19 ओ प्यारे साथी विश्वासियो! ये गल्ल तुसे जाणी लो; हर एक माणूं सुणने खे आगे, बोलणे रे धीरज वाल़ा और रोषो रे सब्रखोर ओ।

1 सोबटा ज्वाब सुणने ते जल़न ठण्डी ओई,

पर कड़क शब्द सुणी की गुस्सा पड़की जाओआ।

29 जो देरा ते गुस्सा करने वाल़ा ए, से बऊत समजदार ए,

पर जो जल्दबाजी करने वाल़ा ए, से मूर्खता खे बढ़ावा देओआ।

11 मूर्ख माणूं गुस्से दे सारे मनो री गल्ल खोली देओआ,

पर अक्लमंद माणूं आपणे मनो खे रोकोआ ओर शान्त रओआ।

16 जेबे कोई मूर्ख नराज ऊई जाओआ, तेबे से छोड़ आपणी नराजगी दखाई देओआ,

पर समजदार बेज्जतिया खे पुलाई देओआ।

26 जे तुसा खे रोष आई जाओ तो एसा गल्ला रा त्यान राखो कि तुसे रोषो रे पाप नि करो। सूरज डूबणे तक तुसा रा रोष नि रओ 27 और ना ई शैतानो खे मौका देओ।

3 लड़ाई-चगड़े ते पीछे आटणा, मर्दो री महिमा ठईरोई;

पर सारे मूर्ख लोक लड़ने खे त्यार रओए।

10 लड़ाई-चगड़े बस कमण्डो ते ई ओए,

पर जो लोक सलाह मानोए, तिना गे बुद्धि रओई।

12 बैर राखणे ते तो चगड़े ई पैदा ओए,

पर प्यारो साथे गल्ला करने ते सारे पाप टखी जाओए।*

4 प्यार सब्रखोर ए और कृपा करने वाल़ा ए। प्यार जल़न नि करदा, प्यार आपणी तारीफ नि करदा और कमण्ड नि करदा। 5 प्यार अनुचित रीतिया ते नि चलदा, से आपणी पलाई नि चांदा, प्यारो रे चट गुस्सा नि आऊँदा, बुरा नि मानदा।

17 तुसे आपणे मनो रे एकी-दूजे रे खलाफ बैर नि राखणा; आपणे पड़ोसिये खे जरूर समजेया कर, नई तो तेसरे पापो री सजा ताखे मिलणी।* 18 बदला नि लणा, ओर ना ई केसी साथे बैर राखणा, पर एकी-दूजे साथे आपू जेड़ा प्यार राखणा; आऊँ तुसा रा यहोवा ए।*

20 तेबे तिने बोलेया, "जो बुरिया गल्ला माणूंआ रे मुंओ ते निकल़ोईया, सेई तेसखे अशुद्ध बणाओईया। 21 कऊँकि माणूंए रे मनो रे बुरे-बुरे बिचार, व्याभिचार, चोरी, अत्या, 22 परस्त्रीगमन, लोब, दुष्टता, छल, लुचपण, बुरी नजर, निन्दा, कमण्ड और मूर्खता निकल़ोई। 23 यो सब बुरिया गल्ला पीतरो तेई निकल़ोईया और माणूंए खे बुरा बणाओईया।"

12 ओ साथी विश्वासियो, चौकस रओ कि तुसा रे एड़ा बुरा मन और अविश्वासिया रा मन नि ओ, जो जिऊँदे परमेशरो ते दूर टाई की लयी जाओ।

