1 होकाम येसुये बारं जना उसिसरंलाई टखेपटंज़ खुल्डे, नोरंलाई भुतरं पुलैने सोनो रोगोरं ससम्ने स्यान्टै सक्ति सोनो अडिकार ओयोवरं। 2 येसुये नोरंलाई परमेस्वरलो ओराज्यलो प्रचार डाने सोनो ठलिव मीरंलाई ससम्नेलो लागिटं उपरिःङोरं। 3 येसुये नोरंलाई हैओडोवरं, "येम्ट जेनाकं जेसं कडिज़ टालाङच्यो झुइ, ज़ःन, बरे, पैसा, होसोनो नेजोर क्वा, आवरं जेसं कडिज़ टालेकं। 4 जो ज़ीःमलं जे जेपंसि हो ज़ीःमलंज़ लेच्यो, होसोनो हो ज़ीःमलामज़ पुलुडे राच्यो। 5 जोकं जेलाई जेमान डाडेमायाच्योरं जे नो सहरलाम जिपुलुकं नोराई याबिरोडलं गोहाइ याने लागिटं जेखङटा ढुइरं ठरैड्याच्योरं।"

6 होकाम नोरं भासिडे, चाव सोर प्रचार डावग्यान सोनो स्यान्टैडे नाङखार-नाङखारयालं ठलिव मीरंलाई ससोमोग्यान नावग्यान याडोव।

7 आव स्यान्टै घटनालो ओबारेलं ठैडे राजा हेरोड अचम्ब ओटाव, कडालेकं युहन्ना सिवलाम ज्युङडा टाडे राडेले वार्ने कोइ-कोइराई हैयावार्ज़्याव। 8 कोइराईची, "एलिया राडेले यावार्ज़्याव," उरुराईची "डोङ्का अगमबक्तारंलाम टोबो ज्युङडा टाडे राडेले यावार्ज़्याव।" 9 होकाम हेरोडये हैओवारो, "युहन्नालो ओङैः के ङा पोलो ङापरिःङोरं, होकाम आव काङ्का जोलो ओबारेलं ऐटाव रोः ङाठैज़्याव?" होकाम हेरोडये येसुसं डैसिने युङ ओडोव।

10 होकाम येसुलो ओसाचीरं वोल्डे राडे नोराई याडोव स्यान्टै येःन येसुलाई यापान्ड्योव। येसुये नोरंलाई ओल्स लाङडे बेठसेडा वार्ने नाङखारलं काङ्कालाईज़ हैमाडाडे याबाठङ यानाव। 11 होकाम नो ठा सन्डे माहुले मीरं येसुलो उझिन-उझिन यानाव। येसुये नोरंलाई खुसि उयुङये राव ओयोवरं, होसोनो परमेस्वरलो ओराज्यलो ओबारेलं ओसठोयोरं, होसोनो जो-जोरंलाई ससंम्ने लेव होरंलाई ओससोमोरं।

12 होकाम नम उढल्किरिव, होकाम बारं जना उसिसरं राडे येसुलाई हैयाडोव, "आव माहुले मीरंलाई गपरिःङरंके, होकाम नोरं आकाला आसै होसैयाला नाङखारलं नाडे गबासिनारंकं, होसोनो याज़्याव गखिमरंकं, कडालेकं गे के मीरं मालेव पोलं ची गेलिज़्या।"

13 होकाम येसुये नोरंलाई हैओडोवरं, "जे ज़ नोरंलाई ज़्याव याच्योरं।" होकाम नोराई हैयावारो, "गेसं के पाँस गोटा बरे सोनो नेबऱ्याङ ङाः याज़ लिज़्या, माटाखे भने के गे स्यान्टै नाडे आव स्यान्टै मीराई यालागिटं ज़्याव लःङने टाके।" 14 नोरं ठोकै पाँस हजारया खेपारंया मान्त्रा लेवरं।

