1 नो बेलाकं नलं आडंङ मीरं लेवरं, जोराई गालीलीराई याबारेलं येसुलाई हैयाडोव, जोरंलाई पिलातसये सैःडे नोराई याझी भोक याचरैज़्याव मारलो उझीसं बराइडे ओयोवरं 2 होकाम येसुये नोरंलाई जबाफ ओयोवरं, "नोराई ऐजैडे डुखं भुक्टैज़्यारं वार्डे, कडा जे आव गालीलीरं उरु स्यान्टै गालीलीरं भन्डा भ्या पापी यालेव वार्डे हैजेवार्ज़्याव? 3 ङा जेलाई हैङाडाच्यो, हैटाव माङ्क, हैनि पनि जे जेपापलाम जियुङ जेमसवोल्खे भने जे स्यान्टै ऐझैडेज़ नास टाने जेले। 4 सै जे कै जेवार्ज़्याव, नो अठार जनारं, नो सिलोआमला ढरहरा ढलिडे यासिव, नोरं यरुसलेमला लेने मीरं भन्डा भ्या पापी यालेव? 5 हो माङ्क, ङा जेलाई हैङाडाच्यो, जे जेपापलाम जियुङ जेमसवोल्खे भने, जे स्यान्टै हैजैडेज़ नास टाने जेले।"

6 होकाम येसुये आव सात्रो हैओवारो "टोबो मीये अङ्गुर उरुपिज़्याव येःङलं टोबो डीलो उबिरुवा रुपिडे ओनैज़्याव। नो सिङटं ओसै मसैया वार्डे नो ओराव, हैनि पनि नोये कडिज़ माडोयोये 7 होकाम नोये नो येःङ रःङने मीलाई हैओडोव, ‘सोङबर्स याटा, ङा आव डीलो उसिङटं ओसै याखिमो, हैनि पनि ङाम्डैये। आवलाई पल्डे ढलै, आवये सोजो येःङ कडाने कप्डे नैने?’

8 होकाम येःङ रःङने मीये येःङ साहुलाई हैओडोव, ‘अँ आवलाई अजं टबर्स लेव यो। ङा आवलो ओखङलं घोडे मल ङाझा, 9 होकाम यासै भने चावज़ याटा, मासैखे भने नङ नोलाई नढलैके।’"

10 टछा नाःसिने डिन छ्याम टोबो यहुडीरं याडुप्सिने ज़ीःमलं येसुये ओपैज़्यावरं। 11 नलं टोबो मेमा लेव, नोलाई अठार बर्सकाम कम्जोर झैने माचाव आत्माये डापो लेव। नोलो ओवाःङ कुमल्याउ लेव, होकाम नो ओल्ज़ सिडा ओमटाडुज़्यावं। 12 येसुये नोलाई ओरोःङो, होकाम खुल्डे हैओडोव, "ए मेमा, नङ नरोगोटाम नसमडुखे।" 13 होकाम येसुये नो मेमालो ओङैःटं उकुइ ओनोयो, होकाम नो होपानाज़ सिडा टाडे परमेस्वरलो ओप्रसन्सा ओडोव।

14 यहुडीरं याडुप्सिने ज़ीःमला सेःर मी उरिसिव, कडावार्क येसुये नाःसिने डिन छ्याम मीलाई ओससोमो, होकाम मीरंलाई नो मीये हैओडोवरं, "येःन डाने के छ डिन ले। हैजैडे छ डिन समं राडे ससम्सिच्यो, नाःसिने डिन छ्याम माःङकं।"

15 प्रभुये जबाफ ओयोव, "ए कैफटिरं! जेलाम काङ्काये नाःसिने डिन छ्याम गोठोलाम उयिःङ सै ओगडाहा पलाडे रीः सोवैँने मालाङो डोरो? 16 अब्राहामलो आव ओज़ा नो अठार बर्स समं सैतानलो ओबन्डनलं लेव, नाःसिने डिन छ्याम आव बन्डनलाम नो छुटिने चाव माङ्क डोरो?" 17 येसुये आव रोः हैओवारो पाना येसुलो उबिरोडिरं स्यान्टै यालाजंये सिने स्यानाव याटाव, येसुये ओडोव अचम्बला येःनटं मीरं बनै यारेङो।

