टिट्टां केरू दर्शन
1 एक्सां परमेशर यहोवा मीं एन हिरावं: ते मीं कुन हेरू ज़ैखन राज़ेरे हिस्सेरी फसल कटोरी थी ते बाकी फसल एजनेबाली थी तैखन टिट्टां पैदा भोआं। 2 ज़ैखन तैनेईं सब घास खाव, तैखन मीं बिनती की, "परमेशर यहोवा, अपने लोकन माफ़ केर! नईं त याकूब केन्च़रे कायम रेई सकेलो? तै केत्रो कमज़ोरे!" 3 इसेरे बारे मां यहोवा अपने मन बदलो, ते तैस सेइं ज़ोवं, "एरी गल हुनी न भोल्ही।"
अग्गरू दर्शन
4 परमेशर यहोवा मीं अक होरू दर्शन हिरावं: ते मीं कुन हेरू कि परमेशर यहोवा अग्गरे ज़िरिये मुकदमो लड़नेरे लेई ज़ोवं, ते तैस अग्गी सेइं महासागर शुक्की जेव, ते मुल्ख भी भस्म भोने लगोरो थियो। 5 तैखन मीं बिनती की, "हे परमेशर यहोवा, रुकी गा! नईं त याकूब केन्च़रे कायम रेई सकेलो? तै केत्रो कमज़ोरे।" 6 एसेरे बारे मां भी यहोवा मन बदलो; ते परमेशर यहोवाए ज़ोवं, "एरी गल हुनी न भोल्ही।"
सालहरू दर्शन
7 तैनी मीं अक होरू दर्शन हिरावं: मीं हेरू कि प्रभु साहल लेइतां बनेवरी कोन्ची दिवारी पुड़ खड़ोए, ते तैसेरे हथ्थे मां साहले। 8 ते यहोवाए मीं पुछ़ू, "हे आमोस, तीं कुन लेइहोते?" मीं जुवाब दित्तो, "अक साहल।" तैखन परमेशरे ज़ोवं, "हेर, अवं अपने इस्राएली लोकां केरे दरमियान परखनेरे लेई साहल लेइलो। 9 अवं तैन हुनी न छ़डेलो। इसहाकेरे खानदानेरी पूज़ा केरनेरी उच्ची ठारां, ते इस्राएलेरी पवित्र ठारां बेरान भोइ गैली, ते अवं यारोबाम राज़ेरे घराने पुड़ तलवार खिचतां चढ़ाई केरेलो।"
आमोस ते अमस्याह
10 तैखन बेतेलेरे महायाजक अमस्याह, इस्राएलेरे राज़े यारोबामे कां समाद भेज़ो, "आमोसे इस्राएली लोकां केरे दरमियान बगावतरी साज़िश कियोरीए; तैसेरे सारे वचन मुल्ख न झ़ेल्ली सखे। 11 किजोकि आमोस एन ज़ोते, ‘यारोबाम जंगी मां तलवारी सेइं मारो गालो, ते इस्राएल अपने मुल्खे मरां पक्को गुलैमी मां च़लो गालो।’"
12 तैखन अमस्याहे आमोसे सेइं ज़ोवं "हे दर्शी, इट्ठां नश ते यहूदा प्रदेशे मांजो गा, ते तैड़ी रोट्टी खा, ते तैड़ी नबूवत भी केर; 13 पन बेतेले मां फिरी कधी नबूवत न केरां, किजोकि ऐह राज़ेरी पवित्र ठारे ते आराधना केरनेरू नगरे।" 14 आमोसे जुवाब दित्तो अमस्याह सेइं ज़ो, "अवं न त नबी थियो, ते न नेबेरू मट्ठू, अवं गोरू-गब्बां च़ारने बालो थियो, ते गूलरेरे बुट्टां केरो बागबान थियो, 15 ते यहोवा अवं गब्बन पत्पती च़लनेरे करां कुजेइतां मीं हुक्म दित्तो, ‘गा मेरे इस्राएली लोकन सेइं नबूवत केर।’ 16 एल्हेरेलेइ हुनी तू यहोवारू वचन शुन, तू ज़ोतस, ‘इस्राएलेरे खलाफ नबूवत न केर; ते इसहाकेरे घरानेरे खलाफ बार-बार वचन न शुना।’ 17 एल्हेरेलेइ यहोवा एन ज़ोते: ‘तेरी कौन्श नगरे मां वेश्या भोल्ही, ते तेरां मट्ठां-कुइयां जंगी मां तलवारी सेइं मारां गालां, ते तेरी ज़मीन रेस्सी लेइतां बंटी गाली; ते तू एप्पु अशुद्ध मुल्खे मां मेरि गालो, ते इस्राएल अपनि ज़मीनी पुड़ेरां ज़रूर गुलैमी मां च़लो गालो।’"