1 सिय्योने मां नरशिंगो बज़ाथ; मेरे पवित्र पहाड़े पुड़ लम्मी फुक देथ! मुल्खेरे सब रानेबाले कम्बते खड़े उठन, किजोकि यहोवारी दिहाड़ी एज्जी राहोरीए, बल्के नेड़े पुज़ोरीए। 2 तै दिहाड़ी अंधकार ते ज़ुलमेरी दिहाड़ीए, तै बिदलारारी दिहाड़ीए ते आंधरेरी ज़ेरि फैलतीए। ज़ेन्च़रे झ़ेझ़री धुप पहाड़न पुड़ फैलतीए। तेन्च़रे अक बड़ी ताकतबर कौम एज्जेली। पुराने ज़माने मां एरहु कधे नईं भोवरू, ते न एसेरे बाद फिरी कोन्ची पीढ़ी मां भोल्हु।✝

3 तैस अग्री-अग्री त अग भस्म केरती गाली, ते तैस पत्पती लौ बलती राली। तैस करां अग्गर त ज़मीन अदनेरे बागरी ज़ेरि भोल्ही, पन तैस करां पेत्रीं ज़मीन बेरान भोइ गाली, ते तैस मां किछ न बच़ेलू।

4 तैन केरि शकल घोड़ेरी ज़ेरिए, ते तैना सुवेरारे घोड़ेरे ज़ेरे दौड़तन।✝ 5 तैन केरे दौड़नेरी आवाज़ एरी भोतीए ज़ेरि पहाड़ां केरि च़ोटी पुड़ रथ्थां केरे च़लनेरी, या डैल्‍लां भस्म केरती अग्गरी ज़ेरि, या ज़ेन्च़रे जंगरे लेई तियार बड़े सेनारी आवाज़ भोतीए।✝

6 तैन केरे सामने कौमां-कौमां केरे लोक डेरतां दुखी भोतन, सेभी केरां तुत्तरां ट्लेक्‍की गातन। 7 तैना शूरबीरां केरे ज़ेरे दौड़तन, ते जंगी सिपाही केरे ज़ेरे नगरेरे दिवारन पुड़ च़ड़तन। तैना एपनी-एपनी बत्तां च़लतन, ते कोई एपनी बत्ती न ट्लोड़े। 8 तैना एक्‍की होरि धक्‍को न देन, तैना एपनी-एपनी बत्ती पुड़ च़लतन; हथियारां केरो सामनो केरने सेइं भी तैना अपनि बार न ट्लोड़न। 9 तैना नगरन मां इरां-उरां दौड़तन, ते शहरपनाही पुड़ च़ड़तन; ते तैना घरन मां एन्च़रे गातन ज़ेन्च़रे च़ोर दैरारां बत्तां अन्तर गातन।

10 तैन केरे सामने धरती ते अम्बर थरकते। दिहाड़ो ते चाँदनी भी काली भोइ गातीए, ते तारे भी न चमकन।✝ 11 यहोवा अपने तैस सेनारे सामने अपनि आवाज़ शुनाते, किजोकि तैसेरी सेना बड़ीए; ज़ै अपनु वचन पूरू केरनेबालोए, तैए शक्तिशाली आहे, किजोकि यहोवारी दिहाड़ी बड्डी ते भयानके; तैस कौन बरदाशत केरेलो?✝

12 फिरी भी, यहोवा एन ज़ोते, हेजू भी शुना, बरते सेइं लेरां-देंते अपने पूरे मने सेइं फिरतां मीं कां एज्जा। 13 दुखे मां अपना लिगड़ां नईं, बल्के अपनो मन छ़िन्दतां अपने परमेशर यहोवारे पासे फिरा; किजोकि तै बड़ो अनुग्रह केरनेबालो ते दया केरनेबालोए क्रोध केरने मां च़िर लानेबालो, करुणा केरनेबालो दुख देइतां पसताने बालोए। 14 कुन पतोए कि यहोवा फिरतां पसताए ते एरी बरकत दे ते ज़ैस सेइं तुश्शे परमेशर यहोवा अन्नबलि ते पीनेरी च़ढ़तल दित्ती गाए।

15 हे याजकव, सिय्योने मां नरशिंगो बज़ाथ, बरकतरी दिहाड़ी ठहराथ, महा सभारो प्रचार केरा; 16 लोकन अकोट्ठे केरा। सभाई पवित्र केरा; बुज़ुर्गन कुजाथ; बच्‍चन ते दुद्ध पीते बच्‍चन भी अकोट्ठे केरा। लाड़ो अपने कमरे मरां ते लाड़ी भी अपने कमरे मरां निस्सी एज्जन।

17 याजक ज़ैना यहोवारे सेवकन, तैना वेदरे ते अंगनेरे मझ़ाटे लेरां देइतां प्राथना केरन, "हे यहोवा अपने लोकन पुड़ तरस खा; ते अपने हिस्सेरी बदनामी न भोने दे; ते न कौमी-कौमी मां तैसेरू ऊपाम बने। ते कौमां-कौमां केरे लोक एप्पु मांमेइं किजो ज़ोन, ‘तैन केरो परमेशर कोड़िए?’"