18 होकाम येसुये हैओवारो, "परमेस्वरलो ओराज्य कडि स्याव ले? नोलाई ङा कडिसं ङाडान्जि के? 19 नो सुरसुङलो उढुरलो टोबो ओगेडा स्यानाव ची, नोलाई टोबो मीये लाङडे ओयेःङलं ओवाव, होकाम नो घ्योडे टोबो सिङ ओटाव होकाम नमटा बाज़ाराई नोलो ओखारयालं याज़ीःम याझोयो।"

20 फरि येसुये हैओवारो, "परमेस्वरलो ओराज्यलाई ङा कडिसं ङाडान्जि के? 21 नो खमीर स्यानाव ची, नो टोबो मेमाये पचास माना कनिलं ओबरायो, होकाम नो स्यान्टै कनि खमीर ओटाव।"

22 आबो सहर-सहर सोनो नाङखार-नाङखार यालं नावग्यान पोयोरंग्यान डाडे येसु यरुसलेमडे ओनाव। 23 टोबो मीये येसुलाई ओपजोयो, "प्रभु, कडा उड्डार डैनेरं ठोकोज़ यालिज़्याव डोरो?"

हैनि पनि येसुये नोरंलाई हैओडोवरं, 24 "साङगोरो झलालाम पसिने जोर डाच्यो, कडावार्क, ङा जेलाई हैङाडाच्यो, भ्या मीरं पसिनेपानरं हैनि पनि पसिडुने मालेरं। 25 साहुये झला उरुपो पाना जे पाखाकं च्याङसिडे ऐ वार्डे झलायेमकाम घचं-घचं झैडे किःने जेले, ‘प्रभु, गेलाई झला फैड्यासी,’ होकाम नोये ऐ वार्डे जबाफ याडे हैवार्ने ले, ‘जे काङाम जेराव ङा ङाम्सःरेच्योये।’ 26 होकाम जे हैवार्ने जेले, ‘गे नङाःकंज़ गेज़्योव सोनो गेओँव, होसोनो गेगल्लियालं नङ नपोयोरं।’ 27 होये हैवार्ने ले, ‘ङा जेलाई हैङाडाच्योज़्या, जे काङाम जेराव ङा ङामसन। माचाव येःन डानेरं ङालेवकाम टाडा लेच्यो।’ 28 जे अब्राहाम, इसहाक, याकुब सोनो स्यान्टै अगमबक्तारंलाई परमेस्वरलो ओराज्यलं रःङने जेले, होकाम जे के पाखाडे ख्यासिव टाने जेले, जे घर्ने जेले होसोनो जेहा कैये-कैये घर्नेजेले। 29 मीरं पुर्ब, पोछ्योङ, उतर सोनो डखिन ङाम राडे परमेस्वरलो ओराज्यला भट्यारलं चुङने लेरं। 30 रःङच्यो, झिन्डेङाःर ङाःडे सोनो ङाःडेङारं झिन्डे टाने लेरं।"

31 होबेलाकंज़ कोइ-कोइ फरिसीरं राडे येसुलाई हैयाडोव, "आलाम पुलुडे गनानके, कडालेकं हेरोडये नङलाई सैःने पानसनज़्याव।"

32 येसुये नोरंलाई हैओडोवरं, "नाडे नो स्यालालाई हैडाच्यो, ‘रःङ, आछिम सोनो पराटि ङा भुतरं ङाखेपैरं होसोनो ससंम्ने येःन ङाडो, सोङलाका ङायेःन पुरा टानेले। 33 होटानि पनि आछिम, पराटि सोनो मछ्या पनि ङा बानेज़ ची, कडालेकं यरुसलेमकाम टङडे काङ्का अगमबक्ता पनि सिने माले।’"

34 "यरुसलेम ए यरुसलेम, अगमबक्तारंलाई सैःने, नङ लेवकं परिःङसिवरंलाई नङ लुङ-लुङये नझोमरंये! कैजैडे बामाये उचीङनारंलाई ओकर ज्युङलं डुपोरंये, हैजैडेज़ खा पाला ङा बाल्खरंलाई डुप्ने युङ ङाडोव, हैनि पनि नङ नम्भनये। 35 रःङ नज़ीःम भट्याबाङ्गो टाडेले। ङा नङलाई हैङाडानज़्या, जोकासमं नङ ‘स्यान्टैराई भन्डा घ्योव प्रभुलो उमिन्ट राने के गराङो ची’ हैनमवार, होका समं नङ ङालाई रःङने नमले।"