1 "हाय तैन पुड़ ज़ैना सिय्योने मां सुखे सेइं रहतन, ते तैन पुड़ ज़ैना सामरिया नगरेरे पहाड़न पुड़ बे फिक्र रहतन, ते ज़ैना महान कौमी मां मुशूर आन, ज़ैन कां इस्राएली लोक एइतन! 2 कलने नगरे मां गेइतां हेरा, ते तैट्ठां बड्डे हमात नगरे जो गाथ; फिरी पलिश्ती केरे गत नगरे जो गाथ। कुन तैना इन रियासतन करां रोड़ेन? कुन तैन केरो मुल्ख तुश्शे मुल्खे करां बड्डोए? 3 तुस बुरे दिहाड़न दूर केरथ, ते ज़ुलमेरी गद्दी नेड़े आनतथ।

4 "तुस हाथी दांतां केरे पलंघन पुड़ लेटतथ, ते अपने-अपने बिछ़ाने पुड़ पव खिलैरतां झ़ुलतथ, ते बाड़े मरां गबड़ां ते गाल्ही मरां बछ़ड़ां खातथ। 5 तुस सैन्गी सेइं साथी गीतां ज़ोतथ, ते दाऊदेरे ज़ेरे किसमे-किसमां केरे बाज़े अक्ली सेइं कढतथ; 6 ते कटोरन मां दाछ़रो रास पीतथ, ते रोड़ो-रोड़ो तेल लातथ, पन यूसुफे पुड़ एजनेबाली मुसीबतरो हाल शुन्तां हैरान न भोथ। 7 एल्हेरेलेइ तैना हुनी गुलैमी मां पेइले गाले, ते ज़ैना पव खिलैरतां झ़ुलतन, तैन केरि आयाशी हुनी खतम भोइ गैली।"

8 सेना केरो परमेशर यहोवा एन ज़ोते, (परमेशरे यहोवा अपनि कसम खेइतां ज़ोवं) "ज़ैस पुड़ याकूब घमण्ड केरते, तैस सेइं अवं नफरत ते तैसेरे मेहलन सेइं बैर रखताईं; ते अवं एस नगरे ज़ैन तैस मांए, दुश्मना केरे हथ्थे मां केरेलो।"

9 अगर कोन्ची घरे मां कोई दश मड़द बच़ोरे रान, फिरी भी तैना तेन्च़रे मेरि गाले। 10 ज़ैखन केन्चेरो चाचो, ज़ै तैसेरो फुकने बालो भोए, तैसेरी हेड्डी घरेरां कढनेरे लेई सलेलो, ते ज़ै घरेरे कूने पुड़ बिशोरो भोए तैस सेइं ज़ोलो, "कुन तीं कां कोई होरो भी आहे?" तैखन तै ज़ोलो, "कोई नईं;" फिरी तै ज़ोलो, "च़ुप रा! असेईं यहोवारू नवं न लोड़े घिन्नोरू।"

11 किजोकि यहोवारे हुक्मे सेइं बड्डे घरे मां गत, ते निकड़े घरे मां दर्ज़ भोइ गाली। 12 कुन घोड़े चट्टानी पुड़ दौड़न? कुन तैड़ी दांत लाए ज़ैड़ी तुसेईं न्याय सेइं, ते धार्मिकतारे फल ट्लिठे फले मां बदले? 13 तुस एरी चीज़री वजाई सेइं खुशी केरतथ ज़ै बेकारे; ते ज़ोतथ, "कुन अस अपने कोशिशी सेइं सामर्थी नईं भोवरे?" 14 एल्हेरेलेइ सेना केरो परमेशर यहोवा एन ज़ोते, "हे इस्राएली लोकव, हेरा, अवं तुश्शे खलाफे एरी कौम खड़ी केरेलो, ज़ै हमातेरे वैदी करां देंती अराबारे दरियाए तगर तुसन मुसीबत मां छ़डेली।"