4 यहोवा त तैसेरी शक्ति तोप्पा,

तैसेरे दर्शनेरे तलाशी मां लगातार लग्गोरे राथ।

11 यहोवा ते तैसेरी शक्ति तोप्पा;

तैसेरे दर्शनेरे लेई लगातार तलाश केरा।

6 ज़ांतगर यहोवा मैल्ही सखते त तैसेरी तलाशी मां राथ; ते ज़ांतगर तै नेड़े आहे तैस पुकारा।

4 अक बर मीं यहोवा करां मगोरूए,

तैसेरे लेई कोशिश केरतो रेइलो;

कि अवं ज़िन्दगी भर यहोवारे भवने मां रेईं सेकी

ज़ैस सेइं यहोवारी महिमा पुड़ नज़र लेइतां रेखी,

ते तैसेरे भवने मां ध्यान केरतो रेईं।✝

10 किजोकि तेरे अंगन्न मां अक दिहाड़ी कही हज़ार दिहैड़ी करां जादे रोड़ीए।

दुष्टां केरे डेरन मां राने करां रोड़ूए।

अपने परमेशरेरे भवनेरे दारे पुड़ खड़ू रानू मीं जादे पसंद एइते।

11 तू मीं ज़िन्दगरी बत हरालो;

तेरे नेड़े बड़ो आनन्दे,

ते तेरे देइने हथ्थे मां सुख हमेशारे लेई बनेरू रहते*।

17 धर्मी लोक बिनती केरतन ते यहोवा शुनते,

ते तै तैन सैरी मुसीबतन करां छुटकारो देते।

18 यहोवा ट्लुटोरे दिलां केरे नेड़े रहते,

ज़ैन उमीद नईं तैन्न छुटकारो देते।

5 तुश्शी नरमी सेब्भी मैन्हन पुड़ बांदी भोए, प्रभु नेड़ोए।

13 पन अक वक्त थियो कि तुस परमेशरे करां दूर थिये, पन हुनी यीशु मसीह मां तैसेरे खून सेइं नेड़े आनोरेथ।

6 पक्‍की भलियाई ते करुणा सैरी उमरी

मीं सेइं साथी-साथी राहेली;

ते अवं हमेशा यहोवारे घरे मां रेइलो।

18 अवं तुसन अकैल्‍लो न शैरेलो बल्के अवं तुसन कां एज्जेलो।

57 इश्शो परमेशर यहोवा ज़ेन्च़रे इश्शे दादे-पड़दादन सेइं साथी रहतो थियो, तेन्च़रे असन सेइं साथी भी राए, तै असन न शारे ते न असन करां दूर भोए।

31 फिर भी तीं ज़ै बड़ो महरबानस, तैन केरो नाश न कियो ते न तैना शारे, किजोकि तू बड़ो महरबान ते दया केरनेबालो परमेशरस।

16 हुनी अवं प्राथना केरताईं प्रभु ज़ै शान्ति देनेबालोए, तुसन हर वक्त हर किसमे सेइं शान्ति देतो राए, ते प्रभु लगातार तुसन सेब्भन सेइं साथी भोए।

11 हे ढ्लाव ते बेइनव, खुशी राथ, सिद्ध बनते राथ; एक्‍की होरि हिम्मत देथ; ते मेल मिलापे सेइं राथ, ते प्यार केरनेबालो ते शान्ति देनेबालो परमेशर तुसन साथी भोल्हो।

13 इस सेइं अस ज़ानतम, कि अस परमेशरे मां बनो रहतम, ते परमेशर असन मां, किजोकि तैने असन अपने आत्माई मरां दित्ती।

18 परमेशर केन्चे कधी भी नईं लावरो, पन तैसेरू अक्‍के मट्ठू (यीशु) ज़ैन बाजी परमेशरेरे कुम्मे मां आहे, तैन्ने असन परमेशर हिराव।"

28 मूसो त यहोवाए साथी 40 दिहाड़े ते 40 रात राव; ते तैखन तगर न त तैने रोट्टी खाइ ते न पानी पीवं, ते तैने तैन तेख्तन पुड़ करारेरे वचन मतलब दश हुक्म लिखे।

9 तैट्ठेरे बिमारन बज़्झ़ाथ, ते तैन सेइं ज़ोथ, "परमेशरेरू राज़ नेड़े एवरूए।"

