आमोस 9

परमेशरेरो न्याय

1 मीं दर्शने मां परमेशर वेदी पुड़ खड़ो लाव, ते तैनी ज़ोवं, "भवनेरे खम्भेरी केंगनी पुड़ बह ज़ैस सेइं डेवढी हिलन, ते तैना सेभी लोकां केरि क्रोड़ी पुड़ बुछ़ोड़तां टुक्ड़े-टुक्ड़े केर; ते ज़ैना नाश भोने करां बच़न, तैन अवं जंगी मां तलवारी सेइं मारेलो; तैन मरां अक भी नेश्शी न बटेलो, ते ज़ै अपनो आप बच़ालो, तै बेंच़ी न बटेलो।✝9:1 भज. 68:21.

2 "किजोकि चाहे तैना गत घेड़तां अधलोके मां गान, त तैट्ठां अवं हथ अग्रोवं केरतां तैन आनेलो; ते चाहे तैना तैट्ठां अम्बरे मां च़ैढ़ी गान अवं तैन ओसैलतां आनेलो। 3 चाहे तैना कर्मेल पहाड़े पुड़ छ़ेप्पी गान, पन तैट्ठां भी अवं तोपी-तोपी ट्लेइतां आनेलो, ते चाहे तैना समुन्दरेरे थले मेरी नज़री करां दूर भोन तैड़ी भी अवं समुन्दरी सप्पे तैन डसनेरो हुक्म देइलो। 4 चाहे दुश्मन तैन खदेड़तां गुलैमी मां नेन, तैड़ी भी अवं हुक्म देइतां तैन तलवारी सेइं मारेइलो; अवं तैन पुड़ भलियाई केरनेरे लेई नईं, बुराई केरनेरे लेई नज़र रखेलो।"

5 सेना केरे परमेशर यहोवारे हुरने सेइं धरती गेली गातीए, ते तैसेरे सारे रानेबाले मातम केरतन; ते तै सारी धरती मिस्रेरे नील दरियारे ज़ेरि भोतीए, ज़ै बद्धते ते छ़ेल्‍ली मारते ते फिरी घटते। 6 ज़ै अम्बरे मां अपनो मेहल बनाते, ते अम्बरेरी मुनीयाद धेरती पुड़ रखते, ते समुन्दरेरू पानी धेरती पुड़ बगाते, तैसेरू नवं यहोवाए।

7 हे इस्राएली लोकव, "यहोवा एन ज़ोते, कुन तुस मेरे लेई कूश*9:7 कूश एथोपिया मुल्खेरे लोकां केरे ज़ेरे नईं? कुन मीं इस्राएली लोक मिस्र मुल्खे मरां ते पलिश्ती केरे कप्तोरेरां*9:7 कप्तोरेरां कीर मुल्ख नईं केढतां आनोरे? ते अरामी लोकां केरे कीर नगरे मरां केढतां नईं कढोरे? 8 हेरा, परमेशर यहोवारी नज़र इस पापे बाले रियासती पुड़ लगोरीए, ते तैस अवं धेरती पुड़ेरां खतम केरेलो; फिरी भी अवं याकूबेरे खानदानेरे लोकन नाश न केरेलो," यहोवा एन ज़ोते।

9 "मेरे हुक्मे सेइं इस्राएली लोक सब कौमन मां एरे छ़ाने गाले ज़ेन्च़रे अन्न बुडोरने मां छ़ानतन, पन तैसेरो अक भी गलेव ज़मीनी पुड़ न बिछ़ड़ेलो। 10 मेरे लोकन मरां सब पापी ज़ैना ज़ोतन, ‘तै मुसीबत असन पुड़ न एज्जेली, ते न असन घेरेली,’ तैना सब तलवारी सेइं मारे गाले।"

इस्राएलेरी बहाली

11 यहोवा ज़ोते, "तैस मौके अवं दाऊदेरू बिछ़ड़ोरू राज़ दुबारां आबाद केरेलो, ते तैसेरे बाड़ेरे नाके सुधारेलो, ते तैसेरे खण्डर फिरी बनेइलो, ज़ेन्च़रे पेइलू थियूं, तेन्च़रे बनेइलो। 12 ज़ैस सेइं तैना बच़ोरे एदोमी लोक बल्के सब कौमां ज़ैन जो मेरी ज़ोतन, तैन अपने अधिकारे मां नेथ," यहोवा ज़ै एन कम पूरू केरते, तैन्नी एन ज़ोवरूए।✝9:12 प्रेरित. 15:16-18.

13 यहोवा एन भी ज़ोते, "हेरा, एरे दिहाड़े एजने बालेन, कि दांत लानेबालो फसल कटनेबाले, ते दाछ़रो रस कढने बालो बीज़ बेने बाले च़िकेलो, ते पहाड़न पुड़ेरां नंव्वो दाछ़रो रस टपकेलो, ते सारे पहाड़न पुड़ेरां रस बगेलो। 14 अवं अपनि कौम इस्राएली लोकन गुलैमी मरां फिरी वापस आनेलो, ते तैना उज़ड़ोरे नगरन फिरी आबाद केरतां तैन मां फिरी आबाद भोल्हे। तैना दाछ़री बागां लेइतां तैन केरो रस पीले, तैना बागां लाएले ते तैन केरो फल खाएले। 15 अवं इस्राएली लोकन, तैन्ना केरे मुल्खे मां बसेइलो, तैना फिरी कधी अपने धेरती मरां ज़ै मीं तैन दित्तोरी कढे न गाले।" तुश्शो परमेशर यहोवा एन ज़ोते।