Lucas 11

प्रार्ठनालो ओबारेलं येसुलो उसिछ्या

1 टछा येसु टोबो पोकं चुङडे प्रार्ठना ओडोज़्याव। येसुये प्रार्ठाना डाडे ओखेमो पाना उसिसरंलाम टोबोये येसुलाई हैओडोव, "ए प्रभु, युहन्नाये उसिसरंलाई ओपोयोरं मान्टि गेलाई पनि प्रार्ठाना डाने पैसि।"

2 येसुये नोरंलाई हैओडोवरं, "जे प्रार्ठना जेडाकं ऐ वार्च्यो,

‘ए बाबु,

नमिन चोखो ले वार्डे ओमानिरंकं,

नराज्य ओराकं।

3 गे डिनका गेज़्याने ज़्याव डिनकापटिज़ यासि।

4 गेलाई गेपाप छेमा डाड्यासि,

कडालेकं गे पनि गेबिरोडलं अपराड डानेरंलाई छेमा गेडारंये।

गेलाई परिछ्यालं टालाङसि।’"

5 होकाम येसुये नोरंलाई हैओडोवरं, "ऐटाव मानिच्यो, जेरंकाम टोबोलो टोबो जेनै लिज़्या। नो आढा रिलं नो लेवकं नाडे हैडोव, ‘ङानै, ङालाई सोमबऱ्याङ बरे पैचा याङ। 6 कडालेकं टोबो ङानै टाडाङाम ङालेवकं राडेले, नोलाई याने ङासं ज़्याव कडिज़ माले।’" 7 "नोये ज़ीःमलाम जबाफ याडे हैडोवये, ‘ङालाई टाझिझैसंङ। झला पनि रुःप्सिव ची लिज़्या, होसोनो ङाज़ारं ङासं ऐस्याडेलेरं। ङा सोडे नङलाई कडिज़ ङामयान्डु।’ 8 ङा जेलाई हैङाडाच्यो, ओनै ओटावये नोये सोडे होलाई कडिज़ ओमयोनि पनि, होये निःव का निःव ओलेकं सोडे चाहिव हाडंङ होलाई यानेले।" 9 "ङा जेलाई हैङाडाच्यो, निःच्यो खेने जेलाई यासिनेले। खिमच्योखेने जे डैने जेले। झला घचं-घचं जेझैखे भने जेलागिटं फैसिनेले। 10 कडालेकं स्यान्टैराई जोये निःवये होये डोयोये, जोये खिमोये होये डोयोये, होसोनो जोये झला घचं-घचं झोयोये होलो ओलागिटं फैसिनेले। 11 जेरंकाम काङ्का बाबु ची टाके ड, ओज़ाये बरे उनीःकं लुङ याने, होसोनो ङाः उनीःकं होलो ओपोलं गुल याने? 12 सै बाज़ुरी उनीःकं नोलाई बिछी योव के? 13 जे माचाव जेयुङ लेवरं टाडे पनि जेज़ारंलाई चाव बस्तरं याने जेसनये भने जे स्वर्गटा जेबाबुये ओल्स निःनेरंलाई खाडंङ भ्या झैडे चोखो आत्मा योवरंये।"

येसु सोनो बालजिबुल

14 येसुये टोबो भुत उपुलोयो, नो भुत लाटा लेव। भुत उपुलुव पाना नो लाटा मी ओपाङो, होकाम माहुले मीरं बनै बक्क याटाव। 15 नोरंकाम कोइ-कोइराई हैयावारो, "भुतराई यामुख्या बालजिबुललो ओसक्तिङाम नोये भुतरं पुलैज़्यावरं।" 16 उरुराई येसुलो उपरिछ्या डाने येसुसं स्वर्गटाम टोबो चिन्न यानिःव। 17 येसुये नोराई याबिचार ठा सन्डे हैओडोवरं, "जो डेसला राज्यलं फाटो पसिये हो डेस नास टाये। जो ज़ीःमलं फाटो पसिये नो ज़ीःम नास टाये। 18 सैतानलो पनि ओल्सज़ फाटो याटा भने, नोलो ओराज्य कैजैडे टिकिव के? कडालेकं जे हैजेडाङज़्या, ङा बालजिबुललो ओसक्तिङाम भुतरं ङाखेपैज़्यारं। 19 ङा बालजिबुललो ओसक्तिङाम भुतरं ङापुलैरंखे भने जे जेज़ाराई कडिलो ओसक्तिङाम नोरंलाई पुलैरं? नोराईज़ जेलाई निया डोने लेरं। 20 परमेस्वरलो ओसक्तिये ङा भुतरं ङापुलैरंखे भने, परमेस्वरलो ओराज्य जेलेवकं राडेखेम्डेले।