1 किछ वक्तेरां बाद परमेशरेरो आत्मा ओदेदरे मट्ठे अजर्याह पुड़ अव, 2 ते तै आसा राज़े सेइं मुलाकात केरनेरे लेई निस्सो, ते तैस कां मिलतां सेइं ज़ोवं, "हे आसा, ते हे सारे यहूदा ते बिन्यामीन गोट्लां केरे लोकव, मेरी गल शुना, ज़ांतगर तुस यहोवा सेइं साथी राले तांतगर तै भी तुसन सेइं साथी रालो। ते अगर तुस तैसेरी तलाशी मां लगोरे राले, तैखन त तै तुसन सेइं मिलोरो रालो, पन अगर तुस तैस शारेले त तै भी तुसन शारेलो। 3 बड़े सालन तगर इस्राएली लोक सच़्च़े परमेशरेरे आराधना केरनेरे बगैर ते शिखालनेबाले याजकेरे बगैर राए ते तैनेईं परमेशरेरो कानून न मन्नो। 4 पन ज़ैखन-ज़ैखन तैना दुखे मां पेइतां इस्राएलेरे परमेशर यहोवारे पासे फिरे ते तैसेरी तलाश की, तैखन-तैखन तै तैन मैल्हो। 5 तैस मौके न त गानेबाले ते न एजने बाले कोई शान्ति भोती थी, बल्के मुल्खेरे सारे रानेबालन मां बड़ी खलबली भोती थी। 6 कौमी सेइं कौम ते नगरे सेइं नगर पस्त भोइ गाते थिये, किजोकि परमेशर अलग-अलग किसमेरो दुख देइतां तैन तंग केरतो थियो।✝ 7 पन तुस लोक हिम्मत केरा ते तुश्शे हथ ढिल्‍ले न भोन, किजोकि तुश्शे कम्मेरो फल तुसन मैल्हेलो।"✝

8 ज़ैखन आसा राज़े इना वचन ते ओदेद नेबेरी नबूत शुनी, तैखन तैनी हिम्मत केरतां यहूदा ते बिन्यामीनेरे सारे प्रादेशन मरां, ते तैन नगरन मरां भी ज़ैना तैनी एप्रैमेरे पहाड़ी प्रदेशे मरां आनोरे थिये, सैरी भिट्टी चीज़ां दूर की, ते यहोवारी ज़ै वेदी यहोवारे ओसारे सामने मां पेइली थी, तैनी फिरी दुबारां बनाई। 9 तैखन आसा सारे यहूदा ते बिन्यामीन, ते एप्रैम, मनश्शे ते शिमोन गोट्लां केरे ज़ैना लोक तैस सेइं साथी रहते थिये, तैना अकोट्ठे किये, किजोकि तैना एन हेरतां कि तैसेरो परमेशर यहोवा तैस सेइं साथी रहते, इस्राएले मरां बड़े लोक तैस सेइं साथी एवरे थिये। 10 आसा राज़ेरे राज़ केरनेरे परहनोवं सालेरे ट्लेइयोवं महीने मां तैना यरूशलेम नगरे मां अकोट्ठे भोए। 11 तैस्से मौके तैनेईं तै लूटरे माले मरां ज़ै तैनेईं आनोरो थियो, 700 दांत ते 70000 गब्बां, यहोवा कां बलि च़ाढ़ां। 12 तैनेईं करार कियो कि अस अपने पूरे मने ते सैरी जानी सेइं अपने दादे-पड़दादां केरे परमेशर यहोवारी तलाश केरमेले। 13 ते कुन बड्डो, कुन निकड़ो, कुन कौन्श, कुन मड़द, ज़ै कोई इस्राएलेरे परमेशर यहोवारी तलाश न केरे, तै मारो गालो। 14 ते तैनेईं जयजयकार केरतां तुरही ते नरशिंगे बज़ेइतां बड़े उच्‍ची आवाज़ी सेइं यहोवारी कसम खाई। 15 ई कसम खेइतां सारे यहूदी खुशी भोए, किजोकि तैनेईं अपने सारे मने सेइं कसम खाई ते बड़े उमीदी सेइं तैनेईं तैसेरी तलाश की ते तै तैन मैल्हो, ते यहोवा परमेशरे तैन च़ेवरे पासना दुश्मन्न करां आराम दित्तो।

16 आसा राज़ेरी दादी माका अशेरा कां रखनेरे लेई अक भिट्टी मूरती बनाई, तै तैनी राजमातारे पदे करां हटाई। ते आसा तैसेरी मूरती केटतां पिही ते किद्रोन नाले मां शारी। 17 पन इस्राएले मरां मूरती पुज़ारी उच्‍ची ठारां बिछ़ोड़ी न जेई, फिरी भी आसा राज़ेरो दिल ज़िन्दगी भर परमेशरेरे लेई वफादार राव। 18 ज़ैन सोन्नू-चाँदी, ते भांडां तैसेरे बाजे अर्पण कियोरां थियां, ते ज़ैना तैनी एप्पु अर्पण कियोरां थियां, तैना परमेशरेरे भवने मां पुज़ेई दित्तां। 19 यहूदा प्रदेशेरे आसा राज़ेरे राज़े मां पेनतियोवं साले तगर फिरी लड़ाई न भोइ।