लुका 20

येसुलो ओअडिकार बारेलं प्रस्न

1 टछा येसुये प्रार्ठना डोने ज़ीःमलं मीरंलाई ओपैज़्यारंकं, हो मीरंलाई चाव सोर ओसठोयोरं। मुख्या सेवा डोने मीरं, न्याम पैने मीरं सोनो अगंवारं येसुलेवकं याराव, 2 होकाम येसुलाई यापजोयो, "गेलाई हैगडासिके, नङ आव येःन कडि अडिकारये नोडोज़्याव, नङलाई आव अडिकार काङ्काये ओयानो?"

3 येसुये नोरंलाई जबाफ ओयोवरं, "ङा पनि जेलाई टोबो रोः ङापजैच्यो, ङालाई जबाफ याङच्यो। 4 युहन्नाये ओयोज़्याव बप्तिस्मा स्वर्गटाम, सै मीराई ङाम?"

5 नोरं या-या पाङसिडे ऐ यालेव, "स्वर्गटाम, यावार्सिखे भने, ‘जे नोलाई बिस्वास कडा जेमडो?’ वार्डे मी लाई है ची डाने ले। 6 ‘मीराईङाम’ यावार्सिखे भने, स्यान्टै मीराई गेलाई लुङये झोम्ने लेरं, कडालेकं युहन्ना के अगमबक्ता ची वार्ने नोरंलाई पक्का बिस्वास लेव।" 7 हैजैडे नोराई जबाफ यायोव, "गे गेम्सन, काङाम ओराव।"

8 होकाम येसुये नोरंलाई हैओडोवरं, "हो टावसं ङा पनि कडि अडिकारये आव येःन ङाडोज़्याव जेलाई ङाम्पान्ड्याच्यो।"

अडिया कमैनेराई यासात्रो

9 येसुये मीरंलाई आव सात्रो हैओडोवरं, "टोबो मीये ओयेःङलं अङ्गुर ओवावो, होकाम अडिया कमैनेरंलाई ओयोवरं, होकाम जामा भ्या डिन समं प्रडेस डे ओनाव। 10 ओसै उमिःनो पान्त्रा नो येःङलाम अडिया भाग रैने नो येःङलो ओसाहुये टोबो ओनौकरलाई अडिया कमैनेरं लेवङ उपरिःङो। हैनि पनि अडिया कमैनेराई नो ओनौकरलाई पोःडे कडिज़ मायाडे रितो यापरिःङो। 11 नो साहुये फरि छुटं ओनौकरलाई उपरिःङो, हैनि पनि नोराई होलाई पनि पोःडे रितोज़ यापरिःङो। 12 होकाम सोङ्खेपका छुटं ओनौकरलाई पनि उपरिःङो, होराई नोलाई पनि पोःडे घाइते झैडे यापरिःङो।" 13 "होकाम येःङलो ओर्गेये हैओवारो, ‘आबो ङा कै लेने? ङा ङायुङ्का ङाज़ालाई परिःङने ङाले सक्याटं नोलाई के जामा मान योरंके।’ 14 हैनि पनि अडिया कमैनेराई येःङ ओर्गेलो ओज़ालाई रःङडे या-या यापाङसिव, ‘आव के ओहक लेव ची। डे गे आवलाई सैःने, होकाम सम्पतिलो हक गे डैने गेले।’ 15 होकाम नोराई येःङ ओर्गेलो ओज़ालाई अङ्गुर वासिव येःङकाम टङडे लाङ्डे यासोःयो।"

"आबो येःङलो ओर्गेये नोरंलाई कै डोवरंके? 16 नो ओर्गे राडे नोरंलाई सैःनेरंले होकाम नो येःङ उरुरंलाई अडिया यानेले।"

मीराई आव रोः ठैडे हैयावारो, "ऐटाव खर्कज़ टाटाकं।"

17 हैनि पनि येसुये नो मीरंलाई रःङडे हैओवारो, "आव सर्सिव कडि खेने?

‘जो लुङलाई ज़ीःम झैनेराई फालिम याझोयो,

हो लुङज़ ज़ीःमलो ओगोराटा उगुर लुङ ओटाव।’

18 नो लुङ तर्ट टेःनेरं स्यान्टै कुत्रा-कुत्रा टानेलेरं, हैनि पनि नो लुङ जोलो ओतर्ट टेः हो नप-नप टानेले।"

19 होकाम न्याम पैनेरं सोनो मुख्या सेवा डोने मीराई येसुलाई होकंज़ क्योःने यापानो। येसुये नो सात्रो नोराई याबिरोडलं ओपाङो वार्डे नोरंलाई ठा के लेव कडालेकं मीरंलाई रःङडे नोरं याछेव।

कैसरलाई फोने सिरमा

20 नोराई मौका यारःङज़्याव, होकाम सहि मी झैसिने चिवारेरंलाई नोराई येसु लेवङ यापरिःङोरं। नोरं येसुलाई ओरोःटंज़ फसैडे हाकिमराई याकुइटं येसुलाई सुम्पिड्याने डाउँ यारःङज़्याव। 21 नोराई येसुलाई यापजोयो, "गुरबा गे गेसनये, नङ चाव नपाङये होसोनो चावज़ नपैये, होकाम काङ्कालो याज्युङनि पनि नम्झैसिये, होकाम परमेस्वरलो ओयेम सत्यसं नपैये। 22 गे कैसरलाई सिरमा फोने टाये, सै माटाये?"