21 हत्यार भिरिसिडे बल्ल्या मीये उज़ीःमलाई याजोगोयो भने, उज़ीःमला स्यान्टै ओसमानरं पनि जोगिये। 22 नो भन्डा बल्ल्या मी राडे नोसं खप्सिडे नोलाई याहारोयो भने, नो भर उपरिज़्याव नोलो स्यान्टै ओहत्याररं नान्डे लाङोये, होसोनो नोलो ओसमानरं लुटिडे भावये।

23 हैनि पनि जो ङासंका माङ्क, हो ङाबिरोडलं टाये, होसोनो जोये ङासं माडुपो, होये ओडोयोये।"

माचाव आत्मा वोल्डे ओराव

24 "नो माचाव आत्मा मी लेवटाम पुलुडे नाये, होकाम नो सोपो पो यालं आनन्डसं लेने पो खिम्नावये, नोये काङं कडि पोज़ ओम्डैकं, नोये हैवार्ये, ‘ङा पुलुडे ङाराव ङाज़ीःमलंज़ वोल्डे ङाना।’ 25 नो वोल्डे राये, होकाम नोये नो ज़ीःम सिडे सिङ्गारिसिव डोयोये। 26 होकाम नो नाडे ओल भन्डा बनै बलेवरं उरु सात गोटा माचाव आत्मारंलाई ओल्स रोयोरंये, होकाम नोरं उज्युङलं पसिडे नलंज़ बासिरंये, होकाम नो मीलो झिन्डेङा ओडसा ङाःडेङा भन्डा झन बलेये।"

चाव काङ्का

27 येसुये आव रोः ओपाङज़्याकं माहुले मीराई याखार्लाम टोबो मेमाये किःडे हैओवारो, "बनै चाव ची नो मेमा जोये नङलाई गर्भलं ओनैसोनो होसोनो उनुन् ओसोवोइँसोनो।"

28 येसुये हैओवारो, "बुरु नोरं ची बनै रेङोरं, जोये परमेस्वरलो ओपाङ ठैरंये होसोनो हो अनंसारज़ डोरंये।"

मीराई येसुसं चिन्न यानिःव

29 येसुलो ओछ्योयालं बनै भ्या मीरं याडुप्सिकं येसुये हैओवारो, "आव पुस्ता के बलेव बनै माचाव पुस्ता ची। आवये चिन्न खिमोये, आवलाई योनालो उचिन्नकाम उरु कडि चिन्नज़ यासिनेमाले। 30 कडावार्क योना निनबेला मीराई यालागिटं चिन्न ओटाव मान्टि मानवालो ओज़ा पनि आव पुस्तालो ओलागिटं चिन्न टानेले। 31 निया ओटाने बेलाकं आव पुस्ताला मीरासं डखिन डेसला रानीये च्याङसिडे आवरंलाई डोसैनेरं ले, कडालेकं नो प्रिठीबीलो ओछ्योङाम सोलोमनलो उबुड्डिला रोः ठैने ओराव। रःङच्यो, आकं टोबो लिज़्या, नो सोलोमन भन्डा घ्योव लिज़्या। 32 निनबेला मीराई यानिया ओटाकं आव पुस्तालाई च्याङसिडे डोसैने लेरं, कडालेकं नोराई योनाये प्रचार ओडोकं यापापलाम यायुङ यासवोलो, रःङच्यो, आकं टोबो लिज़्या, नो योना भन्डा बनै घ्योव लिज़्या।"

क्याङलो ओभाङ

33 "काङ्काये पनि भाङ खाङडे गुप्तलं मानोयो होसोनो जाये पनि माकपोये, ज़ीःमलं पसिने स्यान्टैराई उज्यालो गरःङरंकं वार्डे डियाटोटं नोयोये। 34 नक्याङलो ओभाङ नमिलंङज़ ची। नमिलंङ चाव याले भने स्यान्टै नक्याङ उज्यालोलं टाये, नो माचाव यालेखे भने के नक्याङ पनि अन्ड्यारोलं टानेले। 35 हैजैडे होस्यार टाङंन, नङसं लिज़्याव उज्यालो अन्ड्यारो टाटाकं। 36 होकाम डस्साज़ जे स्यान्टै जेक्याङ उज्यालोये कप्सिव यालेखे भने, होसोनो कान्डे पनि अन्ड्यारो मालेखे भने, नो स्यान्टै उज्यालो टाये, होमान्टि भाङलो ओसाङये जेलाई उज्यालो याच्योवये।"

