1 येसुये उसिसरंलाई हैओडोवरं, "टोबो ढनी मीलो ओयेःन डोनेराई टोबो यामुख्या लेव। नोलाई ओसाहुलो ओढन सम्पति ओडैज़्याव वार्ने आरोप लागिडे उलिज़्याव। 2 होकाम साहुये होलाई खुल्डे हैओडोव, ‘ङा नबारेलं जो रोः ङाठैज़्या हो कडि? नङ ङालाई नडोव खर्चलो उहिसाप याङ। नङ आबोकाम सेःर टाने नम्ले।’" 3 "होकाम हो यामुख्याये उयुङलं ऐ ओवारो, ‘आबो ङा कै ङालेके, कडालेकं ङासाहुये ङालाई भन्डारे येःनलाम हाइने पान्सङज़्याव। येःङ किडे ज़्याने ङासा माले, निःडे ज़्याने ङालाजं ची रा। 4 आबो ङा कै ङालेके वार्ने ङासुन्चिडुखे। भन्डारेला येःनलाम ओहाइसोङो छिन्डे पनि मीराई ङालाई कैजैडे याज़ीःमलं खुल्सङरं वार्ने रोः ङा पक्का ङाझैडुखे।’"

5 "होकाम नोये साहुलो ओआसामीरं स्यान्टैलाई उखुलोरं, होकाम ङाःडे रावलाई हैओडोव, ‘नङ साहुलाई खाडंङ फोने उलिज़्याव?’" 6 "होये हैओडोव, ‘सोङ हजार लिटर जैतुनलो ठी।’ होकाम भन्डारेये होलाई हैओडोव, ‘आव नतमुसुकटं, चानो चानो पन्ड्र सय लिटर गसर्के।’" 7 "होकाम नोये छुटंलाई खुल्डे हैओडोव, ‘नरिन खाडंङ उलिज़्याव?’ होये हैओवारो, ‘सोःङसै पचास कोनटंल पिमा।’ नोये होलाई हैओडोव, ‘नतमुसुक लाङ, होकाम सोःङसै कोनटंल गसर्के।’"

8 "होकाम ओसाहुये नो बैमान मुख्यालाई बनै ओसंरोयो कडालेकं नोये बनै चलाक टाडे येःन ओडोव। कडालेकं आव सङसारला मीरं यापुस्ताला मीरासं येःन याडोकं बिस्वासीरं भन्डा भ्या चलाक टारंये।

9 ङा जेलाई हैङाडाच्यो, सङसारलं माचाव येःनटाम जेकमोयो जेढनये चाव येःन डाडे जेनैरं झैच्योरं, होकाम नो ढन ओखेमो छिन्डे खर्कज़ नास माटाने पोलं रैडे जेमान डाडे ओयाच्योरंकं।"

10 "जो ठोकोज़ा रोःटं इमानडार टाये, हो भ्याटं पनि इमानडारज़ टाये, जो बनै आलिज़ा रोःटं बैमान टाये, हो भ्याटं पनि बैमानज़ टाये। 11 हैजैडे जे सङसारला ढनटं इमानडार जेमटाखे भने, जेलाई सड्डेका ढनलो ओजिम्मा काङ्काये याच्योवके ड? 12 जे अर्कालो ओढनटं इमानडार जेमटाखे भने, जेलाई जेढन* काङ्काये याच्योवके ड?"

13 "नेबऱ्याङ साहुलो ओयेःन काङ्का कमारायेज़ माडोडुव, कडालेकं नोये टोबोलाई हेला रःङडे टोबोलाई मया डोवये, होसोनो टोबोलाई बनै ओसेवा डोड्याडे छुटंलाई हेला रोःङो। जे परमेस्वरलो ओसेवा सोनो ढनलो ओसेवा टखेपटं जेमडोडु।"

14 ढनलो लोभी फरिसीराई आवरोः ठैडे येसुलाई यागिल्लोयो। 15 होकाम येसुये नोरंलाई हैओडोवरं, "मीराई याङाःकं सहि मी झैसिनेरं जेज़, हैनि पनि परमेस्वरये जेयुङला लेव रोः ठा सोनोये, कडालेकं जो बस्तलाई मीराई चाव ङप्सिरं, होलाई परमेस्वरये घिनोयोये।"