होकाम येसुये उसिसरंलाई हैओडोवरं, "नोरंलाई पचास-पचास जना झैडे टाना-टाना सुचुनच्योरं।" 15 नोराई हैजैडेज़, स्यान्टैरंलाई यासुचुनोरं। 16 होकाम येसुये नो पाँस गोटा बरे सोनो नेबऱ्याङ ङाः छेन्डे स्वर्गडे रःङडे ढन्याबाड ओयोव, होकाम बरे केःडे मीरंलाई भाड्याच्योरं वार्डे उसिसरंलाई ओयोवरं। 17 स्यान्टैराई ज़्योडे यावाःङो, होकाम उसिसराई येःलो उकुत्रारं बारं फुङ्गा याडुपो।

18 टछा येसुये ओबाठङ प्रार्ठना ओडोज़्याकं उसिसरं पनि ओल लेवकं याराव। होकाम येसुये नोरंलाई ओपंजोयोरं, "मीराई ङालाई काङ्का वार्डे हैडाङरंये?"

19 नोराई हैयाडोव, "कोइये बप्तिस्मा झैने युहन्ना वाररंये, कोइये एलिया, होसोनो उरुराई ङाःडेका कोइ अगमबक्तारंलाम टोबो फरि ज्युङडा टाडे ओसोव वार्ये।"

20 येसुये नोरंलाई हैओडोवरं, होकाम "जे ङालाई कै जेडाङ? ङा काङ्का?" होकाम पत्रुसये जबाफ याडे हैओडोव, "परमेस्वरलो ओख्रीस्ट*!"

21 होकाम येसुये नोरंलाई चेतावनी याडे हैओडोवरं, आव रोः काङ्कालाई पनि हैटाडाच्यो। 22 होकाम येसुये हैओडोवरं, "मानवालो ओज़ाये बनै भ्या डुखं डैनेले, होसोनो नो यहुडी अगंवारं, मुख्या सेवा डोने मीरं सोनो सास्त्र पैने मीराई चाव ङप्सिने मालेरं, नोराई सैःने लेरं होकाम सोङलाका सिवलाम ज्युङडा टाडे सोनेले।"

23 होकाम येसुये स्यान्टैरंलाई हैओडोवरं, "कोइ मी ङाछिन्ट राने युङ याडोव भने नोये ओल्लाईज़ मया टाडोवकं, होसोनो डिनकापटि उक्रुस घुर्डे ङाछिन्ट ओराकं। 24 कडालेकं जोये ओपोहोन जोगैने युङ डोव, नोये हो पनि गोमैनेले। हैनि पनि जोये ङालागिटं ओपोहोन गोमोयो, होये नो बचैनेले। 25 कडालेकं स्यान्टै सङसार उकुइटं रैडे ओललाई नास याजोयो भने होसोनो ओपोहोन याझाव भने नो मीलाई कडि फाइडा टा ड? 26 कोइ ङासं सोनो ङापाङसं ओलाजं याहायो भने मानवालो ओज़ा पनि ओमहिमालं, ओबाबुलो सोनो चोखो ओकटंवालरासंका ओमहिमालं ओराकं नोसं पनि ओलाजं हाइने ले। 27 डस्साज़ ङा जेलाई हैङाडाच्यो, आका च्याङसिडे लिज़्यावरंकाम कोइ-कोइ लिज़्यारं, जोराई परमेस्वरलो ओराज्य यामरःङया समं सिने मालेरं।"