येसुये फरिसीरं सोनो न्याम पैनेरंलाई गलत ओठहरोयोरं

37 येसुये पाङडे ओखेमो पाना टोबो फरिसीये येसुलाई काङ ज़्याने उखुलो। येसु ज़ीःमलं पसिडे काङ ज़्याने उचुङो। 38 काङ ज़्याने भन्डा ङाःडे येसुये उकुइ उमहुर्सिव रःङडे नो फरिसी अचम्ब ओटाव। 39 प्रभुये नोलाई हैओडोव, "जे फरिसीरं कचौरा सोनो टाठीलो पाखाङाम के जेसिलये, जे जेयुङलं के लुटिने सोनो माचाव येःनये ब्यालो टाये। 40 मुर्ख मीरं, जोये पाखाटा ओझोयो, होयेज़ उज्युङला पनि ओझोयो माङ्क डोरो? 41 जाला लिज़्याव स्यान्टै अन्नरं डान यो, होकाम नलागिटं स्यान्टै रोः चोखो टाने ले।

42 जे फरिसीरंलाई चाव टाने माले! कडालेकं जे बास्माठि, सम्फु सोनो स्यान्टै जरिबुटिलो डस भा जेयाये, हैनि पनि निया सोनो परमेस्वरलो ओमयालाई वास्ता जेमडाये। उरु येःनलो ओवास्ता जेडोव मान्टि आव येःन पनि जे डाने लेव।"

43 "जे फरिसीरंलाई चाव टाने माले! कडालेकं जे यहुडीरं याडुप्सिने ज़ीःमयालं मुख्या पो सोनो बजारयालं मान डाडे यायाच्योव चाव जेङप्सिये। 44 जेलाई चाव टाने माले! कडालेकं जे नो खाडर स्यानाव जेलिज़्या, नो मारःनये, ठा मासन्डे मीरं नो तर्ट बारंये।"

45 न्याम पैने टोबो मीये येसुलाई हैओडोव, "गुरबा, आव रोः डाडे नङ के गेबिज्यात नझैड्यासिज़्या।"

46 येसुये हैओवारो, "जे न्याम पैने मीरंलाई पनि बनै माचाव टानेले! कडालेकं माघुरडुने गुर मीरंलाई जेसुघुर्रये, हैनि पनि जे के टोबो जेकुइसैये पनि नो गुररंलाई जेमछुये।" 47 "जेलाई चाव टाने माले! कडालेकं जेसाखा पुर्खाराई यासोःयो अगमबक्ताराई याखाडर जे जेझैये। 48 हैजैडे जे जेसाखा जिपुर्खाराई यायेःनलो साची जेलिज़्या, होसोनो नोरासं टोबोनास्याव जेलिज़्या, कडालेकं नोराई अगमबक्तारंलाई यासोःयोरं, होकाम जे नोराई याखाडर जेझैज़्या। 49 हैजैडे स्यान्टै रोः सन्ने परमेस्वरये पनि हैवार्ये, ‘ङा जेलेवकं अगमबक्तारं सोनो ङासाचीरं परिःङनेरंङाले। नोरंकाम कोइरंलाई नोराई सैःने लेरं होसोनो कोइरंलाई सहटैने लेरं।’ 50 सङसार सुरु ओटावकाम स्यान्टै अगमबक्ताराई याझीलो उहिसाप आव पुस्ताये फोने ले। 51 हो, ङा जेलाईज़ हैङाडाच्योज़्या, हाबिललो उझीकाम रैडे, ठान सोनो प्रार्ठना डोने ज़ीःमलं चोखो पोलो ओमान्जला सैःसिव जकरियालो उझी समंलो उहिसाप आव पुस्ताये फोने ले।"

52 "जे न्याम पैने मीरंलाई माचाव टानेले! कडावार्क जे ग्यानलो ओसान्चा रैने के जेरैखे, हैनि पनि जे पनि उज्युङलं जेमपसिये, उरु पसिनेरंलाई पनि पसिव जेमयोरंये।"

53 येसु नलाम उपुलुव पाना, न्याम पैने मीरं सोनो फरिसीराई येसुलो बनै उबिरोड डाडे बनै भ्या रोःलो ओबारेलं येसुलाई यापंजोयो, 54 होसोनो येसुये ओपाङो रोःटं येसुलाई क्योःने डाउँलं लेवरं।