई जोलाम फोडे जेयोरं, जे पनि होलामज़ फोडे डैनेजेले।"

39 येसुये होरंलाई टोबो सात्रो पनि हैओडोवरं "कडा अन्डलाये अन्डलालाई चेङडुव डोरो? होकाम ओचेङनि पनि नोनि नेबऱ्याङज़ खाल्टालं माटेःनि डोरो? 40 उसिस उगुर भन्डा घ्योव माटाये, बुरु स्यान्टै रोः ओपैसिव पान्त्रा उगुर स्यानावज़ टानेले।"

41 "नङ नभाइलो उमिला लिज़्याव खा कडाने नरःङज़्याव, नङ नमिलं मोन्डा उलिज़्याव नमसन? 42 नङ नमिला लिज़्याव मोन्डा नमरःङडुखे भने, नभाइलाई ‘ए भाइ, नमिला लिज़्याव खा हाइडे ङायान’ वार्डे कैजैडे है नडोडु? ए कैफटि, ङाडे नङ नमिला मोन्डा हाइ, होकाम नभाइलो उमिला खा चावसं रःङडे नहाइडु।"

43 "चाव सिङये माचाव ओसै माझाव, न माचाव सिङये चाव ओसै झावये। 44 स्यान्टै सिङरंलाई यासैटामज़ सःरेसिरंये। कडालेकं ज़ुलो ओघारटाम काङ्कायेज़ डी माफ्याव, न पठरक्या टाम अङ्गुर फ्याव। 45 चाव मीये उयुङलाम चाव रोःज़ पुलोयो, माचाव मीये उयुङला माचाव रोःज़ पुलोयो। कडालेकं युङलं खेटाव रोः ले, याःलाम पनि होज़ पुलुये।"

46 "ङा हैङाडाच्योव रोः जेमडाखे भने ङालाई कडाने ‘प्रभु, प्रभु,’ जेडाङज़्याव? 47 जो ङालेवकं राडे ङापाङ ठोयो होकाम हो अनंसार डोव, हो खेटाव मी, वार्डे ङा जेलाई हैडाने ङाले। 48 नो टोबो ज़ीःम झैने मी स्यानाव ची, जोये बनै पटाललं घोडे पहरटं जग उसुचुनो। होकाम भलं राडे नो ज़ीःमलाई उहुटोयो, होकाम नो ज़ीःमलाई घानाङघनङज़ माझैडुवये कडालेकं नो पहरटं पक्कासं झैसिव लेव। 49 हैनि पनि जोये ठैडे पनि हो अनंसार माडोव, नो के टोबो एटाव मी ची, जोये जगलं लुङ माझाडे गम झाडे ज़ीःम ओझोयो। होकाम भलं राडे नो ज़ीःमलाई उहुटोयो, होकाम नो ज़ीःम होपान्ट्राज़ उढलिव, हैजैडे नो ज़ीःम स्यान्टै नास ओटाव।"