28 येसुये आव रोः हैओवारो ठोकै आठ डिन झिन्डे पत्रुस, युहन्ना सोनो याकुबलाई ओल्स लाङडे प्रार्ठना डाने डान्डाटं ओनाव। 29 येसुये प्रार्ठना ओडोज़्याकं ओअनवारलो उरुप ओफेरैसिव, होसोनो येसुलो ओक्वा गोङज़ा उमिल्किका मान्टिव उज्यालो ओटाव। 30 होकाम येसुसं नेबऱ्याङ मीनि रोः नेडोज़्याव, नोनि मोसा सोनो एलिया लेवनि। 31 नोरं निमी मान्टिव चाङज़्याव रुपंलं रःन्डे येसुलो प्रिठीबीलाम ओनाने* बारेलं रोः याडोज़्याव। आव रोः येसुये यरुसलेमलं पुरा झैने लेव। 32 आबो पत्रुस सोनो नोसं लिज़्यावरं यामिरंये रोलाटा टाडे यालिज़्याव। यामिरंलाम यासन्सिकं नोराई येसुलो निमी मान्टिव चाःङो उरुप सोनो येसुसं च्याङसिव नेबऱ्याङ मीनिलाई यारोःङोरं। 33 होकाम नो नेबऱ्याङ मीनि येसुसं भासिडे नेनारिज़्याकं पत्रुसये येसुलाई हैओडोव, "गुरबा, गेलाई आकं लेने बनै चाव ओलेव लेव। गे सोमबऱ्याङ छाप्रा गेझैके टोबो नलागिटं, टोबो मोसालो ओलागिटं होसोनो टोबो एलियालो ओलागिटं।" कडि ओपाङो हो रोः नोये मासोनोये।

34 पत्रुसये आव रोः ओपाङज़्याकज़ टोबो बाडल राडे येसु सोनो उसिसरंलाई ओकपोरं, नोरंलाई बाडलये ओकपरिज़्याकं उसिसरं बनै याछेव। 35 होकाम बाडलटाम टोबो ऐ वार्ने गा ओठोयो, "आव के ङाज़ा ची, जोलाई ङा ङारुजिव ची। आवलो ओरोः ठैच्यो।"

36 आव गा ओखेमो पाना येसु नलं ओबाठङज़ उलिज़्याव। उसिसरं गाइगुइज़ मालेरंये, होसोनो नोराई यारोःङो रोःरं नो बेलाकं काङ्कालाईज़ हैमाडोरंये।

37 नोलो ओपंराटिका छ्याम येसु सोनो उसिसरं डान्डाटाम याझरिव, माहुले मीराई येसुलाई डैने याराव। 38 नो माहुले मीराई याखार्लामटा टोबो मीये किःडे हैओवारो, "गुरबा, ङा नङसं बिन्ती ङाडो, ङाज़ालाई चावसं रःङड्याङ। कडालेकं ङाज़ा नो टोबोज़ाज़ ची। 39 रःङखेने, टोबो माचाव आत्माये नोलाई क्योःवये, होकाम नो अम्ल्याङसानि किःये, होसोनो नोलाई बारबुर किलोये होकाम नोये ओयाःलाम फेन ख्यावये। होसोनो नोलाई ल-ल टडे बल्ल-बल्ल राःवये। 40 नो माचाव आत्मालाई गुपुलैड्याङरंकं वार्डे नसिसरासं बिन्ती ङाडोव के, नोराई माढुरंये।"

41 होकाम येसुये जबाफ ओयोव, "ए बिस्वास माडोने सोनो झ्याङस्या पुस्ता, ङा खर्का समं जेसं ङालेकेडं, होसोनो ङा जेलाई खा समं ङासहिच्योके ड? नज़ालाई आकं रै।"

42 होकाम नो ओराज़्याकंज़ माचाव आत्माये नोलाई ल-ल ओटंव, होसोनो किल्ने ओपानो। होकाम येसुये नो माचाव आत्मालाई ओहक्लोयो, होकाम नो बाल्खलाई ससम्डे ओबाबुलाई ओयोव। 43 परमेस्वरलो बनै घ्योव ओयेःन रःङडे नोरं स्यान्टै बक्क याटाव।

येसुये ओडोव स्यान्टै येःनरं रःङडे स्यान्टैरं बक्क याटाव, होकाम येसुये उसिसरंलाई हैओडोवरं, 44 "आव रोः जे मामेःडे चावसं ठैच्यो, कडालेकं मानवालो ओज़ा मीराई याकुइटं क्योःसिरिने पानज़्याव।" 45 नोराई आव रोः माबुझिरंये। कडावार्क आव नोराई टाबुझिरंकं वार्डे नोराईकाम गुप्तलं नैसिव लेव। नोरं आवलो ओबारेलं येसुलाई पजैने याछेज़्याव।