16 "बप्तिस्मा याने युहन्नालो ओपाला समं मोसालो ओन्याम सोनो अगमबक्ताराई याप्रचार ओटाव। हो बेलाकाम आडे परमेस्वरलो ओराज्यला चाव सोरलो ओप्रचार डोसिवले, होकाम स्यान्टैराई बनै कोसिस डाडे नो राज्यलं नारंये। 17 स्वर्ग सोनो प्रिठीबी सजालोसं मिटिडे नाके हैनि पनि न्यामटं सर्सिव टोबो ओमान्त्रा पनि मिटिने माले।"

18 "जोये ओज्यालाई राःडे छुटंलाई बिह्याँ डोव, नोये ब्यभिचार डोव, होकाम ओरेये ओराःव मेमालाई बिह्याँ डाने मीये पनि ब्यभिचारज़ डोवये।"

19 "टोबो ढनी मी लेव, हो एकसप्ड्याज़ बनै मोङ्गो सोनो नपो निल्ल्याव क्वा क्वाइसिडे बनै ठान्टसं उलिज़्याव। 20 हो मीलो ओझलायेमकं मीराई टोबो ओक्याङ भरि माःज़ गछेले-गछेले टाव लाजरस याडोज़्याव गरिब मीलाई रैडे ख्यानैरंये। 21 लाजरसये नो ढनी मीलो ओटेबल टाम टेःव उकुत्रारं ज़्याडे उफु सवाङने युङ डोवये। होकाम काःर पनि राडे ओमाःलेप्ड्योरंये।"

22 "नो गरिब मी उसिव, होकाम स्वर्गटा कटंवालराई नोलाई लाङडे अब्राहामलो ओछ्योकं यासुचुनो। हो ढनी मी पनि उसिव होकाम होलाई लाङडे यागाडिव। 23 हो मीये नर्गलं बनै डुखं ओडैज़्याव बेलाकं याडे ओबाल्सिव, होकाम टाडाङं अब्राहामसं लाजरसलाई ओरोःङो। 24 होये ऐ वार्डे उकिःव, ‘ए बाबु अब्राहाम, ङालाई डया डोडे लाजरसलाई परिःङड्याङ, होकाम नोये उकुइसै रीःलं छिम्डे ङासेटं चिसो गझैड्याङोकं, कडालेकं ङा आव मेःलो ओलप्कालं बनै घ्योव डुखं ङाडैज़्या।’"

25 "हैनि पनि अब्राहामये हैओडोव, ‘ङाज़ा, चेटैखेने, नङ नजुगु भरि बनै चाव-चाव बस्तरं नडोखे, हो मान्टिज़ लाजरसये बनै डुखं याडोयो। नो आबो आङं सुखंलं लिज़्या, नङ डुखंलं नलिज़्या। 26 आव स्यान्टै रोः बाहेक आकाम नटं नङ लेवटं नाने पान्नेरं टानाडुरंकं होकाम नटाम आटं पनि टाराडुरंकं वार्डे नङ सोनो गेखार्ल बनै घ्योव खाल्टा लिज़्या।’"

27 "नोये हैओवारो, ‘बाबु, हैजैडेज़ ङा नङसं बिन्ती ङाडोज़्या, नङ लाजरसलाई ङाबाबुलो उज़ीःमलं परिःङड्याङ, 28 कडालेकं पाँस जना ङाभाइरं लेरं, होकाम नोये होरंलाई चेतावनी गोयोवरंकं, मानि नोरं पनि एटाव डुखंला पोलं रारंके।’

29 हैनि पनि नोलाई अब्राहामये हैओडोव, ‘होरासं मोसा सोनो अगमबक्ताराई यापोस्टोको लिज़्या। होराई नो ओठैरंकं।’ 30 हैनि पनि नोये हैओवारो, ‘माङ्क, बाबु अब्राहाम, सिवरंलाम टोबो नोराई यालेवकं यानाखेभने नोरं यापापलाम वोल्नेलेरं।’ 31 होये नोलाई हैओडोव, ‘मोसा सोनो अगमबक्ताराई यारोः नोराई माठैरंखे भने, सिवरंलाम कोइ ज्युङडा याटानि पनि नोराई बिस्वास डाने मालेरं।’"