18 तैखन यहोवा अपने मुल्खेरे बारे मां जलन भोइ, ते तैनी अपने लोकन पुड़ तरस खाव। 19 यहोवाए अपने लोकन जुवाब दित्तो, "शुना, अवं अन्न ते नंव्वो दाछ़रो रस ते ताज़ो ज़ैतूनेरो तेल तुसन देने बालोईं, ज़ैस सेइं तुसां रेज़्ज़ी गाले; ते एजने बाले मौके अवं गैर कौमन मां तुश्शी बदनामी न देइलो भोने।

20 "अवं उत्तरेरे पासेरां एवरी टिट्टां केरे सेनाई तुश्शे सामनेरां दूर केरेलो, ते तैस अवं एक्‍की खुशक ते बंझर ज़मीनी मां धकेलतां छ़डेलो। ते तैस सेनारो अक हिस्सो त पूरबेरे समुन्दरेरे पासे ते होरो पेत्रियों हिस्सो पश्चिमेरे समुन्दरेरे पासे भोल्हो; तैन करां मुशक च़लेली, ते तैसेरी शड़ोरी मुशक फैलेली, किजोकि तैनी बड़ां बुरां कम्मां कियोरन।

21 "हे मुल्ख, तू न डर; तू आनन्द केर ते मघन भो, किजोकि यहोवाए बड्डां-बड्डां कम्मां कियोरन! 22 हे मैइदानेरे जानबरव, डरा न, किजोकि जंगले मां चरागा उगेली, ते बुट बेडोने लग्गेले; फैगेरे बुट ते दाछ़री बागां अपनि-अपनि ताकत हिराने लेगोरिन।

23 "हे सिय्योनेरे लोकव, तुस अपने परमेशर यहोवारे वजाई सेइं मघन भोथ, ते आनन्द केरा; किजोकि तुश्शे लेई तै झ़ड़ी, मतलब बरसांतरी पेइली झ़ड़ी खूब देलो; ते पेइली ज़ेरि पेइली-आखरी झ़ड़ी भी खूब देलो।✝

24 "तैखन खलाड़ां अन्ने सेइं खूब भेरोली, ते दाछ़रे रस्सेरां कुण्डां नंव्वे दाछ़रे कुण्डन सेइं ते तेले सेइं खूब भेरोलां। 25 ते ज़ैन सालां केरि पैदावार अर्बे नंव्वेरे टिट्टेइं, ते येलेक, ते हासीले, ते गाजाम नंव्वे टिट्टेइं, मतलब मेरे बड़े सेना ज़ै मीं तुश्शे दरमियान भेज़ी, खेवरी थी, अवं तैसेरो नुकसान तुसन जो भरेलो।

26 "तुसां पेट भेरतां खाएले, ते रज़्ज़ेले, ते अपने परमेशर यहोवारे नंव्वेरी तारीफ़ केरेले, ज़ैनी तुश्शे लेई बड़ां-बड़ां कम्मां कियोरन। ते मेरे लोकां केरि उमीद फिरी कधे न ट्लुटेली। 27 तैखन तुसन पतो लग्गेलो कि अवं इस्राएलेरे मझ़ाटे आईं, ते अवं यहोवा तुश्शो परमेशर आईं ते होरो कोई नईं। मेरे लोकां केरि उमीद फिरी कधे न ट्लुटेली।

28 "एन गल्‍लां केरे बाद अवं सेभी लोकन पुड़ अपनि आत्मा उतरेलो; तुश्शां मट्ठां कुइयां नबूवत केरेलां, ते तुश्शे बुज़ुर्ग सुपना लाहेले, ते तुश्शे जुवान दर्शन हेरेले।✝ 29 तुश्शे दास दैसन पुड़ भी अवं तैन दिहाड़न मां अपनि आत्मा उतरेलो।

30 "ते अवं अम्बरे मां ते धेरती पुड़ चमत्कार, मतलब खून ते अग ते तूएरे खम्भे हरेइलो।✝ 31 यहोवारे तैस बड़े ते खतरनाक दिहाड़ेरे एजने करां पेइले दिहाड़ो आंधरो ते चाँदनी खूनेरी ज़ेरि लाल भोल्ही। 32 तैस वक्ते ज़ै कोई यहोवा कां प्राथना केरेलो, तैस छुटकारो मैल्हेलो; ते यहोवारे वचनेरे मुताबिक सिय्योन पहाड़े पुड़, ते यरूशलेम नगरे मां ज़ैना बच़ोरे लोकन तैन तै कुजालो तैन्न मुक्ति मैल्हेली।"✝