1 यहोवा इन भी ज़ोते, "शुना, ज़ैन दिहाड़न मां ते ज़ैस मौके अवं यहूदा प्रदेश ते यरूशलेमेरे रानेबालन गुलैमी मरां वापस आनेलो, 2 तैस मौके सेभी कौमन अकोट्ठे केरतां यहोशापातेरे वैदी मां आनेलो, ते तैड़ी तैन सेइं अपने लोक मतलब अपनो खास हिस्सो इस्राएलेरे बारे मां ज़ै तैनेईं कौमी-कौमी मां तितर-बितर केरतां मेरो मुल्ख बंटोरोए, तैन सेइं मुकदमो लड़ेलो। 3 तैनेईं त मेरे लोकां केरे लेई चिट्ठी छ़डी, ते अक मट्ठू वेश्यारे बदले मां दित्तू, ते अक कुई बेच़तां दाछ़रो रस पियोरोए।
4 "हे सोर, ते सीदोन ते पलिश्तीनेरे सब प्रदेशव, तुसन मीं सेइं कुन कम्मे? कुन तुसां मीं बदलो देले? अगर तुसां मीं बदलो भी देथ, त अवं लूशी तुश्शो दित्तोरो बदलो, तुश्शे दोग्गे पुड़ छ़डेलो। 5 किजोकि तुसेईं मेरू सोन्नू चाँदी नेही छ़डू, ते मेरी रोड़ी ते मन पसंद चीज़ां अपने मन्दरन मां नेइतां रेखोरिन; 6 ते यहूदी ते यरूशलेमेरे रानेबाले यूनानी लोकां केरे हथ्थे एल्हेरेलेइ बेच़ोरेन कि तैना अपने मुल्खे मरां दूर किये गान। 7 एल्हेरेलेइ शुना, अवं तैन तैस ठारी पुड़ेरां, ज़ैठेरे गाने बालां केरे हथ्थे तुसेईं तैना बेच़े, कुजाने बालोईं, ते तुश्शो दित्तोरो बदलो, तुश्शे दोग्गे पुड़ छ़डेलो। 8 अवं तुश्शे मट्ठन कुइयन यहूदी लोकां केरे हथ्थे बेच़ी देइलो, ते तैना तैन अरबेरे बुपारी शबाई लोकां केरे हथ्थे बेच़ी देले, ज़ैना दूर मुल्खेरे रानेबालेन; किजोकि यहोवा एन ज़ोवरूए।"
9 कौमी-कौमी मां ऐह प्रचार केरा, जंगरी तियारी केरा, अपने शूरबीरन उभारा। सारे बहादर सिपाही नेड़े एइतां जंग लड़नेरे लेई गान। 10 अपने-अपने हलरे फाल लुहारे करां झ़ुसेइतां तलवार बनाथ, ते अपना-अपना ड्लातां लुहारे करां झ़ुसेइतां बलम बनाथ; ज़ै कमज़ोरे तै भी ज़ोए, अवं बहादर आईं।
11 हे च़ेवरे पासां केरे कौमां-कौमां केरे लोकव, लूशी एज्जा ते अकोट्ठे भोथ। हे यहोवा, तू भी अपने शूरबीरन तैड़ी आन। 12 कौमां-कौमां केरे लोक उभरतां इड़ी एज्जन, ते यहोशापातेरे वैदी मां गान, किजोकि तैट्ठेरे च़ेवरे पासां केरि सैरी कौमां केरो न्याय केरनेरे लेई बिशेलो।
13 ड्लात च़लाथ, किजोकि फसल पकोरीए। एज्जा, दाछ़ ढ्लेन्च़ा, किजोकि कुण्डां भेरोई जेवरन। रस्सेरां कुण्डां भेरोइतां बेइरोवं डुलने लगोरन, किजोकि तैन केरि बुराई बड़ी बेधी जेवरीए।3:13 मरक. 4:29;प्रका. 14:15-18.
14 फैसलेरे वैदी मां भीड़ी पुड़ भीड़े! किजोकि फैसलेरे वैदी मां यहोवारी न्यायेरी दिहाड़ी नेड़े आहे। 15 दिहाड़ो ते चाँदनी अपनि-अपनि लौ न देले, ते न तारे चमकेले।3:15 मत. 24:29;मरक. 3:24-25;प्रका. 6:12-13;8:12.
16 ते यहोवा सिय्योन पहाड़े पुड़ां गरज़ेलो, यरूशलेम नगरे मरां बड़ी आवाज़ एज्जेली; ते धरती ते अम्बर थरकेले। पन यहोवा अपने लोकां केरे लेई छ़पनेरी ठार ते इस्राएली लोकां केरे लेई क़िलो ठहरेलो।
17 एस तरीके सेइं तुसन पतो लग्गेलो कि यहोवा ज़ै अपने पवित्र सिय्योन पहाड़े पुड़ बास केरतां रहते, तैए इश्शो परमेशरे। ते यरूशलेम पवित्र ठहरेलो, ते परदेशी तैस मां फिरी न गेइ बटेले।
18 ते तैस मौके पहाड़न पुड़ेरां नंव्वो दाछ़रो रस टपकनो शुरू भोल्हो, ते यहूदा प्रदेशेरे सारे नाले पैनी सेइं भेरोई गाले; ते यहोवारे भवने मरां अक पैनेरो नाग निस्सेलो, ज़ैस सेइं शित्तीमेरी वैदी सेगोई गाली।
19 यहूदीन पुड़ ज़ुलम केरनेरे वजाई सेइं; मिस्र ते एदोम मुल्ख उज़ड़तां रेगिस्तान भोइ गाले, किजोकि तैनेईं तैन केरे मुल्खे मां बेकसूर लोक मारोरेन। 20 यहूदा प्रदेश हमेशारे लेई, ते यरूशलेम नगर पीढ़ी-पीढ़ी तगर बनोरो राले। 21 किजोकि तैन केरो खून, ज़ै हेजू तगर मीं पवित्र न थियो ठहरावरो, तैस हुनी पवित्र ठहरेइलो, किजोकि यहोवा सिय्योन पहाड़े मां बास केरते।