1 यहोवा इस्राएलिया ते बोलोआ, "मूसे बिधानो री कताबा दे लिखी राखेया, जे कोई आपणी लाड़िया खे तलाक देई देयो ओर से तेसगे ते जाई की केसी दूजे मर्दो साथे ब्या करी लो, तो क्या तेसा रा पईला लाड़ा तेसा गे फेर जाणा? क्या से देश बऊत अशुद्ध नि ऊई जाणा? यहोवे री ये बाणी ए कि तुसा गे ओर बी चूठे देवता ए, जेड़े कि तुसे बऊत सारे प्रेमिया साथे एकी वेश्या जेड़े रई चुके रे ओ। क्या तुसा एबे मेरी तरफा खे फिरना?"* 2 ओ इस्राएलियो, "हर पाह्ड़िया री चूँडिया पाँदे बणे दे मन्दरा खे देखो। क्या कोई एड़ी जगा ए जेती तुसे दूजे देवतेया री पूजा करी की आपू खे अशुद्ध नि करी राखेया ओ? तूँ बाटा दे एड़ी बैठी जेड़ा कोई अरबी माणूं शकार करने खे सुनसाण जगा दे घात लगाई की बैठी रा। तैं सारा देश चूठे देवतेया री मूर्तिया री पूजा करी की जेड़े परोसा तोड़ने वाल़ा व्याभिचार ओर दुष्टता साथे अशुद्ध करी ता रा। 3 इजी बजा ते बर्खा रोकी ती ओर पिछली बरसात नि ऊँदी; तेबे बी तेरा माथा वेश्या जेड़ा ए, तूँ शर्मिंदा ऊणा ई नि चाँदी।" 4 क्या तां एबे माखे आका पायी की बोलणा, "ओ मेरे बाओ, तूँ ई मेरे बचपनो रा साथी ए? 5 तुसे ये बी बोलेया, परमेशर सदा मां पाँदे रोष नि रणा। परमेशरो रा गुस्सा सदा बणेया दा नि रणा। यहूदा, तू ये सब बोलोई, पर तू तितणे ई पाप करोई जितणे तू करी सकोई।"

6 एक दिन यहूदा प्रदेशो रे योशिय्याह राजे रे दिना दे यहोवे मांगे ईंयाँ बी बोलेया, "क्या तैं देखी राखेया कि पटकणे वाल़े इस्राएलो रे लोके क्या करी राखेया? तिने सारे ऊच्चे पाह्ड़ा पाँदे ओर सारे अरे डाल़ा निठे जाई-जाई की व्याभिचार करी राखेया।" 7 तेबे मैं सोचेया कि जेबे इस्राएली इना सारे कामा करी चुकोगे, तेबे मेरी तरफा खे फिरी जाणे, पर सेयो नि फिरे ओर तेसरी तोखा देणे वाल़ी बईण यहूदा रे राज्य रे लोके ये सब कुछ देखेया। 8 फेर मैं देखेया, जेबे मैं पटकणे वाल़ी इस्राएलो खे तेसारे व्याभिचार करने रिया बजा ते छाडी की तेसा खे फारगती कागज देईता; तेबे तेसारी तोखा देणे वाल़ी बईण यहूदा नि डरी बल्कि से बी चूठे देवतेया री पूजा करी की आपणियां बईणी जेड़ी व्याभिचार करने वाल़ी ऊईगी। 9 तिना रे बेशर्म व्याभिचारी ऊणे रिया बजा ते देश बी अशुद्ध ऊईगा, तिने पात्थर ओर डाल़ा री पूजा करी की व्याभिचार कित्तेया। 10 इतणा ऊणे ते बाद बी तेसारी तोखा करने वाल़ी बईण यहूदा पूरे मनो ते मेरी तरफा खे नि फिरी, पर कपटो साथे, यहोवे री येई बाणी ए। 11 यहोवे माखे बोलेया, "पटकणे वाल़े इस्राएलो रे लोक, यहूदा रे लोका ते निर्दोष निकल़ी रे। 12 तूँ जाई की इस्राएलो रे उत्तर दिशा दे ये प्रचार कर कि यहोवा ईंयाँ बोलोआ कि ओ इस्राएलो रे पटकणे वाल़े लोको वापस आओ, मां तुसा पाँदे रोष नि करना, कऊँकि यहोवे री ये बाणी ए, आऊँ दया करने वाल़ा ए, मां सदा रोष नि करना। 13 बस आपणे इना पापा खे मानी लो कि तुसे आपणे परमेशर यहोवे ते फिरी गे ओर सारे अरे डाल़ा निठे ओरे-पोरे गये ओर पराये देवतेया री पूजा कित्ती ओर मेरी गल्ला नि मानियां, यहोवे री येई बाणी ए। 14 ओ पटकणे वाल़े लोको मांगे वापस आओ, आऊँ तुसा रा स्वामी ए, यहोवे री येई बाणी ए। जे तुसे वापस आओगे, तो तुसा रे हर शईरो बीचा ते एक ओर हर कुलो बीचा ते दूई खे लई की मां सिय्योनो रे पऊँचाई देणे। 15 मां तुसा खे आपणे मनो साथे मेल खाणे वाल़े गवाल़े देणे, जिना ज्ञान ओर बुद्धिया साथे तुसे चराणे। 16 तिना दिना रे जेबे तुसे एस देशो रे बढ़ोगे ओर फलो-फूलोगे, तेबे तुसा रे लोका फेर एड़ा नि बोलणा कि यहोवे री वाचा रा सन्दूक। यहोवे री ये बी बाणी ए। तिना रा विचार बी तेसरे मनो रे नि आऊणा, ना लोका तिजी रे ना रणे ते फिकर करनी ओर ना तिजी री मरम्मत ऊणी। 17 तेस बखते यरूशलेम शईरो खे यहोवे रा सिंहासन बोलेया जाणा ओर सारिया जातिया मेरे नाओं री खातर तेस यरूशलेम शईरो दे स्तुति करने रिया तँईं कट्ठिया ऊणिया, सेयो फेर आपणे बुरे मनो पाँदे नि चलणे। 18 तिना दिना रे यहूदा रा कराना इस्राएलो रे कराने साथे चलेया करना ओर सेयो दोनो मिली की उत्तर दिशा ते एस देशो रे आऊणे, जो मैं तिना रे बुजुर्गा खे तिना रा इस्सा करी की देई राखेया था।"

