Lucas 10

येसुये बहतर जना उसिसरंलाई उपरिःङोरं

1 होकाम प्रभुये उरु सहतर जना उसिसरंलाई उरुजिवरं, होकाम ओल ओनारिज़्याव स्यान्टै नाङखार सोनो पो यालं ओल भन्डा ङाडेज़ नोरंलाई नेबऱ्याङ-नेबऱ्याङ झैडे उपरिःङोरं। 2 येसुये नोरंलाई हैओडोवरं, "अन्न के फसिवलंज़ लिज़्या, हैनि पनि येःन डाने मीरं ठोको लिज़्यारं। हैजैडे अन्नलो ओर्गे प्रभुलाई प्रार्ठना डाच्यो, होकाम प्रभुये ओअन्न लेव येःङलं येःन डानेरं उपरिःङोरंकं। 3 गनाच्योके, रःङच्यो, ङा जेलाई ब्वाङसाराई याखार्ल भेडालो ओपाठारं मान्टि ङापरिःङच्यो। 4 न पैसालो ठैली, न झुली, न पनै घुर्च्यो न येम्ट कोइलाई ढो डाच्यो।" 5 "जो ज़ीःमलं जिपसिना हो भन्डा ङाडेज़ हैवार्च्यो, ‘आव ज़ीःमलाई सान्ति ओटाकं!’ 6 नलं सान्ति चाव ङप्सिने मी यालेखे भने जेआसिक नोलाई रःन्ने ले, हैनि पनि सान्ति चाव माङप्सिने मी यालेखे भने जेयाव आसिक जेलेवडेज़ वोल्डे रानेले। 7 नोराई यायाच्योव ज़्याव ज़्याडे ओँडे नो ज़ीःमलंज़ लेच्यो। कडालेकं येःन डाने मीये ओज्याला ओडोयोकं। स्यान्टै ज़ीःम-ज़ीःमकं टाडुलिच्यो।"

8 "जे जो नाङखारलं जेपंसि, नोराई जेलाई जेमान माडाड्याच्योरं, होकाम जेङाःकं रैडे यायाच्योव ज़्याव ज़्याच्यो, 9 नला लिज़्याव रोगीरंलाई ससम्च्योरं, होकाम नोरंलाई हैडाच्योरं, ‘परमेस्वरलो ओराज्य जेछ्योकंज़ केरिडेले।’ 10 होकाम जे जो नाङखारलं जेपंसि, नोराई जेलाई जेमान डाडेमायाच्योरखे भने, पुलुडे नो बजारला येमयालं नाडे, हैडाच्योरं, 11 ‘गेखङटा गालो जेनाङ्खारला ढुइरं समं गे जिबिरोडलं गेठरै। होटानि पनि आव सन्च्यो, परमेस्वरलो ओराज्य नजिकज़ केरिडेले।’ 12 ङा जेलाई हैङाडाच्यो, नो छ्याम नो नाङखारलो भन्डा सडोमलो ओहालंत सहिडुने टानेले।"

13 "बनै माचाव टानेले नङलाई, खोराजीन! बनै माचाव टानेले नङलाई, बेठसेडा! कडालेकं जेलागिटं डोसिव सक्तिला येःन टुरोस सोनो सीडोनलं डाखिन के नोराई ङाःडेज़ भङरा क्वाइसिडे ढुलिलं चुङडे यापापलाम वोल्ने यालेव। 14 निया टाने बेलाका डिनलं जे भन्डा के टुरोस सोनो सीडोनलो ओहालंत सहिडुने टानेले। 15 नङ कफर्नहुम! होकाम नङ नम्ट नाने नपान्ज़्याव रो? माङ्क, नङ पतालडे सटेःसिने नले।"

16 "जोये जेरोः ठोयो, होये ङारोः पनि ठोयो। जोये जेलाई चाव माडाच्योव, होये ङालाई पनि चाव माडाङो, होसोनो जोये ङालाई चाव माडाङो, होये ङालाई परिःङनेलाई पनि चाव माङप्सि।"

बहतर जनारं यावोलो

17 नो बहतर जनारं बनै खुसिसं वोल्डे राडे ऐ यावार्रिव, "प्रभु, नमिनङाम भुतरं पनि गे हैगेवारो ठैरंये।"

18 येसुये नोरंलाई हैओडोवरं, "ङा सैतानलाई स्वर्गटाम गोङज़ा उमिल्किका मान्टि ओटेरिज़्याव ङारोःङो। 19 ङा जेलाई गुलरं सोनो बिछीरं सिडुने सक्ति सोनो सुतंरलो स्यान्टै ओसक्तिलाई हारैने अडिकार याडे ङानैच्यो, होसोनो कडि रोःये पनि जेलाई हानि झैने माले। 20 होटानि पनि माचाव आत्मारंलाई गेहारैडुज़्यारं वार्डे माङ्क, बुरु जेमिन स्वर्गटं सर्सिव लिज़्या वार्डे रेङच्यो।"

येसु खुसि ओटाव

21 नो बेलाकंज़ येसु चोखो आत्मालं खुसि ओटाव, होकाम ऐओवारो, "ए बाबु, स्वर्ग सोनो प्रिठीबीला स्यान्टैराई भन्डा घ्योव, ङा नङलाई ढन्याबाड ङायान, कडावार्क, नङ आव रोः बुड्डिसं सोनो बनै सन्डे गुप्त नैडे बाल्खरंलाई सटन्डे नयोवरं। कडावार्क, बाबु नङ आवज़ चाव नङप्सिव।"