46 नो बेलाकंज़ नोरंलाम काङ्का घ्योव वार्ने बारेलं बनै रोः याडोज़्याव। 47 होकाम येसुये नोराई यायुङला रोः ठा सन्डे टोबो बाल्खलाई ओछ्योकं ओरोयो, 48 होकाम नोरंलाई हैओडोवरं, "जोये ङामिन्टाम आव बाल्खलाई बिस्वास डोव, नोये ङालाई बिस्वास डाङो, होसोनो जोये ङालाई बिस्वास डाङो, होये ङालाई परिःङनेलाई बिस्वास डोवये। कडालेकं जे मड्डेलाम जो स्यान्टैराई भन्डा आलिज़ा ले, नोज़ स्यान्टैराई भन्डा घ्योव टाये।"

49 होकाम युहन्नाये हैओवारो, "गुरबा, टोबो मीये नमिनटाम भुतरं उपुलैज़्यावरं गे गेरोःङो, होकाम गे नोलाई ऐटाव येःन टाडो गेडोव। कडावार्क नो गेसं नझिन्ट माबारिये।"

50 होकाम येसुये नोलाई हैओडोव, "नोलाई नो येःन डाव याच्यो। कडालेकं जो नबिरोडलं माले, नो नङलेवडेज़ झैसिये।"

51 येसु स्वर्गडे नाने बेला नजिकं ओरारिज़्याकं येसुये यरुसलेमडे नाने बनै युङ ओडोव। 52 होकाम येसुये सोर लाङने मीरंलाई ङाःडेज़ उपरिःङोरं। नोरं यानाव, होकाम येसुलो ओलागिटं स्यान्टै बस्त तयार झैने नोरं सामरीराई टोबो यानाङखारलं यापसिव। 53 होकाम येसुलो यरुसलेमडे नाने उयुङ उलिज़्याव ठा सन्डे नो सामरीराई येसुलाई ओमान डाडे मायोरंये। 54 होकाम आव रःङडे येसुलो उसिसनि याकुब सोनो युहन्नानि हैनेवारो, "प्रभु, सै नङ स्वर्गटाम मेः सवाडे आवरंलाई भसम गटारंकं वार्ने नुयुङ ओलेखिन् गे नङलाई हैगेडान?"

55 होकाम येसुये नोरंलाई वोल्डे रःङडे ऐलेडे ओहप्कोयोरं, "जेसं खैटाव आत्मा उलिज़्याव जे जेमसनये? कडालेकं मानवालो ओज़ा मीरंलाई नास झैने के ओराव माङ्कची बुरु नोलाई जोगैने ची।" 56 होकाम येसु सोनो उसिसरं छुटं नाङखारडे यानाव।

57 येसु सोनो उसिसरं येम्ट यानाज़्याकं, टोबो मीये येसुलाई हैओडोव, "ए प्रभु, नङ जोडे नना ङा नझिन्ट रानेङाले।"

58 होकाम येसुये नोलाई हैओडोव, "स्यालाराई यागार टाये, होसोनो नमटा भुर्ज़्याव बाज़ाराई याज़ीःम ले, हैनि पनि मानवालो ओज़ालो के ओङैः अडैने पो पनि माले।" कुङलं स्याला आलिज़ा ओज़ारासं

59 येसुये छुटं टोबोलाई हैओडोव, "ङाछिन्ट राङंन।" होकाम नोये हैओवारो, "ङाःडे ङाबाबुलाई गाडिनाने नाव गयाङ्के।"

60 येसुये नोलाई हैओडोव, "मोरोरंलाई यामोरोज़ गाडिव योरं, होकाम नङ नाडे परमेस्वरलो ओराज्यलो चाव सोर प्रचार डो।"

61 छुटं टोबोये पनि हैओवारो, "प्रभु, ङा नझिन्ट रानेङाले, हैनि पनि ङाःडे ङाज़ीःमलारासं भासिव याङ।"

62 होकाम येसुये नोलाई हैओडोव, "उकुइ वोःरटं क्योःडे उझिन्डे वोल्डे रःङने काङ्का पनि परमेस्वरलो ओराज्यलं नाडुने माले।"