19 मैं सोचेया था, कि आऊँ ताखे बाल़क जाणी की किंयाँ मनो खे अच्छा लगणे वाल़ा देश देऊँ, जो सबी जातिया रे देशो ते सुन्दर ए। मैं सोचेया कि तां माखे बाओ बोलणा ओर मांते फेर नि पटकणी।* 20 इदे कोई शक नि ए कि जिंयाँ विश्वासघाती जवाणस आपणे लाड़े ते मन फेरी लओई, तिंयाँ ई ओ इस्राएलो रे कराने, तू मांते फिरी गा रा, यहोवे री येई बाणी ए। 21 बंजर टीलेया रे इस्राएलो रे लोका रे रोणे री ओर गिड़गिड़ाणे री आवाज सुणने लगी री, कऊँकि सेयो टेडी चाल चलदे आई रे ओर आपणे परमेशर यहोवे खे पूली गे रे। 22 यहोवे ए बी बोलेया ओ इस्राएलो रे अविश्वासी लोको, तुसे मांगे वापस आओ, मां तुसा रा पटकणा सुदारी देणा। तेबे लोके ज्वाब दित्तेया, "तुसे लोक बोलोए, देख, आसे तांगे आई रे, कऊँकि तूँ ई म्हारा परमेशर यहोवा ए। 23 पाह्ड़िया पाँदे कित्ती री आसा री मूर्तिया री पूजा ते कोई मताद नि मिली। इस्राएलो खे मताद सिर्फ म्हारे परमेशर यहोवे ते ई आओई। 24 पर म्हारी जवानिया ते ई बाल देवते री पूजा, जो शर्मा रा देवता ए, म्हारे बुजुर्गा री कमाई, मतलब तिना रे पेडा-बाकरिया ओर गायी-बल़द, ओर तिना रे माठे-बेटिया खत्म करीते। 25 इजी री खातर आसे बेज्जत ऊई की लेटी गये दे ए; आसे आपणे आपू खे बेज्जतिया ते टकणे लगी रे, कऊँकि म्हारे बुजुर्ग ओर आसे बी जवानिया ते लई की आजो तक आपणे परमेशर यहोवे रे खलाफ पाप करदे आई रे ओर आसे आपणे परमेशर यहोवे रिया गल्ला नि मानियां।"