22 "ङाबाबुये स्यान्जाति ङालाई सुम्पीडे नैसोङो। ज़ा काङ्का वार्डे बाबुकाम उरु काङ्कायेज़ मासोनो। बाबु काङ्का वार्डे ओज़ाये सोनो, ओज़ाकाम उरु काङ्काये पनि मासोनो, ओज़ाये नोलाई जोलेवकं सटोनोये।"

23 उसिसरं लेवडे न्याःडे येसुये नोरंलाई गुप्तलं हैओडोवरं, "गराङो ची नो मिलङ, जोये जे जेरोःङो आव रोःरं रःङडुज़्याव। 24 कडालेकं ङा जेलाई हैङाडाच्यो, बनै भ्या अगमबक्ताराई सोनो राजाराई जे जो जेरःङज़्या, नो रःङने युङ याडोव, हैनि पनि मारःङरंये, होसोनो जो जे जेठैज़्या हो ठैने युङ याडोव, हैनि पनि माठैरंये।"

चाव सामरीलो ओसात्रो

25 न्याम पैने टोबो मीये येसुलाई परिछ्या डाने ओच्याङसिव, होकाम आव प्रस्न ओडोव, "गुरबा, खर्कज़ मासिने जीबन डैने ङा कडि डाने?"

26 येसुये नोलाई हैओडोव, "न्यामटं कडि सर्सिव ले? नङ कडि नपरिःव?"

27 नोये हैओवारो, "नङ स्यान्टैराई भन्डा घ्योव नपरमेस्वरलाई नङ स्यान्टै नयुङये, नङ स्यान्टै नपोहोनये, स्यान्टै नसक्तिये होसोनो नङ स्यान्टै नबुड्डिये मया डो, होसोनो नछिमेकीलाई नङलाई स्यानावज़ मया डो।"

28 येसुये नोलाई हैओडोव, "नङ ठीकंज़ जबाफ नयोखे। नेटावज़ डो, होकाम नङ बान्चिने नले।"

29 होकाम ओललाई बनै सहि सटन्ने युङ डाडे येसुलाई हैओडोव, "ङाछिमेकी काङ्का खेने?"

30 येसुये जबाफ ओयोव, "टोबो मी यरुसलेमङाम यरीहोडे ओनाज़्याकं नो डाङकुराई याफेलालं उपरिव। नोराई नो मीलाई ओक्वा पिःडे यापोःव, होकाम नोलाई अडंपिल्च्या झैडे राःडे याख्यानोयो। 31 मौकाये टोबो सेवा डोने मी नो येमलाग्यान्टं ओनाज़्याकं नो अडंपिल्च्या मीलाई रःङडे छुटं येम तर्किडे ओनाव। 32 हैजैडेज़ टोबो लेबी पनि नो पोकं ओकेरिकं नोलाई रःङडे छुटं येम तर्किडे ओनाव। 33 हैनि पनि टोबो सामरी नो येम टाडे ओनाज़्याकं नो मी लेवकं ओकेरिव, होकाम नोलाई रःङडे बनै उयुङ ओनाव। 34 होकाम नोलेवकं नाडे ठी सोनो अङ्गुरलो मड्ड ओघाइटं ठिड्याडे ओघाइयालं पट्टिये पोडे ओयोव, होकाम ओगडाहाटं झाडे टोबो होटललं रैडे नोलो ओसयार सुसार ओडोव। 35 ओपराटि नोये चान्डीलो नेबऱ्याङ ढ्याक होटलला साहुलाई याडे ऐ ओडोव, ‘आवलो ओसयार सुसार डो, उरु भ्या खर्च यालागिखे भने ङा वोल्डे ङाराकं ङाफोके।’"

36 येसुये ओपजोयो, "नबिचारलं आव सोमबऱ्याङ मीरंकाम डाङकुराई याफेलालं परिव मीलो उछिमेकी काङ्का ओटाव?"

37 नोये हैओवारो, "नो मीलाई उयुङ नाने मीज़।"

होकाम येसुये नोलाई हैओडोव, "गनानके, नङ पनि हैटाव येःनज़ डो।"

मार्ठा सोनो मरियमनि निज़ीःमकं येसु

38 येसु सोनो उसिसरं यानाज़्याकं येसु टोबो नाङखारलं उपसिव, होकाम मार्ठा उमिन लेव टोबो मेमाये येसुलाई उज़ीःमकं खुल्डे येसुलो ओमान डाडे ओयोव। 39 मरियम उमिनलेव नोलो टोबो ओबैनी लेव। नो येसुलो ओखङ छ्योकं चुङडे येसुलो ओपाङ ओठैज़्याव। 40 हैनि पनि मार्ठा पर्भैने येःन्ट अल्मलिडे उलिज़्याव। नोये येसु लेवकं राडे हैओवारो, "प्रभु, ङाबैनीये पर्भैने येःन्ट ङालाई ङाबाठङ झैडे नैसोङो, नङ वास्टाज़ नम्डोये? नोलाई हैडो, नोये ङालाई येःन्ट गगैसोङोकं।"

41 येसुये नोलाई जबाफ याडे हैओडोव, "मार्ठा, मार्ठा, नङ भ्या रोःलो ओबारेलं चिन्ता नडोये, होसोनो नआतिये। 42 हैनि पनि चाहिज़्याव के टोबो रोःयाज़ ची, नो चाव रोः मरियमये रुजिडे नोयो, नो नोलेवटाम नानसिने माले।"