1 ओबद्याहेरू दर्शन। एदोम मुल्खेरे बारे मां यहोवा एन ज़ोते: असेईं यहोवारी तरफां ज़ै खबर शुनोरीए, ते अक दूत गैर कौमन मां ज़ोनेरे लेई भेज़ोरोए: 2 यहोवा ज़ोते, "हे एदोम मुल्ख उठ! असां तैस सेइं लड़नेरे लेई उट्ठम!" अवं तीं कौमन मां निकड़ो बनेइलो, ते तू बाकी मुल्खन मां बड़ो घटिया गनो गालो। 3 हे पहाड़ां केरे दरज़न मां बस्सने बाला, हे उच्‍ची ठारन मां रानेबाला, तेरे अभिमाने तीं धोखो दित्तोरोए; तू मने मां ज़ोतस, "कौन मीं ज़मीनी पुड़ ओसालेलो?" 4 पन चाए तू उकाबेरो ज़ेरो उच्‍चो उडरतो भोस, बल्के अम्बरेरे तारन मां अपनो आल्हो बनेइतां किना भोस, फिरी भी अवं तीं तैट्ठां उंढो बिछ़ोड़ेलो, यहोवा एन ज़ोते।

5 अगर च़ोर-डैकू राती तीं कां एज्जन, (हाय तू केन्च़रे मिटाव जेव!) त कुन तैना च़ोरी कियोरी दौलती सेइं रेज़्ज़तां च़ले न गाथे? ते अगर दाछ़ ट्लोड़ने बाले तीं कां एज्जेथे, त कुन तैना कोन्ची-कोन्ची दाछ़ छ़ेडतां न गाथे?✝ 6 पन एसावेरी छ़ुपेवरी धन-दौलत केन्च़रे तोपतां लुट्टी जेई, तैसेरी छ़ुपेवरी दौलत केन्च़रे पतो केरतां कढी जेई!

7 ज़ेत्रे लोकेईं तीं सेइं करार कियोरो थियो, तैन सेभेइं तू हद बैंदी तगर धकेलतां छ़डोरोस। ज़ैना लोक तीं सेइं मिलाप रखतन, तैना लोक तीं धोखो देइतां तीं पुड़ अधिकार रखतन। तैना तेरी रोट्टी खातन, तैना तेरे लेई फंदो भी लातन तैन मां किछ भी समझ़ नईं। 8 कुन अवं तैस मौके एदोमे मरां अक्लमन्द लोकन, ते एसावेरे पहाड़े मरां च़लाकी नाश न केरेलो? यहोवा एन ज़ोते।✝

9 ते हे तेमान नगर, तेरे शूरबीरां केरो मन ट्लुटी गालो, ते एसावेरे पहाड़ां केरे सब सिपाही मेरतां नाश भोइ गालो।

10 हे एसाव, एक्‍की ज़ुलमेरे वजाई सेइं ज़ै तीं अपने ढ्ला* याकूबे पुड़ कियो, तू शरमी सेइं छ़पेलो; ते हमेशारे लेई नाश भोइ गालो। 11 ज़ैस दिहाड़े परदेशी लोकेईं तैसेरी सारी जाईदात थुसोड़तां नेही, ते बखले लोकेईं तैसेरे फाटकन मां घुस्ड़तां यरूशलेमे मां चिट्ठी छ़ेडी, तैस दिहाड़े तू भी तैन मरां अक थियो। 12 पन तेरे लेई एन ठीक न थियूं कि तू अपने ढ्लाएरे दिहाड़न मां, मतलब तैसेरी मुसीबतरे दिहाड़े* तू तकतो राथो, ते यहूदी केरे विनाशेरे दिहाड़न मां तू आनन्द केरेथो, ते तैन केरे दुखेरे दिहाड़े बेड़ि गल्‍लां केरेथो। 13 तेरे लेई एन जाइज़ न थियूं कि तू मेरे लोकां केरे मुसीबतरे दिहाड़े तू तैन केरे नगरेरे फाटकन मां घुसेथो, ते तैन केरे मुसीबतरे दिहाड़े तू तैन तकतो राथो, ते तैसेरी मुसीबतरे दिहाड़े तैन केरि जाईदाती पुड़ हथ मारेथो। 14 तेरे लेई एन जाइज़ न थियूं कि तू च़ुबत्ती मां तैन केरे निशान्ने बालन मारनेरे लेई खड़ो भोथो, ते तैन केरे दुखेरे दिहाड़े तैन हवाले केरेथो।

15 किजोकि सैरी कौमन पुड़ यहोवारे न्यायेरी दिहाड़ी एज्जनी नेड़े आहे। ज़ेन्च़रे तीं कियोरूए, तेन्च़रे तीं सेइं कियूं गालू, तेरो बर्ताव वापस मुड़तां तेरे दोग्गे पुड़ एज्जेलो।

16 ज़ैस तरीके तीं मेरे पवित्र पहाड़े* पुड़ पियूं, तैस्से तरीके सैरी कौमां लगातार पीती रहेली, तैना लोक पीले ते तैना निगले गाले, ते एरी भोइ गैली ज़ेरि कधे नईं भोवरी।

17 पन तैस मौके सिय्योन पहाड़े पुड़ बच़ोरे लोक राले, ते तै पवित्र ठार ठहरेली। ते याकूबेरो घरानो* अपने खास हिस्सेरो मालिक भोल्हो। 18 तैखन याकूबेरो घरानो अग, ते यूसुफेरो घरानो* लौ, ते एसावेरो घरानो भूंसेरो ज़ेरो बनेलो। ते तैन मां अग लेगतां तैस भस्म केरि गाली, ते एसावेरे घराने* मरां कोई न बच़ेलो; किजोकि यहोवाए एन ज़ोवरूए।

19 दक्षिण प्रदेशेरे लोक एसावेरे पहाड़ेरे मालिक भोल्हे, ते बुनीयें मुल्खेरे लोक पलिश्ती केरे अधिकारी भोल्हे; ते यहूदी, एप्रैम ते सामरियारे प्रदेशे अपने हिस्से मां केरि देले, ते बिन्यामीन गिलाद प्रदेशेरो मालिक भोल्हो। 20 इस्राएली लोकां केरे तैस जथे मरां ज़ैना लोक गुलैमी मां गेइतां कनानी लोकन मां सारफत नगरे तगर रहतन, ते यरूशलेम नगरेरे लोकन मरां ज़ैना लोक गुलैमी मां गेइतां सपाराद नगरे मां रहतन, तैना सब दक्षिण प्रदेशेरे नगरां केरे अधिकारी भी गाले। 21 बच़ाने बाले एसावेरे पहाड़ेरो न्याय केरनेरे लेई सिय्योन पहाड़े पुड़ च़ैढ़ी गाले, ते राज़ यहोवारू भोइ गालू।✝