आमोस 1

1 आमोस तकोआ नगरेरो रानेबालो थियो ज़ै पुहालन मरां थियो, तैसेरे इना वचन आन ज़ैना तैनी यहूदा प्रदेशेरे राज़े उज्जियाहेरे ते योआशेरे मट्ठे इस्राएलेरे राज़े यारोबामेरे राज़ केरनेरे वक्ते मां भुंज़ले करां दूई साल पेइले, इस्राएलेरे बारे मां परमेशरे करां दर्शन मैलतां ज़ोए;

2 "यहोवा सिय्योने मरां गरज़ेलो ते यरूशलेमे मरां अपनि आवाज़ शुनालो; तैखन पुहालां केरि चरागां मातम केरेली, ते कर्मेल पहाड़ेरी च़ोट फुकोई गाली।"

इस्राएलेरे पड़ोसी रियासतां केरो न्याय

3 यहोवा एन ज़ोते: "दमिश्क नगरेरे ट्लाई नईं बल्के च़ेवर पापां केरि वजाई सेइं अवं तैस ज़रूर सज़ाह देइलो; किजोकि तैनेईं गिलाद प्रदेश फसल मडनेरे लोंहेरे हथियारन सेइं ढ्लन्च़ो। 4 एल्हेरेलेइ अवं हजाएल राज़ेरे मेहले मां अग लेइलो, ते तैस सेइं बेन्हदद राज़ेरे क़िले भी फुकोइतां भस्म भोइ गाले। 5 अवं दमिश्केरे फाटक ट्लोड़ी छ़डेलो, ते आवेन वैदरे रानेबालन ते बेतएदेन नगरेरे घरन मां रानेबाले राज़ केरनेबालन नष्ट केरतां छ़डेलो; ते अराम मुल्खेरे लोक गुलाम बेनतां कीर प्रदेशे जो गाले, यहोवा एन ज़ोते।"

6 यहोवा एन भी ज़ोते, "गाज़ा नगरेरे ट्लाई नईं बल्के च़ेवर पापां केरि वजाई सेइं अवं तैस ज़रूर सज़ाह देइलो; किजोकि तैनेईं सब लोक नौकर बनेइतां नियोरेन कि तैन्न एदोम मुल्खेरे कब्ज़े मां केरन। 7 एल्हेरेलेइ अवं गाज़ा नगरेरी शहरपनाही मां अग लेइलो, तैस सेइं तैसेरे क़िले भी भस्म भोइ गाले। 8 अवं अश्दोद नगरेरे रानेबालन ते अश्कलोन नगरे पुड़ राज़ केरनेबालन भी नष्ट केरतां छ़डेलो; अवं अपनो हथ एक्रोन नगरेरे खलाफ खड़ो केरेलो, ते बाकी पलिश्ती लोक नष्ट भोइ गाले," परमेशर यहोवा एन ज़ोते।

9 यहोवा एन ज़ोते: "सोर नगरेरे ट्लाई बल्के च़ेवर पापां केरे वजाई सेइं अवं तैस ज़रूर सज़ाह देइलो; किजोकि तैनेईं सब लोक गुलाम बनेइतां एदोमेरे अधीन किये ते ढ्लाएरो ज़ेरो करार याद न कियो। 10 एल्हेरेलेइ अवं सोर नगरेरे शहरपनाही पुड़ अग लेइलो, ते तैस सेइं तैसेरे क़िले भी भस्म भोइ गाले।"✝1:10 मत. 11:21-22;लूक. 10:13-14.

एदोम

11 यहोवा एन ज़ोते: "एदोमेरे ट्लाई बल्के च़ेवर पापां केरे वजाई अवं तैस ज़रूर सज़ाह देइलो; किजोकि तैनी अपनो भियाल इस्राएल तलवार घिन्तां निशानोरोए ते किछ भी दया न की, पन क्रोधे सेइं तैन दलतो राव, ते अपनो क्रोध हमेशारे लेई बनोरो रख्खो। 12 एल्हेरेलेइ अवं तेमान नगरे मां अग लेइलो, ते तैस सेइं बोस्रा नगरेरे क़िले भस्म भोइ गाले।"

अम्मोन

13 यहोवा एन ज़ोते: "अम्मोनेरे ट्लाई बल्के च़ेवर पापां केरे वजाई सेइं अवं तैस ज़रूर सज़ाह देइलो; किजोकि तैनी अपनि हदबन्दी बधानेरे लेई गिलाद मुल्खेरी दोज़ींती कौन्शां केरां पेटां कटोरन। 14 एल्हेरेलेइ अवं रब्बाह नगरेरे शहरपनाही मां अग लेइलो, ते तैस अग्गी सेइं तैसेरे क़िले भी भस्म भोइ गाले। तैस जंगरे दिहाड़न मां ललकार भोल्ही। तै आँधी बल्के बवण्डरेरी दिहाड़ी भोल्ही। 15 ते तैन केरो राज़ो अपने हाकिमन समेत गुलैमी मां च़लो गालो, यहोवा एन ज़ोते।"