23 येसुये नोराई याकैफट सन्डे हैओडोवरं, 24 "ङालाई टोबो पैसा सतन्ड्याङच्यो। आव पैसाटं काङ्कालो उसुरुप सोनो काङ्कालो उमिन सर्सिव लिज़्या?"

नोराई हैयावारो, "कैसरलो"

25 येसुये नोरंलाई हैओडोवरं, "हैजैडे जो कैसरलो लिज़्या, हो कैसरलाई याच्यो। होकाम जो परमेस्वरलो लिज़्या, हो परमेस्वरलाई याच्यो।"

26 मीराई याङाःकं नोराई येसुलाई रोःटं माफसैडुरंये, होकाम येसुलो ओजंबाफटं नोरं अचम्ब टाडे च्याम-चिम याटाव।

सिडे ज्युङडा टाने बारेलं

27 होकाम येसु लेवकं नेबऱ्यायाँ सडुकीरं याराव। मीरं सिडे फरि ज्युङडा माटारं वार्ने नोराई याबिचार लेव। नोराई येसुलाई यापजोयो, 28 "गुरबा, मोसाये गेलाई हैडाडेनैसिव, टोबो मीलो ओडाज्यु बिह्याँ डाडे ओसन्तान ओम्टाडेज़ यासिखे भने, ओभाइये ओडाज्युलो ओज्यालाई बेह्याँ डाडे ओडाज्युलो ओसन्तान झैड्याने टाये। 29 नोरं सातभाइ लेवरं। जेठाये टोबो ज्या रैडे ओसन्तान ओम्टाडेज़ उसिव, 30 होकाम माईलाये, 31 हैजैडेज़ साईँलाये पनि बेह्याँ ओडोव, हैजैडेज़ सातभाइज़ यासन्तान माटाडे यासिव। 32 झिन्डे नो मेमा पनि उसिव। 33 होकाम सिडे फरि ज्युङडा टाकं नो मेमा काङ्कालो ओज्या टा के? कडालेकं नो सातजनाराईज़ याज्या टाडे खेमो लेव।"

34 येसुये नोरंलाई हैओडोवरं, "आव जुगुला मीरं बेह्याँ डोरं होसोनो बेह्याँ डाड्योरं। 35 हैनि पनि छुटं जुगु समं केनाने टावरं सोनो सिवलाम फरि ज्युङडा टावराई न बिह्याँ डोरं, न याबिह्याँ डाड्योरं। 36 नोरं फरि मासिरं, कडालेकं नोरं स्वर्गटा कटंवाल मान्टिव टारंये, होकाम सिडे फरि ज्युङडा याटाव कारनये नोरं परमेस्वरलो ओसन्तानरं ची। 37 हैनि पनि सिवरं ज्युङडा टाडे सोने लेरं वार्ने रोः मोसाये पनि घ्योव प्रभुलाई अब्राहामलो ओपरमेस्वर, इसहाकलो ओपरमेस्वर सोनो याकुबलो ओपरमेस्वर वार्डे उपुगारिकं पठरक्यालो ओबयानटाम ओसोटोनो। 38 परमेस्वर सिवराई यापरमेस्वर माङ्कची हैनि पनि ज्युङडाराई यापरमेस्वर ची, कडालेकं स्यान्टै ओलागिटंज़ ज्युङडा लेरं।"

39 होकाम न्याम पैनेरंलाम कोइ कोइराई हैयावारो, "गुरबा, नङ चावज़ नवार्खे।" 40 होकाम काङ्काये पनि येसुलाई प्रस्न पजैने हिक्मत माडोडुरंये।

ख्रीस्ट काङ्कालो ओज़ा?

41 हैनि पनि येसुये नोरंलाई हैओडोवरं, ख्रीस्ट डाउडलो ओज़ा वार्डे नोरं कैजैडे हैवार्र? 42 कडालेकं भजनलो उकितापटं डाउडये ओलज़ हैवार्डेले,

स्यान्टैराई भन्डा घ्योव प्रभुये ङाप्रभुलाई हैओडोव,

"नङ वोःर्डेङा ङाकुइडे चुङसिन,

43 जोकासमं नसुतंररंलाई

नखङ ढुङलं लेने ङाम्झैरं।"

44 ऐजैडे डाउडये ख्रीस्टलाई प्रभु याडोवखे भने फरि कैजैडे नो डाउडलो ओज़ा टा?

45 होकाम स्यान्टै मीरं याठैज़्याकं येसुये उसिसरंलाई हैओडोवरं, 46 "खे-खेव क्वा क्वाइसिडे आडे होडे बाने, होकाम बजारयालं मीराई ढो गोडोरंकं वार्डे यामान खिम्ने, यहुडीरं याडुप्सिने ज़ीःमलं घ्योव मीरं याचुङने पोटं चुङनाने, भोज ज़्याने पोलं यामान लेव मीरं याचुङने पोयालं चुङनाने युङ डाने न्याम पैनेरंङाम होस्यार लेच्यो। 47 नोराई रान्डिनिराई याज़ीःम नान्ड्योरंये, प्रार्ठना याडोकं मीरंलाई सतन्ने लागिटं खे-खेव प्रार्ठना डोरंये। आवराईज़ भ्या डन्ड डैने लेरं।"